Be Jiwheyẹwhe Wẹ to Yasana Mí Ya?

“N’lẹndọ tembatsu (yasanamẹ Jiwheyẹwhe tọn) wẹ, dile etlẹ yindọ onú mẹhe jiya nugbajẹmẹji lọ tọn lẹ tọn blawuna mi,” wẹ tonudọtọ nukundeji Japon tọn de dọ to whenue aigba sisọsisọ he huhlọn etọn sinyẹn taun po tsunami de po gbànú to mars 2011 to otò lọ mẹ godo.

To whenue aigba sisọsisọ he gbànú to Haïti to janvier 2010 hù gbẹtọ 220000 linlán, yẹwhehodọtọ televiziọn ji tọn he diyin de dọ dọ yé “nùalẹ hẹ lẹgba” bo dona “lẹkọwa jiwheyẹwhe dè” wutu wẹ.

To whenue gbẹtọ 79 kú to hunyanhunyan de mẹ to Manille, Philippines, yẹwhenọ Katoliki tọn de dọmọ: “Jiwheyẹwhe jlo na fọ́n ayihadawhẹnamẹnu mítọn he ko kúatli bo masọ nọ dotukla mí ba.” Linlinwe otò lọ tọn de na linlin dọ “mẹhe ko whẹ́n mẹho ko-nukundopo to kanweko ji yise dọ Jiwheyẹwhe to homẹgble etọn tunjẹgbonu gbọn aigba sisọsisọ, jẹhọn ahizi po nugbajẹmẹji devo lẹ po dali,” ehe nọ wá aimẹ whẹwhẹ to otò lọ mẹ.

NUYISE lọ dọ Jiwheyẹwhe nọ yí nugbajẹmẹji lẹ do sayana mẹylankan lẹ ma yin onú yọyọ. To 1755, whenue gbẹtọ 60 000 kú to aigba sisọsisọ, miyọ́n, po tsunami de po mẹ to Lisbonne, Portugal, Voltaire he yin tamẹnuplọnmẹtọ he diyin de kanse dọmọ: “Be nuylankan sù to Lisbonne fie nugbajẹmẹji lọ jọ te, hugan Paris fie gblewa gbayipe te wẹ ya?” Na nugbo tọn, gbẹtọ livi susu wẹ ko kanse yede eyin Jiwheyẹwhe ma to nugbajẹmẹji jọwamọ tọn lẹ yizan nado sayana gbẹtọvi lẹ. To otò susu mẹ, nugbajẹmẹji enẹlẹ nọ saba yin yiylọdọ nuyiwa Jiwheyẹwhe tọn.

Enẹwutu, e sọgbe dọ mí ni kanse dọmọ: Be Jiwheyẹwhe wẹ to nugbajẹmẹji jọwamọ tọn lẹ yizan nado sayana gbẹtọvi lẹ nugbonugbo ya? Be yasanamẹ sọn Jiwheyẹwhe dè wẹ nugbajẹmẹji he wá aimẹ pludopludo to agọe lẹ yin ya?

Nado gblewhẹdo Jiwheyẹwhe, mẹdelẹ nọ dlẹnalọdo kandai Biblu tọn lẹ he mẹ Jiwheyẹwhe hẹn vasudo wá gbẹtọ lẹ ji te gbọn nugonu jọwamọ tọn lẹ yiyizan dali. (Gẹnẹsisi 7:17-22; 18:20; 19:24, 25; Osọha lẹ 16:31-35) Ṣigba, dogbigbapọnna kandai Biblu tọn enẹlẹ dohia dọ onú voovo atọ̀n tin he jẹna ayidego. Tintan, avase ko nọ yin nina jẹnukọn. Awetọ, to vogbingbọn mẹ na nugbajẹmẹji jọwamọ tọn egbezangbe tọn lẹ he nọ hù gbẹtọ dagbe po ylankan po, mẹylankan lẹ kẹdẹ wẹ vasudo he wá sọn Jiwheyẹwhe dè lẹ nọ hù. Mẹylankan he ma lẹnvọjọ lẹ kavi mẹhe gbẹ́ nado dotoaina avase lẹ kẹdẹ wẹ nọ yin vivasudo. Podọ atọ̀ntọ, Jiwheyẹwhe nọ deali na homẹvọnọ lẹ nado họ̀ngán.—Gẹnẹsisi 7:1, 23; 19:15-17; Osọha lẹ 16:23-27.

Kunnudenu depope ma dohia dọ Jiwheyẹwhe wẹ to godona nugbajẹmẹji jọwamọ tọn madosọha he ko hẹnnugble to egbehe to gbẹzan gbẹtọ livi susu tọn mẹ. To whelọnu lo, etẹwutu wẹ nugbajẹmẹji mọnkọtọn lẹ fọ́n bo to agayi? Nawẹ mí sọgan pehẹ yé gbọn? Podọ, be nugbajẹmẹji lẹ na wá doalọte gbèdopo ya? Hiẹ na mọ gblọndo kanbiọ ehelẹ tọn to hosọ he bọdego lẹ mẹ.