Zinjẹgbonu Oplọn Tọn lọ Janwẹ!
Mí ko sọ basi diọdo delẹ to zinjẹgbonu oplọn tọn Atọ̀họ̀-Nuhihọ́ lọ Tọn mẹ na e nido dọnmẹdogo dogọ bo gọalọna we nado plọn nugbo họakuẹ he tin to Ohó Jehovah tọn mẹ lẹ.—Ps. 1:2; 119:97.
E ko yì owhe ẹnẹ todin he mí to Atọ̀họ̀-Nuhihọ́ lọ Tọn voovo awe zinjẹgbonu, dopo na gbonutọ lẹ podọ awetọ na mílọsu—enẹ wẹ Kunnudetọ Jehovah tọn lẹ po plọnmẹ Biblu mítọn he to nukọnzindo lẹ po.
Gando zinjẹgbonu oplọn tọn go, mẹmẹsunnu de he ko to Jehovah sẹ̀n sọn whenu dindẹn die wlan dọmọ: “Numọtolanmẹ ṣie wẹ yindọ zinjẹgbonu oplọn tọn tintan Atọ̀họ̀-Nuhihọ́ lọ Tọn yọ́n taun bosọ jẹ ahun mẹ. Aliho he mẹ nugbo Biblu tọn titengbe lẹ yin hodọdeji te yinuwado ahun ṣie ji. Mì wanu taun na awuwledainanu jiawu yọyọ ehe.” Mẹmẹsunnu devo wlan dọmọ: “N’nọ nọ̀ jejeji nado yí whenu susu zan nado plọn zinjẹgbonu ehe po Biblu ṣie po to apá.” Mí deji dọ numọtolanmẹ dopolọ wẹ hiẹ lọsu tindo.
Dile hiẹ yọnẹn do, Atọ̀họ̀-Nuhihọ́ lọ Tọn ko to yinyin zinzinjẹgbonu sọn 1879 gbọ́n, yèdọ nuwadotana de he yọnbasi kiki gbọn gbigbọ Jiwheyẹwhe tọn po dona etọn po dali. (Zek. 4:6) To owhe 133 ehelẹ gblamẹ, diọdo susu wẹ ko yin bibasi to wepa linlinnamẹwe lọ tọn ji. To 2012, yẹdide mẹhe to kunnude lẹ tọn de na nọ sọawuhia to wepa zinjẹgbonu oplọn tọn dopodopo ji, ehe na nọ flin mí azọ́n he Jiwheyẹwhe zedo alọmẹ na mí nado dekunnu mlẹnmlẹn gando Ahọluduta Jehovah tọn go. (Owalọ 28:23) To weda 2tọ ji, hiẹ na mọ fọto he ji yẹdide he tin to wepa lọ ji sinai do, gọna nudọnamẹ kleun de gando nuhe to jijọ to yẹdide lọ mẹ po fihe e to jijọ te po go. To owhe lọ gblamẹ, ehe na nọ flinnu mímẹpo dọ omẹ Jehovah tọn lẹ to yẹwheho wẹndagbe lọ tọn dọ “to aigba fininọ lẹpo ji.”—Mat. 24:14.
Diọdo tẹlẹ wẹ sọ yin bibasi to linlinnamẹwe lọ mẹ? Apotin dogbapọn tọn ko yin tẹndiọna wá bẹjẹeji hosọ oplọn tọn dopodopo tọn. Ehe na zinnudo nuagokun he hiẹ dona dín dile a to hosọ lọ hia bosọ to pinplọn ẹn lẹ ji. Ayihaawe ma tin dọ anademẹtọ Oplọn Atọ̀họ̀-Nuhihọ́ lọ Tọn na gbẹ́ nọ yí kanbiọ ehelẹ zan nado gbadopọnna nuhe mí plọn lẹ to vivọnu hosọ lọ tọn. Hiẹ na doayi e go dọ tẹnmẹ he tin to tónu weda lẹ tọn ko yin hinhẹngblo vude dogọ podọ sọha weda po hukan lẹ po tọn ko sọ yin hinhẹn klo dogọ.
Dile e yin zẹẹmẹ basina to zinjẹgbonu osun ehe tọn mẹ do, hosọ yọyọ de he yin “Sọn Onú Hoho Sẹdotẹn Mítọn” ko yin yiyidogọ nado nọ do nukọnyiyi ayidego tọn he wá aimẹ to whenuho egbezangbe tọn Kunnudetọ Jehovah tọn lẹ tọn mẹ hia. Podọ sọn ojlẹ de mẹ jẹ devo mẹ, numimọ gbẹzan tọn lẹ na nọ sọawuhia to hosọ lọ “Yé Ze Yede Jo sọn Ojlo mẹ Wá” glọ. Ehelẹ na nọ dọhodo ayajẹ, pekọ, gọna homẹhunhun he mẹmẹsunnu po mẹmẹyọnnu lẹ po tindo to whenue yé yì sẹ̀n to fie nuhudo wẹnlatọ Ahọluduta lọ tọn lẹ sù te ji.
Na linlinnamẹwe ehe ni gọalọna we nado mọ awuvivi to whenu he a nọ yizan nado plọn Ohó Jiwheyẹwhe tọn mẹ.
Zinjẹgbonutọ lẹ
[Yẹdide to weda 3]
1879
[Yẹdide to weda 3]
1895
[Yẹdide to weda 3]
1931
[Yẹdide to weda 3]
1950
[Yẹdide to weda 3]
1974
[Yẹdide to weda 3]
2008