Jehovah Wẹ Oklunọ Nupojipetọ Mítọn!
“Na OKLUNỌ Gigogán . . . wẹ Ahọlu daho to aihọn lẹpo ji.”—PS. 47:2.
1. Etẹwẹ Paulu to alọdlẹndo to hogbe etọn he tin to 1 Kọlintinu lẹ 7:31 mẹ?
APỌSTELI Paulu dọ dọ, “Ninọmẹ aihọn ehe tọn to didiọ.” (1 Kọl. 7:31) E taidi dọ, e to aihọn lọ yí jlẹdo oplò aihundida tọn de go, ehe ji aihundatọ lẹ to adà voovo—yèdọ dagbe kavi ylankan lẹ—yiwà te, bo nọ tlọ́n oplò lọ ji nado jotẹnna aihundatọ devo lẹ.
2, 3. (a) Etẹ go wẹ mí sọgan yí avùnnukundiọsọmẹ lọ sọta nupojipetọ-yinyin Jehovah tọn jlẹdo? (b) Kanbiọ tẹlẹ wẹ mí na gbadopọnna?
2 To egbehe, ninọmẹ he sọgan yin yiyijlẹdo aihundida mọnkọtọn de go to yìyì to alọnu—podọ e gando gowe! Na taun tọn, e gando whẹsuna nupojipetọ-yinyin Jehovah Jiwheyẹwhe tọn go. Aihundida ehe sọgan yin yiyijlẹdo ninọmẹ otò tangan de tọn go. To alọ de mẹ, gandudu he tindo aṣẹ lọ nọ wazọ́n na nulẹ nido yì linsinlinsin. To alọ devo mẹ, pipli sẹ́nhẹngbatọ lẹ tọn he nọ hòmẹdu, wadanu bo nọ hùhlọ̀n de sọ tin. Pipli enẹ yin avùnnukundiọsọmẹnu de na gandudu he tindo aṣẹ lọ bosọ nọ whlé nugbonọ-yinyin tòvi he tin to gandudu enẹ glọ lẹpo tọn pọ́n.
3 Ninọmẹ mọnkọtọn mẹ wẹ wẹkẹ lọ tin te. Gandudu “Oklunọ Nupojipetọ Jehovah” tọn he yin didoai to osẹ́n-liho de tin. (Ps. 71:5, NW) Ṣigba pipli sẹ́nhẹngbatọ lẹ tọn he “mẹylankan lọ” to anadena to egbehe de to gbẹtọvi lẹ zedo owù mẹ. (1 Joh. 5:19) E yin avùnnukundiọsọmẹnu de na gandudu Jiwheyẹwhe tọn he tindo aṣẹ lọ bosọ nọ whlé nugbonọ-yinyin mẹhe tin to aṣẹpipa daho hugan etọn glọ lẹpo tọn pọ́n. Etẹwẹ hẹn ninọmẹ ehe wá? Naegbọn Jiwheyẹwhe do jotẹnna ẹn? Etẹwẹ dopodopo mítọn sọgan wà gandego?
Whẹho He Aihundida Oplò Ji Tọn lọ Bẹhẹn Lẹ
4. Whẹho he tindo kanṣiṣa awe tẹlẹ wẹ aihundida he yin gòhùnna bo gando wẹkẹ lọ go bẹhẹn?
4 Aihundida he yin gòhùnna bo gando wẹkẹ lọ go ehe bẹ whẹho awe he tindo kanṣiṣa hẹn: enẹ wẹ nupojipetọ-yinyin Jehovah tọn po tenọgligo-hinhẹn gbẹtọvi lẹ tọn po. To Owe-wiwe mẹ, Jehovah nọ saba yin yiylọdọ “Gigogán.” Di apajlẹ, na psalm-kantọ lọ deji mlẹnmlẹn do ewọ go wutu, e jihàn dọmọ: “Na OKLUNỌ Gigogán . . . wẹ Ahọlu daho to aihọn lẹpo ji.” (Ps. 47:2) Mẹhe yin nupojipetọ nọ yí aṣẹpipa he yiaga hugan zan. Whẹwhinwhẹ́n susu wẹ tin nado nọ pọ́n Jehovah Jiwheyẹwhe hlan taidi Gigogán.—Dan. 7:22.
5. Naegbọn mí dona nọ yiavunlọna nupojipetọ-yinyin Jehovah tọn?
5 Taidi Mẹdatọ, Jehovah Jiwheyẹwhe wẹ Nupojipetọ aigba po wẹkẹ lọ blebu po tọn. (Hia Osọhia 4:11.) Jehovah sọ wẹ Whẹdatọ, Osẹ́nnọ, po Ahọlu mítọn po. (Isa. 33:22) To whenuena e yindọ mí duahọ tintin mítọn tọn do Jiwheyẹwhe bọ ogbẹ̀ mítọn sọ to alọ etọn mẹ, mí dona nọ pọ́n ẹn hlan taidi Oklunọ Nupojipetọ mítọn. Eyin mí nọ hẹn do ayiha mẹ to whepoponu dọ “[Jehovah] ko hẹn ofìn etọn lodo to olọn lẹ mẹ [bọ] ahọludu etọn dugán to onú popo ji,” enẹ na nọ whàn mí nado yiavunlọna otẹn yiaga etọn.—Ps. 103:19; Owalọ 4:24.
6. Etẹwẹ tenọgli zẹẹmẹdo?
6 Nado nọgodona nupojipetọ-yinyin Jehovah tọn, mí dona hẹn tenọgli mítọn go. Hogbe lọ “tenọgli” bẹ linlẹn gbemima nado wà nuhe sọgbe mlẹnmlẹn tọn hẹn. Tenọgligo-hẹntọ zẹẹmẹdo omẹ pipé kavi madoblọ podọ jlọjlọ. Omẹ mọnkọtọn wẹ tọgbo Job yin.—Job 1:1.
Lehe Aihundida Oplò Ji Tọn lọ Bẹjẹeji Do
7, 8. Nawẹ Satani diọavunnukunsọ jlọjẹ Jehovah tọn taidi nupojipetọ gbọn?
7 To owhe 6000 linlán die wayi, nudida gbigbọnọ de diọavunnukunsọ jlọjẹ Jehovah tọn taidi nupojipetọ. Ojlo ṣejannabi tọn nado yin sinsẹ̀n-basi hlan wẹ whàn atẹṣitọ enẹ nado dọho bo yinuwa. E klọ asu po asi po tintan lọ, yèdọ Adam po Evi po, nado vẹtolina nupojipetọ-yinyin Jiwheyẹwhe tọn bo tẹnpọn nado kọnmasin do oyín Jehovah tọn go gbọn alọsọakọ́n dali dọ Ewọ dolalo. (Hia Gẹnẹsisi 3:1-5.) Atẹṣitọ lọ lẹzun Kẹntọgán, Satani (Agọjẹdomẹtọ), Lẹgba (Mẹhẹngbletọ), odàn (mẹklọtọ), podọ dlagọni (mẹtlẹndutọ).—Osọ. 12:9.
8 Satani yí ede do dó gandutọ agbàwhlẹntọ de. Etẹwẹ Oklunọ Nupojipetọ Jehovah na wà nado didẹ avùnnukundiọsọmẹ ehe? Be e na và atẹṣitọ atọ̀n lọ lẹ—yèdọ Satani, Adam po Evi po—sudo to afọdopolọji wẹ ya? E họnwun dọ e tindo huhlọn nado wàmọ, podọ mọwiwà na ko do mẹhe tindo huhlọn he yiaga hugan lọ hia. E na ko sọ dohia dọ nugbo wẹ Jehovah dọ gando kọdetọn he osẹ́n etọn gbigbà na hẹnwa go. Naegbọn Jiwheyẹwhe ma do yinuwa domọ?
9. Etẹlẹ go wẹ Satani fọ́n ayihaawe dote gando?
9 Gbọn lalodido po kọlilẹ na Adam po Evi po sọn Jiwheyẹwhe dè po dali, Satani fọ́n ayihaawe dote gando jlọjẹ Jehovah tọn nado biọ to gbẹtọvi lẹ si nado setonuna ẹn go. Humọ, na Satani klọ asu po asi po tintan lọ nado vẹtolina Jiwheyẹwhe wutu, e sọ fọ́n ayihaawe dote gando nugbonọ-yinyin nudida nuyọnẹntọ lẹpo tọn go. Dile e yin didohia do to whẹho Job, mẹhe yin nugbonọ na nupojipetọ-yinyin Jehovah tọn mẹ, Satani sọalọakọ́n dọ emi sọgan gọkọna gbẹtọvi lẹpo sọn Jiwheyẹwhe dè.—Job 2:1-5.
10. Na Jiwheyẹwhe sẹ̀ whenue e na yí nupojipetọ-yinyin etọn zan do nukọn wutu, etẹwẹ e na dotẹnmẹ?
10 Na Jehovah sẹ̀ whenue e na yí nupojipetọ-yinyin etọn zan do nukọn wutu, e na dotẹnmẹ Satani nado do nugbo-yinyin alọsọakọ́n etọn tọn hia. Jiwheyẹwhe sọ na dotẹnmẹ gbẹtọvi lẹ nado do nugbonọ-yinyin yetọn hia na nupojipetọ-yinyin etọn. Etẹwẹ yin kọdetọn lọ dile owhe lẹ to yìyì? Satani ko wleawuna pipli huhlọnnọ sẹ́nhẹngbatọ lẹ tọn de. To godo mẹ, Jehovah na và pipli enẹ po Lẹgba po sudo, podọ ehe na dohia hezeheze dọ Jiwheyẹwhe wẹ tindo jlọjẹ lọ nado yin nupojipetọ. Jehovah Jiwheyẹwhe tindo nujikudo mlẹnmlẹn na kọdetọn dagbe he enẹ na hẹnwa sọmọ bọ e dọ dọdai etọn to whenuena atẹṣiṣi lọ wá aimẹ to Edẹni.—Gẹn. 3:15.
11. Etẹwẹ mẹsusu ko wà gando nupojipetọ-yinyin Jehovah tọn go?
11 Gando nupojipetọ-yinyin Jehovah tọn po klandowiwe oyín etọn tọn po go, mẹsusu ko do yise hia bo hẹn tenọgli yetọn go. Ehe bẹ Abẹli, Enọku, Noa, Ablaham, Sala, Mose, Luti, Davidi, Jesu, devi dowhenu Jesu tọn lẹ po tenọgligo-hẹntọ livi susu devo lẹ po hẹn. Omẹ ehelẹ he yiavunlọna nupojipetọ-yinyin Jiwheyẹwhe tọn yí adà de wà nado do Satani hia taidi lalonọ bosọ de vlẹko he Lẹgba hẹnwa oyín Jehovah tọn ji to whenuena e yí nùgo dọ emi sọgan gọkọna gbẹtọvi lẹpo sọn Jiwheyẹwhe dè sẹ̀.—Howh. 27:11.
Aihundida Oplò Ji Tọn lọ Na Wá Vivọnu Dandan
12. Etẹwẹ sọgan hẹn mí deji dọ Jiwheyẹwhe ma na jotẹndona danuwiwa kakadoi?
12 Mí sọgan deji dọ Jehovah na yí nupojipetọ-yinyin etọn zan to madẹnmẹ. E ma na jotẹndona danuwiwa kakadoi gba, podọ mí yọnẹn dọ azán godo tọn lẹ mẹ wẹ mí to gbẹnọ te. Jehovah yinuwa sọta mẹylankan lẹ to Singigọ lọ whenu. E và Sodọmi po Gomọla po gọna Falo po awhànpa etọn lẹ po sudo. Sisela po awhànpa etọn po gọna Sẹnnakelibi po awhànpa Assilianu etọn lẹ po ṣíawhàn to Gigogán nukọn. (Gẹn. 7:1, 23; 19:24, 25; Eks. 14:30, 31; Whẹ. 4:15, 16; 2 Ahọ. 19:35, 36) Enẹwutu, mí sọgan deji dọ Jehovah Jiwheyẹwhe ma na jotẹndona mẹhe to masin kọ̀n do oyín etọn go bo to onú agọ̀ yiwà hẹ Kunnudetọ etọn lẹ kakadoi gba. Humọ, mí to kunnudenu he do tintin tofi Jesu tọn po vivọnu aihọn ylankan ehe tọn po hia lẹ mọ to egbehe.—Mat. 24:3.
13. Etẹwẹ mí sọgan wà ma nado yin vivasudo to pọmẹ hẹ kẹntọ Jehovah tọn lẹ?
13 Ma nado yin vivasudo to pọmẹ hẹ kẹntọ Jiwheyẹwhe tọn lẹ, mí dona yin nugbonọ na nupojipetọ-yinyin Jehovah tọn. Gbọnna? Mí sọgan wàmọ gbọn laninọ na gandudu sẹ́nhẹngbatọ Satani tọn dali bo ma joawuna obu awhànpa etọn lẹ tọn. (Isa. 52:11; Joh. 17:16; Owalọ 5:29) Kiki eyin mí wàmọ wẹ mí sọgan yiavunlọna nupojipetọ-yinyin Otọ́ mítọn olọn mẹ tọn po todido lọ po nado yin whinwhlẹngán to whenue Jehovah na de vlẹko lẹpo sẹ̀ sọn oyín etọn go bo dohia dọ ewọ wẹ Nupojipetọ Wẹkẹ tọn.
14. Etẹlẹ wẹ adà voovo Biblu tọn lẹ dehia?
14 Zẹẹmẹ gigọ́ gando gbẹtọvi lẹ po nupojipetọ-yinyin Jehovah tọn po go sọawuhia to Biblu blebu mẹ. Weta atọ̀n tintan lẹ dọhodo nudida po lehe gbẹtọ jai jẹ ylando mẹ do po ji, to whenuena weta atọ̀n godo tọn lẹ dọhodo lehe gbẹtọvi lẹ na mọ whlẹngán do ji. Weda Biblu tọn enẹlẹ wleawuna zẹẹmẹ gigọ́ gando afọdide he Oklunọ Nupojipetọ Jehovah ze nado hẹn lẹndai etọn na gbẹtọvi lẹ, aigba po wẹkẹ lọ po di go. Owe Gẹnẹsisi tọn do lehe Satani po danuwiwa po biọ aihọn mẹ do hia, podọ adà godo tọn Osọhia tọn do lehe ylanwiwa na yin didesẹ bọ Lẹgba na yin vivasudo do, po lehe ojlo Jiwheyẹwhe tọn na yin wiwà to aigba ji dile e te to olọn mẹ do po hia. Na nugbo tọn, Biblu de adọ̀ ylando po okú po tọn hia bosọ do lehe yé na yin didesẹ sọn aigba ji bọ tenọgligo-hẹntọ lẹ na duvivi ogbẹ̀ mavọmavọ po ayajẹ mayọnjlẹ po tọn do hia.
15. Eyin dopodopo mítọn na mọaleyi to whenue whẹho he gando nupojipetọ-yinyin go lọ na wá vivọnu, etẹwẹ mí dona wà?
15 Ninọmẹ aihọn ehe tọn na diọ mlẹnmlẹn to madẹnmẹ. Whẹho he gando nupojipetọ-yinyin go lọ na wá vivọnu. Satani ma nasọ dugán ba, bo na yin vivasudo to godo mẹ, podọ jide tin dọ ojlo Jiwheyẹwhe tọn na hẹnai. Ṣigba eyin mí na duvivi dona susu he yin didọdai to Ohó Jiwheyẹwhe tọn mẹ lẹ tọn, mí dona yiavunlọna nupojipetọ-yinyin Jehovah tọn todin. Mí dona nọgodona mẹdopo to whẹho he yin finfọndote lọ mẹ. Eyin mí na penugo nado dọ: “Jehovah tin to adà ṣie mẹ,” mílọsu dona gbọṣi adà etọn mẹ.—Ps. 118:6, 7, NW.
Mí Sọgan Hẹn Tenọgligo!
16. Naegbọn mí sọgan deji dọ gbẹtọvi lẹ sọgan hẹn tenọgligo na Jiwheyẹwhe?
16 Mí sọgan yiavunlọna nupojipetọ-yinyin Jehovah tọn bo hẹn tenọgli mítọn go, na apọsteli Paulu wlan dọmọ: “Whlepọn depope ma ko wá mì ji adavo dehe to paa mẹ na gbẹtọ lẹ. Ṣigba, nugbonọ wẹ Jiwheyẹwhe, podọ ewọ ma na dike mì ni yin whiwhlepọn zẹ̀ nuhe mì sọgan doakọnna go, ṣigba eyin whlepọn lọ wá, ewọ nasọ deali na mìwlẹ nido penugo nado doakọnna ẹn.” (1 Kọl. 10:13) Fie wẹ whlepọn he go Paulu donù lọ nọ wá sọn, podọ nawẹ Jiwheyẹwhe nọ deali na mí gbọn?
17-19. (a) Whlepọn tẹwẹ Islaelivi lẹ pehẹ to danfafa ji? (b) Naegbọn e yọnbasi na mí nado hẹn tenọgligo na Jehovah?
17 Dile nuhe jọ do Islaelivi lẹ go to danfafa ji dohia do, ninọmẹ he sọgan hẹnmẹ nado gbà osẹ́n Jiwheyẹwhe tọn lẹ mẹ wẹ “whlepọn” lọ nọ wá sọn. (Hia 1 Kọlintinu lẹ 10:6-10.) Islaelivi lẹ sọgan ko nọavùnte sọta whlepọn, ṣigba yé tindo ojlo to “onú ylankan lẹ mẹ” to whenue Jehovah gbọn azọ́njiawu dali wleawu asọkle tọn na yé na osun dopo. Dile etlẹ yindọ akọta lọ ma mọ olàn dù na ojlẹ de, Jiwheyẹwhe na yé manna he pemẹnu taidi núdùdù. Etomọṣo, yé joawuna whlepọn lọ nado yí nukunkẹn zẹjlẹgo do bẹ asọkle lẹ pli na yede.—Sọh. 11:19, 20, 31-35.
18 Jẹnukọnna nujijọ enẹ, to whenue Mose to Osẹ́n lọ yí to Osó Sinai ji, Islaelivi lẹ jẹ boṣiọ oyìnvu tọn sẹ̀n ji bosọ doalọ to fẹnnuwiwa mẹ. Na nukọntọ yetọn he yé sọgan mọ nukun-sọ-nukun ma tin to finẹ wutu, yé joawuna whlepọn. (Eks. 32:1, 6) Ojlẹ kleun de whẹpo Islaelivi lẹ nado biọ Aigba Pagbe tọn ji, yọnnu Moabinu lẹ klọ fọtọ́n susu yetọn lẹ nado tindo kọndopọ zanhẹmẹ tọn hẹ yé. To nujijọ enẹ whenu, fọtọ́n susu Islaelivi lẹ tọn wẹ kú na ylando yetọn wutu. (Sọh. 25:1, 9) To ojlẹ delẹ mẹ, akọta Islaeli tọn nọ joawuna whlepọn lọ nado hlunnudọ po atẹṣiṣi po, bo tlẹ dọhodo Mose po Jiwheyẹwhe lọsu po go to nujijọ de whenu! (Sọh. 21:5) Akọta Islaeli tọn tlẹ hlunnudọ to whenue Kola, Datani, Abilami po gbẹdohẹmẹtọ ylankan yetọn lẹ po yin vivasudo godo, bo gbọn linlẹn agọ̀ dali dọ dọ whẹdida he yin hinhẹnwa atẹṣitọ enẹlẹ ji ma sọgbe. Taidi kọdetọn de, Islaelivi 14700 wẹ kú gbọn azọ̀nylankan he Jiwheyẹwhe hẹnwa yé ji dali.—Sọh. 16:41, 49.
19 Depope to whlepọn he go mí ṣẹṣẹ donù ehelẹ mẹ ma ko sinyẹn sọmọ bọ Islaelivi lẹ ma sọgan nọavùnte sọta gba. Islaelivi lẹ joawuna whlepọn na yise yetọn miọn bọ yé ko sọ wọnji Jehovah, nukunpedomẹgo owanyinọ etọn po aliho dodo tọn etọn lẹ po go. Dile e yin do to whẹho Islaelivi lẹ tọn mẹ, whlepọn he mí nọ pehẹ lẹ yin dehe mẹ gbẹtọvi lẹpo nọ jugbọn to paa mẹ. Eyin mí nọ dovivẹnu he jẹ lẹpo nado nọavùnte sọta yé bo ganjẹ Jiwheyẹwhe go na alọgọ, mí sọgan hẹn tenọgli mítọn go. Mí sọgan deji, na “nugbonọ wẹ Jiwheyẹwhe” podọ e ma na dike mí ni yin “whiwhlepọn zẹ̀ nuhe [mí] sọgan doakọnna go.” Jehovah ma na jo mí do jẹ obá lọ mẹ bọ ninọmẹ he sọgan hẹn ẹn vẹawuna mí nado wà ojlo etọn lẹ ni wá mí ji gbede.—Ps. 94:14.
20, 21. To whenue mí pannukọn whlepọn, nawẹ Jiwheyẹwhe nọ “deali” na mí gbọn?
20 Jehovah nọ “deali” gbọn huhlọn nina mí nado nọavùnte sọta whlepọn dali. Di apajlẹ, homẹkẹndomẹtọ lẹ sọgan sayana mí na mí nido mọ́n yise mítọn. Nuyiwahẹmẹ mọnkọtọn sọgan whlé mí pọ́n nado jogbe nado sọgan dapana mẹhiho, yasanamẹ kavi okú. Ṣigba, to dodonu jidenamẹ gbọdo Paulu tọn he tin to 1 Kọlintinu lẹ 10:13 mẹ ji, mí yọnẹn dọ ojlẹ gli de poun wẹ ninọmẹ whlepọn tọn lẹ nọ tin na. Jehovah ma na dike whlepọn lọ ni yì jẹ obá lọ mẹ bọ mí ma sọgan hẹn nugbonọ-yinyin mítọn go na ẹn. Jiwheyẹwhe sọgan hẹn yise mítọn lodo bo na mí huhlọn he mí tindo nuhudo etọn to gbigbọ-liho nado hẹn tenọgligo.
21 Jehovah nọ gọalọna mí gbọn gbigbọ wiwe etọn gblamẹ. Gbigbọ enẹ sọ nọ hẹn linlẹn Owe-wiwe tọn he mí tindo nuhudo yetọn nado sọgan nọavùnte sọta whlepọn lẹ wá ayiha mẹ na mí. (Joh. 14:26) Taidi kọdetọn de, mí ma nọ yin kiklọ nado waylan. Di apajlẹ, mí mọnukunnujẹ whẹho he gando nupojipetọ-yinyin Jehovah tọn po tenọgligo-hinhẹn gbẹtọvi lẹ tọn po go mẹ. Ehe yinyọnẹn ko zọ́n bọ mẹsusu hẹn nugbonọ-yinyin yetọn go kakajẹ okú po alọgọ Jiwheyẹwhe tọn po. Ṣigba, e ma yin okú wẹ ali he yin dide na yé lọ gba; kakatimọ, alọgọ Jehovah tọn wẹ hẹn yé penugo nado doakọnnanu kakajẹ opodo bo ma joawuna whlepọn. E sọgan wà nudopolọ na mílọsu. Na nugbo tọn, e sọ nọ yí angẹli nugbonọ etọn lẹ zan do ota mítọn mẹ taidi devizọnwatọ gbangba tọn lẹ he yin “didohlan nado yilizọn na mẹhe na wá dugu whlẹngán tọn lẹ.” (Heb. 1:14) Dile hosọ he bọdego na dohia do, tenọgligo-hẹntọ lẹ kẹdẹ wẹ sọgan tindo todido nado mọ lẹblanulọkẹyi ayajẹnọ lọ yí nado yiavunlọna nupojipetọ-yinyin Jiwheyẹwhe tọn kakadoi. Mí sọgan tin to yé mẹ eyin mí tẹdo Jehovah go taidi Oklunọ Nupojipetọ mítọn.
Nawẹ Hiẹ Na Na Gblọndo Gbọn?
• Naegbọn mí dona kẹalọyi Jehovah taidi Oklunọ Nupojipetọ mítọn?
• Etẹwẹ e zẹẹmẹdo nado hẹn tenọgligo na Jiwheyẹwhe?
• Nawẹ mí wagbọn do yọnẹn dọ Jehovah na yí nupojipetọ-yinyin etọn zan to madẹnmẹ?
• Sọgbe hẹ 1 Kọlintinu lẹ 10:13, naegbọn e yọnbasi na mí nado hẹn tenọgligo?
[Yẹdide to weda 24]
Satani klọ Adam po Evi po nado vẹtolina Jehovah
[Yẹdide to weda 26]
Magbe nado yiavunlọna nupojipetọ-yinyin Jehovah tọn