Jesu Klisti—Mẹdehlan Daho Hugan Lọ
“E dè wẹ yẹn sọn, ewọ wẹ sọ do mi hlan.”—JOH. 7:29.
1, 2. Etẹwẹ hogbe lọ “mẹdehlan” zẹẹmẹdo, podọ mẹnu wẹ sọgan yin yiylọdọ Mẹdehlan daho hugan lọ?
ETẸWẸ nọ wá ayiha towe mẹ eyin a sè hogbe lọ “mẹdehlan”? Mẹdelẹ nọ lẹnnu yì mẹdehlan Mẹylọhodotọklisti tọn lẹ ji, he susu yetọn nọ doalọ to whẹho tonudidọ po ajọwiwa otò he mẹ yé to devizọnwa te lẹ tọn po mẹ. Ṣigba, taidi Kunnudetọ Jehovah tọn de, vlavo hogbe ehe nọ hẹn we flin mẹdehlan he Hagbẹ Anademẹtọ lọ nọ dohlan nado yì lá wẹndagbe lọ to otò voovo lẹ mẹ lẹdo aihọn pé. (Mat. 24:14) Mẹdehlan ehelẹ nọ yí whenu po huhlọn yetọn po do sanvọ́ nado sọgan wà azọ́n he jẹna pipà lọ he yin alọgigọna gbẹtọ lẹ nado dọnsẹpọ Jehovah Jiwheyẹwhe bo duvivi haṣinṣan vonọtaun de tọn hẹ ẹ.—Jak. 4:8.
2 Hogbe lọ “mẹdehlan” ma sọawuhia to Biblu Wiwe Lọ Gun Alada mẹ gba. Ṣigba, hogbe Glẹki tọn he yin lilẹdo “evangelisti” kavi wẹndagbe-jlatọ to Efesunu lẹ 4:11 mẹ sọ sọgan yin lilẹdogbedevomẹ dọ “mẹdehlan.” Jehovah wẹ Wẹndagbe-Jlatọ daho hugan lọ, ṣogan e ma sọgan yin yiylọdọ Mẹdehlan daho hugan lọ gba, na e ma ko yin didohlan gbọn mẹde dali pọ́n gbede. Ṣigba, Jesu Klisti dọ gando Otọ́ olọn mẹ tọn etọn go dọmọ: “E dè wẹ yẹn sọn, ewọ wẹ sọ do mi hlan.” (Joh. 7:29) Nado do owanyi daho he e tindo na gbẹtọvi lẹ hia, Jehovah do Ovi detọ́n dopo akàn etọn hlan aigba ji. (Joh. 3:16) Jesu sọgan yin yiylọdọ Mẹdehlan daho hugan lọ, yèdọ Mẹdehlan dagbe hugan lọ, na dopo to whẹwhinwhẹ́n he wutu e yin didohlan aigba ji lẹ mẹ wẹ nado “dekunnu hlan nugbo lọ.” (Joh. 18:37) E tindo kọdetọn dagbe to wẹndagbe Ahọluduta lọ tọn lilá mẹ mlẹnmlẹn, podọ mí gbẹ́ pò to alemọyi sọn sinsẹ̀nzọn etọn mẹ kakajẹ din. Di apajlẹ, mí sọgan yí aliho mẹpinplọn tọn etọn lẹ zan to lizọnyizọn mítọn mẹ, vlavo mí yin azọ́ndena taidi mẹdehlan kavi lala.
3. Kanbiọ tẹlẹ wẹ mí na gbadopọnna?
3 Azọngban Jesu tọn taidi lilatọ Ahọluduta lọ tọn fọ́n kanbiọ delẹ dote taidi: Numimọ tẹwẹ Jesu tindo to aigba ji? Naegbọn mẹpinplọn etọn do tindo kọdetọn dagbe? Podọ etẹwẹ hẹn lizọnyizọn etọn de sinsẹ́n tọ́n?
Gbigbọ Mẹdezejo Tọn to Ninọmẹ Yọyọ lẹ Mẹ
4-6. Etẹwẹ yin delẹ to diọdo he Jesu pehẹ to whenuena e yin didohlan aigba ji lẹ mẹ?
4 Mẹdehlan egbezangbe tọn lẹ po Klistiani delẹ he sẹtẹn yì fie nuhudo wẹnlatọ Ahọluduta lọ tọn sù hugan te lẹ po sọgan tin to dandannu glọ nado diọada sọgbe hẹ ninọmẹ gbẹninọ tọn he yìdo hú dehe yé ko jẹakọ hẹ lẹ. Ṣigba, mí ma tlẹ sọgan yọ́n vogbingbọn he tin to ninọmẹ he mẹ Jesu nọgbẹ̀ te to aigba ji po ninọmẹ he mẹ e nọ̀ to olọn mẹ lẹ po ṣẹnṣẹn, fie e nọpọ́ hẹ Otọ́ etọn te to angẹli he nọ sẹ̀n Jehovah po mẹwhinwhàn dagbe po lẹ ṣẹnṣẹn. (Job 38:7) Lehe e na ko gbọnvo do sọ nado tin to gbẹtọvi ylandonọ lẹ ṣẹnṣẹn to aihọn gblezọn de mẹ! (Malku 7:20-23) E tlẹ sọ biọ dọ Jesu ni doakọnna agbàwhinwhlẹn he tin to devi etọn he sẹpọ ẹ hugan lẹ ṣẹnṣẹn. (Luku 20:46; 22:24) Na nugbo tọn, e didẹ ninọmẹ he e pehẹ to aigba ji lẹ dopodopo to aliho pipé mẹ.
5 Jesu ma jẹ ogbè gbẹtọvi tọn de dó ji to azọ́njiawu-liho poun gba; kakatimọ, e dona jẹ ogbè plọn ji sọn ovu gbọ́n. Diọdo nankọ die na ewọ he ko nọ deanana angẹli lẹ to olọn mẹ dai! To aigba ji, Jesu yí e whè gbau dopo to “ogbè gbẹtọ tọn” lẹ mẹ zan. Ehe gbọnvo mlẹnmlẹn na ‘ogbè angẹli lẹ tọn.’ (1 Kọl. 13:1) Etomọṣo, na nuhe dù ohó ojọmiọn tọn lẹ yiyizan, gbẹtọvi de ma ko tin pọ́n gbede he dọho taidi Jesu.—Luku 4:22.
6 Lẹnnupọndo diọdo titengbe devo lẹ ji, he Ovi Jiwheyẹwhe tọn dona doakọnna to whenuena e wá aigba ji. Dile etlẹ yindọ Jesu ma dugu ylando tọn sọn Adam si, E lẹzun gbẹtọvi de, taidi mẹhe na wá yin “mẹmẹsunnu,” kavi hodotọ yiamisisadode etọn lẹ. (Hia Heblu lẹ 2:17, 18.) To ozán godo tọn he e yizan to aigba ji mẹ, Jesu sọgan ko biọ to Otọ́ olọn mẹ tọn etọn si nado do hugan “awhànpa angẹli lẹ tọn wiawe” hlan ẹn, ṣigba e ma wàmọ. Etomọṣo, yí nukun homẹ tọn do pọ́n angẹli susugege he tin to anademẹ ewọ Mikaẹli Angẹligán lọ tọn glọ dai to olọn mẹ! (Mat. 26:53; Juda 9) Nugbo wẹ dọ Jesu wà azọ́njiawu lẹ; ṣogan, nuhe e wà to whenuena e tin to aigba ji lẹ ma tlẹ sọtẹ́n eyin mí yí yé jlẹdo nuhe e na ko penugo nado wà to olọn mẹ lẹ go.
7. Nukun tẹwẹ Ju lẹ yí do pọ́n Osẹ́n lọ?
7 To whenuena Jesu gbẹ́ pò to olọn mẹ taidi “Ohó lọ,” e sọgan ko yindọ ewọ wẹ yin yiyizan taidi Hoyidọtọ Jiwheyẹwhe tọn he deanana Islaelivi lẹ gbọn zungbo mẹ lọ. (Joh. 1:1; Eks. 23:20-23) Ṣigba, Islaelivi lẹ “mọ osẹ́n yí gbọn lizọnyiyi angẹli lẹ tọn dali, bo ma yìn in.” (Owalọ 7:53; Heb. 2:2, 3) Na nugbo tọn, sinsẹ̀ngán Ju owhe kanweko tintan whenu tọn lẹ gboawupo nado tunwun lẹndai Osẹ́n lọ tọn go. Di apajlẹ, lẹnnupọndo osẹ́n Gbọjẹzan tọn ji. (Hia Malku 3:4-6.) Wekantọ lẹ po Falesi lẹ po “gbẹ́ onú pẹnzin osẹ́n tọn dai, [enẹ wẹ] whẹdida, lẹblanu, po yise po.” (Mat. 23:23) Etomọṣo, Jesu ma gbọjọ bo gọ̀n nugbo lọ dọ gba.
8. Naegbọn Jesu do sọgan gọalọna mí?
8 Jesu tindo gbigbọ mẹdezejo tọn. E yin whinwhàn gbọn owanyi he e tindo na gbẹtọvi lẹ dali, bo nọ jlo vẹkuvẹku nado gọalọna yé. E ma hẹn gbigbọ wẹndagbe-jijlá tọn bu pọ́n gbede. Podọ na e yin nugbonọ na Jehovah to whenuena e tin to aigba ji wutu, Jesu “lẹzun mẹhe dà whlẹngán madopodo dai hlan yé he yí ì sè lẹpo.” Humọ, “le ewlọsu ko jiya, bọ yè whlé e pọ́n, e sọgan gọalọna yé [taidi míwlẹ] he yè to whiwhlepọn lẹ.”—Heb. 2:18; 5:8, 9.
E Yin Pinplọn Ganji Nado Yin Mẹplọntọ
9, 10. Azọ́nplọnmẹ nankọ wẹ Jesu mọyi whẹpo do yin didohlan aigba ji?
9 Whẹpo Klistiani egbezangbe tọn lẹ nọ yin didohlan taidi mẹdehlan, Hagbẹ Anademẹtọ lọ nọ basi tito azọ́nplọnmẹ de tọn na yé. Be Jesu Klisti mọ azọ́nplọnmẹ de yí ya? Mọwẹ, ṣigba e ma yì wehọmẹ labbi lẹ tọn whẹpo do yin yiyiamisisadode taidi Mẹssia lọ gba; mọjanwẹ e masọ yin pinplọn gbọn sinsẹ̀ngán nukundeji delẹ dali do niyẹn. (Joh. 7:15; yijlẹdo Owalọ lẹ 22:3 go.) To whelọnu lo, naegbọn Jesu do pegan sọmọ nado plọnmẹ?
10 Mahopọnna nudepope he Jesu sọgan ko plọn sọn onọ̀ etọn, Malia, po otọ́ mẹgopọntọ etọn, Josẹfu po dè, Asisa daho hugan lọ mẹ wẹ e mọ azọ́nplọnmẹ titengbe hugan lọ yí sọn nado hẹn lizọnyizọn etọn di. Gando ehe go, Jesu dọmọ: “Yẹn ma dọho sọn dee dè gba; ṣigba Otọ́ he do mi hlan, ewọ ko na gbedide de mi, nuhe yẹn na nọ dọ, po ohó he yẹn na nọ gblọn po.” (Joh. 12:49) Doayi e go dọ Ovi lọ mọ anademẹ gigọ́ yí gando nuhe e na plọnmẹ go. Whẹpo Jesu do wá aigba ji, ayihaawe ma tin dọ e na ko yí whenu susu zan nado dotoaina anademẹ Otọ́ etọn tọn lẹ. Azọ́nplọnmẹ devo tẹwẹ e sọgan ko mọyi he na yọ́n humọ?
11. Obá tẹ mẹ wẹ Jesu do pọndohlan Otọ́ etọn tọn gando gbẹtọvi lẹ go hia jẹ?
11 Sọn whenue e yin didá, Ovi lọ tindo haṣinṣan pẹkipẹki de hẹ Otọ́ etọn. Whẹpo Jesu do wá aigba ji, e nọ doayi aliho he mẹ Jehovah nọ yinuwa hẹ gbẹtọvi lẹ te go, bo wá yọ́n pọndohlan Jiwheyẹwhe tọn gando yé go. Ovi lọ de owanyi Jiwheyẹwhe tọn na gbẹtọvi lẹ hia sọmọ bọ, taidi apajlẹ pipé nuyọnẹn tọn, ewọ sọgan dọmọ: “Homẹhunhun ṣie . . . tin to ovi gbẹtọ tọn lẹ dè.”—Howh. 8:22, 31.
12, 13. (a) Etẹwẹ Jesu plọn dile e to ayido nuyiwa Otọ́ etọn tọn hẹ Islaelivi lẹ go? (b) Nawẹ Jesu yí azọ́nplọnmẹ he e mọyi lọ zan gbọn?
12 Adà devo to azọ́nplọnmẹ he Ovi lọ mọyi mẹ wẹ nado nọ doayi lehe Otọ́ etọn nọ didẹ ninọmẹ sinsinyẹn lẹ gbọn go. Di apajlẹ, lẹnnupọndo aliho he mẹ Jehovah yinuwa hẹ Islaelivi tolivẹtọ lẹ te ji. Nẹhemia 9:28 dọmọ: “[To whenuena] yé tindo gbọjẹ yé sọ wà oylan to nukọn towe: enẹwutu wẹ hiẹ jo yé dai do alọ kẹntọ yetọn lẹ tọn mẹ, sọmọ bọ yewlẹ tindo ahọludu to yé ji: ganṣo whenuena yé lẹgọ, bo dawhá hlan we, hiẹ sè sọn olọn mẹ; whlasusu wẹ hiẹ whlẹn yé kẹdẹdi lẹblanu towe lẹ.” Dile Jesu to azọ́nwa hẹ Jehovah bosọ to ayido nuyiwa etọn lẹ go, e wleawuna awuvẹmẹ dopolọ na mẹhe e dọyẹwheho na lẹ.—Joh. 5:19.
13 Jesu yí azọ́nplọnmẹ ehe zan bo yinuwa hẹ devi etọn lẹ po awuvẹmẹ po. To ozán he jẹnukọnna okú etọn mẹ, apọsteli etọn he e ko do owanyi hia sọmọ lẹpo wẹ “jo e dai, bo họnyi.” (Mat. 26:56; Joh. 13:1) Apọsteli Pita tlẹ mọ́n Klisti whla atọ̀n! Etomọṣo, Jesu gbẹ́ hùn dotẹnmẹ dotena apọsteli etọn lẹ nado lẹgọ do e dè. E dọna Pita dọmọ: “Yẹn basi ovẹvivẹ na we, dọ yise towe fẹ́ blo: hiẹ nisọ basi whenuena hiẹ ko lẹ́ hadopo, hẹn mẹmẹsunnu towe lẹ lodo.” (Luku 22:32) Islaeli gbigbọmẹ tọn ko yin didoai gligli do “apọsteli lẹ, po yẹwhegán lẹ po” ji, podọ yinkọ apọsteli nugbonọ 12 Lẹngbọvu lọ, Jesu Klisti tọn lẹ yin winwlan do zannu dodonu adó Jelusalẹm Yọyọ lọ tọn lẹ go. Kakajẹ egbé, Klistiani yiamisisadode lẹ po gbẹdohẹmẹtọ klandowiwe yetọn lẹ po, yèdọ “lẹngbọ devo” lẹ, to kọdetọn dagbe tindo taidi titobasinanu de he nọ dọyẹwheho Ahọluduta lọ tọn to alọ huhlọnnọ Jiwheyẹwhe tọn po anademẹ Ovi yiwanna etọn tọn po glọ.—Efe. 2:20; Joh. 10:16; Osọhia 21:14.
Lehe Jesu Plọnmẹ Gbọn
14, 15. Aliho tẹlẹ mẹ wẹ mẹpinplọn Jesu tọn gbọnvo na wekantọ lẹ po Falesi lẹ po tọn te?
14 Nawẹ Jesu yí azọ́nplọnmẹ etọn zan nado plọnnu hodotọ etọn lẹ gbọn? Eyin mí yí nuplọnmẹ Jesu tọn jlẹdo sinsẹ̀ngán Ju lẹ tọn go, e nọ họnwun hezeheze dọ aliho mẹpinplọn Jesu tọn wẹ yọ́n hugan. Wekantọ lẹ po Falesi lẹ po ‘hẹn osẹ́n Jiwheyẹwhe tọn zun ovọ́ na otanhoho yetọn tọn wutu.’ To vogbingbọn mẹ, Jesu ma nọ dọho sọn linlẹn edetiti tọn mẹ; e nọ tẹdo ohó kavi wẹndomẹ Jiwheyẹwhe tọn go. (Mat. 15:6; Joh. 14:10) Nuhe mílọsu dona nọ wà niyẹn.
15 Onú devo sọ hẹn Jesu gbọnvo pete na sinsẹ̀ngán lẹ. E dọ gando wekantọ lẹ po Falesi lẹ po go dọmọ: “Onú depope yé degbena mì, ehelẹ mì ni nọ tùnayi e go, bosọ nọ basi; ṣigba mì basi di azọ́n yetọn blo: na yé nọ dọ, yé ma nọ wà gba.” (Mat. 23:3) Jesu nọ yí nuhe e plọnmẹ lẹ do yizan mẹ. Mì gbọ mí ni pọ́n apajlẹ dopo he do enẹ hia.
16. Naegbọn hiẹ sọgan dọ dọ Jesu nọgbẹ̀ sọgbe hẹ nuhe e dọ to Matiu 6:19-21 mẹ?
16 Jesu dotuhomẹna devi etọn lẹ nado “bẹ adọkunnu pli . . . to olọn mẹ.” (Hia Matiu 6:19-21.) Be Jesu lọsu nọgbẹ̀ sọgbe hẹ tudohomẹnamẹ enẹ ya? Mọwẹ, na e penugo nado dọ madoadúdẹji gando ede go dọmọ: “Wọtupọẹ lẹ tindo odò, ohẹ̀ oji aga tọn lẹ sọ do adọ́, ṣigba Ovi gbẹtọ tọn ma tindo ofi de na do ota etọn ai te gba.” (Luku 9:58) Jesu zan gbẹzan he bọawu. Ahunmẹdunamẹnu etọn tintan wẹ nado lá wẹndagbe Ahọluduta lọ tọn, podọ e do nuhe e zẹẹmẹdo nado vò sọn magbọjẹ he adọkunnu lẹ bibẹpli do aigba ji nọ hẹnwa lẹ si hia. Jesu dohia dọ e pọnte tlala hugan nado bẹ adọkunnu lẹ pli do olọn mẹ, “fie na owán kavi okọ́ ma nọ hẹn ẹn gble te, podọ fie ajotọ lẹ ma nọ gboadó bosọ fìnnú te.” Be hiẹ to tudohomẹnamẹ Jesu tọn lọ nado bẹ adọkunnu lẹ pli do olọn mẹ hodo ya?
Jẹhẹnu Jesu Tọn He Dọ̀n Gbẹtọ lẹ Sẹpọ Ẹ
17. Jẹhẹnu tẹlẹ wẹ hẹn Jesu zun wẹndagbe-jlatọ ayidego tọn de?
17 Jẹhẹnu tẹlẹ wẹ hẹn Jesu zun wẹndagbe-jlatọ ayidego tọn de? Dopo wẹ pọndohlan etọn gando mẹhe e to alọgọna lẹ go. Delẹ to jẹhẹnu dagbe Jehovah tọn he Jesu dohia lẹ mẹ wẹ whiwhẹ, owanyi po awuvẹmẹ po. Doayi lehe jẹhẹnu ehelẹ dọ̀n mẹsusu sẹpọ Jesu do go.
18. Naegbọn e sọgan yin didọ dọ Jesu do whiwhẹ hia?
18 To whenuena Jesu kẹalọyi azọ́ndenamẹ lọ nado wá aigba ji, e “klọ́n gigo etọn dai, [bo] yí ojlẹmọ afanumẹ tọn de na ede, yè sọ basi i to apajlẹ gbẹtọ lẹ tọn mẹ.” (Flp. 2:7) Nuyiwa whiwhẹ tọn de wẹ enẹ yin. Humọ, Jesu ma nọ yí nukunpẹvi do pọ́n gbẹtọ lẹ gba. Nuyiwa etọn ma nọ do gbigbọ lọ hia dọ, ‘Kaka olọn mẹ wẹ n’jẹte wá sọn, enẹwutu mì dona dotoaina mi.’ To vogbingbọn mẹ na mẹhe ylọ yede dọ mẹssia lẹ, Jesu ma jlá otẹn etọn taidi Mẹssia nugbo lọ gba. To whedelẹnu, e nọ gbẹ́ na gbẹtọ lẹ ma nado dọna mẹdevo lẹ mẹhe ewọ yin kavi nuhe e ko wà. (Mat. 12:15-21) Jesu jlo dọ gbẹtọ lẹ ni basi dide nado hodo e to dodonu nuhe yelọsu ko doayi e go lẹ tọn ji. Dona nankọ die na devi etọn lẹ dọ Oklunọ yetọn ma nọ donukun to yé si nado taidi angẹli pipé he e ko nọpọ́ hẹ to olọn mẹ lẹ!
19, 20. Nawẹ owanyi po awuvẹmẹ po whàn Jesu nado gọalọna gbẹtọ lẹ gbọn?
19 Jesu Klisti sọ do owanyi hia—yèdọ jẹhẹnu titengbe hugan Otọ́ etọn olọn mẹ tọn. (1 Joh. 4:8) Owanyi wẹ whàn Jesu nado plọnnu hosetọ etọn lẹ. Di apajlẹ, lẹnnupọndo numọtolanmẹ he e tindo na ogán jọja de ji. (Hia Malku 10:17-22.) Jesu “yiwanna ẹn” bo jlo nado gọalọna ẹn, ṣigba ogán jọja lọ ma jlo na lẹkọ sọn nutindo susugege etọn lẹ godo nado sọgan lẹzun hodotọ Klisti tọn.
20 Dopo to jẹhẹnu he dọ̀n gbẹtọ lẹ do Jesu dè lẹ mẹ wẹ awuvẹmẹ etọn. Taidi gbẹtọvi mapenọ lẹpo, mẹhe kẹalọyi nuplọnmẹ etọn lẹ tindo nuhahun susu. Na Jesu yọ́n ehe wutu, e yí awuvẹmẹ po lẹblanu po do plọnnu yé. Di dohia: To gbèdopo, alọnu Jesu po apọsteli etọn lẹ po tọn ján sọmọ bọ yé ma tlẹ mọ whenu nado dùnú. Ṣigba, nawẹ Jesu yinuwa gbọn to whenuena e mọ bọ gbẹtọgun de pli? ‘Ewọ tindo lẹblanu to yé ji, na yé taidi lẹngbọ he ma tindo hihọ́tọ de wutu; e sọ ṣẹ nususu plọn yé.’ (Malku 6:34) Jesu doayi ninọmẹ blawu he mẹ mẹhe e dọyẹwheho na lẹ tin te go bo yí ede zan nado plọnnu yé bosọ wà azọ́njiawu lẹ do ota yetọn mẹ. Na jẹhẹnu dagbe etọn lẹ dọ̀n mẹdelẹ dogo, bọ ohó etọn lẹ sọ whàn yé wutu, yé lẹzun devi etọn lẹ.
21. Etẹwẹ mí na gbadopọnna to hosọ he bọdego mẹ?
21 Nususu gbẹ́ pò he mí sọgan plọn sọn lizọnyizọn aigba ji tọn Jesu tọn mẹ, dile hosọ he bọdego na dohia do. Aliho devo tẹlẹ mẹ wẹ mí sọgan hodo apajlẹ Jesu Klisti, Mẹdehlan daho hugan lọ tọn te?
Nawẹ Hiẹ Na Na Gblọndo Gbọn?
• Azọ́nplọnmẹ tẹwẹ Jesu mọyi whẹpo do wá aigba ji?
• Nawẹ aliho mẹpinplọn Jesu tọn yọ́n hugan wekantọ lẹ po Falesi lẹ po tọn gbọn?
• Jẹhẹnu Jesu tọn tẹlẹ wẹ dọ̀n gbẹtọ lẹ sẹpọ ẹ?
[Yẹdide to weda 15]
Nawẹ Jesu plọnnu gbẹtọgun lẹ gbọn?