Be Ahọluduta Jiwheyẹwhe Tọn Tin to Ahun Towe mẹ Wẹ Ya? — WESẸDOTẸN INTẸNẸT JI TỌN Watchtower Tọn

Wehiatọ Mítọn lẹ Kanse

Be Ahọluduta Jiwheyẹwhe Tọn Tin to Ahun Towe mẹ Wẹ Ya?

Mẹsusu yise to egbehe dọ gblọndo kanbiọ he tin to aga ehe tọn wẹ mọwẹ. Di apajlẹ, otanwe lọ The Catholic Encyclopedia zinnudeji dọmọ: “Ahọluduta Jiwheyẹwhe tọn zẹẹmẹdo . . . aliho he mẹ Jiwheyẹwhe nọ deanana ahun mítọn te.” To paa mẹ, nuhe nukọntọ sinsẹ̀n tọn lẹ nọ plọnmẹ niyẹn. Be Biblu plọnmẹ nugbonugbo dọ Ahọluduta Jiwheyẹwhe tọn tin to ahun gbẹtọ lẹ tọn mẹ wẹ ya?

Mẹdelẹ de linlẹn lọ tọ́n dọ Jesu lọsu wẹ plọnmẹ jẹnukọn dọ Ahọluduta Jiwheyẹwhe tọn tin to ahun gbẹtọ lẹ tọn mẹ. Nugbo wẹ dọ Jesu dọmọ: “Pọ́n, ahọludu Jiwheyẹwhe tọn tin to gblagbla mìtọn mẹ.” (Luku 17:21) Biblu delẹ lilẹ́ wefọ ehe dọmọ: “Ahọluduta Jiwheyẹwhe tọn tin to mì mẹ” kavi to “ohò mìtọn mẹ.” Be aliho he mẹ Biblu enẹlẹ lilẹ́ hogbe Jesu tọn lẹ te sọgbe ya? Be nuhe dọ Jesu te nugbo wẹ yindọ Ahọluduta Jiwheyẹwhe tọn tin to ahun gbẹtọ lẹ tọn mẹ ya?

Tintan whẹ́, lẹnnupọndo nuhe ahun gbẹtọ tọn yin ji. Eyin Biblu dlẹnalọdo ahun yẹhiadonu tọn, e nọ zẹẹmẹdo nuhe gbẹtọ yin to homẹ, asisa linlẹn, jijọ, po numọtolanmẹ mẹtọn po. Linlẹn lọ dọ nuhe yin nujọnu taun taidi Ahọluduta Jiwheyẹwhe tọn nọ nọ̀ ahun gbẹtọ tọn mẹ—di apajlẹ to aliho he mẹ e nọ diọ gbẹtọ lẹ bo nọ hẹn yé pọnte dogọ te—sọgan taidi nuhe dọnmẹdogo, ṣigba be e sọgbe hẹ lẹnpọn dagbe ya?

Biblu dọna mí dọmọ: “[Ahun] yin oklenọ hugan onú lẹpo, podọ e sọ yin awutunọ tupinpẹnnọ: mẹnu wẹ sọgan yọ́n ẹn?” (Jẹlemia 17:9) Jesu lọsu dọmọ: “Sọn homẹ, sọn [ahun] gbẹtọ tọn mẹ, wẹ linlẹn ylankan lẹ nọ tọ́n sọn, galilọ lẹ, ajò, mẹhuhu, ayọdide, nukunkẹn, kanyinylan.” (Malku 7:20-22) Lẹnnupọndo ehe ji: Be e ma yin ahun gbẹtọ tọn wẹ yin asisa suhugan ninọmẹ blawu he mí nọ mọ to aihọn lọ mẹ to egbehe lẹ tọn ya? Eyin mọ wẹ, nawẹ Ahọluduta pipé Jiwheyẹwhe tọn sọgan wá sọn asisa mọnkọtọn mẹ gbọn? Na nugbo tọn, Ahọluduta Jiwheyẹwhe tọn ma sọgan wá sọn ahun gbẹtọ tọn mẹ kẹdẹdile tẹwùn ma sọgan de ovò-sinsẹ́n tọ́n do.—Matiu 7:16.

Awetọ, lẹnnupọndo mẹhe Jesu to hodọna lẹ ji to whenuena e dọ nuhe yin mimọ to Luku 17:21 mẹ lẹ. Wefọ he jẹnukọn hia dọmọ: “Podọ le Falesi lẹ kanbiọ ẹ dọ, whetẹnu wẹ ahọludu Jiwheyẹwhe tọn ja, e gblọnna yé.” (Luku 17:20) Kẹntọ Jesu tọn wẹ Falesi lẹ yin. Jesu dọ dọ yẹnuwatọ enẹlẹ ma na biọ Ahọluduta Jiwheyẹwhe tọn mẹ. (Matiu 23:13) Todin eyin Falesi lẹ ma na biọ Ahọluduta Jiwheyẹwhe tọn mẹ, be Ahọluduta lọ sọgan tin to ahun yetọn mẹ ya? Gbede pọ́n! To whelọnu lo, etẹ dọ wẹ Jesu te?

To whenuena Biblu susu he yè yí sọwhiwhe do basi lẹdogbedevomẹ etọn jlo na lilẹ́ hogbe Jesu tọn enẹlẹ, yé yí hogbe taidi dehe yin mimọ to Biblu Wiwe—Gun-Alada mẹ lẹ zan. Delẹ dọ dọ Ahọluduta lọ tin “to ṣẹnṣẹn mìtọn” kavi “to gblagbla mìtọn mẹ.” Aliho tẹ mẹ wẹ Ahọluduta Jiwheyẹwhe tọn tin to gblagbla omẹ enẹlẹ gọna Falesi lẹ tọn mẹ te to ojlẹ enẹ mẹ? Eyọn, Jesu wẹ omẹ lọ he Jehovah Jiwheyẹwhe de taidi Ahọlu Ahọluduta lọ tọn. Taidi Ahọlu Dide lọ, Jesu tin to gblagbla omẹ enẹlẹ tọn mẹ tlọlọ. E plọnnumẹ gando Ahọluduta Jiwheyẹwhe tọn go bo tlẹ sọ wà azọ́njiawu lẹ, bo gbọnmọ dali do nuhe Ahọluduta enẹ na wadotana hia yé. Enẹwutu, nado dọ hójọhó, Ahọluduta lọ ko tin to gblagbla yetọn mẹ.

E họnwun dọ wefọ Biblu tọn depope ma nọgodona linlẹn lọ dọ Ahọluduta Jiwheyẹwhe tọn tin to ahun gbẹtọ lẹ tọn mẹ. Kakatimọ, gandudu nugbo de wẹ e yin, he na hẹn diọdo mlẹnmlẹn wá aigba ji, kẹdẹdile yẹwhegán lẹ ko dọ dọdai etọn do.—Isaia 9:6, 7; Daniẹli 2:44.