Dọnsẹpọ Jiwheyẹwhe
“E Ma Tlẹ Dẹn sọn Dopodopo Mítọn Dè”
NADO dọ hójọhó, gbẹtọvi lẹ ma sọtẹ́n eyin yè yí yé jlẹdo wẹkẹ gblagada ehe go. Vlavo hiẹ ko kanse dewe pọ́n dọ, ‘Be e yọnbasi na gbẹtọvi tata lẹ nado tindo haṣinṣan pẹkipẹki hẹ Jiwheyẹwhe Ganhunupotọ lọ nugbonugbo ya?’ Enẹ sọgan yọnbasi kiki eyin Jiwheyẹwhe, he oyín etọn nọ yin Jehovah jlo dọ mí ni dọnsẹpọ ẹ. Be e jlo domọ ya? Gblọndo mẹjlọdote tọn lọ sọgan yin mimọ to hogbe mẹwhinwhàn tọn he apọsteli Paulu dọna wesetọ Atẹni tọn lẹ mẹ, dile e yin kinkàndai to Owalọ lẹ 17:24-27 mẹ do. Doayi onú ẹnẹ delẹ go he Paulu dọ gando Jehovah go.
Tintan, Paulu dọ dọ Jiwheyẹwhe wẹ “basi aihọn po nuhe tin to e mẹ lẹpo po.” (Wefọ 24) Whanpẹ po wunmẹ voovo nudida he nọ hẹn gbẹninọ zun awuvivinu lẹ tọn po yin kunnudenu lọ dọ Basitọ mítọn nọ hò mítọn pọ́n bosọ yiwanna mí. (Lomunu lẹ 1:20) E ma na yin nuyọnẹnnu nado lẹndọ Jiwheyẹwhe mọnkọtọn na desọn ojlo mẹ bo dẹn do mẹhe e do owanyi mọnkọtọn hia lẹ.
Awetọ, Jehovah “wẹ yí ogbẹ̀ na mẹpo, po gbọfufu po, po onú lẹpo po.” (Wefọ 25) Jehovah wẹ Gbẹ̀namẹtọ lọ. (Psalm 36:9) Jẹhọn, osin, po núdùdù po, yèdọ nuhe yin dandan nado nọgbẹ̀ lẹpo wẹ yin nunina sọn Mẹdatọ mítọn dè. (Jakobu 1:17) Be e sọgbe hẹ lẹnpọn dagbe nado lẹndọ Jiwheyẹwhe alọtlútọ mítọn na whlá ede bo gbọnmọ dali tẹ̀ nunina lọ mí nado yọ́n mẹhe ewọ yin bosọ dọnsẹpọ ẹ ya?
Atọ̀ntọ, Jiwheyẹwhe “yí ohún dopo do dá akọta gbẹtọ lẹpo tọn.” (Wefọ 26) Jehovah ma nọ homẹnukuntapọ́n, mọ e masọ tindo nuvẹun to aliho depope mẹ. (Owalọ lẹ 10:34) Nawẹ e sọgan nọma yinmọ gbọn? Ewọ wẹ wleawuna “ohùn dopo” kavi gbẹtọ dopo, yèdọ Adam he mẹ akọta po hẹnnu lẹpo po wá sọn. Ojlo Jiwheyẹwhe tọn wẹ yindọ “yè ni whlẹn omẹ popo gán.” (1 Timoti 2:4) Enẹwutu, dotẹnmẹ lọ hundote na mí nado dọnsẹpọ ẹ mahopọnna sinmẹ agbasa mítọn tọn, otò kavi akọ̀ he mẹ mí wá sọn.
Podọ ẹnẹtọ, Paulu donù nugbo jidenamẹ tọn de go dọ Jehovah “ma tlẹ dẹn sọn dopodopo mítọn dè.” (Wefọ 27) Dile Jehovah tlẹ yiaga tlala sọ, e ma nọ dẹn do mẹhe jlo nugbonugbo nado dọnsẹpọ ẹ lẹ gbede. Ohó etọn na mí jide dọ, ewọ ma dẹn, ṣigba e “tin to yakẹ yé he to awhádo ylọ ẹ . . . lẹpo tọn.”—Psalm 145:18.
Sọn nuhe Paulu dọ lẹ mẹ, e họnwun dọ Jiwheyẹwhe jlo dọ mí ni dọnsẹpọ ẹ. Ṣigba Paulu basi zẹẹmẹ dọ, mẹhe desọn ojlo mẹ bo “dín in” bosọ “dọ̀n do e go” kavi dín in vẹkuvẹku lẹ kẹdẹ wẹ e nọ na dotẹnmẹ nado dọnsẹpọ ẹ. (Wefọ 27) Owe alọdlẹndonu tọn he lẹdogbedevomẹ-basitọ Biblu tọn lẹ nọ yizan de dọ dọ, hogbe dowhenu tọn awe he yin lilẹdo “dín in” po “dọ̀n do e go” po “nọ dlẹnalọdo nuhe e yọnbasi nado jẹ e kọ̀n . . . kavi ojlo he sọgan yin hinhẹndi de.” Di dohia: To ohọ̀ he dozinvlu he a jẹakọ hẹ de mẹ, hiẹ sọgan to avìdla nado dín miyọ́n-tánu kavi ohọ̀n, ṣogan a yọnẹn dọ emi na mọ ẹn janwẹ. Mọdopolọ, eyin mí nọ yí ahundopo do dín Jiwheyẹwhe vẹkuvẹku, mí sọgan deji dọ vivẹnudido mítọn lẹ na de sinsẹ́n tọ́n. Paulu hẹn mí deji dọ mí na ‘mọ ẹn.’—Wefọ 27.
Be hiẹ jlo vẹkuvẹku nado dọnsẹpọ Jiwheyẹwhe ya? Eyin hiẹ gbọn yise dali jẹ ‘Jiwheyẹwhe dín’ ji, bosọ “dọ̀n do e go,” e ma na hẹn we jẹflumẹ. E ma vẹawu nado dín Jehovah mọ, na “e ma tlẹ dẹn sọn dopodopo mítọn dè.”