Hodo Aliho Gbẹzan Tọn He Yọ́n Hugan Lọ!
“Eyin mí to ogbẹ̀ podọ eyin mí kú, Jehovah tọn wẹ mí yin.”—LOM. 14:8.
1. Etẹwẹ Jesu plọnmẹ gando aliho gbẹzan tọn he yọ́n hugan lọ go?
JEHOVAH jlo dọ mí ni duvivi gbẹzan he yọ́n hugan tọn. Aliho voovo mẹ wẹ gbẹtọ lẹ nọ zan gbẹzan yetọn te, ṣigba aliho gbẹzan tọn dopo gee wẹ yọ́n hugan. Nude ma yọ́n hugan nado hẹn gbẹzan mítọn tin to kọndopọ mẹ hẹ Ohó Jiwheyẹwhe tọn bo plọnnu sọn Ovi etọn, Jesu Klisti dè. Jesu plọn hodotọ etọn lẹ nado nọ sẹ̀n Jiwheyẹwhe to gbigbọ mẹ podọ to nugbo mẹ, podọ e sọ deazọ́nna yé nado hẹn gbẹtọ lẹ zun devi. (Mat. 28:19, 20; Joh. 4:24) Eyin mí nọ nọgbẹ̀ sọgbe hẹ anademẹ Jesu tọn lẹ, mí na hẹn homẹ Jehovah tọn hùn bo na duvivi dona Etọn tọn.
2. Nawẹ mẹsusu yinuwa gbọn to whenue yé sè owẹ̀n Ahọluduta lọ tọn to owhe kanweko tintan whenu, podọ etẹwẹ e zẹẹmẹdo nado yin “Aliho Lọ” tọn?
2 To whenuena “mẹhe tindo ninọmẹ ahun mẹ tọn he jẹna ogbẹ̀ madopodo lẹ” lẹzun yisenọ bo yí baptẹm, mí nọ tindo whẹwhinwhẹ́n dagbe nado dotuhomẹna yé nado “Hodo aliho gbẹzan tọn he yọ́n hugan lọ!” (Owalọ 13:48) To owhe kanweko tintan W.M., gbẹtọ fọtọ́n susu sọn akọta voovo lẹ mẹ wẹ kẹalọyi nugbo lọ bo do mẹdezejo yetọn na Jiwheyẹwhe hia to gbangba gbọn baptẹm yíyí dali. (Owalọ 2:41) Gbọnmọ dali, devi dowhenu tọn enẹlẹ yin “Aliho Lọ” tọn. (Owalọ 9:2; 19:23) Hogbe ehe sọgbe, na mẹhe lẹzun hodotọ Klisti tọn lẹ nọ zan gbẹzan yetọn to kọndopọ mẹ hẹ yise he yé tindo to Jesu Klisti mẹ bo nọ hodo apajlẹ etọn wutu.—1 Pita 2:21.
3. Naegbọn omẹ Jehovah tọn lẹ nọ yí baptẹm, podọ omẹ nẹmu wẹ ko wàmọ to owhe ao agọe tọn mẹ?
3 Azọ́n mẹhẹnzun devi tọn lọ ko yinukọn taun to azán godo tọn ehelẹ mẹ, podọ e to yinyin wiwà to aigba he hugan 230 ji todin. To owhe ao he wayi lẹ gblamẹ, gbẹtọ he hugan 2700000 wẹ ko basi nudide nado sẹ̀n Jehovah bo yí baptẹm to yẹhiadonu klandowiwe yetọn tọn hlan ẹn mẹ. Enẹ yin madozẹnzẹn gbẹtọ he hugan 5000 tọn to osẹ dopodopo mẹ! Nudide yetọn nado yí baptẹm sinai do owanyi na Jehovah, oyọnẹn Biblu tọn, podọ yise tintindo to nuhe e plọnmẹ lẹ mẹ ji. Baptẹm yin afọdide tangan de to gbẹzan mítọn mẹ, na e nọ dohia dọ mí bẹ haṣinṣan pẹkipẹki de jẹeji hẹ Jehovah. E sọ nọ dohia dọ mí tindo jide dọ Jehovah na gọalọna mí nado sẹ̀n ẹn po nugbonọ-yinyin po dile e wà na devizọnwatọ hohowhenu tọn etọn lẹ nado zinzọnlin to aliho etọn ji do.—Isa. 30:21.
Naegbọn Hiẹ Dona Yí Baptẹm?
4, 5. Donù dona po ale he baptẹm yíyí nọ hẹnwa delẹ po go.
4 Vlavo hiẹ ko tindo oyọnẹn Jiwheyẹwhe tọn, bo basi diọdo lẹ to gbẹzan towe mẹ, bosọ lẹzun wẹnlatọ he ma ko yí baptẹm de todin. Eyin mọwẹ, hiẹ jẹna pipà taun. Ṣigba be hiẹ ko basi klandowiwe na Jiwheyẹwhe to odẹ̀ mẹ, bo to linlẹn nado yí baptẹm ya? Po nuhe a plọn to Biblu mẹ lẹ po, e yọnbasi dọ a na ko yọnẹn dọ a dona yí gbẹzan towe pete do pagigona Jehovah, kakati nado hẹn homẹ dewetiti tọn hùn kavi nado bẹ agbasanu lẹ pli. (Hia Psalm 148:11-13; Luku 12:15) To whelọnu lo, dona po ale tẹlẹ po wẹ nọ wá sọn baptẹm yíyí mẹ?
5 Taidi Klistiani klandowiwe de, gbẹzan towe na tindo lẹndai dagbe hugan. Hiẹ na tindo ayajẹ na a to ojlo Jiwheyẹwhe tọn wà wutu. (Lom. 12:1, 2) Gbigbọ wiwe Jehovah tọn na gọalọna we nado wleawuna jẹhẹnu delẹ taidi jijọho po yise po. (Gal. 5:22, 23) Jiwheyẹwhe na sè odẹ̀ towe lẹ bo dona vivẹnudido towe lẹ nado hẹn gbẹzan towe sọgbe hẹ Ohó etọn. Hiẹ na mọ ayajẹ to lizọnyizọn towe mẹ, podọ gbẹninọ sọgbe hẹ ojlo Jiwheyẹwhe tọn na hẹn todido towe to ogbẹ̀ madopodo mẹ lodo. Humọ, klandowiwe bibasi po baptẹm yíyí po na dohia dọ hiẹ jlo nugbonugbo nado yin dopo to Kunnudetọ Jehovah tọn lẹ mẹ.—Isa. 43:10-12.
6. Etẹwẹ baptẹm mítọn nọ dohia?
6 Mídelẹ kinklan do wiwe na Jiwheyẹwhe po baptẹm yíyí po nọ dohia dọ mí ko lẹzun Jehovah tọn. Apọsteli Paulu wlan dọmọ: “Depope to mí mẹ ma nọ nọgbẹ̀ na edetiti kẹdẹ, podọ mẹdepope ma nọ kú na edetiti kẹdẹ; na eyin mí to ogbẹ̀, mí to ogbẹ̀ na Jehovah, podọ eyin mí kú, mí kú na Jehovah. Enẹwutu, eyin mí to ogbẹ̀ podọ eyin mí kú, Jehovah tọn wẹ mí yin.” (Lom. 14:7, 8) Jiwheyẹwhe ko doyẹyigona mí gbọn mẹdekannujẹ nudide bibasi tọn nina mí dali. Eyin mí magbe nado doafọna aliho gbẹzan tọn ehe na mí yiwanna Jiwheyẹwhe wutu, mí na hẹn homẹ etọn hùn. (Howh. 27:11) Baptẹm mítọn nọ dohia dọ mí klan míde do wiwe na Jiwheyẹwhe podọ e yin dohia gbeyiyi gbangba tọn dọ Jehovah wẹ Ahọlu mítọn. E nọ dohia dọ mí to godonọna ẹn to whẹho nupojipetọ-yinyin wẹkẹ tọn lọ mẹ. (Owalọ 5:29, 32) Taidi kọdetọn de, Jehovah lọsu nọ nọgodona mí. (Hia Psalm 118:6.) Baptẹm sọ nọ hùn dotẹnmẹ dotena mí nado mọ dona gbigbọmẹ tọn susu devo lẹ yí todin podọ to sọgodo.
Yé Yin Apadewhe Pipli Mẹmẹsunnu Lẹdo Aihọn Pé Tọn De
7-9. (a) Jide tẹwẹ Jesu na mẹhe jo onú lẹpo do bo hodo e lẹ? (b) Nawẹ opagbe he Jesu do to Malku 10:29, 30 mẹ to hẹndi mọyi gbọn?
7 Apọsteli Pita dọna Jesu dọmọ: “Pọ́n! Míwlẹ ko jo onú lẹpo do bo hodo we; etẹwẹ mí na mọyi sọn e mẹ taun?” (Mat. 19:27) Pita jlo na yọ́n nuhe tin to sẹdotẹnmẹ na ewọ po devi Jesu tọn he pò lẹ po. Yé ko yí nususu do sanvọ́ nado sọgan tindo mahẹ gigọ́ to azọ́n yẹwhehodidọ Ahọluduta lọ tọn mẹ. (Mat. 4:18-22) Jide tẹwẹ Jesu na yé?
8 Sọgbe hẹ kandai Malku lọsu tọn, Jesu dohia dọ devi emitọn lẹ na lẹzun apadewhe pipli mẹmẹsunnu gbigbọmẹ tọn lẹ tọn de. E dọmọ: “Mẹdepope ma tin he jo owhé kavi nọvisunnu lẹ kavi nọviyọnnu lẹ kavi onọ̀ kavi otọ́ kavi ovi lẹ kavi aigba lẹ do na yẹn tọn podọ na wẹndagbe lọ tọn wutu he ma na mọ donu kanweko to ojlẹ ehe mẹ todin, owhé lẹ, nọvisunnu lẹ, nọviyọnnu lẹ, onọ̀ lẹ, ovi lẹ, po aigba lẹ po, gọna homẹkẹn lẹ, podọ ogbẹ̀ madopodo to titonu he ja mẹ.” (Malku 10:29, 30) Klistiani owhe kanweko tintan tọn lẹ taidi Lidia, Akuila, Pliskila, po Gaiu po tin to mẹhe ze “owhé” yetọn jo na yisenọ hatọ lẹ mẹ, bo gbọnmọ dali lẹzun ‘nọvisunnu lẹ, nọviyọnnu lẹ, po onọ̀ lẹ po’ na yé, dile Jesu dopagbe etọn do.—Owalọ 16:14, 15; 18:2-4; 3 Joh. 1, 5-8.
9 Nuhe Jesu dọ lẹ to hẹndi mọyi to aliho he gbloada mẹ to egbehe. “Aigba” he hodotọ etọn lẹ jodo dlẹnalọdo agbasazọ́n he mẹsusu, gọna mẹdehlan lẹ, hagbẹ whẹndo Bẹtẹli tọn lẹ, devizọnwatọ tògodo tọn lẹ, po mẹdevo lẹ po desọn ojlo mẹ bo jodo nado yì sẹ̀n to otò devo lẹ mẹ na nukọnyiyi Ahọluduta lọ tọn wutu. Mẹmẹsunnu po mẹmẹyọnnu susu po wẹ ko jo owhé yetọn lẹ do nado sọgan hẹn gbẹzan yetọn bọawu, podọ homẹ mítọn nọ hùn nado sè numimọ yetọn gando lehe Jehovah nọ penukundo yé go bọ sinsẹ̀nzọn yetọn nọ hẹn ayajẹ wá na yé do go. (Owalọ 20:35) Humọ, taidi apadewhe pipli mẹmẹsunnu lẹ tọn lẹdo aihọn pé, devizọnwatọ Jehovah tọn he ko yí baptẹm lẹpo wẹ sọgan mọaleyi, eyin yé “to ahọluduta [Jiwheyẹwhe tọn] po dodowiwa etọn po dín whẹ́.”—Mat. 6:33.
Hihọ́ Mimọ to “Fiwhiwhlá” lọ Mẹ
10, 11. Etẹwẹ yin “fiwhiwhlá Gigogán tọn” lọ, podọ nawẹ mí sọgan biọ e mẹ gbọn?
10 Klandowiwe po baptẹm po sọ nọ hẹn dona titengbe devo wá—enẹ wẹ lẹblanulọkẹyi lọ nado nọ “fiwhiwhlá Gigogán tọn” mẹ. (Hia Psalm 91:1.) Ehe yin nọtẹn hihọ́ tọn de to yẹhiadonu-liho—yèdọ ninọmẹ hihọ́-basinamẹ tọn sọn awugble gbigbọmẹ tọn si. E yin “fiwhiwhlá” de, na mẹhe ma tindo oyọnẹn gbigbọmẹ tọn bo ma nọ dejido Jiwheyẹwhe go lẹ ma sọgan mọ ẹn wutu. Eyin mí nọ nọgbẹ̀ sọgbe hẹ klandowiwe mítọn bo nọ dejido Jehovah go mlẹnmlẹn, mí to didọna ẹn to linlẹn de mẹ dọmọ: ‘Hiẹ wẹ fibẹtado ṣie podọ figángán ṣie: Jiwheyẹwhe ṣie; hiẹ go wẹ yẹn na dotudo.’ (Ps. 91:2) Jehovah Jiwheyẹwhe wẹ nọtẹn hihọ́ tọn mítọn. (Ps. 91:9) Be nude sọ yọ́n hugan enẹ ya?
11 Mí dona wleawuna haṣinṣan pẹkipẹki de hẹ Jehovah nado sọgan biọ “fiwhiwhlá” etọn mẹ. Ehe nọ bẹjẹeji to whenue mí klan míde do wiwe bo yí baptẹm. Enẹgodo, mí nọ hẹn haṣinṣan mítọn hẹ Jiwheyẹwhe lodo dogọ bo nọ dọnsẹpọ ẹ gbọn Biblu pinplọn, odẹ̀ ahundopo tọn hihò, po tonusise mlẹnmlẹn na ẹn po dali. (Jak. 4:8) Mẹdepope ma ko dọnsẹpọ Jehovah sọ Jesu pọ́n, mẹhe jidide etọn to Mẹdatọ lọ mẹ ma depò gbede. (Joh. 8:29) Enẹwutu, mì dike mí tindo ayihaawe do Jehovah kavi ojlo etọn gọna nugopipe etọn nado gọalọna mí nado hẹn opà klandowiwe mítọn tọn di go gbede blo. (Yẹwh. 5:4) Awuwledainanu gbigbọmẹ tọn he Jiwheyẹwhe hẹn tin-to-aimẹ na omẹ etọn lẹ yin kunnudenu dolido de dọ e yiwanna mí nugbonugbo bo jlo dọ mí ni tindo kọdetọn dagbe to sinsẹ̀n-bibasi mítọn mẹ.
Yọ́n Pinpẹn Paladisi Gbigbọmẹ Tọn Mítọn Tọn
12, 13. (a) Etẹwẹ paladisi gbigbọmẹ tọn lọ yin? (b) Nawẹ mí sọgan gọalọna mẹyọyọ lẹ gbọn?
12 Klandowiwe po baptẹm po sọ nọ hùn dotẹnmẹ dotena mí nado duvivi paladisi gbigbọmẹ tọn. Paladisi ehe yin ninọmẹ vonọtaun gbigbọmẹ tọn he mí nọ duvivi etọn hẹ yisenọ hatọ he tin to jijọho mẹ hẹ Jehovah Jiwheyẹwhe podọ hẹ ode awetọ yetọn. (Ps. 29:11; Isa. 54:13) Aihọn lọ ma tindo nudepope he sọgan yin yiyijlẹdo paladisi gbigbọmẹ tọn mítọn go. Na taun tọn, mí nọ mọ ehe to plidopọ akọjọpli tọn lẹ tẹnmẹ, fie mẹmẹsunnu po mẹmẹyọnnu mítọn lẹ po he wá sọn otò, akọ̀ po ogbè voovo lẹ po mẹ nọ kọnawudopọ to jijọho, pọninọ, po owanyi mẹmẹsunnu tọn po mẹ te.
13 Paladisi gbigbọmẹ tọn he mí nọ duvivi etọn gbọnvo pete na ninọmẹ ylankan he tin to aihọn lọ mẹ to egbehe. (Hia Isaia 65:13, 14.) Gbọn owẹ̀n Ahọluduta lọ tọn lilá dali, mí tindo lẹblanulọkẹyi lọ nado basi oylọna mẹdevo lẹ nado wá biọ paladisi gbigbọmẹ tọn lọ mẹ. Ayajẹnu wẹ e sọ yin nado nọ gọalọna mẹhe ṣẹṣẹ kọnawudopọ hẹ agun lọ bo jlo na mọaleyi sọn azọ́nplọnmẹ lizọnyizọn lọ tọn mẹ lẹ. To anademẹ mẹho agun tọn lẹ tọn glọ, mí sọgan tindo lẹblanulọkẹyi lọ nado gọalọna mẹyọyọ delẹ kẹdẹdile Akuila po Pliskila po “hẹn aliho Jiwheyẹwhe tọn họnwun” hezeheze na Apolo do.—Owalọ 18:24-26.
To Nuplọn sọn Jesu dè Zọnmii
14, 15. Whẹwhinwhẹ́n dolido tẹlẹ wẹ mí tindo nado to nuplọn sọn Jesu dè zọnmii?
14 Mí tindo whẹwhinwhẹ́n dolido susu nado to nuplọn sọn Jesu dè zọnmii. Whẹpo Jesu do wá aigba ji, e ko yí owhe fọtọ́n susu do wazọ́n dopọ hẹ Otọ́ etọn. (Howh. 8:22, 30) E yọnẹn dọ aliho gbẹzan tọn he yọ́n hugan lọ wẹ nado sẹ̀n Jiwheyẹwhe bo dekunnu gando nugbo lọ go. (Joh. 18:37) Jesu mọnukunnujẹemẹ dọ aliho gbẹzan tọn devo hihodo na taidi ṣejannabi tọn, po ojlẹ gli po tọn. E yọnẹn dọ emi na jugbọn whlepọn sinsinyẹn mẹ bo na yin hùhù. (Mat. 20:18, 19; Heb. 4:15) Taidi Apajlẹnọ mítọn, e plọn mí lehe mí sọgan hẹn tenọgli go do.
15 Ojlẹ kleun de to baptẹm Jesu tọn godo, Satani whlé e pọ́n na e nido gbẹ́ aliho gbẹzan tọn he yọ́n hugan lọ dai—ṣigba e ma pà ẹ. (Mat. 4:1-11) Ehe plọn mí dọ mahopọnna nudepope he wà Satani te, mí sọgan hẹn tenọgli go. E sọgan ze ayidonugo etọn do mẹhe jlo na yí baptẹm lẹ po mẹhe ṣẹṣẹ yí baptẹm lẹ po ji. (1 Pita 5:8) Hẹnnumẹ mítọn he ko sèhó agọ̀ gando Kunnudetọ Jehovah tọn lẹ go de sọgan diọnukunsọ mí po linlẹn lọ po dọ dagbe wà na mí wẹ e te. Etomọṣo, whlepọn mọnkọtọn lẹ nọ hùn dotẹnmẹ dotena mí nado do jẹhẹnu Klistiani tọn lẹ, taidi sisi po zinzin po hia to whenue mí to gblọndo kanbiọ lẹ tọn na podọ to whenue mí to kunnude. (1 Pita 3:15) Gbọnmọ dali, numimọ ehelẹ sọgan yinuwado mẹhe dotoaina mí lẹ ji to aliho dagbe mẹ.—1 Tim. 4:16.
Gbọṣi Aliho Gbẹzan Tọn He Yọ́n Hugan lọ Ji!
16, 17. (a) Nubiọtomẹsi tangan atọ̀n he na zọ́n bọ mẹde nado nọgbẹ̀ tẹlẹ wẹ tin to Deutelonomi 30:19, 20 mẹ? (b) Nawẹ Jesu, Johanu, po Paulu po nọgodona nuhe Mose wlan gbọn?
16 Nudi owhe 1500 whẹpo Jesu do wá aigba ji, Mose dotuhomẹna Islaelivi lẹ nado de aliho gbẹzan tọn he yọ́n hugan lọ to whenẹnu. E dọmọ: “Yẹn ylọ olọn po aigba po nado dekunnu do mì ji to egbehe, dọ yẹn ko ze ogbẹ̀ po okú po, dona lọ po dẹ̀hodo lọ po do nukọn towe: enẹwutu de ogbẹ̀, na hiẹ nido gán, hiẹ po okún towe po: nado nọ yiwanna OKLUNỌ lọ Jiwheyẹwhe towe, nado nọ setonuna ogbè etọn, podọ nado nọ dọnsẹpọ jẹ e dè.” (Deut. 30:19, 20) Islaelivi lẹ ma yin nugbonọ na Jiwheyẹwhe, ṣigba nubiọtomẹsi tangan atọ̀n he go Mose donù he na zọ́n bọ mẹde nado nọgbẹ̀ lẹ ma diọ. Jesu po mẹdevo lẹ po vọ́ nùzindo nubiọtomẹsi lọ lẹ ji.
17 Tintan, ‘mí dona yiwanna Jehovah Jiwheyẹwhe mítọn.’ Eyin mí nọ yinuwa to kọndopọ mẹ hẹ aliho dodo Jiwheyẹwhe tọn lẹ enẹ na dohia dọ mí yiwanna ẹn. (Mat. 22:37) Awetọ, ‘mí dona nọ setonuna ogbè Jehovah tọn’ gbọn Ohó etọn pinplọn po tonusisena gbedide etọn lẹ po dali. (1 Joh. 5:3) Ehe biọ dọ mí ni nọ yì opli Klistiani tọn lẹ to gbesisọ mẹ, fie mí nọ plọn Biblu te. (Heb. 10:23-25) Atọ̀ntọ, ‘mí dona dọnsẹpọ Jehovah.’ Mahopọnna nudepope he mí na pehẹ, mì gbọ mí ni nọ do yise hia to Jiwheyẹwhe mẹ bo nọ hodo Ovi etọn.—2 Kọl. 4:16-18.
18. (a) Nawẹ Atọ̀họ̀-Nuhihọ́ lọ Tọn basi zẹẹmẹ nugbo lọ tọn to 1914 gbọn? (b) Etẹwẹ dona yin numọtolanmẹ mítọn gando hinhọ́n nugbo lọ tọn go to egbehe?
18 Dona nankọ die nado nọgbẹ̀ sọgbe hẹ nugbo Biblu tọn lẹ! To 1914, hodidọ titengbe de yin zinzinjẹgbonu to Atọ̀họ̀-Nuhihọ́ lọ Tọn mẹ dọmọ: “Be e ma yin míwlẹ wẹ donanọ po ayajẹnọ po hugan ya? Be Jiwheyẹwhe mítọn ma yin nugbonọ ya? Eyin mẹde sọ yọ́n aliho de he yọ́n hugan ehe, mì gbọ e ni hẹn e go. Eyin depope to mì mẹ wá mọ aliho de he yọ́n hugan ehe, mí deji dọ e na dọna mí. Mí ma mọ nudevo depope he yọ́n sọ nuhe mí ko mọ to Ohó Jiwheyẹwhe tọn mẹ. . . . E vẹawu nado basi zẹẹmẹ jijọho, ayajẹ, po dona he Jiwheyẹwhe nugbo lọ yinyọnẹn po nọ hẹnwa ahun po gbẹzan mítọn po mẹ tọn. Kandai he gando Nuyọnẹn, Whẹdida Dodo, Huhlọn, po Owanyi Jiwheyẹwhe tọn po go lẹ nọ hẹn pekọwana mí to apọ̀n mẹ podọ to numọtolanmẹ-liho. Mí masọ to nude dín humọ. Mí ma tindo nuhudo nude tọn hugan nado to nuplọn gando Jiwheyẹwhe mítọn go zọnmii.” (Atọ̀họ̀-Nuhihọ́ lọ Tọn, [Glẹnsigbe] 15 décembre 1914, weda 377-378) Pinpẹn-nutọn-yinyọnẹn mítọn na hinhọ́n po nugbo gbigbọmẹ tọn po ma diọ. Na nugbo tọn, mí tindo whẹwhinwhẹ́n susu todin nado jaya dọ mí to ‘zọnlinzin to hinhọ́n Jehovah tọn mẹ.’—Isa. 2:5; Ps. 43:3; Howh. 4:18.
19. Naegbọn mẹhe pegan nado yí baptẹm lẹ ma dona dọngbàn nado wàmọ?
19 Eyin hiẹ jlo na ‘zọnlinzin to hinhọ́n Jehovah tọn mẹ’ ṣigba bo ma ko klan dewe do wiwe bo yí baptẹm, ma dọngbàn blo. Wà nuhe go a pé lẹpo nado jẹ nubiọtomẹsi Biblu tọn lẹ na baptẹm kọ̀n—mọwiwà wẹ aliho dopo gee he mẹ mí sọgan dohia te dọ mí yọ́n pinpẹn nuhe Jiwheyẹwhe po Klisti po wà na mí tọn. Na Jehovah nutindo towe he họakuẹ hugan lọ—enẹ wẹ ogbẹ̀ towe. Nọ dohia dọ a jlo na wà ojlo Jiwheyẹwhe tọn gbọn Ovi etọn hihodo dali. (2 Kọl. 5:14, 15) Matin ayihaawe, aliho gbẹzan tọn he yọ́n hugan lọ niyẹn!
Nawẹ Hiẹ Na Na Gblọndo Gbọn?
• Etẹwẹ baptẹm mítọn nọ dohia?
• Ale tẹlẹ wẹ klandowiwe na Jiwheyẹwhe po baptẹm po nọ hẹnwa?
• Naegbọn e do yin nujọnu nado plọnnu sọn Jesu dè?
• Etẹwẹ na gọalọna mí nado gbọṣi aliho gbẹzan tọn he yọ́n hugan lọ ji?
[Yẹdide to weda 25]
Baptẹm towe nọ dohia dọ a ko de aliho gbẹzan tọn he yọ́n hugan lọ
[Yẹdide to weda 26]
Be hiẹ ko mọ hihọ́ to “fiwhiwhlá” lọ mẹ ya?