Zinjẹgbonu Oplọn Tọn Yọyọ Atọ̀họ̀-Nuhihọ́ lọ Tọn

LINLINNAMẸWE he hiẹ to hihia ehe wẹ zinjẹgbonu oplọn tọn tintan Atọ̀họ̀-Nuhihọ́ Lọ Tọn. Mí na jlo nado basi zẹẹmẹ delẹ na we gando diọdo he zinjẹgbonu yọyọ ehe bẹhẹn lẹ go.

Zinjẹgbonu oplọn tọn lọ tin na Kunnudetọ Jehovah tọn lẹ po plọnmẹ Biblu he to nukọnyi ganji lẹ po. E na nọ yin didetọn whladopo to osun mẹ bo na nọ bẹ hosọ oplọn tọn ẹnẹ kavi atọ́n hẹn. Tito-to-whinnu he na yin hihodo to dogbapọn hosọ oplọn tọn ehelẹ tọn whenu na nọ sọawuhia to wepa linlinnamẹwe lọ tọn ji. To vogbingbọn mẹ na zinjẹgbonu Atọ̀họ̀-Nuhihọ́ Lọ Tọn he yin gbonutọ lẹ tọn, yẹdide he to wepa zinjẹgbonu oplọn tọn lọ tọn ji ma na nọ diọ to sunmẹsunmẹ, na zinjẹgbonu lọ ma na nọ yin zizedonukọnnamẹ to lizọnyizọn lọ mẹ.

To weda 2tọ linlinnamẹwe lọ tọn ji, hiẹ na mọ bladopọ kleun he na yọ́n-na-yizan de gando lẹndai hosọ oplọn tọn lẹ tọn go, gọna todohukanji hosọ he pò lẹ tọn. Bladopọ ehe na gọalọna anademẹtọ Oplọn Atọ̀họ̀-Nuhihọ́ Lọ Tọn lẹ taun dile yé to awuwle nado hẹn dogbapọn hosọ ehelẹ tọn gọ́ na zẹẹmẹ to opli agun tọn ji.

Hiẹ na doayi e go dọ hosọ oplọn tọn lẹ whè pẹẹde hú dai tọn lẹ. Taidi kọdetọn de, mí na mọ whenu dogọ nado gbadopọnna wefọ tangan lẹ to Oplọn Atọ̀họ̀-Nuhihọ́ Lọ Tọn whenu. Mí to tudohomẹna we nado nọ hia wefọ he yin dide lẹpo to osẹ dopodopo mẹ. Hogbe lọ “hia” nọ jẹnukọnna wefọ he yin dide delẹ, podọ yé dona yin hihia bo yin hodọdeji to Oplọn lọ whenu. Wefọ devo lẹ sọ sọgan yin hihia eyin whenu tin. To hosọ delẹ mẹ, hogbe lọ “yijlẹdo” sọgan jẹnukọnna wefọ delẹ. Na wefọ mọnkọtọn lẹ ma nọ de nuagokun he tin to hukan lọ mẹ lẹ tọ́n tlọlọ wutu, yé ma na nọ saba yin hihia to opli agun tọn ji. Etomọṣo, wefọ he hogbe lọ “yijlẹdo” jẹnukọnna lẹ nọ bẹ nudọnamẹ dagbe devo lẹ hẹn, kavi sọgan nọgodona nuagokun he to yinyin hodọdeji lọ lẹ to aliho de kavi devo mẹ. Mí na tuli we nado nọ hia yé dile hiẹ to awuwlena Oplọn Atọ̀họ̀-Nuhihọ́ Lọ Tọn. Vlavo hiẹ sọgan nọ yihodọ sọn yé mẹ to gblọndo towe lẹ whenu.

Linlin whemẹwhemẹ tọn ma nasọ nọ sọawuhia to Atọ̀họ̀-Nuhihọ́ Lọ Tọn mẹ ba. Bẹsọn 2008, e na nọ sọawuhia to owe-to-wemẹ Lizọnyizọn Ahọluduta Tọn Mítọn tọn de ji podọ to Annuaire mẹ. Ṣigba, dile mí ko dọ do to aga, zinjẹgbonu oplọn tọn lọ na nọ bẹ hosọ devo lẹ hẹn. Dile etlẹ yindọ susu to hosọ ehelẹ mẹ ma na nọ yin dogbapọnna to opli agun tọn de ji, mí to tulina we nado nọ hia yé po sọwhiwhe po. Hosọ enẹlẹ lọsu bẹ núdùdù gbigbọmẹ tọn he nọ wá sọn “afanumẹ nugbonọ, nuyọnẹntọ” lọ dè hẹn.—Mat. 24:45-47.

To popolẹpo mẹ, zinjẹgbonu Atọ̀họ̀-Nuhihọ́ Lọ Tọn ehelẹ, enẹ wẹ oplọn tọn po gbonutọ lẹ tọn po, ma yin linlinnamẹwe voovo awe gba. Awe lẹpo wẹ yin Atọ̀họ̀-Nuhihọ́ Lọ Tọn He To Ahọluduta Jehovah Tọn Lá. Yé tindo hukan dopolọ lẹ to weda 2tọ ji he basi zẹẹmẹ lẹndai Atọ̀họ̀-Nuhihọ́ Lọ Tọn. Awe lẹ na nọ tin to bladopọ whemẹwhemẹ tọn lọ mẹ. Podọ nudọnamẹ na nọ yin didesọn awe lẹ mẹ nado wleawuna hosọ lọ “Be Hiẹ Flin Ya?” he na nọ sọawuhia to zinjẹgbonu oplọn tọn lọ mẹ.

Sọn 1879 gbọ́n, Atọ̀họ̀-Nuhihọ́ Lọ Tọn ma gboawupo gbede nado lá nugbo lẹ gando Ahọluduta Jiwheyẹwhe tọn go, etlẹ yin to ojlẹ awhàn tọn, nuhahun akuẹzinzan tọn po homẹkẹn tọn lẹ po mẹ. Mí to dẹ̀ho dọ, po alọgọ Jehovah tọn po, zinjẹgbonu wunmẹ yọyọ lọ na zindonukọn nado to mọwà. Podọ, odẹ̀ mítọn wẹ yindọ Jehovah ni dona we, hiẹ wehiatọ, dile a to zinjẹgbonu oplọn tọn yọyọ Atọ̀họ̀-Nuhihọ́ Lọ Tọn yizan to aliho dagbe mẹ.