‘Dona Jehovah Tọn Nọ Hẹnmẹ Wàdọkun’
MÍMẸPO wẹ nọ jlo nado mọ dona yí. The American Heritage College Dictionary dọ dọ dona lẹ nọ yidogọna “ayajẹ, dagbemẹ-ninọ, kavi kọdetọn dagbe tintindo.” Na Jehovah wẹ yin Nunamẹtọ “nunina dagbedagbe po nunina he sọgbe lẹpo po” tọn wutu, dona nujọnu tọn, he nọ dẹn-to-aimẹ lẹpo nọ wá sọn Mẹdatọ owanyinọ mítọn dè. (Jakobu 1:17) E nọ dona gbẹtọvi lẹpo, etlẹ yin mẹhe ma yọ́n ewọ lẹ. Jesu dọ gando Otọ́ etọn go dọmọ: “E hẹn owhè etọn vẹ́ do mẹylankan lẹ ji, podọ do omẹ dagbe lẹ ji, bosọ [ja jikun] do dodonọ lẹ ji, podọ do mawadodonọ lẹ ji.” (Matiu 5:45) Gbọnmọ dali, Jehovah nọ do mẹtọnhopọn vonọtaun hia hlan mẹhe yiwanna ẹn lẹ.—Deutelonomi 28:1-14; Job 1:1; 42:12.
Psalm-kàntọ wlan dọmọ: “[Jehovah] ma to na whlẹn onú dagbe de do yé he to zọnlin jlọjlọ zìn lẹ.” (Psalm 84:11) Mọwẹ, mẹhe to Jehovah sẹ̀n lẹ nọ zan gbẹzan adọkunnọ, he tindo lẹndai. Yé yọnẹn dọ “dona OKLUNỌ tọn, e nọ hẹnmẹ wàdọkun, e ma nọ yí awubla dogọ ẹ gba.” Biblu sọ dọ ga dọmọ: “Mẹdonanọ [Jehovah tọn] lẹ wẹ na dugu aigba tọn.” (Howhinwhẹn lẹ 10:22; Psalm 37:22, 29) Dona nankọ die enẹ na yin!
Nawẹ mí sọgan mọ dona Jehovah tọn yí gbọn? Aliho dopo wẹ yindọ, mí dona wleawuna jẹhẹnu he nọ hẹn homẹ etọn hùn lẹ. (Deutelonomi 30:16, 19, 20; Mika 6:8) Mí mọ ehe to apajlẹ atọ̀n to devizọnwatọ hohowhenu Jehovah tọn tọn mẹ.
Jehovah Dona Devizọnwatọ Etọn Lẹ
Noa yin devizọnwatọ vonọtaun Jiwheyẹwhe tọn de. Mí hia to Gẹnẹsisi 6:8 mẹ dọmọ: “Noa mọ nukundagbe to nukun Jiwheyẹwhe tọn mẹ.” Etẹwutu? Na Noa setonu wutu. Kandai lọ dọmọ: “Noa sọ zinzọnlin hẹ Jiwheyẹwhe.” Noa payi nunọwhinnusẹ́n dodo Jehovah tọn lẹ go bosọ setonuna gbedide etọn lẹ. To ojlẹ he mẹ aihọn tlọ̀ biọ danuwiwa mẹ bosọ gblezọn tlala, Noa yin whinwhàn nado “basi, kẹdẹdi enẹ he Jiwheyẹwhe ko degbena ẹn lẹpo, mọwẹ e basi do.” (Gẹnẹsisi 6:9, 22) Taidi kọdetọn de, Jehovah deanana ẹn nado gbá “ohún (aki) tọn dai na whlẹngán whédo [Noa] tọn.” (Heblu lẹ 11:7) To aliho ehe mẹ, Noa po whẹndo etọn po—podọ akọ̀ gbẹtọvi tọn gbọn yewlẹ gblamẹ—lùn vasudo ojlẹ enẹ mẹ tọn tọ́n. Podọ Noa kú po todido lọ po nado yin finfọnsọnku biọ nukundido ogbẹ̀ mavọmavọ to paladisi aigba ji tọn de mẹ. Dona họakuẹ nankọtọn lẹ die e mọyi!
Ablaham lọsu tindo jẹhẹnu lẹ he hẹn homẹ Jehovah tọn hùn. Yise wẹ yin tintan to ehelẹ mẹ. (Heblu lẹ 11:8-10) Ablaham jo gbẹzan vivomẹninọ tọn dó to Uli podọ to godo mẹ to Halani, na e tindo yise to opagbe Jehovah tọn mẹ dọ okún etọn na lẹzun susugege bo na yin dona de na akọta lẹpo wutu. (Gẹnẹsisi 12:2, 3) Mahopọnna owhe susu whlepọn tọn lẹ, yise etọn mọ ahọsumẹ yí to whenuena visunnu etọn Isaki yin jiji. Gbọn ewọ gblamẹ, Ablaham lẹzun tọgbo akọta Islaeli he Jiwheyẹwhe de tọn, podọ Mẹssia tọn to godo mẹ. (Lomunu lẹ 4:19-21) Humọ, e sọ “yin otọ́ yé he yise lẹpo tọn,” podọ e sọ wá yin yiylọdọ ‘họntọn Jehovah tọn.’ (Lomunu lẹ 4:11; Jakobu 2:23; Galatianu lẹ 3:7, 29) E zan gbẹzan he tindo lẹndai de, bosọ yin didona susugege.
Sọ lẹnnupọn do apajlẹ Mose nugbonọ tọn ji ga. Pinpẹn-nutọn tintindo na onú gbigbọmẹ tọn lẹ etọn yin jẹhẹnu vonọtaun etọn. Mose gbẹ́ adọkun Egipti tọn lẹpo dai bosọ “doakọnna ẹn taidi e mọ ewọ heyin mamọ lọ.” (Heblu lẹ 11:27) To whenuena e ko yí owhe 40 zan to Midiani godo, e lẹkọ do Egipti taidi sunnu mẹhomẹ de bo yí adọgbigbo do pannukọn Falo, heyin aṣẹpatọ huhlọnnọ hugan ojlẹ lọ mẹ tọn, nado biọ tundote mẹmẹsunnu etọn lẹ tọn. (Eksọdusi 7:1-7) E mọ azọ̀n ylankan ao lẹ, mimá Ohù Vẹẹ tọn, po vasudo awhànpa Falo tọn lẹ po. Jehovah yí i zan nado na Osẹ́n Islaeli podọ nado yin whẹgbọtọ Alẹnu Etọn tọn hẹ akọta yọyọ lọ. Mose deanana akọta Islaeli tọn na owhe 40 to zungbo mẹ. Gbẹzan etọn tindo lẹndai nujọnu tọn, podọ e sọ duvivi sinsẹ̀nzọn họakuẹ susugege tọn.
Dona Egbezangbe Tọn Lẹ
Kandai ehelẹ dohia dọ gbẹzan mẹhe nọ sẹ̀n Jiwheyẹwhe lẹ tọn nọ tindo zẹẹmẹ nugbonugbo. Dile omẹ Jehovah tọn lẹ jẹ awuwlena jẹhẹnu lẹ ji taidi tonusise, yise, po pinpẹn-nutọn-yinyọnẹn na onú gbigbọmẹ tọn lẹ po, yé nọ yin didona susugege.
Nawẹ mí nọ yin didona gbọn? Eyọn, dile omẹ livi susu lẹ to oyà huvẹ gbigbọmẹ tọn ji to Mẹylọhodotọklisti mẹ, míwlẹ sọgan ‘jẹaglin do dagbewà Jehovah tọn ji.’ (Jẹlemia 31:12) Gbọn Jesu Klisti po “afanumẹ nugbonọ, nuyọnẹntọ” lọ po gblamẹ, Jehovah ko wleawuna núdùdù gbigbọmẹ tọn susugege he nọ gọalọna mí nado tin to ‘aliho he planmẹ yì ogbẹ̀ mẹ ji.’ (Matiu 7:13, 14; 24:45; Johanu 17:3) Gbẹdido hẹ mẹmẹsunnu Klistiani tọn mítọn lẹ yin dona họakuẹ devo. To opli lẹ ji podọ to nujijọ devo lẹ whenu, tintin to sinsẹ̀n-basitọ he nọ do owanyi hia podọ he nọ dovivẹnu sinsinyẹn nado ‘ze gbẹtọ-yinyin yọyọ lọ dogo’ lẹ ṣẹnṣẹn nọ yin asisa ayajẹ daho tọn. (Kọlọsinu lẹ 3:8-10; Psalm 133:1) Ṣigba, dona mítọn he klohugan wẹ haṣinṣan họakuẹ mẹdetiti tọn tintindo hẹ Jehovah Jiwheyẹwhe po afọdòmẹ Visunnu etọn, Klisti Jesu tọn hihodo po.—Lomunu lẹ 5:1, 8; Filippinu lẹ 3:8.
Eyin mí lẹnnupọndo dona mọnkọtọn lẹ ji, mí nọ yọ́n lehe sinsẹ̀nzọn he mí to wiwà hlan Jiwheyẹwhe họakuẹ sọ na taun tọn. Vlavo mí nọ lẹnnupọndo oló Jesu tọn heyin ajọwatọ tomẹyitọ he to pali dagbe de dín tọn ji. Jesu dọ gando ewọ go dọmọ: “Whenuena e mọ pali dopo akuẹ gege tọn, e yì, bo sà nuhe e tindo lẹpo, bosọ họ̀ ẹ.” (Matiu 13:46) Na jide tọn, numọtolanmẹ mítọn niyẹn gando haṣinṣan he mí tindo hẹ Jiwheyẹwhe, dotẹnmẹ hundote họakuẹ sinsẹ̀nzọnwiwa hlan ẹn tọn, gbẹdido Klistiani tọn mítọn, todido Klistiani tọn mítọn, po dona he gando yise mítọn go lẹpo po go. Nudevo depope ma họakuẹ hugan mọ to gbẹzan mítọn mẹ gba.
Nunina Lẹkọ Hlan Jehovah
Na mí yọ́n Jehovah taidi Nunamẹtọ nunina dagbedagbe lẹpo tọn wutu, ahun mítọn nọ yin whinwhàn nado do pinpẹn-nutọn-yinyọnẹn hia na dona he mí mọyi lẹ. Nawẹ mí sọgan wà enẹ gbọn? Aliho dopo wẹ nado gọalọna mẹdevo lẹ nado duvivi dona ehelẹ dopolọ tọn. (Matiu 28:19) To nuhe hugan aigba 230 ji, alọnu Kunnudetọ Jehovah tọn lẹ tọn ján to kọmẹnu lẹ didlapọn nado wà nudopolọ mẹ. Dile yé to mọwà, yé nọ yí nutindo mẹdetiti tọn vude he yé tindo lẹ zan—whenu, huhlọn, po nutindo agbasa tọn lẹ po—nado gọalọna mẹdevo lẹ nado ‘wá tindo oyọnẹn he pegan nugbo lọ tọn.’—1 Timoti 2:4.
Lẹnnupọndo apajlẹ gbehosọnalitọ he nọ nọ̀ Glendale, Californie, États-Unis tọn lẹ ji. To samedi afọnnu lẹpo, yé nọ basi gbejizọnlin nudi kilomẹtlu 100 tọn na yìyì po gigọ̀ po nado dla gànpa otò tọn de pọ́n. Dile etlẹ yindọ ganhiho kleun de poun wẹ yé nọ yizan hẹ gàntọ lẹ to dlapọn dopodopo whenu, yé ma gbọjọ gba. Dopo to yé mẹ dọmọ: “Ale susu wẹ tin to azọ́nwiwa to aigba-denamẹ vonọtaun ehe ji mẹ. Mí to wiwà ẹ po ayajẹ susu po. Mí tindo jlodotọ susu bọ e nọ sinyẹnawu nado dla yemẹpo pọ́n. Omẹ atọ́n wẹ mí to nuplọn hẹ todin, bọ omẹ ẹnẹ ko sọ biọ plọnmẹ Biblu.”
Homẹ Klistiani lizọnyizọnwatọ zohunhunnọ lẹ tọn nọ hùn nado wadevizọn vọnu nado wazọ́n ogbẹ̀-whlẹngán tọn ehe. Yé nọ do walọyizan he Jesu dọ lọ hia, dọmọ: “Vọnu wẹ mì mọyi, vọnu wẹ mì ni na omẹ.” (Matiu 10:8) Omẹ livi susu lẹdo aihọn pé wẹ to mahẹ tindo to devizọn ṣejannabi matindo tọn mọnkọtọn mẹ, podọ taidi kọdetọn de, gbẹtọgun ahundoponọ lẹ to alọkẹyi bo to lilẹzun devi. To owhe atọ́n agọe tọn lẹ kẹdẹ mẹ, nudi gbẹtọ livi 1,7 wẹ klan gbẹzan yetọn do wiwe hlan Jehovah. Nukunpipedo jideji he to nukọnzindo ehe go nọ biọ dọ yè ni wleawuna Biblu po owe Biblu tọn susu dogọ po podọ nado gbá Plitẹnhọ Ahọluduta tọn po nọtẹn opli tọn yọyọ devo lẹ po. Fie wẹ akuẹ he nọ yin yiyizan na onú ehelẹ nọ wá sọn? Sọn nunina sọn ojlo mẹ wá lẹ kẹdẹ mẹ wẹ.
Na ninọmẹ ohẹ́n sinsinyẹn tọn he tin to otò delẹ mẹ wutu, mẹsusu nọ vánkan nado wleawuna dandannu gbẹ̀mẹ tọn lẹ na whẹndo yetọn lẹ. Sọgbe hẹ linlinnamẹwe New Scientist, gbẹtọ liva dopo nọ yí e whè gbau 70 to kanweko ji akuẹ he whédo yetọn tindo zan na núdùdù. Susu mẹmẹsunnu po mẹmẹyọnnu mítọn lẹ po wẹ tin to ninọmẹ enẹ mẹ. Eyin yisenọ hatọ lẹ ma gọalọ, yé ma sọgan penugo nado yí owe Klistiani tọn lẹ kavi tindo Plitẹnhọ Ahọluduta tọn he sọgbe de.
Nugbo wẹ dọ, enẹ ma zẹẹmẹdo dọ omẹ mọnkọtọn lẹ nọ tindo ayajẹ nado dike dọ mẹdevo lẹ ni to agbàn yetọn hẹn wẹ gba. Ṣigba yé tindo nuhudo alọgọ tọn. To whenuena Mose to tulina Islaelivi lẹ nado na nutindo agbasa tọn lẹ taidi aliho pẹdido na Jehovah na dona he yé ko mọyi lẹ tọn, e dọmọ: “Omẹ dopodopo na na kẹdẹdile e tin sọgan do, kẹdẹdi dona OKLUNỌ lọ Jiwheyẹwhe towe tọn lọ he e ko na we.” (Deutelonomi 16:17) Enẹwutu, to whenuena Jesu mọ bọ asuṣiọsi de na “abọgan-kuẹ flinflin awe” to tẹmpli mẹ, e pà ẹ to devi etọn lẹ nukọn. E wà nuhe e sọgan wà lẹpo. (Luku 21:2, 3) Mọdopolọ, Klistiani he tin to ohẹ́n klókló mẹ lẹ nọ wà nuhe go yé pé lẹ. Podọ eyin nuwhedo tin, e sọgan yin hinhẹn sọgbe gbọn nunina Klistiani hatọ he mayin hẹntọnọ sọmọ lẹ tọn dali.—2 Kọlintinu lẹ 8:13-15.
To whenuena mí nanú Jiwheyẹwhe lẹkọ to aliho enẹ mẹ, e yin nujọnu dọ mí ni tindo mẹwhinwhàn he sọgbe. (2 Kọlintinu lẹ 8:12) Paulu dọmọ: “Omẹ dopodopo dile e lẹn to ayiha etọn mẹ do, mọwẹ mì ni gbọ e ni na do; e yin po hunhlun po blo, kavi huhlọndohẹnmẹ basi tọn blo: na Jiwheyẹwhe yiwanna nunamẹtọ homẹhunhunnọ.” (2 Kọlintinu lẹ 9:7) Gbọn nunina sọn ojlo mẹ wá dali, mí nọ nọgodona hẹngblodeji titobasinanu Jiwheyẹwhe tọn he to aimẹ wá todin bosọ nọ hẹn ayajẹ mítọn jideji.—Owalọ lẹ 20:35.
Mahẹ tintindo to azọ́n yẹwhehodidọ tọn mẹ podọ nunina sọn ojlo mẹ wá yin aliho awe he mẹ mí sọgan nanú Jehovah lẹkọ na dona he e ko na mí lẹ te. Podọ lehe e nọ na tulimẹ sọ nado yọnẹn dọ Jehovah jlo na kọ̀n dona do omẹ ahunjijlọnọ susu, he ma ko yọ́n ewọ todin lẹ ji dogọ! (2 Pita 3:9) Enẹwutu, mì gbọ mí ni zindonukọn nado yí nutindo mítọn lẹ zan to sinsẹ̀nzọn Jiwheyẹwhe tọn mẹ nado sọgan dín ahunjijlọnọ lẹ podọ nado gọalọna yé nado wleawuna jẹhẹnu lẹ taidi tonusise, yise, po pinpẹn-nutọn-yinyọnẹn po. To aliho enẹ mẹ, mí na tindo ayajẹ dọ mí gọalọna yé nado “dọ́ ẹ pọ́n, bosọ mọdọ yinyọ́n wẹ OKLUNỌ.”—Psalm 34:8.
[Apotin to weda 28, 29]
Aliho He Mẹdelẹ Dè Nado Nanú te Lẹ
NUNINA LẸ NA AZỌ́N LẸDO AIHỌN PÉ TỌN
Mẹsusu nọ dè, kavi klan akuẹ sọha de dovo he yé nọ yí do apotin nunina tọn he go yè kàn “Nunina lẹ na Azọ́n Lẹdo Aihọn Pé Tọn—Matiu 24:14” do mẹ.
To osun dopodopo mẹ, agun lẹ nọ yí akuẹ ehelẹ vlavo hlan tatọ́-tẹnnọ aihọn tọn heyin Kunnudetọ Jehovah tọn lẹ ehovah tọn lẹ tọn to Brooklyn, New York, kavi hlan wekantẹn alahọ lẹdo lọ tọn. Nunina akuẹ tọn lẹ sọn ojlomẹ wá sọgan sọ yin didohlan Wekantẹn Akuẹbẹhẹntọ tọn, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483 tlọlọ, kavi hlan wekantẹn alahọ tọn he nọ penukundo otò mìtọn go. Aṣọdonu akuẹgegenu tọn lẹ kavi nuhọakuẹ devo lẹ sọgan sọ yin nina ga. Wekanhlanmẹ kleun de he dohia dọ onú ehelẹ yin nunina tlọlọ de dona hodo nunina ehelẹ.
TITO NUNINA HE SINAI DO NINỌMẸ JI TỌN
Akuẹ sọgan yin nina to tito vonọtaun de glọ to ehe mẹ, eyin nunamẹtọ lọ tindo nuhudo mẹdetiti tọn de, nunina lọ na yin gigọjo hlan ẹn . Na nudọnamẹ dogọ, jaale kanwehlan Wekantẹn Akuẹbẹhẹntọ tọn gbọn adlẹsi heyin kinkàn do aga lọ yiyizan dali.
TITO NUNAMẸ HOMẸDAGBE TỌN
To yidogọmẹ na nunina akuẹ tọn tlọlọ lẹ po nunina akuẹ tọn he sinai do ninọmẹ ji lẹ po, wunmẹ nunina tọn devo lẹ na alemọyi sinsẹ̀nzọn lẹdo aihọn pé Ahọluduta lọ tọn lẹ sọ tin. Ehelẹ wẹ:
Alọgọ Owù-Nujijọ Tọn: Ogbẹ́ Watch Tower sọgan yin nina alemọyi nunina alọgọ owù-nujijọ gbẹzan tọn kavi to tito gbọjẹ gaa/agbasazọ́n jijodo tọn mẹ.
Akuẹ He Tin to Akuẹsẹdotẹn Lẹ: Akuẹ he tin to akuẹsẹdotẹn lẹ, kandai akuẹsẹdo tọn lẹ, kavi akuẹ gbọjẹ gaa mẹdopodopo tọn lẹ sọgan yin zize do kandai ogú mimá tọn mẹ kavi sọgan yin súsú lẹkọ to okú godo hlan Ogbẹ́ Watch Tower, to kọndopọmẹ hẹ nubiọtomẹsi akuẹsẹdotẹn lẹdo lọ tọn lẹ.
Kandai Ajọ́ Akuẹ Tọn lẹ po Ale Ajọ́ Tọn lẹ Po: Kandai akuẹ ajọ́ tọn lẹ po ale ajọ́ tọn lẹ po sọgan yin nina hlan Ogbẹ́ Watch Tower taidi nunina tlọlọ de.
Ohọ̀ po Aigba Po: Ohọ̀ po aigba po he sọgan yin sisa lẹ sọgan yin nina hlan Ogbẹ́ Watch Tower vlavo taidi nunina tlọlọ de bibasi kavi gbọn hinhẹn ohọ̀ po aigba de po dote na nunamẹtọ lọ na gbẹwhenu etọn, yèdọ mẹhe sọgan to finẹ nọ̀ to gbẹwhenu etọn. Dọna alahọ otò towe tọn whẹpo do basi nunina ohọ̀ po aigba po tọn depope.
Nunina Whemẹwhemẹ Tọn: Nunina whemẹwhemẹ tọn yin tito de to ehe glọ mẹde nọ na akuẹ Ogbẹ́ Watchtower. To kọlilẹ mẹ, nunamẹtọ lọ, kavi mẹhe yin dide gbọn nunamẹtọ lọ dali, nọ yí ahọsumẹ tangan de to owhe dopodopo mẹ na pipotọ gbẹzan etọn tọn. Nunamẹtọ lọ nọ yí ale takuẹ didepo tọn to owhe he mẹ nunina whemẹwhemẹ tọn lọ yin didoai.
Kandai Gúmima po Nunina lẹ Tọn Po: Nutindo kavi akuẹ sọgan yin nina taidi ogú hlan Ogbẹ́ Watch Tower gbọn kandai sọgbe hẹ osẹ́n de bibasi dali, kavi yinkọ Ogbẹ́ Watch Tower tọn sọgan yin kinkàndai taidi mẹhe na dugu nunina lẹ tọn. Nunina he mẹ titobasinanu sinsẹ̀n tọn de yin mahẹtọ te sọgan dè takuẹ he nọ yin bibiọ delẹ pò.
Dile hogbe lọ “tito nunamẹ homẹdagbe tọn” dohia do, nunina wunmẹ ehelẹ na taun tọn nọ biọ tito bibasi delẹ to adà nunamẹtọ lọ tọn mẹ. Nado gọalọna omẹ dopodopo he to jijlo nado hẹn azọ́n lẹdo aihọn pé Kunnudetọ Jehovah tọn lẹ ehovah tọn lẹ mọaleyi sọn wunmẹ tito nunamẹ homẹdagbe tọn delẹ mẹ, alọnuwe de ko yin awuwlena to Glẹnsigbe po Espagnol-gbè po mẹ he hosọ etọn yin Charitable Planning to Benefit Kingdom Service Worldwide. Alọnuwe lọ yin kinkàn nado na gblọndo hlan kanbiọ susu he ko yin mimọyi na nuhe dù nunina lẹ, po kandai gúmima tọn lẹ po. E sọ bẹ nudọnamẹ yọn-na-yizan a-yizan dogọ lẹ hẹn do tito bibasi do ohọ̀ po aigba po, akuẹ, po takuẹ po ji. Podọ e yin awuwlena nado gọalọna mẹdopodopo to États-Unis he to tito basi nado basi nunina vonọtaun de todin kavi nado jo ogú de do to okú godo nado de aliho alemọyi po dehe yọ́n hugan lọ po to lẹnpọn mẹ na whẹndo yetọn po ninọmẹ mẹdetiti tọn lẹ po. Alọnuwe ehe sọgan yin mimọyi gbọn vọkan dopo bibiọ sọn Wekantẹn Tito Nunamẹ Homẹdagbe tọn dè tlọlọ dali.
To alọnuwe lọ hihia po hodọdopọ hẹ Wekantẹn Tito Nunamẹ Homẹdagbe tọn po godo, mẹsusu ko penugo nado gọalọna Kunnudetọ Jehovah tọn lẹ ehovah tọn lẹ podọ to ojlẹ dopolọ mẹ, ko dè takuẹ he nọ yin bibiọ lẹ pò taun to mọwiwà mẹ. Wekantẹn Tito Nunamẹ Homẹdagbe tọn dona yin didọna podọ dona mọ vọkan dopo kandai depope he gando depope to tito ehelẹ go tọn yí. Eyin hiẹ tindo ojlo to depope to tito nunamẹ homẹdagbe tọn ehelẹ mẹ, hiẹ dona dọnsẹpọ Wekantẹn Tito Nunamẹ Homẹdagbe tọn, vlavo gbọn wekanhlanmẹ kavi alokan dali, to adlẹsi heyin sislẹ to odò kavi to wekantẹn Kunnudetọ Jehovah tọn lẹ ehovah tọn lẹ tọn he nọ penukundo otò mìtọn go mẹ.
WEKANTẸN TITO NUNAMẸ HOMẸDAGBE TỌN
Watch Tower Bible and Tract Society of Pennsylvania
100 Watchtower Drive,
Patterson, New York 12563-9204
Alokan: (845) 306-0707