“A Dibu Blo; Yẹn Na Gọalọna We”

JESU na avase hodotọ etọn lẹ jẹnukọn dọmọ: “Lẹgba na to delẹ to mì mẹ bẹ do gànpamẹ mapote na mì nido sọgan yin whiwhlepọn to gigọ́ mẹ.” Ṣigba, tlolo whẹpo e do na avase enẹ, Jesu dọmọ: “A dibuna nuhe hiẹ na jiya etọn to madẹnmẹ lẹ blo.” To whenuena e yindọ Satani gbẹ́ to obu gànpamẹninọ tọn yizan taidi aliho de nado hẹnalọdotena yẹwhehodidọ Ahọluduta lọ tọn, yọnbasi lọ tin dọ gandudu delẹ na dohomẹkẹn Klistiani nugbo lẹ. (Osọ. 2:10; 12:17) Enẹwutu, etẹwẹ na gọalọna mí nado wleawudaina míde nado duto ayiha gigẹdẹ Satani tọn lẹ ji bo ‘ma dibu,’ dile Jesu dotuhomẹna mí do?

Na nugbo tọn, suhugan mítọn wẹ ko dibu pọ́n to ojlẹ de kavi devo mẹ. Etomọṣo, Ohó Jiwheyẹwhe tọn na mí jide dọ po alọgọ Jehovah tọn po, mí sọgan duto obu ji. Gbọnna? Dopo to aliho he mẹ Jehovah nọ gọalọna mí nado wleawudai nado pehẹ nukundiọsọmẹ te lẹ mẹ wẹ yindọ e nọ do ayiha wintinwintin he Satani po godonọnamẹtọ etọn lẹ po nọ yizan lẹ hia mí. (2 Kọl. 2:11) Nado na apajlẹ lehe ehe nọ jọ do tọn, mì gbọ mí ni gbadopọnna nujijọ de he wá aimẹ to ojlẹ Biblu tọn lẹ mẹ. Mí nasọ dọhodo apajlẹ yisenọ hatọ nugbonọ egbezangbe tọn delẹ tọn ji, he “nọte gligli sọta ayiha wintinwintin Lẹgba tọn lẹ.”—Efe. 6:11-13.

Ahọlu Budisi Jiwheyẹwhe Tọ́ de Pannukọn Gandutọ Ylankan De

To owhe kanweko ṣinatọ̀ntọ J.W.M., ahọlu ylankan Assilia tọn Sẹnnakelibi gbawhàn akọta susu tọn debọdo-dego. Po jidide mlẹnmlẹn po, e lilẹ́ pannukọn omẹ Jehovah tọn lẹ po tatọ́-tònọ yetọn Jelusalẹm po, fie ahọlu budisi Jiwheyẹwhe tọ́ Hẹzekia to gandu te. (2 Ahọ. 18:1-3, 13) Matin Ayihaawe, Satani wẹ to anadena ninọmẹ lọ, bo to sisisẹ Sẹnnakelibi nado yí ayiha gigẹdẹ etọn lẹ zan na sinsẹ̀n-bibasi nugbo nido sọgan busẹ sọn aigba ji.—Gẹn. 3:15.

Sẹnnakelibi domẹhlan Jelusalẹm bo biọ to omẹ tòdaho enẹ tọn lẹ si nado jogbe. Dopo to mẹhe e dohlan lẹ mẹ wẹ Labṣakẹ, he yin hoyidọtọ daho ahọlu lọ tọn.a (2 Ahọ. 18:17) Yanwle Labṣakẹ tọn wẹ nado gbàhundona Juvi lẹ bo hẹn yé nado jogbe matin awhànfunfun. Ayiha wintinwintin tẹwẹ Labṣakẹ yizan to vivẹnudido etọn mẹ nado dobuna Juvi lẹ?

Yé Yin Nugbonọ Mahopọnna Dọ Yé Yin Ginglọndo

Labṣakẹ dọna afọzedaitọ Hẹzekia tọn lẹ dọmọ: “Le wẹ ahọlu daho lọ, ahọlu Assilia tọn dọ, Adọgbomẹ tẹwẹ ehe mẹ hiẹ todo te he yin? . . . Doayi e go, hiẹ to dido do opò ofán gbigbà he tọn go, yèdọ do Egipti go; ehe go eyin omẹ de zẹ̀nmẹ, e na biọ alọ etọn mẹ yì bo sọ́ ẹ.” (2 Ahọ. 18:19, 21) Lalo wẹ whẹsadokọnamẹ Labṣakẹ tọn, na Hẹzekia ma basi alẹnu de hẹ Egipti gba. Etomọṣo, whẹsadokọnamẹ lọ zinnudo nuhe Labṣakẹ jlo dọ Juvi lẹ ni hẹn do ayiha mẹ hezeheze ji: ‘Mẹdepope ma na wá gọalọna mì. Glọ̀ndo mẹ wẹ mì tin te.’

To ojlẹ agọe tọn lẹ mẹ, mẹhe nọ diọnukunsọ sinsẹ̀n-bibasi nugbo lẹ lọsu nọ yí obu omẹ ginglọndo tọn zan to vivẹnudido yetọn mẹ nado dobuna Klistiani lẹ. Mẹmẹyọnnu de he yin wiwle do gànpamẹ na yise etọn wutu bo yin ginglọn dovo na yisenọ hatọ etọn lẹ na owhe susu dọ nuhe gọalọna ẹn ma nado joawuna obu. E dọmọ: “Odẹ̀ gọalọna mi nado dọnsẹpọ Jehovah . . . N’flin jidenamẹ he tin to Isaia 66:2 mẹ dọ Jiwheyẹwhe nọ hò ‘agbátọnọ po gbigbọ whiwhẹnọ po’ tọn pọ́n. Ehe nọ hẹn mi lodo bosọ nọ miọnhomẹna mi tlala to whepoponu.” Mọdopolọ, mẹmẹsunnu he yí owhe susu zan to gànhọ ṣokẹdẹninọ tọn mẹ de dọmọ: “N’wá mọdọ gànhọ kleun lọ sọ sọgan yin lẹdo he mẹ mẹde sọgan voawu te eyin e tindo haṣinṣan pẹkipẹki de hẹ Jiwheyẹwhe.” Mọwẹ, haṣinṣan pẹkipẹki de tintindo hẹ Jehovah na huhlọn he Klistiani awe ehelẹ tindo nuhudo etọn nado doakọnnanu to gànhọ ṣokẹdẹninọ tọn mẹ. (Ps. 9:9, 10) Nukundiọsọmẹtọ yetọn lẹ sọgan klan yé sọn whẹndo, họntọn po yisenọ hatọ yetọn lẹ po go, ṣigba Kunnudetọ he yin wiwle do gànmẹ lẹ yọnẹn dọ nukundiọsọmẹtọ lẹ ma sọgan klan yé sọn Jehovah go gbede.—Lom. 8:35-39.

Enẹwutu, lehe e yin nujọnu do sọ dọ mí ni yí dotẹnmẹ hundote lẹpo zan nado hẹn haṣinṣan mítọn hẹ Jehovah lodo! (Jak. 4:8) Mí dona nọ kanse míde gbọzangbọzan dọ: ‘Nawẹ Jehovah yin omẹ nujọnu tọn de na mi do sọ? Be ohó etọn lẹ nọ yinuwado ji e sisosiso dile n’to nudide pẹvi kavi daho lẹ basi egbesọegbesọ ya?’ (Luku 16:10) Eyin mí nọ dovivẹnu vẹkuvẹku nado hẹn haṣinṣan pẹkipẹki mítọn hẹ Jiwheyẹwhe go, mí ma na tindo whẹwhinwhẹ́n depope nado dibu. To whenue yẹwhegán Jelemia to hodọ do Juvi he to yaji lẹ tamẹ, e dọmọ: “Yẹn dawhá ylọ oyín towe, sọn odò pete akoṣó tọn mẹ OKLUNỌ E . . . Hiẹ dọnsẹpọ to azán he gbè yẹn dawhá ylọ we: hiẹ sọ dọmọ, A dibu blo.”—Avi. 3:55-57.

Ayihaawe Dido Do Ahun mẹ Na Yé Ma Wazọ́n

Labṣakẹ yí linlẹn oklọ tọn zan nado sọgan fọ́n ayihaawe dote to ahun gbẹtọ lẹ tọn mẹ. E dọmọ: “OKLUNỌ . . . ma wẹ enẹ otẹn yiaga mẹhe tọn lẹ podọ agbà mẹhe tọn lẹ Hẹzekia ko bẹ? . . . OKLUNỌ lọ wẹ dọ hlan mi dọ, Hẹji yì aigba he ji, bo sú i do.” (2 Ahọ. 18:22, 25) Gbọnmọ dali, Labṣakẹ dọnnu dọ Jehovah ma na hoavùn na omẹ Etọn lẹ na E ko gblehomẹ do yé go. Ṣigba lalodo wẹ e te. Homẹ Jehovah tọn hùn do Hẹzekia po Juvi he lẹkọwa sinsẹ̀n-bibasi nugbo kọ̀n lẹ po go.—2 Ahọ. 18:3-7.

To egbehe, homẹkẹndomẹtọ ayiha gigẹdẹnọ lẹ sọgan dọ nugbo ṣinun-ṣinun de po yanwle lọ po dọ mẹhe yé wle lẹ ni kọngbedopọ hẹ yé, ṣigba yé nọ gbọn wlẹnwin dali ṣaka lalo dopọ hẹ nugbo enẹ po todido lọ po nado fọ́n ayihaawe dote to ahun yetọn mẹ. Di apajlẹ, yé ko dọna mẹmẹsunnu po mẹmẹyọnnu he yin wiwle do gànmẹ delẹ po pọ́n dọ mẹmẹsunnu he to anadenanu to otò yetọn mẹ de ko jogbe podọ e na yọ́n dọ yelọsu ni wà nudopolọ bo gbẹ́ nuyise yetọn lẹ dai. Ṣigba, linlẹn enẹlẹ ma nọ fọ́n ayihaawe dote to ahun Klistiani he tin aṣeji lẹ tọn mẹ gba.

Lẹnnupọndo nuhe jọ do mẹmẹyọnnu de go to Wẹkẹ-Whàn II whenu ji. To whenue e tin to gànpamẹ, ponọ hokansemẹtọ de do kandai he dohia dọ mẹmẹsunnu azọngbannọ de mọ́n yise etọn hia ẹ. E kanse mẹmẹyọnnu lọ eyin ewọ dejido Kunnudetọ enẹ go. E gblọnna ẹn dọmọ, “Gbẹtọvi mapenọ wẹ e yin.” E yidogọ dọ dile e na dẹnsọ bọ ewọ na to nunọwhinnusẹ́n Biblu tọn lẹ hodo, Jiwheyẹwhe na to yíyí i zan. “Ṣigba to whenuena e yindọ hodidọ etọn lẹ masọ sọgbe hẹ Biblu, e masọ yin mẹmẹsunnu ṣie ba.” Mẹmẹyọnnu nugbonọ enẹ yí nuyọnẹn do hodo tudohomẹnamẹ Biblu tọn lọ dọmọ: “Mì dotudo ahọvi lẹ go blo, kavi do ovi gbẹtọ tọn go, mẹhe mẹ whlẹngán depope ma tin te.”—Ps. 146:3.

Eyin mí tindo oyọnẹn he pegan Ohó Jiwheyẹwhe tọn bo nọ yí i do yizan mẹ, enẹ na gọalọna mí nado nọavùnte sọta linlẹn oklọ tọn he sọgan dekanpona gbemima mítọn nado doakọnnanu. (Efe. 4:13, 14; Heb. 6:19) Enẹwutu, mí dona na ayidonugo sọwhiwhe tọn Biblu hihia egbesọegbesọ po oplọn mẹdetiti tọn po dile mí to awuwledaina míde nado nọ lẹnnupọn ganji to whlepọn glọ. (Heb. 4:12) Mọwẹ, din wẹ ojlẹ lọ nado hẹn oyọnẹn mítọn jideji bo hẹn yise mítọn lodo. Mẹmẹsunnu he yin ginglọndo gànhọ ṣokẹdẹninọ tọn mẹ na owhe susu de dọmọ: “N’to tulina mẹlẹpo nado ylọ núdùdù gbigbọmẹ tọn he nọ yin nina mí lẹpo dọ nujọnu, na mí ma yọ́n lehe yé na yọ́n-na-yizan na mí do to nukọn mẹ.” Na nugbo tọn, eyin mí nọ yí sọwhiwhe do plọn Ohó Jiwheyẹwhe tọn po owe he pipli afanumẹ lọ tọn nọ wleawuna to egbehe lẹ po, whenẹnu gbigbọ wiwe na hẹn nuhe mí ko plọn lẹ “wá oflin mẹ na” mí to ojlẹ awusinyẹn tọn lẹ mẹ.—Joh. 14:26.

Yé Yin Hihọ́-Basina Sọta Budonamẹ

Labṣakẹ tẹnpọn nado dobuna Juvi lẹ. E dọmọ: “Yẹn vẹ̀ mì, mì na gòdenu lẹ hlan mẹmẹnu ṣie ahọlu Assilia tọn, yẹn nasọ na osọ́ fọtọ́n awe hiẹ, eyin hiẹ tin sọgan to awà towe ji nado de hihẹtọ lẹ do yé ji. Nawẹ hiẹ na sọgan whenẹnu do lẹ́ nukunmẹ awhàngán dopo tọn sọn pẹvi pete mẹmẹsi mẹmẹnu ṣie tọn tọn lẹ mẹ?” (2 Ahọ. 18:23, 24) Sọn pọndohlan gbẹtọvi tọn mẹ, Hẹzekia po omẹ etọn lẹ po ma tlẹ sọtẹ́n to awhànpa huhlọnnọ Assilia tọn nukọn.

To egbehe, homẹkẹndomẹtọ lẹ lọsu sọgan sọawuhia taidi mẹhe tindo huhlọn tlala, titengbe eyin togán lẹ to godona yé. Lehe e yindo pẹpẹ to whẹho homẹkẹndomẹtọ Nazi tọn lẹ tọn mẹ do niyẹn to Wẹkẹ-Whàn II whenu. Yé tẹnpọn nado dobuna susu devizọnwatọ Jiwheyẹwhe tọn lẹ tọn. Dopo to mẹmẹsunnu mítọn lẹ mẹ, he yí owhe susu zan to gànpamẹ, dọ lehe yé dobuna ẹn do to godo mẹ. To gbèdopo, ponọ-gán de kanse e dọmọ: “Be hiẹ mọ lehe yé desòdo nọvisunnu towe do ya? Etẹwẹ enẹ plọn we?” E gblọn dọmọ: “Kunnudetọ Jehovah tọn de wẹ n’yin bo na gbẹsọ to mọ yin tẹgbẹ.” “Eyin mọ wẹ, be hiẹ wẹ yè na desòdo bọdego,” wẹ ponọ-gán lọ dobuna ẹn dọ. Mahopọnna enẹ, mẹmẹsunnu mítọn hẹn tenọgli etọn go, podọ kẹntọ lọ gbọ bo johodo. Etẹwẹ gọalọna ẹn nado duto budonamẹ mọnkọtọn ji? E dọmọ: “N’dejido oyín Jehovah tọn go.”—Howh. 18:10.

Eyin mí tindo yise mlẹnmlẹn to Jehovah mẹ, ehe na gọalọna mí nado hẹn awọ̀yinu daho he na basi hihọ́na mí sọn nudepope he Satani nọ yizan nado gbleawuna mí to gbigbọ-liho si. (Efe. 6:16) Enẹwutu, mí na wà dagbe nado nọ biọ Jehovah to odẹ̀ mẹ dọ e ni gọalọna mí nado hẹn yise mítọn lodo. (Luku 17:5) Mí sọ dona nọ yí tito he pipli afanumẹ nugbonọ lọ tọn wleawuna nado hẹn yise mítọn lodo lẹ zan ganji. To whenue mí pehẹ budonamẹ, jidide he Jehovah na yẹwhegán Ezekiẹli he lá owẹ̀n na gbẹtọ tasinyẹntọ lẹ finflin nọ hẹn yise mítọn lodo. Jehovah dọna ẹn dọmọ: “Yẹn ko hẹn nukunmẹ towe zun sinsinyẹn do nukunmẹ yetọn lẹ go, podọ nukọn towe zun sinsinyẹn do nukọn yetọn lẹ go. Dile zannu diamọndi de yin sinsinyẹn hugan okẹ́n wẹ yẹn ko basi nukọn towe do.” (Ezek. 3:8, 9) Eyin e biọ domọ, Jehovah sọgan gọalọna mí nado sinyẹn kavi lodo taidi diamọndi dile e yindo na Ezekiẹli.

Avùnteninọ Sọta Mẹtẹnpọn Lẹ

Nukundiọsọmẹtọ lẹ mọdọ eyin ayiha wintinwintin he mí slẹ wayi lẹpo ma wazọ́n, yé sọgan yí nuzedonukọnnamẹ mẹtẹnpọn tọn lẹ zan to whedelẹnu nado hẹn tenọgli mẹde tọn gble. Labṣakẹ lọsu yí ayiha gigẹdẹ ehe zan. E dọna tòmẹnu Jelusalẹm tọn lẹ dọmọ: “Le wẹ ahọlu Assilia tọn dọ dọmọ, Mì ni basi jijọho mìtọn po yẹn po, bo tọ́n wá dee . . . kaka yẹn na do wá bo bẹ mì yì jẹ aigba taidi mìtọn titi de ji, aigba gbàdo po ovẹn po tọn de, aigba akla po vẹngle lẹ po tọn de, aigba amì olivieli tọn po owín tọn po de, na mì nido tin to ogbẹ̀, bo kú blo.” (2 Ahọ. 18:31, 32) Nukundido lọ nado dù blẹdi bo nù ovẹn yọyọ dona ko dọ̀n Juvi enẹlẹ dogo, yèdọ mẹhe yin ginglọndo adò tòdaho lọ tọn he yin osla do lẹdo pé lẹ ṣẹnṣẹn!

Ayiha gigẹdẹ mọnkọtọn de ko yin yiyizan pọ́n nado sọgan dekanpona gbemima mẹdehlan he tin to gànpamẹ de tọn. Ponọ lẹ dọna ẹn dọ emi na ze e do fie yé ylọ dọ “owhé whanpẹnọ” he tin to “jipa dagbedagbe” de mẹ na osun ṣidopo na e nido sọgan lẹnnupọn. Ṣigba, mẹmẹsunnu lọ gbọṣi nukle to gbigbọ-liho bo ma tùnafọ nunọwhinnusẹ́n Klistiani tọn etọn lẹ ji. Etẹwẹ gọalọna ẹn? E dọ to godo mẹ dọmọ: “N’nọ saba lẹnnupọndo Ahọluduta lọ ji taidi todido nujọnu tọn lọ. . . . Na oyọnẹn ahọluduta Jiwheyẹwhe tọn hẹn mi lodo bọ n’tindo jide gandego bo masọ tindo ayihaawe depope gandego wutu, e glo yé nado diọlinlẹnna mi.”

Nawẹ Ahọluduta Jiwheyẹwhe tọn yin nujọnu na mí sọ? Tọgbo Ablaham, apọsteli Paulu po Jesu po doakọnnanu to whlepọn sinsinyẹn lẹ glọ na Ahọluduta lọ yin nujọnu na yé wutu. (Flp. 3:13, 14; Heb. 11:8-10; 12:2) Eyin mí zindonukọn nado nọ ze Ahọluduta lọ do otẹn tintan mẹ bo nọ hẹn dona mavọmavọ etọn lẹ do ayiha mẹ, mílọsu sọgan nọavùnte sọta mẹtẹnpọn lọ nado kẹalọyi nuzedonukọnnamẹ he nọ namẹ kọgbọ sọn whlepọn lẹ si na ojlẹ gli de.—2 Kọl. 4:16-18.

Jehovah Ma Na Gbẹ́ Mí Dai

Mahopọnna vivẹnudido Labṣakẹ tọn lẹpo nado dobuna Juvi lẹ, Hẹzekia po mẹjidugando etọn lẹ po dejido Jehovah go mlẹnmlẹn. (2 Ahọ. 19:15, 19; Isa. 37:5-7) Taidi kọdetọn de, Jehovah na gblọndo odẹ̀ yetọn bo do angẹli dopo hlan nado hù awhànfuntọ 185000 to osla Assilianu lẹ tọn mẹ to zánto dopo mẹ. To wunkẹngbe tlolo, Sẹnnakelibi yawu lẹkọyi tatọ́-tònọ etọn, Nineve po winyan po, to pọmẹ hẹ awhànpa etọn kleun he pò lọ.—2 Ahọ. 19:35, 36.

E họnwun dọ, Jehovah ma nọ jo mẹhe dejido ewọ go lẹ do gba. Apajlẹ mẹmẹsunnu po mẹmẹyọnnu mítọn he hẹn tenọgligo to whlepọn glọ lẹ tọn po dohia dọ Jehovah gbẹ́ nọ wàmọ to egbehe. Enẹwutu, nuhe sọgbe wẹ e yin dọ Otọ́ mítọn olọn mẹ tọn na mí jide dọmọ: “Yẹn OKLUNỌ Jiwheyẹwhe towe, na hẹn adusilọ towe go, bo na dọhlan we dọ, A dibu blo; yẹn na gọalọna we.”—Isa. 41:13.

[Nudọnamẹ odò tọn]

[Blurb to weda 13]

Hugan whla 30 to Ohó etọn mẹ, Jehovah hẹn devizọnwatọ etọn lẹ deji dọmọ: “A dibu blo”

[Yẹdide to weda 12]

Nawẹ ayiha wintinwintin Labṣakẹ tọn lẹ yin nudopolọ po dehe kẹntọ omẹ Jiwheyẹwhe tọn lẹ tọn nọ yizan to egbehe lẹ po gbọn?

[Yẹdide to weda 15]

Haṣinṣan pẹkipẹki de tintindo hẹ Jehovah nọ gọalọna mí nado hẹn tenọgligo to whlepọn glọ