Nugbajẹmẹji lẹ Ma Nasọ Tin Ba!
ETẸWẸ na yin linlẹn towe eyin mẹde dọna we dọ, “To zaande din, nugbajẹmẹji lẹ ma nasọ tin ba”? Hiẹ sọgan gblọnna ẹn dọ, “Dlọku wẹ a te. Jọwamọnu wẹ nugbajẹmẹji lẹ yin.” Kavi hiẹ sọgan lẹn poun dọ, ‘Mẹnu na klọ wẹ ewọ te?’
Dile etlẹ taidi dọ nugbajẹmẹji jọwamọ tọn lẹ na gbọṣi aimẹ kakadoi, todido nujọnu tọn tin dọ ninọmẹ lọ na diọ. Ṣigba, diọdo enẹ ma na wá aimẹ gbọn vivẹnudido gbẹtọ tọn dali. Gbẹtọvi lẹ ma sọgan tindo nukunnumọjẹnumẹ gigọ́ do nuhewutu po lehe onú lẹ nọ jọ do to jọwamọ-liho po ji gba, mọjanwẹ yé ma sọgan diọ kavi deanana yé do niyẹn. Ahọlu Sọlomọni Islaeli hohowhenu tọn, he yin yinyọnẹn na nuyọnẹn po ayidonugo sọwhiwhe tọn etọn po, wlan dọmọ: “Gbẹtọ ma sọgan mọdona azọ́n he yè to wiwà to owhè glọ gba: na eyin gbẹtọ tlẹ dovivẹnu nado dindona ẹn, ganṣo e ma na sọgan mọ ẹn gba; humọ eyin gbẹtọ nuyọnẹntọ lẹn nado dindona ẹn, ganṣo e ma na sọgan mọdona ẹn.”—Yẹwhehodọtọ 8:17.
Eyin gbẹtọ ma tindo huhlọn do nugbajẹmẹji jọwamọ tọn lẹ ji, mẹnu wẹ pé yé go? Biblu do Mẹdatọ mítọn hia taidi mẹhe na hẹn diọdo lọ wá. Ewọ wẹ Mẹhe basi titona onú jọwamọ tọn lẹ to aigba ji, taidi lilẹpe osin tọn. (Yẹwhehodọtọ 1:7) Podọ, to vogbingbọn mẹ pete na gbẹtọvi lẹ, huhlọn Jiwheyẹwhe tọn ma tindo dogbó. Yẹwhegán Jelemia zinnudo nugbo enẹ ji dọmọ: “OKLUNỌ Jiwheyẹwhe! Doayi e go, hiẹ ko basi olọn po aigba po gbọn huhlọn daho towe dali podọ gbọn awà dindlẹn jẹgbonu towe dali; nude ma yin onú jiawu gbau na we gba.” (Jelemia 32:17) Na Jiwheyẹwhe wẹ dá aigba po nugonu etọn lẹpo po wutu, e sọgbe hẹ lẹnpọn dagbe dọ ewọ yọ́n lehe e na deanana nulẹ do na gbẹtọ lẹ nido nọ aigba lọ ji to jijọho mẹ podọ to hihọ́ glọ.—Psalm 37:11; 115:16.
Eyin mọ wẹ, nawẹ Jiwheyẹwhe na hẹn diọdo he nuhudo tin na lọ wá gbọn? Flindọ to hosọ debọdo-dego ehelẹ mẹ, awetọ lọ dohia dọ nudobu susu he to jijọ to aigba ji to egbehe lẹ yin “ohia . . . vivọnu titonu lọ tọn.” Jesu dọmọ: “To whenue mì mọ onú ehelẹ to jijọ, mì ni yọnẹn dọ ahọluduta Jiwheyẹwhe tọn ko sẹpọ.” (Matiu 24:3; Luku 21:31) Ahọluduta Jiwheyẹwhe tọn, yèdọ gandudu olọn mẹ tọn de he Jiwheyẹwhe wleawuna, na hẹn diọdo ayidego tọn lẹ wá aigba ji bo na tlẹ sọ hẹn nugonu jọwamọ tọn lẹ wá anademẹ etọn glọ. Dile Jehovah Jiwheyẹwhe lọsu tlẹ sọgan wá ehe, e de azọngban lọ na Visunnu etọn. Yẹwhegán Daniẹli dọ gando Visunnu ehe go dọmọ: “Yè sọ yí ahọluigba na ẹn finẹ, po gigo po, po ahọludu de po, na gbẹtọ lẹpo, po akọta lẹ po, po ogbè lẹ po nido nọ sẹ̀n ẹn.”—Daniẹli 7:14.
Jesu Klisti, Visunnu Jiwheyẹwhe tọn, ko mọ huhlọn he nuhudo etọn tin lọ yí nado hẹn diọdo he jẹ lẹ wá aimẹ, na aigba lọ nido lẹzun nọtẹn awuvivi tọn de. Owhe 2000 die wayi, to whenue Jesu tin to aigba ji, e do nugopipe etọn nado deanana nugonu jọwamọ tọn lẹ hia to kleun mẹ. To gbèdopo he ewọ po devi etọn lẹ po tin to tọjihun de mẹ to Ohù Galili tọn ji, “yujẹhọn sinsinyẹn de fọ́n, bọ agbówhẹn lẹ to hihò biọ tọjihun lọ mẹ, sọmọ bọ osin dibla gọ́ tọjihun lọ.” Obu jẹ devi etọn lẹ ji. Na yé to budina ogbẹ̀ yetọn wutu, yé lẹhlan Jesu dè. Etẹwẹ Jesu wà? E “gbẹnuna jẹhọn lọ bosọ dọna ohù lọ dọmọ: ‘Danido! Nọ whii!’ Podọ jẹhọn lọ doalọte, bọ abọẹninọ daho de wá aimẹ.” Awuji devi etọn lẹ bọ yé kanse dọmọ: “Mẹnu wẹ ehe na taun tọn, na, yèdọ jẹhọn po ohù po tlẹ nọ setonuna ẹn?”—Malku 4:37-41.
Sọn whenẹnu, Jesu ko yin zize yì lẹdo gbigbọ tọn mẹ bo tlẹ ko mọ huhlọn po aṣẹpipa daho hugan de po yí. Taidi Ahọlu Ahọluduta Jiwheyẹwhe tọn, e tindo azọngban lọ po nugopipe lọ po nado hẹn diọdo he jẹ lẹpo wá, na gbẹtọ lẹ nido nọgbẹ̀ to aigba ji to jijọho mẹ podọ to hihọ́ glọ.
Ṣigba, dile mí ko mọ do, gbẹtọ lẹ lọsu wẹ nọ hẹn susu nuhahun po nugbajẹmẹji lẹ po tọn wá kavi hẹn yé sinyẹn deji gbọn nuyiwa ṣejannabi po nukunkẹn po tọn yetọn lẹ dali. Etẹwẹ Ahọluduta lọ na wà na mẹhe zindonukọn to nuyiwa mọnkọtọn lẹ mẹ bo gbẹ́ ma nado diọ lẹ? Biblu dọ dọ Oklunọ Jesu na wá “sọn olọn mẹ po angẹli huhlọnnọ etọn lẹ po . . . to miyọ́n he to jiji de mẹ, dile ewọ na hẹn ahọsuyi wá mẹhe ma yọ́n Jiwheyẹwhe podọ mẹhe ma setonuna wẹndagbe he gando Oklunọ mítọn Jesu go lẹ ji.” Mọwẹ, e na hẹn “husudo [wá] mẹhe to aigba husudo lẹ” ji.—2 Tẹsalonikanu lẹ 1:7, 8; Osọhia 11:18.
Enẹgodo, Jesu Klisti, “Ahọlu ahọlu lẹ tọn,” na deanana nugonu aigba tọn lẹ to gigọ́ mẹ. (Osọhia 19:16) E na hẹn ẹn diun dọ mẹjidugando Ahọluduta lọ tọn lẹ ma nasọ jiya nugbajẹmẹji depope tọn ba. E na yí huhlọn etọn zan nado deanana nugonu agahomẹ tọn lẹ na ninọmẹ aimẹ tọn po ojlẹ voovo lẹ po nido hẹn ale wá na gbẹtọvi lẹ. Ehe na dekọtọn do hẹndi opagbe he Jehovah Jiwheyẹwhe ko do na omẹ etọn lẹ sọn ojlẹ dindẹn die tọn mẹ dọmọ: “Whenẹnu yẹn na na jikun mìtọn lẹ to osaa yetọn mẹ, aigba lọ nasọ na jideji etọn, atin ogle mẹ tọn lẹ nasọ na sinsẹ́n yetọn.” (Levitiku 26:4) Gbẹtọ lẹ na gbáhọ bo ma na dibu dọ nugbajẹmẹji lẹ ni wá gbidi yé sẹ̀: “Yé na gbá ohọ̀, bosọ nọ nọ̀ yé mẹ, yé na do vẹngle, bosọ dù sinsẹ́n yetọn.”—Isaia 65:21.
Etẹwẹ Hiẹ Dona Wà?
Matin ayihaawe, taidi mẹdevo lẹ, e nọ jlo hiẹ lọsu nado nọgbẹ̀ to aihọn he vò sọn nuhẹngble nugbajẹmẹji lẹ tọn si de mẹ. To whelọnu lo, etẹwẹ hiẹ dona wà nado tin to finẹ? Na “mẹhe ma yọ́n Jiwheyẹwhe” po “mẹhe ma setonuna wẹndagbe” lọ po lẹ ma na nọgbẹ̀ to aihọn yọyọ he mẹ nugbajẹmẹji ma na tin te ba lọ mẹ wutu, din wẹ ojlẹ lọ nado plọnnu gando Jiwheyẹwhe go bo nọgodona tito gandudu tọn etọn na aigba. Jiwheyẹwhe biọ dọ mí ni yọ́n emi bo setonuna wẹndagbe Ahọluduta he e zedai gbọn Visunnu etọn gblamẹ lọ tọn.
Aliho he yọ́n hugan nado wà ehe wẹ nado plọn Biblu po sọwhiwhe po. Biblu bẹ nudọnamẹ he na hẹnmẹ pegan nado nọgbẹ̀ to ninọmẹ hihọ́ tọn he na tin to gandudu Ahọluduta lọ tọn glọ lẹ hẹn. Naegbọn hiẹ ma na biọ to Kunnudetọ Jehovah tọn lẹ si nado gọalọna we nado plọn Biblu? Yé ko wleawufo nado gọalọna we. Nuhe họnwun wẹ yindọ, eyin hiẹ dovivẹnu nado yọ́n Jiwheyẹwhe bo setonuna wẹndagbe lọ, hogbe Howhinwhẹn lẹ 1:33 tọn ehelẹ na mọ hẹndi gando gowe: “Ṣigba mẹhe tuntoai hlan mi na tin ma hanú, bo nasọ nọ blẹo matin budi oylan tọn.”