Be Hiẹ Flin Ya?

Be a duvivi zinjẹgbonu Atọ̀họ̀-Nuhihọ́ Lọ Tọn agọe tọn lẹ hihia tọn ya? Pọ́n eyin a sọgan na gblọndo na kanbiọ he bọdego helẹ:

• Nuhahun sinsinyẹn tẹwẹ Klistiani delẹ ko pehẹ to alọwle yetọn godo, podọ etẹwẹ yé dona dovivẹnu nado wà?

Klistiani delẹ sọgan mọdọ yé ma tindo nususu to kọndopọ mẹ hẹ alọwlemẹ yetọn. To yinyọnẹn mẹ dọ gbẹdai he ma sọgbe hẹ Owe-wiwe ma yin pọngbọ dagbe de, yé dona dovivẹnu nado basi hihọ́na alọwle yetọn.—15/4, weda 17.

• Nuhahun tẹlẹ wẹ Klistiani he tin to owhé mẹgopinpọn tọn gbè de sọgan pehẹ?

E sọgan nọma jẹakọ hẹ agun he tin to fie owhé mẹgopinpọn tọn lọ te. Nuyise suhugan mẹhe tin to owhé lọ gbè lẹ tọn sọgan gbọnvo na etọn podọ yé sọgan nọ tẹnpọn nado hẹn ẹn tindo mahẹ to nuwiwa sinsẹ̀n tọn lẹ mẹ. Hẹnnumẹ Klistiani lẹ po hagbẹ agun he tin to lẹdo lọ mẹ tọn lẹ po dona hẹn nuhahun ehelẹ do ayiha mẹ bo tin to gbesisọ mẹ nado gọalọ bo penukundo Klistiani yọnhonọ ehe go.—15/4, weda 25-27.

• Afọdide ẹnẹ tẹlẹ wẹ sọgan gọalọna alọwlemẹ lẹ nado didẹ nuhahun lẹ?

Mì de ojlẹ de nado nọ dọhodo whẹho lẹ ji. (Yẹwh. 3:1, 7) Mì nọ yí ahundopo po sisi po do dọ linlẹn mìtọn tọ́n. (Efe. 4:25) Nọ dotoaina alọwlemẹ towe bo mọnukunnujẹ numọtolanmẹ etọn lẹ mẹ. (Mat. 7:12) Mì wá gbèta de kọ̀n bo wazọ́n do e ji to pọmẹ. (Yẹwh. 4:9, 10)—1/7, weda 24-26.

• To whenuena Jesu dotuhomẹna mí nado nọ biọ jona ahọ́ mítọn lẹ tọn, ahọ́ tẹlẹ hodọ wẹ e te?

Eyin mí yí Matiu 6:12 jlẹdo Luku 11:4 go, mí na mọdọ Jesu ma to hodọdo ahọ́ akuẹ tọn lẹ ji gba. Ylando lẹ wẹ e tindo to linlẹn mẹ. Mí dona nọ hodo apajlẹ Jiwheyẹwhe tọn gbọn jijonamẹ po awuvivo po dali.—15/5, weda 9.

• Wedegbẹ́ tẹlẹ mẹ wẹ mẹhe tin to Hagbẹ Anademẹtọ lọ mẹ lẹ nọ wazọ́n te?

Wedegbẹ́ Azinponọ tọn; Wedegbẹ́ Mẹpinplọn tọn; Wedegbẹ́ Nukunpedomẹgo tọn; Wedegbẹ́ Sinsẹ̀nzọn tọn; Wedegbẹ́ Wekinkan tọn; Wedegbẹ́ Wezinjẹgbonu tọn.—15/5, weda 29.

• Be walọ Ju lẹ tọn wẹ yin zẹẹmẹ basina to Lomunu lẹ 1:24-32 mẹ ya kavi Kosi lẹ tọn?

Zẹẹmẹ lọ sọgan sọgbe hẹ pipli awe lọ lẹpo, ṣigba Islaelivi atẹṣitọ hohowhenu tọn he gboawupo nado yìn Osẹ́n Mose tọn na owhe kanweko susu lẹ wẹ apọsteli Paulu to alọdlẹndo na taun tọn. Yé yọ́n gbedide dodo Jiwheyẹwhe tọn lẹ, ṣogan yé ma nọgbẹ̀ sọgbe hẹ gbedide enẹlẹ.—15/6, weda 29.

• Naegbọn yanwle jlẹkaji tọn lẹ zizedonukọnna míde sọgan yidogọna ayajẹ mítọn?

Eyin mí to tintẹnpọn nado jẹ yanwle he hugan mí lẹ kọ̀n mahopọnna nudepope he e sọgan biọ to mí si, mí na nọ do magbọjẹ he ma yin dandan na míde. Etomọṣo, mí ma dona nọ vẹawu míde zẹjlẹgo bo nọ pọ́n do numadinu lẹ go nado dekanpona nuhe mí nọ wà to lizọnyizọn lọ mẹ.—15/7, weda 29.