Omẹ Nankọ Wẹ Hiẹ Jlo Na Yin?

TO TÒPẸVI Philippines tọn de mẹ, ponọ-gán de kanse gbehosọnalitọ de dọ, “Etẹwẹ hiẹ wà na dawe enẹ bọ e do diọ jijọ etọn?” E dlẹnalọdo owe susu he tin to tafo etọn ji bo yidogọ dọmọ: “Be hiẹ yọnẹn dọ kandai owhẹ̀ he yin sisadokọna ẹn wayi lẹ tọn kẹdẹ wẹ gọ́ owe ehe lẹpo mẹ ya? Hiẹ ko whlẹn mí sọn mẹhe nọ dotukla mí hugan to tòpẹvi ehe mẹ dopo si.” Dawe he hodọ e te lọ ko yin ahànnumunọ danuwatọ de dai he nọ fọ́n nuhahun dote whẹwhẹ. Etẹwẹ hẹn ẹn nado basi diọdo ayidego tọn lẹ to gbẹzan etọn mẹ? Nudọnamẹ he tin to Ohó gbọdo Jiwheyẹwhe tọn, Biblu mẹ lẹ wẹ.

Mẹsusu wẹ ko kẹalọyi ayinamẹ apọsteli Paulu tọn lẹ nado ‘klọ́n walọ ogbẹ̀ yetọn hoho tọn do apadopo, gbẹtọ hoho lọ, bo ze gbẹtọ yọyọ lọ dogo, mẹhe yè dá to dodo mẹ di apajlẹ Jiwheyẹwhe tọn.’ (Efe. 4:22-24) Vlavo diọdo he mí dona basi lẹ sù kavi whè, nubiọtomẹsi de wẹ e yin na mẹhe jlo na lẹzun Klistiani lẹ nado ze gbẹtọ-yinyin yọyọ lọ dogo.

Ṣigba bẹjẹeji de poun wẹ diọdo po nukọnyiyi he mí nọ basi nado pegan na baptẹm po lẹ yin. To whenuena mí jlo na yí baptẹm, mí taidi atin he anazọ́nwatọ de pà do alọ nuhe e jlo na yí i do basi tọn ji. Nuhe e jlo na basi lọ ko nọ họnwun, ṣigba azọ́n susu gbẹ́ pò. Anazọ́nwatọ lọ gbẹ́ dona wà azọ́n flinflin godo tọn delẹ nado sọgan hẹn nuhe e to bibasi lọ yọnwhanpẹ. To baptẹm yíyí whenu, mí ko nọ tindo jẹhẹnu tangan delẹ he yin bibiọ to mí si nado lẹzun devizọnwatọ Jiwheyẹwhe tọn. Etomọṣo, mí gbẹ́ dona to azọ́nwa do gbẹtọ-yinyin yọyọ mítọn go. Mí dona to hinhẹn ẹn pọnte dogọ gbọn vọjlado lẹ bibasi dali.

Paulu lọsu tlẹ mọdọ emi dona basi vọjlado delẹ. E yigbe dọmọ: “Whenuena yẹn jlo dagbe nado wà, ylankan tin to dè e.” (Lom. 7:21) Matin ayihaawe, Paulu yọ́n ede ganji bosọ yọ́n mẹhe nkọ e jlo na yin. Míwlẹ lo? Mílọsu dona kanse míde dọ: ‘Etẹwẹ yẹn yin to homẹ? Gbẹtọ wunmẹ tẹwẹ yẹn yin? Podọ omẹ nankọ wẹ yẹn jlo na lẹzun?’

Etẹwẹ Yẹn Yin to Homẹ?

Eyin mí na vọ́ ohọ̀ he dohó de jlado, e ma ko pé nado sásẹ̀ndo gbonu etọn to whenuena atin he tin to ohọ̀ lọ homẹ delẹ ko dù gba. Vọ́didona nuhe gble to ohọ̀ lọ go lẹ na hẹn nuhahun wá to nukọn mẹ poun wẹ. Mọdopolọ, nado sọawuhia taidi dodonọ ma ko pé. Mí dona gbeje gbẹtọ-yinyin mítọn pọ́n kitokito bo yọ́n nuhahun he mí dona basi vọjladona lẹ. Eyin e ma yinmọ, gbẹtọ-yinyin hoho lọ na lẹkọwa. Enẹwutu, dandannu wẹ e yin dọ mí ni gbeje míde pọ́n. (2 Kọl. 13:5) Mí dona nọ doayi jijọ he ma sọgbe lẹ go bo basi vọjlado. Nado jẹ yanwle enẹ kọ̀n, Jehovah ko wleawu nuhe na gọalọna mí tọn.

Paulu wlan dọmọ: “Ohó Jiwheyẹwhe tọn tin to ogbẹ̀, e dohuhlọn, bo da hú ohí nùawenọ, e nọ sọ́ omẹ, yèdọ nado klan ayiha po gbigbọ po do voovo, agómẹ hupetẹn tọn po ojó ohú mẹ tọn po, ewọ sọ wẹ linlẹn ayiha tọn po ojlo ayiha tọn po yọnẹntọ.” (Heb. 4:12) Nudọnamẹ he tin to Ohó kandai Jiwheyẹwhe tọn, Biblu mẹ lẹ sọgan yinuwado gbẹzan mítọn ji to aliho jiawu de mẹ. E nọ sọ́ mí sisosiso yì homẹ—yèdọ biọ ojó ohú mẹ tọn mẹ to yẹhiadonu-liho. E nọ de linlẹn po mẹwhinwhàn mítọn lẹ po hia, bo nọ hùngona nuhe mí yin to homẹ dọ́n, yijlẹdo nuhe mí sọawuhia nado yin to gbonu kavi mẹhe mí lẹndọ mí yin go. Lehe Ohó Jiwheyẹwhe tọn nọ gọalọna mí nado yọ́n nuhahun mítọn lẹ do sọ!

Eyin mí na vọ́ ohọ̀ he dohó de jlado, nuhe gble lẹ didiọ kẹdẹ sọgan nọma pé. Nuhe hẹn ohọ̀ lọ gble lẹ yinyọnẹn na gọalọna mí nado yọ́n nuhe mí na wà bọ nuhahun dopolọ ma nado wá aimẹ to whedevonu. Mọdopolọ, e ma yin jijọ mítọn he ma sọgbe lẹ kẹdẹ wẹ mí dona yọnẹn gba, ṣigba nuhe nọ zọ́n bọ mí do tindo jijọ ehelẹ yinyọnẹn na gọalọna mí nado duto madogán mítọn lẹ ji. Onú susu wẹ nọ yinuwado gbẹtọ-yinyin mítọn ji. Delẹ to yé mẹ wẹ otẹn he mẹ mí tin te, ninọmẹ akuẹzinzan tọn mítọn, lẹdo he mẹ mí nọ nọ̀, aṣa he mẹ mí wá sọn, mẹjitọ mítọn lẹ, gbẹdohẹmẹtọ mítọn lẹ, po sinsẹ̀n he mẹ mí wá sọn po. Tito-to-whinnu televiziọn tọn lẹ, sinimoto, po ayidedai wunmẹ devo lẹ po tlẹ nọ yinuwado gbẹtọ-yinyin mítọn ji. Eyin mí nọ doayi nuhe nọ yinuwado gbẹtọ-yinyin mítọn ji to aliho agọ̀ mẹ lẹ go, enẹ na gọalọna mí nado de nuyiwadomẹji yetọn lẹ pò.

To whenuena mí gbeje míde pọ́n godo, mí sọgan yin whinwhàn nado dọ dọ, ‘Mọ wẹ n’jọ.’ Ṣigba linlẹn ehe ma sọgbe. Whenuena Paulu to hodọ gando mẹhe nọ tindo mahẹ to zanhẹmẹ vijinu dopolọ tọn, galilọ, ahànnumu po mọmọ po mẹ dai bo wá tin to agun Kọlinti tọn mẹ lẹ go, e dọmọ: “Mọ wẹ mẹdelẹ te to mì mẹ; ṣigba yè ko klọ mì, ṣigba yè ko lẹ̀ mì wé . . . to [gbigbọ] Jiwheyẹwhe mítọn tọn mẹ.” (1 Kọl. 6:9-11) Po alọgọ gbigbọ wiwe Jehovah tọn po, mílọsu sọgan basi vọjlado he jẹ lẹ po kọdetọn dagbe po.

Lẹnnupọndo whẹho Marcosa tọn ji, yèdọ dawe de, he wá sọn Philippines. To whenuena e to hodọdo ovu whenu etọn ji, Marcos dọmọ: “Mẹjitọ ṣie lẹ nọ saba dọjlẹ. Enẹ wẹ zọ́n bọ n’do lẹzun atẹṣitọ to whenuena n’tindo owhe 19.” Marcos wá yin yinyọnẹn taidi akọhotọ, ajotọ po jaguda de po. Ewọ po hagbẹ etọn delẹ po tlẹ dewé nado yí agahun de, ṣigba tito enẹ ma yì dile yé lẹn do. Marcos zindonukọn to jijọ ylankan etọn mẹ kakajẹ alọwle etọn godo. To godo mẹ, e hẹn nutindo etọn lẹpo bu do akọhiho mẹ. Ṣigba to ojlẹ vude godo, Marcos kọnawudopọ hẹ asi etọn, he ko to Biblu plọn hẹ Kunnudetọ Jehovah tọn lẹ. To bẹjẹeji, e mọdọ emi ma pegan nado yin dopo to Kunnudetọ lẹ mẹ. Ṣigba, nuhe e to pinplọn lẹ yíyí-do-yizan mẹ po opli agun tọn lẹ yìyì po gọalọna Marcos nado jo aliho gbẹzan etọn hoho tọn dai. E ko lẹzun Klistiani he yí baptẹm de todin bo to mẹdevo lẹ plọn na yelọsu nido sọgan diọ.

Gbẹtọ Tẹwẹ Hiẹ Jlo Na Yin?

Diọdo tẹlẹ wẹ mí dona basi nado sọgan hẹn jẹhẹnu Klistiani tọn mítọn lẹ pọnte? Paulu dotuhomẹna Klistiani lẹ dọmọ: “Mì klọ́n ehe lẹpo dai ga, homẹgble, adi, homẹkẹn, nutlọ, po hogblo po sọn onù mìtọn mẹ: mì dolalo na mìnọzo blo, saa pọ́n dọ mì ko klọ́n gbẹtọ hoho nẹ dai po azọ́n etọn po.” Apọsteli lọ yidogọ dọmọ: “[Mì ze gbẹtọ] yọyọ nẹ dogo, ehe yè diọzun yọyọ jẹ oyọnẹn mẹ kẹdẹdi apajlẹ mẹhe dá ẹ tọn.”—Kọl. 3:8-10.

Enẹwutu, yanwle mítọn tintan wẹ nado klọ́n gbẹtọ-yinyin hoho lọ dai bo ze yọyọ lọ dogo. Jẹhẹnu tẹlẹ wẹ mí dona wleawuna nado jẹ yanwle enẹ kọ̀n? Paulu dọmọ: “Mì ze lẹblanu homẹ tọn, dagbewà, hùwhẹ, walọmimiọn, po linsinsinyẹn po dogo; mì sọ nọ sinyẹnlin hẹ mìnọzo, mì nọ jona mìnọzo, eyin mẹde tindo wiwọ́ do mẹde go; yèdọ dile [Jehovah] jona mì do, mọ ga wẹ mì ni nọ basi do. Otado onú ehe lẹpo tọn, mì ze owanyi dogo, ehe yin pọninọ gbesisọ tọn.” (Kọl. 3:12-14) Eyin mí nọ dovivẹnu vẹkuvẹku nado wleawuna jẹhẹnu ehelẹ, enẹ na gọalọna mí nado tindo “nukundagbe . . . to OKLUNỌ dè podọ to gbẹtọ lẹ dè.” (1 Sam. 2:26) Whenuena Jesu tin to aigba ji, e do jẹhẹnu Jiwheyẹwhe tọn lẹ hia to aliho ayidego tọn mẹ. Gbọn nupinplọn do gbẹzan etọn ji po apajlẹ etọn hihodo po dali, mí sọgan tindo jẹhẹnu Klisti tọn nkọ lẹ dogọ bo gbọnmọ dali lẹzun “mẹhodotọ Jiwheyẹwhe tọn” nujọnu tọn lẹ.—Efe. 5:1, 2.

Aliho devo he mẹ mí sọgan yọ́n diọdo he mí dona basi lẹ te wẹ nado plọnnu do jijọ mẹhe yin nùdego to Biblu mẹ delẹ tọn ji bo lẹnnupọndo jẹhẹnu yetọn he dọnmẹdogo lẹ po awugbopo yetọn lẹ po ji. Di apajlẹ, lẹnnupọndo Josẹfu, visunnu tọgbo Jakobu tọn ji. Mahopọnna dọ e to oyà whẹdida mawadodo delẹ tọn ji, Josẹfu hẹn pọndohlan dagbe de po whanpẹ homẹ tọn etọn po go. (Gẹn. 45:1-15) To alọ devo mẹ, Absalọmi, visunnu Ahọlu Davidi tọn nọ klọ gbẹtọ lẹ dọ onú yetọn nọ duahunmẹna ẹn, podọ yé sọ nọ pà ẹ na whanpẹ etọn. Ṣigba nado dọ hójọhó, yẹdoklọmẹtọ po hlọnhutọ de po wẹ e yin. (2 Sam. 13:28, 29; 14:25; 15:1-12) Nado jọmẹ to nukunta bo yọnwhanpẹ to gbonu ma wẹ nọ dọnmẹdogo na taun tọn gba.

Mí Sọgan Tindo Kọdetọn Dagbe

Eyin mí na hẹn gbẹtọ-yinyin mítọn pọnte bo yọnwhanpẹ to nukun Jiwheyẹwhe tọn mẹ, mí dona nọ na ayidonugo gbẹtọ he mí yin to homẹ. (1 Pita 3:3, 4) Nado basi diọdo to gbẹtọ-yinyin mítọn mẹ nọ biọ dọ mí ni yọ́n jijọ mítọn he ma sọgbe lẹ po nuhe nọ zọ́n bọ mí do tindo jijọ ehelẹ po, gọna nuhe nọ gọalọna mí nado wleawuna jẹhẹnu Jiwheyẹwhe tọn lẹ. Be mí sọgan deji dọ vivẹnudido mítọn nado basi diọdo ehelẹ na tindo kọdetọn dagbe ya?

Mọwẹ, mí sọgan basi diọdo he jẹ lẹ po alọgọ Jehovah tọn po. Taidi psalm-kàntọ lọ, mí sọgan hodẹ̀ dọmọ: “Dá ayiha yọyọ de na mi, Jiwheyẹwhe E; bosọ hẹn ayiha nugbo tọn jẹ yọyọ to ohò ṣie mẹ.” (Ps. 51:10) Mí sọgan biọ dọ gbigbọ Jiwheyẹwhe tọn ni yinuwado mí ji bo hẹn mí pegan dogọ nado nọgbẹ̀ sọgbe hẹ ojlo etọn. Na nugbo tọn, mí sọgan penugo nado yọnwhanpẹ to nukun Jehovah tọn mẹ!

[Nudọnamẹ odò tọn]

[Yẹdide to weda 4]

Be e ko pé nado sásẹ̀ndo ohọ̀ he yujẹhọn hẹngble ehe ya?

[Yẹdide to weda 5]

Be gbẹtọ-yinyin towe ko lẹzun Klisti tọn nkọ ya?