Gbedewema-Yitọ Giliadi Tọn lẹ Yin Tudohomẹna Nado “Jẹ Dòkùn Ji” — WESẸDOTẸN INTẸNẸT JI TỌN Watchtower Tọn

Gbedewema-Yíyí Klasi 123tọ Giliadi Tọn

Gbedewema-Yitọ Giliadi Tọn lẹ Yin Tudohomẹna Nado “Jẹ Dòkùn Ji”

TO SAMEDI 8 septembre 2007, gbẹtọ 6 352 sọn otò voovo 41 mẹ wẹ wá gbedewema-yíyí klasi 123tọ Wehọmẹ Biblu Pinplọn Watchtower Giliadi tọn tẹnmẹ. To ogàn ao mẹ afọnnu, azinponọ tito-to-whinnu lọ tọn Anthony Morris he yin dopo to Hagbẹ Anademẹtọ lọ mẹ dokuavọna mẹplidopọ lẹ. To homẹbibiọ kleun de godo, e basi oylọna hodọtọ tintan, yèdọ Gary Breaux he yin dopo to hagbẹ Wedegbẹ́ Alahọ États-Unis tọn mẹ.

Mẹmẹsunnu Breaux na jide wehọmẹvi lọ lẹ dọ mahopọnna awusọhia agbasa tọn yetọn, mẹhe nọ wà ojlo Jehovah tọn lẹ nọ yọnwhanpẹ to nukun Etọn mẹ. (Jẹl. 13:11) E dotuhomẹna gbedewema-yitọ lọ lẹ nado hẹn whanpẹ mọnkọtọn go. Enẹgodo, Gerrit Lösch he yin dopo to Hagbẹ Anademẹtọ lọ mẹ zinnudeji dọ nuhe sọgbe wẹ e yin nado donukun ahọsumẹ de dile mí to Jehovah sẹ̀n. (Heb. 11:6) Etomọṣo, owanyi matin ṣejannabi wẹ dona whàn mí.

Bọdo enẹ go wẹ William Samuelson, nugopọntọ Azọ́nwatẹn Wehọmẹ Yẹwhehọluduta tọn lẹ tọn na tuli gbedewema-yitọ lọ lẹ nado tẹdo azọ́ndenamẹ gigonọ yetọn he yin nado lá Ahọlu he to gandu lọ go bosọ nọ dohia dọ yé tindo yẹyi gbọn walọ dagbe yetọn dali.a Sam Roberson, he yin alọgọtọ nugopọntọ Azọ́nwatẹn Wehọmẹ Yẹwhehọluduta tọn lẹ tọn na tuli gbedewema-yitọ lọ lẹ nado nọ doayi jẹhẹnu dagbe mẹdevo lẹ tọn go to whepoponu. Gbọnmọ dali, yé na penugo dogọ nado “yiwanna mẹmẹsunnu lẹ.”—1 Pita 2:17.

To hodidọ zodolanmẹnamẹ tọn enẹlẹ godo, mẹplọntọ Giliadi tọn Mark Noumair kanhose delẹ to gbedewema-yitọ lẹ mẹ he dọ numimọ he yé tindo to sinsẹ̀nzọn kunnudegbe tọn mẹ to nupinplọn Giliadi tọn lọ whenu. Mẹplidopọ lẹpo wẹ sọgan mọ hezeheze dọ yé yiwanna lizọnyizọn lọ bo jlo nado gọalọna mẹdevo lẹ. Enẹgodo, Kent Fischer sọn Wekantẹn Bẹtẹli Patterson tọn kanhose hagbẹ Wedegbẹ́ Alahọ tọn lẹ sọn otò atọ̀n delẹ mẹ, fie mẹdehlan lẹ ko to devizọnwa te. Hogbe mẹmẹsunnu homẹdagbenọ ehelẹ tọn na jide mẹplidopọ lẹ, he bẹ susu mẹjitọ gbedewema-yitọ lọ lẹ tọn hẹn, dọ mẹdehlan yọyọ lẹ nọ yin nukunpedego ganji to azọ́ndenamẹ yetọn mẹ. Bọdo enẹ go, Izak Marais he yin hagbẹ Azọ́nwatẹn He Nọ Deanana Azọ́n Lẹdogbedevomẹ tọn kanhose mẹhe ko yin mẹdehlan na ojlẹ dindẹn delẹ, he numimọ yetọn lẹ gọalọna gbedewema-yitọ lọ lẹ nado pọnnukọnhlan ayajẹ he yé na wá duvivi etọn.

Hodidọ tangan tito-to-whinnu lọ tọn, he yin didọ gbọn Geoffrey Jackson, dopo to Hagbẹ Anademẹtọ lọ mẹ dali, sinai do hosọ lọ ji dọ, “Po Nuhe Mì Ko Sè Ehe Lẹpo po—Etẹwẹ Mì Na Wà Todin?” Mẹmẹsunnu Jackson, he ko sẹ̀n taidi mẹdehlan na nudi owhe 25 to Hùwaji Pacifique tọn, dọhodo tadonahó Yẹwhehodidọ Osó ji tọn lọ ji. To hodidọ enẹ mẹ, Jesu donù nuyọnẹntọ de po nulunọ de po go, he dopodopo yetọn gbá ohọ̀. Hodọtọ lọ dohia dọ ohọ̀ awe lọ lẹ sọgan ko tin to lẹdo dopolọ mẹ. Ṣigba, nulunọ lọ gbá etọn do aigba tata ji, yèdọ do tọkẹ́n ji, to whenuena nuyọnẹntọ lọ kùndò kakajẹ whenuena e mọ osé he ji e na ze dodonu ohọ̀ etọn tọn do. Whenuena yujẹhọn sinsinyẹn de fọ́n, ohọ̀ he yin gbigbá do osé ji lọ nọte, ṣigba dehe yin gbigbá do tọkẹ́n ji lọ họ́.—Mat. 7:24-27; Luku 6:48.

Jesu basi zẹẹmẹ dọ dawe nulunọ lọ nọtena mẹhe nọ dotoaina ohó etọn poun bo ma nọ yí nude wà lẹ. Dawe nuyọnẹntọ lọ nọtena mẹhe nọ dotoaina ohó Jesu tọn bosọ nọ yí yé do yizan mẹ lẹ. Mẹmẹsunnu Jackson dọna gbedewema-yitọ lẹ dọ, “Eyin mì yí nuhe mì plọn sọn Biblu mẹ lẹ do yizan mẹ to azọ́ndenamẹ mẹdehlan tọn mìtọn mẹ, mì na taidi dawe nuyọnẹntọ lọ.” Enẹwutu, e dotuhomẹna gbedewema-yitọ lọ lẹ to tadona mẹ nado “jẹ dòkùn ji” to azọ́ndenamẹ mẹdehlan tọn yetọn mẹ.

To godo mẹ, gbedewema-yitọ lọ lẹ mọ gbedewema po azọ́ndenamẹ yetọn lẹ po yí, bọ Mẹmẹsunnu Morris na tudohomẹnamẹ tadona tọn delẹ. E na tuli gbedewema-yitọ lẹ nado nọ hodo Jesu to whepoponu bo ma gboawupo gbede blo nado nọ ganjẹ Jehovah go nado mọ huhlọn yí. Enẹ wẹ hẹn tito-to-whinnu gbedewema-yíyí tọn lọ wá vivọnu.

[Nudọnamẹ odò tọn]

a Azọ́nwatẹn Wehọmẹ Yẹwhehọluduta tọn lẹ tọn nọ penukundo wehọmẹ Giliadi tọn, hagbẹ Wedegbẹ́ Alahọ tọn lẹ tọn po nugopọntọ tomẹyitọ lẹ tọn po go to anademẹ Wedegbẹ́ Mẹpinplọn tọn glọ.

[Apotin to weda 31]

SỌHA NULINLẸN KLASI TỌN

Sọha otò he mẹ yé wá sọn tọn: 10

Sọha otò he mẹ yé yin didohlan tọn: 24

Sọha wehọmẹvi lẹ tọn: 56

Madozẹnzẹn owhe mẹhodido tọn: 33,5

Madozẹnzẹn owhe to nugbo mẹ tọn: 17,9

Madozẹnzẹn owhe lizọnyizọn whenu-gigọ́ tọn: 13,8

[Yẹdide to weda 32]

Gbedewema-Yíyí Klasi 123tọ Wehọmẹ Biblu Pinplọn Watchtower Giliadi Tọn

To yinkọ he tin to odò lẹ mẹ, hukan lẹ yin sọha yí na sọn nukọn yì godo, bọ yinkọ lẹ yin sislẹ sọn amiyọnwhé yì adusiwhé to hukan dopodopo ji.

(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T. (7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.