Jiwheyẹwhe po Họntọn Etọn lẹ po Yiwanna Ẹn

MẸDEPOPE ma yọ́n yinkọ etọn to egbehe. Yinkọ otọ́ etọn tọn, Jẹfta, wẹ gbẹtọ lẹ do yọnẹn to egbehe. Gbọ mí ni plọnnu gando yé omẹ awe lẹ go to Biblu mẹ. Mí na mọdọ Jiwheyẹwhe po họntọn viyọnnu Jẹfta tọn lẹ po yiwanna ẹn.

Mí sọgan hia otàn Jẹfta po viyọnnu etọn po tọn to Biblu mẹ to Whẹdatọ weta 11 mẹ. To whenuena e yindọ devizọnwatọ Jiwheyẹwhe tọn nugbonọ de wẹ Jẹfta yin, ayihaawe ma tin dọ ewọ nọ plọn Owe-wiwe lẹ hẹ viyọnnu etọn to gbesisọ mẹ.

Jẹfta ko nọgbẹ̀ whẹpo omẹ Jiwheyẹwhe tọn lẹ, yèdọ Islaelivi lẹ, do biọ dọ gbẹtọ de ni duahọlu do yé ji. Jẹfta yin dawe huhlọnnọ de he penugo nado funawhàn. Enẹwutu, Islaelivi lẹ biọ to e si dọ ni nọ nukọnna yé nado funawhàn sọta Ammọninu lẹ, yèdọ akọta de he sẹpọ Islaelivi lẹ bo to avùn tọ́n yé.

Jẹfta jlo dọ Jiwheyẹwhe ni gọalọna emi nado gbawhàn Ammọninu lẹ tọn, enẹwutu e dopà de. Jẹfta dọ dọ eyin Jehovah na emi awhàngbigba, omẹ tintan he na tọ́n sọn owhé emitọn gbè wá pé emi to whenue emi lẹkọ, wẹ emi na na Jehovah. Omẹ enẹ na yí pipotọ gbẹzan etọn tọn do wà sinsẹ̀nzọn to gòhọtúntún Jiwheyẹwhe tọn mẹ—yèdọ fie gbẹtọ lẹ nọ sẹ̀n Jiwheyẹwhe te to ojlẹ enẹ mẹ. Be a yọ́n omẹ tintan he tọ́n wá pé e ya?—a

Mọwẹ, viyọnnu Jẹfta tọn wẹ! Jẹfta blawu taun. Ovi dopo gee wẹ e tindo. Ṣigba ewọ ko dopà na Jehovah bo dona de e. To afọdopolọji, viyọnnu etọn dọna ẹn dọmọ: “Otọ́ ṣie, hiẹ ko kẹ̀ onú towe hlan OKLUNỌ; wà hlan mi kẹdẹdi enẹ he ko tọ́n sọn onù towe mẹ jẹgbonu.” Enẹgodo, e biọgbè nado yì viavi to osó lẹ ji na osun awe. Etẹwutu e na blawu? Na gbọn opà otọ́ etọn tọn dide dali, e ma nasọ tindo dotẹnmẹ nado dà asu bo jivi lẹ ba. Etomọṣo, e ma pọ́n ojlo mẹdetiti tọn etọn lẹ hlan di nujọnu hugan. E jlo na setonuna otọ́ etọn bo yin nugbonọ na Jehovah. Be a lẹndọ e hẹn homẹ Jehovah po otọ́ etọn po tọn hùn ya?—

Enẹwutu, Jẹfta do viyọnnu etọn po họntọn etọn yọnnu lẹ po hlan na osun awe. To whenue e lẹkọ, otọ́ etọn depà lọ bo do e hlan gòhọtúntún Jiwheyẹwhe tọn mẹ to Ṣilo na pipotọ gbẹzan etọn tọn. Viyọnnu Islaeli tọn lẹ nọ yì Ṣilo to whemẹwhemẹ bo nọ na tuli viyọnnu Jẹfta tọn.

Be a yọ́n jọja delẹ he nọ setonuna mẹjitọ yetọn lẹ bo yiwanna Jehovah ya?— Nudagbe wẹ e yin nado yọ́n ovi mọnkọtọn lẹ ganji bo jihọntọn hẹ yé. Eyin a hodo apajlẹ viyọnnu Jẹfta tọn bo nọ setonu bosọ yin nugbonọ, a na tindo họntọn dagbe lẹ. A na hẹn homẹ mẹjitọ towe lẹ tọn hùn podọ Jehovah na yiwanna hiẹ lọsu ga.