Yé Hùnhomẹ Nado Wà Ojlo Jiwheyẹwhe Tọn
JESU ze apajlẹ de dai na Klistiani lẹpo gbọn dẹ̀hiho hlan Otọ́ etọn dali dọmọ: “Ojlo ṣie ma wẹ gba, adavo towe, yin wiwà.” (Luku 22:42) Hogbe whiwhẹ tọn heyin taliaina Jehovah tọn enẹ nọ yin vivọdọ to egbehe gbọn livi susu devizọnwatọ Jiwheyẹwhe tọn lẹ dali. To yé mẹ wẹ wehọmẹvi 52 klasi 120tọ Wehọmẹ Biblu Pinplọn Watchtower Giliadi tọn lẹ tin te. To 11 mars 2006, hagbẹ klasi he to gbedewema yí ehelẹ tọn jaya po todido lọ po nado wà ojlo Jiwheyẹwhe tọn to otò voovo lẹ mẹ, etlẹ yin to ninọmẹ avùnnukundiọsọmẹ tọn lẹ mẹ.
Etẹwẹ whàn gbedewema-yitọ ehelẹ nado ze ojlo Jehovah tọn wiwà do otẹn tintan mẹ to gbẹzan yetọn mẹ? Chris po Leslie po, yèdọ asu po asi po de he yin didohlan Bolivie taidi mẹdehlan, dọ ẹ dole: “To whenuena e yindọ mí ko mọ́n mídelẹ, mí jlo na hẹn mídelẹ tin-to-aimẹ nado wà nudepope he tin to kọndopọ mẹ hẹ titobasinanu Jehovah tọn.” (Malku 8:34) Jason po Chere po, he yin didohlan Albanie, yidogọ dọmọ: “Azọ́ndenamẹ he mí ko mọyi sọn titobasinanu Jehovah tọn dè lẹpo wẹ nọ tindo avùnnukundiọsọmẹnu etọn lẹ. Etomọṣo, mí ko mọ ẹn taidi nuhe jẹ nado ze jidide mítọn lẹpo do Jehovah mẹ.”
Tulinamẹ Nado Wà Ojlo Jehovah Tọn
George Smith, he yin dopo to hagbẹ whẹndo Bẹtẹli tọn lẹ mẹ bo nọ wazọ́n to Azọ́nwatẹn Yẹdide tọn, bẹ tito-to-whinnu gbedewema-yíyí lọ tọn jẹeji po odẹ̀ po. Stephen Lett, he yin dopo to Hagbẹ Anademẹtọ Kunnudetọ Jehovah tọn lẹ tọn mẹ podọ azinponọ na tito-to-whinnu gbedewema-yíyí lọ tọn, dokuavọna mẹplidopọ lẹpo. Jonọ lẹ zingbejizọnlin sọn otò 23 mẹ wá Nọtẹn Wepinplọn Watchtower tọn to Patterson, New York, na nujijọ ayajẹ tọn ehe. Mẹmẹsunnu Lett dọna gbedewema-yitọ lọ lẹ dọ yé jlo na yì basi wadotana “onú huhlọnnọ tlala de tọn.” E dọ̀n ayidonugo wá “figángán lẹ” ji—taidi sinsẹ̀n-nuplọnmẹ lalo tọn lẹ—he mẹdehlan yọyọ lọ lẹ na penugo nado họliai gbọn huhlọn Owe-wiwe tọn dali. (2 Kọlintinu lẹ 10:4, 5) E dotana dọmọ: “Ayajẹ nankọ die e na hẹnwa na mì nado yin yiyizan gbọn Jehovah dali nado họ́ figángán he tin to gbẹtọ ahunjijlọnọ he mì na yì mọ to azọ́ndenamẹ mìtọn lẹ mẹ liai!”
Harold Jackson, he yin dopo to azọ́nwatọ tatọ́-tẹnnọ tọn lẹ mẹ, dọho do hosọ lọ ji “Nuhe Dona Yin Hinhẹn do Ayiha mẹ Delẹ.” E donu e go dọ mẹdehlan yọyọ lọ lẹ ni ma wọnji nado ‘dín ahọludu Jiwheyẹwhe tọn po dodo etọn po whẹ’ gbede blo. (Matiu 6:33) Yé dona flindọ “owanyi nọ hẹnmẹ dote” bosọ nọ planmẹ jẹ kọdetọn dagbe kọ̀n. (1 Kọlintinu lẹ 8:1) E dọmọ: “Mì dike nuyiwa mìtọn hẹ mẹdevo lẹ ni nọ sinai do owanyi ji.”
Enẹgodo, Geoffrey Jackson, dopo to Hagbẹ Anademẹtọ lọ mẹ he wadevizọn taidi mẹdehlan de sọn 1979 kakajẹ 2003, kanse gbedewema-yitọ lọ lẹ dọ, “Be Azọngban Mìtọn Wẹ E Yin Ya?” E zinnudo nuhudo lọ ji nado tindo pọndohlan jlẹkaji tọn gando yedelẹ po lizọnyizọn lọ po go. Klistiani lẹ tindo azọngban lọ nado wazọ́n sinsinyẹn bo dó okún nugbo lọ tọn lẹ bosọ húsinna yé. Nalete, Jehovah wẹ nọ hẹn jideji gbigbọmẹ tọn wá, to whenuena e yindọ “Jiwheyẹwhe wẹ to jideji na omẹ.” (1 Kọlintinu lẹ 3:6-9) Mẹmẹsunnu Jackson yidogọ dọmọ: “Jehovah ze azọngban lọ do alọ mìtọn mẹ nado gbọṣi dolilo mẹ to gbigbọ-liho. Ṣigba etẹwẹ yin azọngban mìtọn he klohugan? Nado yiwanna Jehovah po mẹhe mì jlo na yì wadevizọn na lẹ po.”
Lawrence Bowen he yin mẹplọntọ Giliadi tọn gbadopọnna hosọ lọ ‘Yọn Lehe Hiẹ Na Nọ Deanana Dewe Do.’ E flinnu wehọmẹvi lọ lẹ dọ Jehovah gbọn azọ́njiawu dali deanana Islaelivi lẹ bosọ basi hihọ́na yé to zungbo mẹ. (Eksọdusi 13:21, 22) To egbehe, e nọ deanana bosọ nọ basi hihọ́na mí jẹ obá de mẹ gbọn agun Klistiani yiamisisadode tọn he yin “dòtin afọdotẹn nugbo tọn” gblamẹ. (1 Timoti 3:14, 15) Mẹdehlan yọyọ lọ lẹ dona tẹdo nugbo Biblu tọn, he nọ deanana whiwhẹnọ lẹ bosọ nọ basi hihọ́na yé go.
Wallace Liverance, mẹplọntọ Giliadi tọn devo, dotuhomẹna gbedewema-yitọ lọ lẹ ma nado wọnji ohó Jiwheyẹwhe tọn he tin to “godo” yetọn go. Ohó Jiwheyẹwhe tọn tin to godo na mí to linlẹn lọ mẹ dọ Biblu yin tadona to owhe kanweko susu lẹ die wayi. Taidi lẹngbọhọtọ he to godo na lẹngbọpa de bo to awhádo jẹgbonu, Jehovah to godo na omẹ etọn lẹ bo to anadena yé gbọn “afanumẹ nugbonọ, nuyọnẹntọ lọ” dali. (Isaia 30:21; Matiu 24:45-47) Wehọmẹ Giliadi tọn gọalọna gbedewema-yitọ lọ lẹ nado hẹn pinpẹn-nutọn-yinyọnẹn yetọn jideji na hagbẹ afanumẹ enẹ tọn. “Afanumẹ” lọ tlẹ sọ wleawuna Les Saintes Écritures—Traduction du monde nouveau. Hodọtọ lọ na tuli gbedewema-yitọ lọ lẹ dọmọ: “Mì yí nudọnamẹ họakuẹ he yin bibẹpli ehe do plọnnu mẹdevo lẹ.”—Matiu 13:52.
Ojlo Jehovah Tọn Wiwà to Sinsẹ̀nzọn Kunnudegbe Tọn Mẹ
To adà tito-to-whinnu lọ tọn he yin “Wleawu Nado Dọyẹwheho Wẹndagbe Tọn” whenu, Mẹplọntọ Giliadi tọn Mark Noumair zinnudo numimọ delẹ ji he gbedewema-yitọ lọ lẹ duvivi etọn to lizọnyizọn gbangba tọn mẹ to Wehọmẹ Giliadi tọn whenu. (Lomunu lẹ 1:15) Hokansemẹ lẹ hẹ gbedewema-yitọ lẹ dohia dọ yé ko wleawufo nado dọyẹwheho to ninọmẹ lẹpo mẹ nugbonugbo.
Gbedewema-yitọ lọ lẹ mọ tulinamẹ dogọ lẹ yí gbọn hokansemẹ he yin anadena gbọn Kenneth Flodin dali hẹ nugopọntọ tomẹyitọ atọ̀n he to devizọnwa todin to États-Unis. Richard Keller po Alejandro Lacayo po, mẹhe ko sẹ̀n to Hùwaji po Ṣẹnṣẹn Amelika tọn po, basi zẹẹmẹ lehe yé doakọnna whlepọn voovo lẹ do bosọ donù dona he yé duvivi etọn to whenuena yé to sinsẹ̀nzọnwa taidi mẹdehlan lẹ go. Moacir Felisbino dọ azọ́nplọnmẹ he e mọyi to whenuena e to azọ́nwa dopọ pẹkipẹki hẹ mẹdehlan lẹ to Brésil, fihe e nọ̀ whẹ́n.
Mẹdehlan numimọnọ atọ̀n, Robert Jones, Woodworth Mills, po Christopher Slay po, yin hokanse gbọn David Schafer dali. Mẹmẹsunnu atọ̀n lọ lẹ dọ lehe yé plọn nado nọ yinuwa po jidide to Jehovah mẹ po do eyin yé tin to awusinyẹnnamẹ lẹ glọ. Yé na jide gbedewema-yitọ lọ lẹ dọ azọ́nplọnmẹ he yé mọyi sọn titobasinanu Jehovah tọn mẹ ko hẹn yé pegan na azọ́ndenamẹ mẹdehlan tọn yetọn lẹ. Mẹmẹsunnu Mills basi bladopọ etọn dole: “E ma yin nugbo Biblu tọn he mí plọn to Giliadi lẹ wẹ gọalọna mi hugan gba, ṣigba nuhe wehọmẹ lọ plọn mi gando whiwhẹ po owanyi po go wẹ gọalọna mi hugan.”
Guy Pierce he yin dopo to Hagbẹ Anademẹtọ lọ mẹ ze hodidọ titengbe he hosọ etọn yin “Jehovah Ma Na Gboawupo Gbede” do nukọn namẹ. Adam gboawupo, ṣigba be enẹ zẹẹmẹdo awugbopo to adà Jiwheyẹwhe tọn mẹ wẹ ya? Be Jiwheyẹwhe gboawupo nado dá Adam to pipé mẹ dile mẹdelẹ nọ dọ do wẹ ya? Paali, na “Jiwheyẹwhe . . . dá gbẹtọ do titengbe.” (Yẹwhehodọtọ 7:29) Tenọgligo hinhẹn Jesu tọn to whlepọn daho hugan lọ glọ to aigba ji dohia dọ “Adam ma tindo whẹwhinwhẹ́n depope nado gboawupo gba,” wẹ hodọtọ lọ dọ. Whlepọn Adam tọn nado setonu to jipa Edẹni tọn mẹ ma sinyẹn sọ whlepọn he Jesu pannukọn bo dudeji po kọdetọn dagbe po gba. Ṣogan, Adam gboawupo. Etomọṣo, Jehovah ma na gboawupo gbede. Lẹndai etọn na yin hinhẹndi. (Isaia 55:11) Mẹmẹsunnu Pierce dọna mẹdehlan yọyọ lọ lẹ dọmọ: “Mì tindo lẹblanulọkẹyi lọ nado gbògbéna Jehovah po gbigbọ mẹde-yido-sanvọ́ tọn mìtọn po. Na Jehovah ni tin po dopodopo mìtọn po to fidepope he mì na to sinsẹ̀n ẹn te taidi mẹdehlan lẹ.”
To nudọdomẹ lẹ he wá sọn wekantẹn alahọ Kunnudetọ Jehovah tọn lẹ tọn voovo mẹ hihia godo, azinponọ lọ, Mẹmẹsunnu Lett, ze gbedewema po azọ́ndenamẹ wehọmẹvi lọ lẹ tọn po do alọmẹ na yé. Vernon Wisegarver, he yin hagbẹ whẹndo Bẹtẹli tọn sọn ojlẹ dindẹn die, nọ̀ nukọnna mẹplidopọ lẹ to odẹ̀ tadona tọn hihò mẹ.
Gbẹtọ 6 872 he wá lẹ tindo numọtolanmẹ dọ tito-to-whinnu gbedewema-yíyí lọ tọn sọ vọ́ hẹn zohunhun yetọn nado wà ojlo Jiwheyẹwhe tọn jẹ yọyọ. (Psalm 40:8) Gbedewema-yitọ lẹ Andrew po Anna po dọmọ: “Mí ko klan gbẹzan mítọn do wiwe hlan Jehovah. Mí ko dopà na Jehovah nado wà nudepope he e biọ to mí si. Jehovah ko sọ biọ to mí si nado yì Cameroun, Aflika.” Yewlẹ po hagbẹ gbedewema-yitọ he pò lẹ po to jejeji nado bẹ yanwle gbẹzan tọn he na hẹn ayajẹ po pekọ po wá na yé jẹeji. Mọwẹ, yé hùnhomẹ nado wà ojlo Jiwheyẹwhe tọn.
[Apotin to weda 17]
SỌHA NULINLẸN KLASI TỌN
Sọha otò he mẹ yé wá sọn tọn: 6
Sọha otò he mẹ yé yin didohlan tọn: 20
Sọha wehọmẹvi lẹ tọn: 52
Madozẹnzẹn owhe mẹhodido tọn: 35,7
Madozẹnzẹn owhe to nugbo mẹ tọn: 18,3
Madozẹnzẹn owhe lizọnyizọn whenu-gigọ́ tọn: 14,5
[Caption on page 18]
Gbedewema-Yíyí Klasi 120tọ Wehọmẹ Biblu Pinplọn Watchtower Giliadi Tọn
To yinkọ he tin to odò lẹ mẹ, hukan lẹ yin sọha yí na sọn nukọn yì godo, bọ yinkọ lẹ yin sislẹ sọn amiyọnwhé yì adusiwhé to hukan dopodopo ji.
(1) Wright, S.; Suárez, B.; Croisant, B.; Davenport, L. (2) Johnson, A.; Ali, C.; Cady, K.; Guerrero, P.; Ases, A. (3) Ortiz, L.; Lyall, K.; Uzeta, M.; Perez, R.; Backus, K.; Caterina, C. (4) Palmer, B.; Loving, D.; Macdonough, J.; Bostock, D.; Benetatos, L. (5) Jasicki, M.; Sarafianos, E.; Stelter, C.; Vaira, R.; Woon, J.; Prentice, K. (6) Davenport, H.; Croisant, H.; Perez, M.; Vaira, E.; Suárez, A.; Caterina, I.; Wright, C. (7) Cady, K.; Macdonough, J.; Ortiz, M.; Woon, J.; Ali, J.; Ases, M. (8) Sarafianos, G.; Lyall, D.; Uzeta, C.; Stelter, P.; Prentice, G.; Johnson, A.; Benetatos, C. (9) Palmer, J.; Jasicki, W.; Backus, J.; Bostock, S.; Guerrero, J. M.; Loving, S.