Aliho He Yé Nọ Yizan Nado Má Wẹndagbe Lọ

KLISTIANI lẹ yin gbedena nado “hẹn akọta lẹpo zun nuplọntọ,” ṣigba ehe ma zẹẹmẹdo dọ yé na gbidikọnamẹ kavi yí huhlọn do diọ mẹdevo lẹ zun yisenọ gba. Azọ́ndenamẹ Jesu tọn wẹ yin nado “dọyẹwheho wẹndagbe tọn hlan homẹmimiọnnọ lẹ,” nado “basi pọngbọ ayiha awublanọ lẹ tọn,” nado “miọnhomẹna mẹhe [to] awubla lẹpo.” (Matiu 28:19; Isaia 61:1, 2; Luku 4:18, 19) Kunnudetọ Jehovah tọn lẹ nọ dín nado wà ehe gbọn wẹndagbe lọ lilá sọn Biblu mẹ dali. Taidi yẹwhegán Ezekiẹli hohowhenu tọn, Kunnudetọ Jehovah tọn lẹ to egbehe nọ tẹnpọn nado dín mẹhe “to hunwẹn podọ he to awhádo na osùnú lẹpo he yin wiwà” wutu lẹ.—Ezekiẹli 9:4.

Yìyì sọn whédegbè jẹ whédegbè wẹ yin aliho he diyin hugan lọ he yé nọ yizan nado dín mẹhe ninọmẹ dintọn lẹ to yasana lẹ mọ. Gbọnmọ dali yé nọ dovivẹnu po nujikudo po nado jẹ gbẹtọ lẹ dè, kẹdẹdile Jesu basi do to whenuena “e to yìyì lẹdo tòdaho po gbeta lẹ po pé bo to yẹwheho dọ, bosọ to wẹndagbe ahọludu Jiwheyẹwhe tọn tọn hẹnwa.” Devi etọn fliflimẹ tọn lẹ lọsu wàmọ ga. (Luku 8:1; 9:1-6; 10:1-9) To egbehe, to fie e yọnbasi te lẹ, Kunnudetọ Jehovah tọn lẹ nọ dovivẹnu nado basi dlapọn yì owhé dopodopo gbè whlasusu to owhe dopo mẹ, bo nọ to dindin nado dọhodopọ hẹ whétọ lọ na nukunwhiwhe vude do hosọ lẹdo tọn kavi aihọn tọn he fọnjlodotenamẹ kavi duahunmẹnamẹ de ji. Wefọ dopo kavi awe sọgan yin zizedonukọnnamẹ na dogbapọnna, podọ eyin whétọ lọ do ojlo hia, Kunnudetọ lọ sọgan basi tito nado lẹkọwa to ojlẹ he vòawu de mẹ na hodọdopọ yinukọn dogọ. Biblu lẹ po owe he basi zẹẹmẹ do Biblu ji lẹ po nọ yin hinhẹn tin-to-aimẹ, podọ eyin whétọ lọ tindo ojlo, plọnmẹ Biblu whégbè tọn de nọ yin anadena vọ́nu. Livi susu plọnmẹ Biblu alọgọnamẹ tọn ehelẹ wẹ nọ yin anadena to gbesisọmẹ hẹ mẹdopodopo lẹ po whẹndo lẹ po lẹdo aihọn pé.

Aliho devo he mẹ “wẹndagbe ahọludu” tọn lọ nọ yin didọna mẹdevo lẹ te wẹ yin dogbọn opli he nọ yin bibasi to Plitẹnhọ Ahọluduta lẹdo mẹ tọn lẹ dali. Kunnudetọ lẹ nọ basi opli to finẹ to sẹmẹsẹmẹ. Dopo to opli lọ lẹ mẹ wẹ hodidọ na mẹlẹpo do hosọ he fọnjlodotenamẹ hugan de ji, bo nọ yin hihodo gbọn oplọn hosọ kavi dọdai Biblu tọn de dali, gbọn yizan linlinnamẹwe Atọ̀họ̀-Nuhihọ́ Lọ Tọn dali taidi owe nupinplọn tọn. Devo to opli lọ lẹ mẹ wẹ wehọmẹ de na azọ́npinplọn Kunnudetọ lẹ nado yin lilátọ wẹndagbe lọ tọn he pegan, bo nọ yin hihodo gbọn adà heyin kinklandovo na hodọdopọ do azọ́n kunnudide tọn to aigba-denamẹ lẹdo lọ tọn ji dali. Humọ, whladopo to osẹ mẹ, pipli pẹvi Kunnudetọ lẹ tọn nọ plidopọ to owhé hatọ yetọn lẹ tọn gbè, na oplọn Biblu tọn lẹ.

Mẹlẹpo wẹ opli ehelẹ tin na. Akuẹjọ ma nọ yin yíyí pọ́n gbede. Opli mọnkọtọn lẹ yin alemọyinu na mẹlẹpo. Biblu dọmọ: “E jẹ mí ni yọ́n lehe dopodopo mítọn sọgan whàn mẹdevo lẹ hlan owanyi po dagbewà zohunhunnọ kọ̀n do, ma nado nọ gọ̀n opli mítọn lẹ, dile mẹdelẹ nọ wà do, ṣigba kakatimọ nado nọ na tuli ode awetọ, titengbe dile mì mọdọ Azán lọ to dindọnsẹpọ.” Oplọn mẹdetiti tọn po dodinnanu po yin dandannu, ṣigba pipli hẹ mẹdevo lẹ nọ fọnjlodotenamẹ: “Dile ogàn nọ gàn ogàn do, mọ wẹ sunnu de nọ gàn nuyọnẹn mẹdevo tọn do.”—Heblu lẹ 10:24, 25; Howhinwhẹn lẹ 27:17, The New English Bible.

Kunnudetọ lẹ sọ nọ yí dotẹnmẹ hundote lẹ zan ganji nado dọho dogbọn wẹndagbe lọ dali dile yé dukosọ hẹ mẹdevo lẹ to nuwiwa egbesọ tọn yetọn lẹ mẹ. E sọgan yin hodọdopọ kleun de hẹ kọmẹnu de kavi hẹ gbejizọnlin-basihẹmẹtọ de to mọto kavi agahun de mẹ, hodọdopọ gaa de hẹ họntọn kavi hẹnnumẹ de, kavi hodọdopọ de hẹ azọ́nwatọgbẹ́ de to gbọjẹyíyí núdùdù tọn whenu. Suhugan kunnudide Jesu tọn lẹ to whenuena e tin to aigba ji wẹ yin ehe nkọ—dile e to zọnlinzin gbọn hùto, sinai to osó de ji, to núdùdù whenu to owhé mẹde tọn gbè, hunwhẹ alọwle de tọn yìyì tẹnmẹ, kavi to gbejizọnlin bibasi to tọjihun whè-hùhù tọn de mẹ to Ohù Galili tọn ji. E plọnmẹ to sinagọgu lẹ mẹ podọ to tẹmpli mẹ to Jelusalẹm. Fidepope he e tin te, e nọ mọ dotẹnmẹ hundote lẹ nado dọho dogbọn Ahọluduta Jiwheyẹwhe tọn dali. Kunnudetọ Jehovah tọn lẹ nọ tẹnpọn nado hodo afọdòmẹ etọn lẹ to whẹho ehe mẹ ga.—1 Pita 2:21.

YẸWHEHODIDỌ GBỌN APAJLẸ DALI

Depope to aliho he nọ yin yiyizan nado lá wẹndagbe lọ na we ehelẹ mẹ ma na tindo zẹẹmẹ gba eyin mẹhe to didọ ẹ na we lọsu ma nọ yí nuplọnmẹ lọ lẹ do yizan mẹ. Nado dọ onú de bo wà onú devo yin yẹnuwiwa, podọ yẹnuwiwa sinsẹ̀n tọn ko lẹkọna livi susu gbẹtọ lẹ tọn sọn Biblu kọ̀n. Biblu ma sọgan yin whẹgbledo po jlọjẹ po gba. Wekantọ lẹ po Falesi lẹ po tindo Owe-wiwe Heblu tọn lẹ, ṣigba Jesu gblewhẹdo yé taidi yẹnuwatọ. E dọho gando Osẹ́n Mose tọn hihia yetọn go, to enẹgodo e yidogọ na devi etọn lẹ dọmọ: “Onú depope yé degbena mì, ehelẹ mì ni nọ tùnayi e go, bosọ nọ basi; ṣigba mì basi di azọ́n yetọn blo: na yé nọ dọ, yé ma nọ wà gba.” (Matiu 23:3) Gbẹzan apajlẹ dagbenọ Klistiani de tọn nọ yinuwadomẹji hugan yẹwhehodidọ ganhiho susu tọn. Ehe wẹ yin alọdlẹndo na asi Klistiani lẹ he tindo asu mayisenọ dọmọ: “Yè nido dọ̀n yé gbọn walọ asi lẹ tọn dali, matin ohó lọ; whenuena yé to walọ wiwe mìtọn po osi po pọ́n.”—1 Pita 3:1, 2.

Enẹwutu, Kunnudetọ Jehovah tọn lẹ nọ tẹnpọn nado lá wẹndagbe lọ na mẹdevo lẹ to aliho ehe mẹ ga: yèdọ gbọn yinyin apajlẹ dagbenọ to walọyizan Klistiani tọn he yé to lilá na mẹdevo lẹ mẹ. Yé nọ tẹnpọn nado ‘wà hlan mẹdevo lẹ dile yé na jlo dọ mẹdevo lẹ ni wà hlan yé do.’ (Matiu 7:12) Yé nọ tẹnpọn nado wàmọ na gbẹtọ lẹpo, e mayin Kunnudetọ hatọ lẹ, họntọn lẹ, kọmẹnu lẹ, kavi hẹnnumẹ lẹ kẹdẹ gba. Na mapenọ yinyin wutu, yé ma nọ tindo kọdetọn dagbe mlẹnmlẹn to whepoponu gba. Ṣigba ojlo ahun yetọn lẹ tọn wẹ nado wà dagbe na gbẹtọ lẹpo e mayin to wẹndagbe Ahọluduta lọ tọn didọna yé mẹ kẹdẹ wẹ gba ṣigba to alọgigọnamẹ to fie e yọnbasi te mẹ ga.—Jakobu 2:14-17.

[Yẹdide to weda 19]

Hawaï

[Yẹdide to weda 19]

Venezuela

[Yẹdide to weda 19]

Yougoslavie

[Yẹdide lẹ to weda 20]

Plitẹnhọ Ahọluduta tọn, heyin awuwlena ganji lẹ, yin nọtẹn hodọdopọ Biblu tọn

[Yẹdide lẹ to weda 21]

To gbẹzan whẹndo yetọn tọn mẹ podọ to nuyiwa hẹ mẹdevo lẹ mẹ, Kunnudetọ lẹ nọ dovivẹnu ahundoponọ tọn nado wà nuhe yé to yẹwheho etọn dọ lẹ