Be Hiẹ Sọgan Yì Sẹ̀n to Fie Nuhudo Wẹnlatọ Ahọluduta lọ Tọn Sù Hugan te de Ya?

“Mí vò to whenue mí to États-Unis, ṣigba mí nọ hanú dọ gbẹzan agbasanu lẹ bibẹpli tọn he tin to finẹ sọgan wá yinuwado míwlẹ po visunnu mítọn awe lẹ po ji to aliho agọ̀ mẹ. Yẹn po asi ṣie po ko sẹ̀n taidi mẹdehlan pọ́n, podọ mí jlo nado duvivi gbẹzan he bọawu bosọ tindo ayajẹ enẹ tọn whladopo dogọ.”

OJLO enẹ whàn Ralph po Pam po, bọ yé de nado kanwe hlan alahọ susu to 1991 nado do ojlo yetọn nado yì sẹ̀n to fie nuhudo wẹnlatọ Ahọluduta lọ tọn sù hugan te hia. Alahọ Mexique tọn dọna yé dọ nuhudo tin taun na wẹnlatọ Ahọluduta lọ tọn he sọgan dekunnuna mẹhe nọ do Glẹnsigbe to otò enẹ mẹ lẹ. Dile alahọ lọ doayi e go do, ayihaawe ma tin dọ ogle lọ ko “whẹ́n na gbingbẹ̀n.” (Joh. 4:35) To ojlẹ kleun de godo, Ralph po Pam po, gọna visunnu yetọn awe lẹ he tindo owhe 8 po 12 po, kẹalọyi oylọ-basinamẹ lọ bo jẹ awuwle ji nado sẹtẹn yì Mexique.

Aigba-Denamẹ He Gbloada De

Ralph na linlin dọmọ: “Whẹpo mí do tọ́n sọn États-Unis, mẹmẹsunnu po mẹmẹyọnnu delẹ po he tlẹ tindo linlẹn dagbe dọna mí dọ: ‘Tẹnsisẹ yì otò devo mẹ do owù!’ ‘Eyin mì ka wá jẹazọ̀n lo?’ ‘Naegbọn mì na do sẹtẹn yì aigba-denamẹ he nọ do Glẹnsigbe de ji? Glẹnsigbe-dótọ he nọ nọ̀ finẹ lẹ ma na tindo ojlo to nugbo lọ mẹ!’ Ṣigba, mí ko magbe nado yì. Mí saa yọnẹn dọ nudide mítọn ma yin nudide aplà. Mí ko yí owhe susu do wleawu. Mí ko dapana ahọ́ ojlẹ dindẹn tọn dùdù, ko sẹ̀ akuẹ do, bo ko sọ dọhodo nuhahun he mí sọgan pehẹ lẹ ji whlasusu to whẹndo mẹ.”

Jẹnukọn whẹ́, Ralph po whẹndo etọn po dla alahọ Mexique tọn pọ́n. To finẹ, mẹmẹsunnu lẹ do yẹdide otò lọ blebu tọn hia yé bo dọna yé dọ, “Aigba-denamẹ mìtọn die!” Whẹndo lọ de nado nọ̀ San Miguel de Allende, yèdọ tòpẹvi he tin to kilomẹtlu 240 do agewaji-whèyihọ Mexico tọn, fie jonọ susu tin te. To owhe atọ̀n godo, agun Glẹnsigbe tọn he bẹ wẹnlatọ 19 hẹn de yin didoai to tòpẹvi enẹ mẹ. Agun Glẹnsigbe tọn tintan wẹ enẹ yin to Mexique—ṣigba azọ́n susu gbẹ́ pò.

Nudi Amelikanu livi dopo wẹ tin to Mexique. Humọ, azọ́nwatọ po wehọmẹvi Mexique-nu susu po wẹ sọ nọ do Glẹnsigbe. Ralph basi zẹẹmẹ dọmọ: “Mí hodẹ̀ dọ azọ́nwatọ susu ni wá. Mí nọ jo abò dopo do janwẹ na mẹmẹsunnu kavi mẹmẹyọnnu depope he sọgan wá lẹdo mítọn mẹ nado dla aigba lọ pọ́n.”—Osọha 13:2.

Yé Hẹn Gbẹzan Yetọn Bọawu Nado Hẹn Lizọnyizọn Yetọn Gblodeji

E ma dẹn bọ mẹmẹsunnu po mẹmẹyọnnu he jlo na hẹn lizọnyizọn yetọn gblodeji lẹ po jẹ wiwá ji. Delẹ to yé mẹ wẹ Bill po Kathy po sọn États-Unis. Yé ko sẹ̀n na owhe 25 to aigba-denamẹ delẹ ji, fie nuhudo wẹnlatọ lẹ tọn sù te. Yé to linlẹn nado plọn Espagne-gbè, ṣigba tito yetọn diọ to whenuena yé sẹtẹn yì tòpẹvi Ajijic tọn mẹ to otọ̀ Chapala tó fie mẹhe wá sọn États-Unis lẹ yiwanna nado nọ̀. Bill basi zẹẹmẹ dọ, “To Ajijic, mí nọ dovivẹnu nado dín mẹhe nọ do Glẹnsigbe bo jlo na plọn nugbo lẹ mọ.” Nudi owhe awe to wiwá yetọn godo, homẹ hùn Bill po Kathy po nado mọdọ agun de yin didoai—yèdọ agun Glẹnsigbe tọn awetọ to Mexique.

Ken po Joanne po he nọ nọ̀ Canada jlo na hẹn gbẹzan yetọn bọawu nado yí whenu susu zan dogọ to nuwiwa Ahọluduta lọ tọn lẹ mẹ. Yelọsu sẹtẹn yì Mexique. Ken na linlin dọ, “E nọ biọ whenu nado jẹakọ hẹ lẹdo de he mẹ e nọ vẹawu nado mọ osin míawu, miyọ́n lẹtliki tọn kavi alokan zan te na azán susu.” Ṣigba, mahẹ tintindo to azọ́n yẹwhehodidọ tọn lọ mẹ yin asisa ayajẹ tọn de. E ma dẹn bọ Ken yin pipà taidi devizọnwatọ lizọnyizọnwiwa tọn, podọ to owhe awe godo, taidi mẹho de. To bẹjẹeji, e vẹawuna viyọnnu yetọn Britanny nado voawu to agun Glẹnsigbe tọn pẹvi he bẹ jọja vude hẹn de mẹ. Ṣigba, to whenuena e jẹ mahẹ tindo ji to Plitẹnhọ Ahọluduta tọn lẹ gbigbá mẹ, e jihọntọn dagbe susu to otò lọ blebu mẹ.

Homẹ hùn Patrick po Roxanne po he nọ nọ̀ Texas to États-Unis nado sè dogbọn aigba-denamẹ he ma dẹn do otò yetọn de dali, fie gbẹtọ lẹ nọ do Glẹnsigbe te. “To whenue mí dla Monterrey, yèdọ tòpẹvi he tin to agewaji-whèzẹtẹn Mexique tọn de pọ́n godo, mí mọdọ Jehovah wẹ to anadena mí nado gọalọ to finẹ,” wẹ Patrick dọ. To azán atọ́n gblamẹ, yé sà owhé yetọn he tin to Texas bo yì Mexique. E ma bọawu nado mọ azọ́n to Mexique, ṣigba to owhe awe poun gblamẹ, homẹ yetọn hùn nado mọ kándo he bẹ Kunnudetọ 17 hẹn de jideji bo lẹzun agun he tindo wẹnlatọ 40.

Asu po asi po devo sọ wẹ Jeff po Deb po, he hẹn gbẹzan yetọn bọawu nado hẹn lizọnyizọn yetọn gblodeji. Yé sà owhé daho yetọn to États-Unis bo sẹtẹn yì owhé pẹvi de mẹ to Cancún, yèdọ tòdaho he tin to huto to whèzẹtẹn Mexique tọn de. Ohọ̀ dagbedagbe he mẹ zomọ he nọ fá họmẹ tin te he ma dẹn do owhé yetọn gbè de mẹ wẹ yé nọ basi plidopọ te dai. Todin, yé dona basi gbejizọnlin na ganhiho ṣinatọ̀n nado yì plidopọ Glẹnsigbe tọn he sẹpọ yé hugan to aihundatẹn he ma tindo họta de mẹ. Ṣigba, homẹhun yé tlala nado mọdọ agun he bẹ wẹnlatọ 50 hẹn de yin didoai to Cancún.

Mẹmẹsunnu po mẹmẹyọnnu Mexique tọn delẹ po jẹ alọgọ ji ga to azọ́n yẹwhehodidọ tọn lọ mẹ to Glẹnsigbe mẹ. Di apajlẹ, to whenuena Rubén po whẹndo etọn po sè dọ agun Glẹnsigbe tọn tintan ko yin didoai to San Miguel de Allende bọ Mexique blebu wẹ yin aigba-denamẹ agun enẹ tọn, yé basi dide to afọdopolọji nado yì gọalọ. Ehe zẹẹmẹdo dọ yé na plọn Glẹnsigbe, jẹakọ hẹ aṣa devo, bo basi gbejizọnlin gaa, yèdọ kilomẹtlu 800 to osẹ dopodopo mẹ nado yì opli lẹ. Rubén na linlin dọ: “Mí tindo ayajẹ nado dekunnuna jonọ he ko nọ̀ Mexique na owhe susu, ṣigba he ma ko sè wẹndagbe lọ to ogbè yetọn titi mẹ pọ́n lẹ. Dasin nọ wayi do delẹ to yé mẹ eyin yé to pinpẹn-nutọn-yinyọnẹn yetọn dohia mí.” To whenuena Rubén po whẹndo etọn po ko gọalọ to agun he tin to San Miguel de Allende godo, yé sẹ̀n to Guanajuato, to ṣẹnṣẹn Mexique tọn, fie yé gọalọ nado do agun Glẹnsigbe tọn he tindo wẹnlatọ he hugan 30 de ai te. To egbehe, yé to sinsẹ̀n to kándo Glẹnsigbe tọn de mẹ to Irapuato, yèdọ tòpẹvi de he sẹpọ Guanajuato.

Wẹndagbe lọ Hinhẹn jẹ Mẹhe E Nọ Vẹawu Nado Mọ lẹ Dè

Gbọnvona jonọ lẹ, Mexique-nu susu wẹ nọ do Glẹnsigbe. E nọ saba vẹawu nado hẹn owẹ̀n Ahọluduta lọ tọn jẹ yé dè, na lẹdo adọkunnọ lẹ tọn mẹ wẹ yé nọ nọ̀, fie deviyọnnu lẹ nọ hùnhọ̀n na jonọ te. Kavi eyin whétọ lẹ tlẹ hùnhọ̀n janwẹ, yé ma nọ dike nado sè owẹ̀n mítọn na yé nọ lẹndọ Kunnudetọ Jehovah tọn lẹ yin hagbẹ klandovo sinsẹ̀n lẹdo lọ tọn de tọn. Etomọṣo, eyin Kunnudetọ he wá sọn otò devo mẹ lẹ wá yé dè, delẹ to yé mẹ nọ dotoai.

Lẹnnupọndo apajlẹ Gloria tọn ji he nọ nọ̀ tòdaho Querétaro tọn mẹ to ṣẹnṣẹn Mexique tọn. E basi zẹẹmẹ dọmọ: “Kunnudetọ he nọ do Espagne-gbè lẹ ko lá wẹndagbe lọ na mi pọ́n bọ n’ma dotoaina yé. Ṣigba, to whenuena whẹndo po họntọn ṣie lẹ po jẹ nuhahun delẹ tindo ji, n’jẹflumẹ sọmọ bọ n’lẹhlan Jiwheyẹwhe to odẹ̀ mẹ bo vẹ̀ ẹ nado gọalọna mi. To ojlẹ vude godo, yọnnu he nọ do Glẹnsigbe de wá dla mí pọ́n. E kanse eyin mẹde sè Glẹnsigbe to owhé mítọn gbè. Na e yin jonọ de wutu, n’tindo ojlo nado sè nuhe na dọ e te, bọ n’dọna ẹn dọ n’sè Glẹnsigbe. Dile e to hodọ, n’to linlẹn to ayiha ṣie mẹ dọ, ‘Etẹwẹ Amelika-nu ehe wá dín to okọ́ ṣie mẹ?’ Ṣigba, na n’ko biọ alọgọ Jiwheyẹwhe tọn jẹnukọn wutu, n’lẹndọ jonọ ehe wẹ Jiwheyẹwhe na ko dohlan nado na gblọndo odẹ̀ ṣie.” Gloria kẹalọyi plọnmẹ Biblu bo zindonukọn po awuyiya po jẹ baptẹm kọ̀n mahopọnna nukundiọsọmẹ whẹndo etọn tọn. To egbehe, Gloria to sinsẹ̀n taidi gbehosọnalitọ whepoponu tọn bọ asu etọn po visunnu etọn po sọ to Jehovah sẹ̀n.

Ale He Mẹhe Hẹn Lizọnyizọn Yetọn Gblodeji lẹ Nọ Mọ

Nugbo wẹ dọ e ma nọ bọawu nado yì sẹ̀n to fie nuhudo wẹnlatọ Ahọluduta lọ tọn lẹ sù te, ṣigba ale he nọ wá sọn e mẹ lẹ sù. Ralph he yin nùdego to bẹjẹeji dọmọ: “Mí nọ plọn Biblu hẹ mẹhe wá sọn Chine, Grande-Bretagne, Jamaïque, Suède kakajẹ Ghana-nù nukundeji lẹ ji. Delẹ to Biblu plọntọ ehelẹ mẹ biọ sinsẹ̀nzọn whenu-gigọ́ tọn mẹ. To owhe he wayi lẹ gblamẹ, whẹndo mítọn ko yí nukun do mọ agun Glẹnsigbe tọn ṣinawe yin didoai. Visunnu mítọn lẹ lọsu bẹ azọ́n gbehosọnalitọ tọn jẹeji hẹ mí, podọ yé to devizọnwa to Bẹtẹli États-Unis tọn to alọnu din.”

Agun Glẹnsigbe tọn 88 po kándo susu po wẹ tin to Mexique to egbehe. Etẹwẹ hẹn jideji enẹ yọnbasi? Susu mẹhe nọ do Glẹnsigbe to Mexique lẹ tọn wẹ ma ko dukosọ hẹ Kunnudetọ lẹ pọ́n dai. Mẹdevo lẹ nọ dotoai, na nuyiwadomẹji hagbẹ tọn he na ko glọnalina yé to otò yetọn mẹ lẹ ma tin tofi wutu. Podọ, mẹdevo lẹ kẹalọyi Biblu pinplọn na yé ko yí gbọjẹ gaa bo tindo whenu nado doafọna gbigbọnu lẹ. Humọ, hugan madatọ̀n wẹnlatọ he tin to agun Glẹnsigbe tọn mẹ lẹ tọn wẹ yin gbehosọnalitọ, podọ ehe yidogọna zohunhun po jideji agun enẹlẹ tọn po.

Dona He to Tepọn We Lẹ

Ayihaawe ma tin dọ, mẹsusu lẹdo aihọn pé wẹ na dotoai eyin yé sè owẹ̀n Ahọluduta lọ tọn to ogbè yetọn mẹ. Enẹwutu, ayajẹnu de wẹ e yin nado yọnẹn dọ mẹmẹsunnu po mẹmẹyọnnu gbigbọnọ susu po—yèdọ jọja po mẹho po, tlẹnnọ po alọwlemẹ lẹ po—wẹ tindo ojlo lọ nado yì sẹ̀n to fie nuhudo wẹnlatọ Ahọluduta lọ tọn lẹ sù te. Nugbo wẹ dọ yé sọgan pehẹ nuhahun lẹ, ṣigba nuhahun ehelẹ ma sọtẹ́n yijlẹdo ayajẹ he yé nọ tindo to whenue gbẹtọ ahunjijlọnọ lẹ kẹalọyi nugbo Biblu tọn lẹ go. Be hiẹ sọgan basi diọdo he na hẹn we penugo nado sẹtẹn yì aigba-denamẹ de ji to otò towe mẹ kavi to tògodo fie nuhudo wẹnlatọ Ahọluduta lọ tọn lẹ sù hugan te ya?a (Luku 14:28-30; 1 Kọl. 16:9) Eyin hiẹ wàmọ, hiẹ na mọ dona susu.

[Nudọnamẹ odò tọn]

[Apotin to weda 21]

Ayajẹ Gbọjẹ Gaa Yitọ lẹ Tọn Dọ̀n Ayidonugo

Beryl sẹtẹn sọn Grande-Bretagne yì Canada. To finẹ, e wazọ́n taidi ogán na azọ́nwhé tògodo tọn susu. Yọnnu ehe sọ lẹzun osọ́-kùntọ akonka de bo tlẹ yin dide nado ze afọ Canada tọn dai to agbàwhinwhlẹn Olympique 1980 tọn whenu. To whenue Beryl po asu etọn po yí gbọjẹ gaa tlolo, bo sẹtẹn yì Chapala to Mexique, yé nọ saba dùnú to núdùdù-satẹn lẹdo lọ tọn lẹ. Eyin e doayi gbọjẹ gaa yitọ he nọ do Glẹnsigbe bo tindo ayajẹ lẹ go, e nọ do ede hia yé bo nọ kàn nuhe yé wá wà to Mexique sè yé. Dibla yindọ omẹ ayajẹnọ he e nọ saba dukosọ hẹ to núdùdù-satẹn ehelẹ wẹ nọ yin Kunnudetọ Jehovah tọn lẹ. Beryl po asu etọn po mọdọ eyin Jiwheyẹwhe yinyọnẹn wẹ nọ hẹnmẹ tindo ayajẹ po lẹndai de po to gbẹ̀mẹ, be yelọsu na jlo nado yọ́n Jiwheyẹwhe enẹ. To whenuena Beryl ko yì opli Klistiani tọn lẹ na osun susu godo, e kẹalọyi nupinplọn bo wá lẹzun Kunnudetọ de. Beryl sẹ̀n taidi gbehosọnalitọ whepoponu tọn na owhe susu.

[Apotin to weda 22]

“Dona de Wẹ Yé Yin to Ṣẹnṣẹn Mítọn”

Mẹmẹsunnu he to lẹdo he mẹ mẹhe sẹtẹn yì fie nuhudo wẹnlatọ Ahọluduta lọ tọn sù hugan te lẹ nọ yọ́n pinpẹn yetọn taun. Wekantẹn Alahọ Caraïbe tọn wlan dọmọ: “Eyin jonọ susu he to sinsẹ̀nzọnwa to file lẹ wá yì sọn fi, agun susu wẹ na jẹdò yetọn taun. Dona de wẹ yé yin to ṣẹnṣẹn mítọn.”

Ohó Jiwheyẹwhe tọn dọ dọ “yọnnusi he to owẹ̀n lọ lá lẹ yin agun daho de.” (Ps. 68:11) Enẹwutu, e ma yin nupaṣamẹ dọ mẹmẹyọnnu tlẹnnọ susu wẹ to sinsẹ̀n to tògodo. Mẹmẹyọnnu he nọ yí yede do sanvọ́ ehelẹ nọ gọalọ taun. Alahọ de to Whèzẹtẹn-waji Europe tọn dọ dọ: “To susu agun mítọn lẹ tọn mẹ, mẹmẹyọnnu lẹ wẹ nọ sù hugan, podọ to whedelẹnu to sọha wẹnlatọ lẹ tọn mẹ, yé nọ yì 70 to kanweko ji. Suhugan yetọn wẹ ṣẹṣẹ mọ nugbo, ṣigba mẹmẹyọnnu gbehosọnalitọ tlẹnnọ he wá sọn otò devo mẹ lẹ nọ gọalọ taun nado plọnazọ́n mẹyọyọ enẹlẹ. Na taun tọn, nunina de wẹ mẹmẹyọnnu he wá sọn tògodo ehelẹ yin!”

Etẹwẹ nọ yin numọtolanmẹ mẹmẹyọnnu enẹlẹ tọn gando sinsẹ̀nzọnwiwa to tògodo go? “Nuhahun lẹ nọ sù,” wẹ Angelica, mẹmẹyọnnu he tindo owhe 35 nkọ bo ko to sinsẹ̀n to tògodo taidi gbehosọnalitọ tlẹnnọ na owhe susu de dọ. “To aigba-denamẹ de ji, e nọ vẹawuna mi egbesọegbesọ nado zinzọnlin gbọn ogbọ̀n mẹ, podọ oyà he ji gbẹtọ lẹ te nọ blawuna mi taun. Ṣigba, homẹ nọ hùn mi nado gọalọna mẹdevo lẹ to lizọnyizọn lọ mẹ. Lehe mẹmẹyọnnu he tin to lẹdo lọ mẹ lẹ nọ yọ́n pinpẹn alọgọ he wiwá ṣie yin na yé tọn do nọ yinuwado jie taun. Mẹmẹyọnnu de dọna mi dọ apajlẹ he n’zedai nado tọ́n sọn otò ṣie mẹ gbọ́n wá otò etọn mẹ nado sẹ̀n taidi gbehosọnalitọ wẹ whàn ewọ lọsu nado doalọ to sinsẹ̀nzọn whenu-gigọ́ tọn mẹ.”

Sue, he tindo owhe 50 linlán dọmọ: “Hiẹ na pehẹ nuhahun lẹ janwẹ, ṣigba yé ma na sọtẹ́n yijlẹdo dona he a na mọ lẹ go. Lizọnyizọn lọ nọ hẹn ayajẹ wá taun! Na n’nọ yí whenu susu zan to sinsẹ̀nzọn lọ mẹ hẹ mẹmẹyọnnu jọja lẹ wutu, n’nọ penugo nado dọ nuhe n’plọn sọn Biblu po owe mítọn lẹ po mẹ na yé gando lehe mí sọgan duto aliglọnnamẹnu lẹ ji do go. Yé nọ saba dọna mi dọ lehe n’nọ penugo nado duto nuhahun ṣie lẹ ji dile n’to sinsẹ̀n taidi gbehosọnalitọ tlẹnnọ de na owhe susu gbọn, nọ gọalọna yé nado mọdọ yelọsu sọgan duto avùnnukundiọsọmẹnu yetọn lẹ ji. Alọgigọna mẹmẹyọnnu ehelẹ nọ hẹn ayajẹ wá na mi taun.”

[Yẹdide otò tọn 20]

(Nado mọ yẹdide lọ ganji, pọ́n zinjẹgbonu lọ)

MEXIQUE

Monterrey

Guanajuato

Irapuato

Ajijic

Chapala

Otọ̀ Chapala

San Miguel de Allende

Querétaro

MEXICO

Cancún

[Yẹdide to weda 23]

Mẹdelẹ tindo ayajẹ nado dekunnuna jonọ he ma ko sè wẹndagbe lọ pọ́n lẹ