Whenu Ma Nọ Fẹ́ Gbede Nado Sẹ̀n Jiwheyẹwhe
To Málaga, onọ̀ de po viyọnnu etọn po, he yinkọ yé omẹ awe lẹ tọn nọ yin Ana, yí baptẹm to 19 décembre 2009 to hùwaji Espagne tọn. Yé tin to gbẹtọ 2352 he ze afọdide enẹ to Espagne to 2009 lẹ mẹ. Ṣigba, nuhe jẹna ayidego to whẹho onọ̀ po viyọnnu etọn ehe po tọn mẹ wẹ owhe yetọn. Onọ̀ lọ tindo owhe 107 podọ viyọnnu etọn owhe 83!
Etẹwẹ whàn yé nado yí baptẹm to yẹhiadonu klandowiwe yetọn tọn mẹ hlan Jehovah? To bẹjẹeji owhe 1970 lẹ tọn, kọmẹnu yọnnu de he yin Kunnudetọ nọ saba basi oylọna Ana—viyọnnu lọ—nado wá Oplọn Agunwe to owhé etọn gbè. Ana nọ yì sọn ojlẹ de mẹ jẹ devo mẹ. Ṣigba, agbasazọ́n etọn zọ́n bọ e ma basi nukọnyiyi.
Nudi owhe ao godo, delẹ to ovi Ana tọn lẹ mẹ jẹ Biblu plọn ji, podọ dile ojlẹ to yìyì, yé lẹzun devizọnwatọ Jehovah tọn lẹ. To nukọn mẹ, Mari Carmen he yin dopo to yé mẹ, vọ́ owanyi onọ̀ etọn tọn na nugbo Biblu tọn fọndote whladopo dogọ bo gọalọna ẹn nado kẹalọyi plọnmẹ Biblu. Enẹgodo, Ana daho lọ, he yin onọ̀ daho Mari Carmen tọn lọsu jẹ ojlo dohia ji to Biblu mẹ. To godo mẹ, hagbẹ whẹndo ehe tọn ao wẹ ze afọdide nado yí baptẹm.
Ana awe lọ lẹ he yin onọ̀ po viyọnnu po gọ́ na ayajẹ taun to azán baptẹm yetọn tọn gbè. Ana he tindo owhe 107 lọ dọmọ: “Jehovah ko wà dagbe na mi taun, gbọn dotẹnmẹ nina mi nado yọ́n ẹn dali.” Viyọnnu etọn yidogọ dọmọ: “Whẹpo Paladisi nado wá, n’jlo na sẹ̀n Jehovah gbọn ojlo etọn wiwà po yẹwheho wẹndagbe lọ tọn didọ po dali dile e na yọnbasi do.”
Opli lẹ yìyì wẹ nọ hẹn ayajẹ vonọtaun wá na asuṣiọsi awe ehelẹ. Dopo to mẹho agun yetọn tọn lẹ mẹ dọmọ: “Yé ma nọ gọ̀n opli depope. Yé nọ wleawufo to whepoponu nado na gblọndo to Oplọn Atọ̀họ̀-Nuhihọ́ lọ Tọn whenu.”
Apajlẹ nugbonọ-yinyin tọn yetọn flin mí Anna, asuṣiọsi de “he ma nọ gọ̀n tẹmpli mẹ gbede, bo nọ yí nùbibla po ovẹ̀ po do to sinsẹ̀nzọn wiwe wà to ozán po okle po.” Ehe zọ́n bọ e tindo lẹblanulọkẹyi nado mọ ovivu lọ Jesu. (Luku 2:36-38) Dile etlẹ yindọ owhe 84 wẹ Anna tindo, e ma mọdọ emi ko poyọnho hugan nado sẹ̀n Jehovah, podọ mọ wẹ e yin na Ana awe he yin nùdego to hosọ ehe mẹ lẹ lọsu.
Be hiẹ tindo hẹnnumẹ delẹ he jlo na dotoaina owẹ̀n Biblu tọn ya? Kavi be a ko dukosọna mẹhomẹ de he jlo na dotoaina we to whenue a dla ẹ pọ́n to owhé etọn gbè ya? E yọnbasi dọ omẹ mọnkọtọn lẹ na wá yinuwa taidi Ana awe he yin nùdego to numimọ ehe mẹ lẹ, na whenu ma nọ fẹ́ gbede nado sẹ̀n Jiwheyẹwhe nugbo lọ, Jehovah wutu.
[Blurb on page 25]
“Jehovah ko wà dagbe na mi taun”
[Blurb on page 25]
“Whẹpo Paladisi nado wá, n’jlo na sẹ̀n Jehovah”