Be Hiẹ Flin Ya?

Be a duvivi zinjẹgbonu Atọ̀họ̀-Nuhihọ́ Lọ Tọn agọe tọn lẹ hihia tọn ya? Pọ́n eyin a sọgan na gblọndo na kanbiọ he bọdego helẹ:

• Whetẹnu wẹ sunwhlẹvu-pọntọ lẹ dla Jesu pọ́n?

Zinjẹgbonu Biblu tọn de basi zẹẹmẹ dọ: “Magi [sunwhlẹvu-pọntọ] lọ lẹ ma dla Jesu pọ́n to opá kanlin lẹ tọn mẹ to ozán he mẹ e yin jiji te dile lẹngbọhọtọ lẹ wà do gba. Yé wá e dè to osun delẹ godo.” To whenẹnu, Jesu ko yin “ovi” de bo nọ nọ̀ owhé de gbè. (Mat. 2:7-11) Eyin sika po nunina họakuẹ devo lẹ po ko yin nina Jesu to ozán he mẹ e yin jiji te wẹ, be ohẹ̀ awe poun wẹ Malia na ko na to tẹmpli mẹ to azán 40 godo ya?—1/1, weda 31.

• Etẹwẹ mẹsusu sọgan wà nado yidogọna ayajẹ yetọn?

Mẹde sọgan kanse ede dọ, ‘Be yẹn sọgan basi diọdo delẹ bo hẹn gbẹzan ṣie bọawu ya?’ Amy wàmọ. E vò to akuẹzinzan-liho, ṣigba e ma tindo ayajẹ. E doayi e go dọ afọdidona agbasazọ́n de to aihọn ehe mẹ ko dibla hẹn ẹn buali sọn yise mẹ. Enẹwutu, e basi dide nado ze Ahọluduta lọ do otẹn tintan mẹ bo penugo nado sẹ̀n taidi gbehosọnalitọ na ojlẹ de. Amy dọmọ: “N’tindo numọtolanmẹ pekọ tọn de todin he n’ma ko tindo pọ́n gbede” dile n’to afọdona yanwle aihọn tọn lẹ.—15/1, weda 19.

• “Whẹndo” tẹwẹ Jesu to alọdlẹndo to whenuena e dọ hogbe he yin kinkàndai to Matiu 24:34 mẹ lẹ?

Jesu nọ saba yí hogbe lọ “whẹndo” zan to aliho agọjẹdonu tọn mẹ to whenuena e to hodọna mẹylankan lẹ kavi to alọdlẹndo yé. Ṣigba e ma wàmọ to whẹho ehe mẹ dile e to hodọna devi etọn he na yin dide gbọn gbigbọ wiwe dali to madẹnmẹ lẹ gba. Yewlẹ wẹ na penugo hugan nado wá tadona he yin nùdego to Matiu 24:32, 33 mẹ lẹ kọ̀n. Enẹwutu, e taidi dọ hodotọ yiamisisadode etọn lẹ wẹ Jesu to alọdlẹndo, yèdọ to owhe kanweko tintan mẹ podọ to hẹndi egbezangbe hogbe etọn lẹ tọn mẹ.—15/2, weda 23-4.

• To kọndopọ mẹ hẹ Jakobu 3:17, jẹhẹnu tẹlẹ wẹ mí dona nọ dohia?

Nado yin wiwe, mí dona nọ gbẹ́ oylan dai to afọdopolọji. (Gẹn. 39:7-9) Mí sọ dona yin jijọhonọ, bo nọ dapana adánwiwà kavi nuyiwa he nọ zọ́n bọ jijọho ma nọ tin lẹ. Enẹwutu, dopodopo mítọn dona kanse ede dọ: ‘Be yẹn yin yinyọnẹn taidi jijọho-dintọ kavi taidi mẹhe nọ hẹn jijọho he tin to mẹmẹsunnu lẹ ṣẹnṣẹn gble wẹ ya? Be n’nọ saba tindo wiwọ́ kavi gbemanọpọ hẹ mẹdevo lẹ wẹ ya? Be n’nọ yawu gblehomẹ wẹ, kavi n’nọ saba hẹn mẹdevo lẹ gblehomẹ? Kavi be n’nọ yawu jonamẹ bo ma nọ tẹkudeji dọ mẹdevo lẹ dona hodo nujinọtedo ṣie lẹ ya?’—15/3, weda 24-5.

• Naegbọn Jesu do hẹnazọ̀ngbọna dawe nukuntọ́nnọ de vudevude? (Malku 8:22-26)

Biblu ma na whẹwhinwhẹ́n de taun gba. Ṣigba, e yọnbasi dọ to nujijọ ehe mẹ, Jesu hẹnazọ̀ngbọna dawe nukuntọ́nnọ lọ vudevude nado sọgan na ẹn whenu nado diọada sọgbe hẹ ninọmẹ yọyọ etọn to whenuena e na jẹ numọ ji. Ehe do mẹtọnhopọn owanyi tọn he Jesu tindo na dawe nukuntọ́nnọ lọ hia.—1/4, weda 26.