Klasi 124tọ Gbedewema-Yíyí Giliadi Tọn
Mẹdehlan lẹ Yin Yiyijlẹdo Owẹ̀n Go
TITO-TO-WHINNU gbedewema-yíyí tọn de nọ wá aimẹ to Wehọmẹ Biblu Pinplọn Watchtower Giliadi tọn to osun ṣidopo lẹpo gblamẹ bọ hagbẹ whẹndo Bẹtẹli États-Unis tọn lẹpo nọ yin oylọ-basina wá otẹn lọ mẹ. To 8 mars 2008, jonọ he wá sọn otò he hugan 30 mẹ lẹ kọnawudopọ hẹ hagbẹ whẹndo Bẹtẹli tọn na tito-to-whinnu gbedewema-yíyí klasi 124tọ Wehọmẹ Giliadi tọn. Gbẹtọ 6 411 he wá lẹpo jaya hẹ wehọmẹvi lọ lẹ to azán vonọtaun ehe ji.
Azinponọ tito-to-whinnu lọ tọn, Stephen Lett he yin dopo to Hagbẹ Anademẹtọ lọ mẹ, bẹ tito-to-whinnu lọ jẹeji po hosọ lọ po “Mì Zindonukọn po Owẹ̀n Yẹhiadonu Jehovah Tọn lẹ Po.” Osọhia 9:1-4 yí pipli pẹvi Klistiani yiamisisadode lẹ tọn he gọ̀ nuwiwa yetọn bẹ to sinsẹ̀nzọn Jehovah tọn mẹ to 1919 jlẹdo awhànpa owẹ̀n tọn he jẹ nuyiwa ji po zohunhun po de go. Wehọmẹvi lọ lẹ yin nuflin dọ taidi hagbẹ “lẹngbọ devo” lẹ tọn, yé ko kọnawudopọ hẹ awhànpa owẹ̀n yẹhiadonu tọn ehe.—Joh. 10:16.
Lon Schilling he yin dopo to hagbẹ Wedegbẹ́ Alahọ États-Unis tọn mẹ, dọhodo hosọ he bọdego ji, “Mì Yin Gọtọ De.” E sinai do apajlẹ Biblu tọn gando Akuila po Pliskila po go he yin Klistiani alọwlemẹ owhe kanweko tintan whenu tọn delẹ ji. (Lom. 16:3, 4) Klasi Wehọmẹ Giliadi tọn lọ bẹ alọwlemẹ 28 hẹn. Yé yin nuflin dọ nado sọgan tindo kọdetọn dagbe taidi mẹdehlan lẹ, yé dona hẹn kanṣiṣa alọwle tọn yetọn lodo. Biblu nọ donù Akuila go to pọmẹ hẹ asi etọn, Pliskila to whepoponu. Gbọnmọ dali, apọsteli Paulu po agun lọ po to pọmẹ nọ pọ́n yé hlan taidi alọwlemẹ. Mọdopolọ to egbehe, alọwlemẹ mẹdehlan lẹ dona nọ wazọ́n dopọ, basi sinsẹ̀n dopọ, bo pehẹ avùnnukundiọsọmẹnu he yé na mọ to azọ́ndenamẹ tògodo tọn yetọn mẹ lẹ dopọ, bo gbọnmọ dali yin gọtọ de na yede.—Gẹn. 2:18.
Hosọ hodidọ he bọdego tọn “Mì Nọ Yinuwa Sọgbe hẹ Dagbewà Jehovah Tọn,” yin zizedonukọnnamẹ gbọn Guy Pierce he yin dopo to Hagbẹ Anademẹtọ lọ mẹ dali. Mẹmẹsunnu Pierce basi zẹẹmẹ dọ dagbewà bẹ nususu hẹn hugan nado dapana ylanwiwa. Gbẹtọ dagbe nọ wà onú dagbe nado hẹn ale wá na mẹdevo lẹ. Dagbewà Jehovah Jiwheyẹwhe tọn wẹ yiaga hugan. Dagbewà po owanyi Jiwheyẹwhe tọn po sọgan whàn mí nado nọ wà dagbe na mẹdevo lẹ. Nado dotana hodidọ etọn, Mẹmẹsunnu Pierce pà wehọmẹvi lọ lẹ dọmọ: “Mì ko to dagbe wà. Mí deji dọ mì na zindonukọn nado to nuyiwa sọgbe hẹ dagbewà Jiwheyẹwhe tọn gbọn dagbewiwà to azọ́n depope he Jehovah Jiwheyẹwhe na dena mì to sọgodo mẹ dali.”
Enẹgodo, Michael Burnett, mẹdehlan dai tọn de he yin azọ́ndena to agọe taidi mẹplọntọ Wehọmẹ Giliadi tọn, ze hodidọ he hosọ etọn yin “Mì Nọ Dó E Taidi Nukunmẹblanu de to Nukun Mìtọn lẹ Ṣẹnṣẹn” donukọnnamẹ. Islaelivi lẹ dona nọ flin lehe Jehovah whlẹn yé to azọ́njiawu-liho sọn Egipti do taidi dọ yé dó “nukunmẹblanu” de to ṣẹnṣẹn nukun yetọn lẹ tọn wẹ nkọ. (Eks. 13:16) Wehọmẹvi lẹ yin tudohomẹna nado nọ flin ayinamẹ susu he yé mọyi to Wehọmẹ Giliadi tọn taidi dọ yé dó nukunmẹblanu de to ṣẹnṣẹn nukun yetọn lẹ tọn wẹ nkọ. Mẹmẹsunnu Burnett zinnudo nuhudo lọ ji nado nọ do whiwhẹ po jlẹkajininọ po hia bosọ nọ yí nunọwhinnusẹ́n Biblu tọn lẹ do yizan mẹ to whenue yé to gbemanọpọ lẹ didẹ to yedelẹ ṣẹnṣẹn kavi hẹ mẹdevo lẹ.—Mat. 5:23, 24.
Mark Noumair he yin mẹplọntọ Wehọmẹ Giliadi tọn sọn ojlẹ dindẹn die, na hodidọ lọ “Ohàn Tẹwẹ Na Yin Jiji Gando Mì Go?” To hohowhenu, ohàn lẹ nọ yin jiji nado jaya to awhàngbigba lẹ godo. Dopo to ohàn mọnkọtọn lẹ mẹ do akọta Leubẹni, Dani, po Aṣeli po tọn hia taidi mẹhe ma nọ jlo na zan yede, to whenuena akọta Zebuluni tọn yin pipà na gbigbọ mẹde-yido-sanvọ́ tọn etọn. (Whẹ. 5:16-18) Taidi hàngbe hànjiji de tọn, nuyiwa Klistiani lẹpo tọn nọ wá họnwun na mẹdevo lẹ to godo mẹ. Zohunhun mẹde tọn na azọ́n Jiwheyẹwhe tọn po nugbonọ-yinyin etọn na anademẹ yẹwhehọluduta tọn lẹ po na hẹn homẹhun Jehovah bo nasọ yin apajlẹ dagbe de na mẹmẹsunnu etọn lẹ. Dile mẹdevo lẹ to agun lọ mẹ to todoaina ohàn yẹhiadonu tọn he pà mí te, enẹ wẹ nuyiwa mítọn, yé nọ yin whinwhàn nado hodo apajlẹ dagbe enẹ.
Taidi apadewhe azọ́nplọnmẹ Giliadi tọn yetọn, wehọmẹvi klasi 124tọ tọn lẹ yí nudi ganmẹ 3 000 zan to azọ́n yẹwhehodidọ tọn mẹ. To hosọ lọ “Mì Hodo Anademẹ Gbigbọ Wiwe Tọn” glọ, wehọmẹvi lẹ dọ numimọ sinsẹ̀nzọn kunnudegbe tọn susu na Sam Roberson he nọ wazọ́n to Azọ́nwatẹn Wehọmẹ Yẹwhehọluduta tọn lẹ tọn mẹ, bosọ basi wadohia numimọ delẹ tọn. Bọdo numimọ tulinamẹ tọn enẹlẹ go, Patrick LaFranca he yin dopo to Wedegbẹ́ Alahọ États-Unis tọn mẹ kanhose mẹhe ko yí gbedewema Giliadi tọn bo to sinsẹ̀nzọnwa todin to otò voovo mẹ lẹ. Wehọmẹvi lọ lẹ yọ́n pinpẹn ayinamẹ yọ́n-na-yizan he yé mọyi sọn mẹmẹsunnu ehelẹ dè tọn.
Anthony Morris he yin dopo to Hagbẹ Anademẹtọ lọ mẹ na hodidọ tadona tọn he hosọ etọn yin, “Mì Wọn Blo, Nuhe Nọ Yin Mimọ lẹ Yin Ojlẹ Gli Tọn.” Owe-wiwe dotuhomẹna mí nado ze ayidonugo do dona sọgodo tọn he na wá sọn Jehovah dè lẹ ji kakati nido yin nukunbibia ojlẹ gli tọn depope he mí sọgan to pipehẹ todin. (2 Kọl. 4:16-18) Ohẹ́n klókló, whẹdida mawadodo, kọgbidinamẹ, azọ̀n, po okú po yin nujijọ jọnun he mímẹpo nọ mọ to egbehe lẹ. Mẹdehlan lẹ sọgan pehẹ delẹ to ninọmẹ nugbajẹmẹji tọn ehelẹ mẹ tlọlọ. Ṣigba mí na hẹn jlẹkajininọ gbigbọmẹ tọn mítọn go bo gọ́ na todido eyin mí flindọ onú ehelẹ yin ojlẹ gli tọn.
Tito-to-whinnu lọ yin tadona po gbedewema-yitọ lẹpo po to oplò ji dile yé to todoaina ayinamẹ godo tọn Mẹmẹsunnu Lett tọn. E na tuli yé ma nado gbọjọ bo dọmọ: “Mí na hẹn tenọgli mítọn go to whepoponu eyin Jehovah tin to adà mítọn mẹ.” E na tuli mẹdehlan yọyọ lọ lẹ nado taidi owẹ̀n bo zindonukọn to sinsẹ̀nzọn Jehovah tọn mẹ bosọ yin zohunhunnọ, nugbonọ, podọ tonusetọ kakadoi.
[Apotin to weda 30]
SỌHA NULINLẸN KLASI TỌN
Sọha otò he mẹ yé wá sọn tọn: 7
Sọha otò he mẹ yé yin didohlan tọn: 16
Sọha wehọmẹvi lẹ tọn: 56
Madozẹnzẹn owhe mẹhodido tọn: 33,8
Madozẹnzẹn owhe to nugbo mẹ tọn: 18,2
Madozẹnzẹn owhe lizọnyizọn whenu-gigọ́ tọn: 13,8
[Yẹdide to weda 31]
Gbedewema-Yíyí Klasi 124tọ Wehọmẹ Biblu Pinplọn Watchtower Giliadi Tọn
To yinkọ he tin to odò lẹ mẹ, hukan lẹ yin sọha yí na sọn nukọn yì godo, bọ yinkọ lẹ yin sislẹ sọn amiyọnwhé yì adusiwhé to hukan dopodopo ji.
(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.
[Yẹdide to weda 32]
Wehọmẹ Giliadi tọn nọ yin bibasi to Nọtẹn Wepinplọn Watchtower tọn