Linlin Opli Whemẹwhemẹ Tọn

Opli de He Pọninọ po Tito Yọyọ He Whànmẹ lẹ po Dohiagona

OJLẸ ayajẹ tọn wẹ opli whemẹwhemẹ tọn Watch Tower Bible and Tract Society of Pennsylvania tọn lẹ nọ yin. Lehe enẹ yin nugbo gando opli whemẹwhemẹ tọn 127tọ he yin bibasi to samedi 1^er octobre 2011 go do sọ! Jonọ he wá sọn agosu ẹnẹ aigba lọ tọn mẹ lẹ pli to Plitẹnhọ Plidopọ Kunnudetọ Jehovah tọn lẹ tọn mẹ to Jersey City, New Jersey, to États-Unis.

Gerrit Lösch, dopo to Hagbẹ Anademẹtọ lọ mẹ dokuavọna mẹplidopọ lẹ. E dọna afọzedaitọ he wá sọn otò 85 mẹ lẹ dọ yé to vivi pọninọ vonọtaun de tọn dù lẹdo aihọn pé. Pọninọ enẹ yin kunnudenu dagbe de he nọ hẹn pipà wá na Jehovah. Na nugbo tọn, opli ehe zinnudo pọninọ mítọn ji.

LINLIN DAGBE DE SỌN MEXIQUE

To adà tintan tito-to-whinnu lọ tọn mẹ, apajlẹ susu wẹ yin nina gando pọninọ he tin to omẹ Jehovah tọn lẹ ṣẹnṣẹn go. Baltasar Perla sọn Bẹtẹli Mexique tọn kanhose hagbẹ whẹndo Bẹtẹli enẹ tọn atọ̀n gando wekantẹn alahọ Amérique Latine tọn ṣidopo he yin kinkọndopọ hẹ alahọ Mexique tọn go. Alahọ ehelẹ he yin kinkọndopọ zọ́n bọ Bẹtẹli Mexique tọn bẹ mẹhe wá sọn aṣa po otò voovo lẹ po mẹ hẹn. Ehe yin asisa tulinamẹ tọn de na mẹmẹsunnu enẹ lẹpo. Dagbe devo he diọdo enẹ hẹnwa wẹ yindọ todin e taidi dọ dogbó de masọ tin to otò enẹlẹ ṣẹnṣẹn wẹ nkọ.

To diọdo enẹ bibasi godo, aliho wekanhlanmẹ Internet ji tọn he to hihọ́ glọ de yin awuwlena na agun dopodopo nado hẹn yọnbasi na mẹhe tlẹ to olá lẹ nado nọ kanwehlan wekantẹn alahọ tọn tlọlọ. Ehe gọalọna wẹnlatọ he tin to otò he ma tindo wekantẹn alahọ tọn ba lẹ nado mọdọ emi gbẹ́ yin apadewhe titobasinanu Jehovah tọn.

LINLIN AGỌE TỌN DE SỌN JAPON

James Linton sọn alahọ Japon tọn mẹ dọ lehe aigba sisọsisọ po tsunami he gbànú to otò lọ mẹ to mars 2011 po yinuwado mẹmẹsunnu mítọn lẹ ji do. Susu yetọn wẹ hẹn mẹyiwanna po nutindo yetọn lẹ po bu. Kunnudetọ he ma tin to lẹdo nugbajẹmẹji lọ tọn mẹ lẹ ze owhé 3 100 po mọto kanweko susu po jo nado gọalọ. Mẹdezejotọ delẹ wazọ́n dopọ hẹ Wedegbẹ́ Họ̀gbigbá Tòpọnla tọn lẹ madoalọte nado jla owhé mẹmẹsunnu lẹ tọn do. Hugan mẹdezejotọ 1 700 wẹ gọalọ to fie nuhudo tin te lẹ. Humọ, mẹdezejotọ 575—ehe delẹ to yé mẹ wá sọn États-Unis—gọalọ nado jla Plitẹnhọ Ahọluduta tọn lẹ do.

Nususu wẹ yin wiwà nado miọnhomẹna mẹhe adán gbò lẹ bo hẹn yise yetọn lodo. Hugan mẹho agun tọn 400 wẹ yì dla mẹmẹsunnu enẹlẹ pọ́n. Mẹhe adán gbò lẹ sin ninọmẹ duahunmẹna Hagbẹ Anademẹtọ lọ sọmọ bọ e do nugopọntọ pọnla tọn awe hlan sọn tatọ́-tẹnnọ mítọn nado yì na tuli yé. Lẹdo aihọn pé, mẹtọnhopọn he Kunnudetọ lẹ dohia yin homẹmiọnnamẹnu daho de.

AWHÀNGBIGBA MÍTỌN LẸ TO WHẸDATẸN

Enẹgodo, hodidọ Stephen Hardy sọn alahọ Grande-Bretagne tọn mẹ po mẹmẹsunnu devo lẹ po tọn gando awhàngbigba agọe tọn mítọn lẹ go to whẹdatẹn whàn mẹplidopọ lẹ taun. Di apajlẹ, gandudu France tọn ko biọ dọ kunnudetọ lẹ ni sú dọla Amelika tọn livi 82 taidi takuẹ. Whẹho lọ yin didọgbò to whenue Whẹdatẹn Europe Tọn Na Jlọjẹ Gbẹtọvi lẹ Tọn basi nudide dagbe do ota mítọn mẹ bo dọ dọ gandudu France tọn ko tùnafọ Osẹ́n 9tọ he yin awuwlena to Gbekọndopọ Europe tọn mẹ ji, ehe nọgodona mẹdekannujẹ sinsẹ̀n-bibasi tọn. Hogbe whẹdatẹn lọ tọn to gbèta he e detọ́n lọ mẹ dohia dọ e ma yin akuẹ dín wẹ France te, na e dọmọ: “Gbigbẹ́ ma nado kẹalọyi pipli sinsẹ̀n tọn de, nado sukúndona pipli enẹ, nado yí hogbe mẹdèpo tọn zan sọta pipli sinsẹ̀n tọn de, yin delẹ to nuhe jẹagọdo jlọjẹ he yin nina sọgbe hẹ Osẹ́n 9tọ Gbekọndopọ lọ tọn lẹ mẹ.”

To whẹho he gando Arménie go de mẹ, Whẹdatẹn Europe Tọn Na Jlọjẹ Gbẹtọvi lẹ Tọn sọ basi nudide dagbe do ota mítọn mẹ. Sọn 1965, whẹdatẹn enẹ ko dohia dọ sọgbe hẹ Gbekọndopọ Europe tọn, eyin mẹde gbẹ́ ma nado wà awhànzọ́n, e dona doakọnna kọdetọn nudide etọn tọn lẹ. Ṣigba, pipli whẹdatọ lẹ tọn he tindo aṣẹ hugan to whẹdatẹn enẹ mẹ de gbedide de tọ́n he dohia dọ eyin mẹdepope gbẹ́ ma nado wà awhànzọ́n na nuyise sinsẹ̀n tọn etọn lẹ wutu, Gbekọndopọ Europe tọn dona na sisi jlọjẹ mẹlọ tọn. Nudide ehe hẹn Arménie gọna otò devo lẹ taidi Azerbaïdjan po Turquie po nado na jlọjẹ mẹmẹsunnu mítọn lẹ ma nado wà awhànzọ́n.

TITO HỌ̀GBIGBÁ TỌN LẸ

Guy Pierce, dopo to Hagbẹ Anademẹtọ lọ mẹ wẹ bọdego. E dohia dọ mẹhe to finẹ lẹpo wẹ to nukundo nado sèhó gando tito họ̀gbigbá tọn mítọn he to yìyì to New York go. E do video de hia gando lehe azọ́n lọ to yìyì do go to Wallkill, Patterson gọna aigba yọyọ mítọn lẹ he tin to Warwick po Tuxedo po to New York. Ohọ̀ daho he mí to gbigbá to Wallkill dona fó to 2014 bo na bẹ ohọ̀ yọyọ 300 hẹn.

Titobasinanu lọ sọ jlo na gbá ohọ̀ dahodaho devo lẹ do aigba he gbigblo etọn yin hectare 100 ji to Warwick. Mẹmẹsunnu Pierce dọ dọ, “Dile mí ma tlẹ ko yọ́n ojlo Jehovah tọn to gigọ́ mẹ gando tito họ̀gbigbá tọn mítọn go to Warwick, mí to nukọnzindo to azọ́n lọ mẹ po linlẹn lọ po nado sẹtẹnna tatọ́-tẹnnọ Kunnudetọ Jehovah tọn lẹ tọn jẹ dọ́n.” To Warwick, mí sọ to tito basi nado yí aigba he gbigblo etọn yin hectare 20 zan nado nọ bẹ maṣinu po azọ́nwanu họ̀gbigbá tọn lẹ po do finẹ. Aigba enẹ to nudi kilomẹtlu 10 do fie azọ́n họ̀gbigbá tọn lọ to yìyì te. Mẹmẹsunnu Pierce dọmọ: “Mí to linlẹn dọ to whenue mí na mọ gbedewema họ̀gbigbá tọn lọ yí godo, mí na fó azọ́n họ̀gbigbá tọn lọ to owhe ẹnẹ gblamẹ. Enẹgodo, mí na sà owhé mítọn he to Brooklyn.”

Mẹmẹsunnu Pierce kanse dọ, “Be Hagbẹ Anademẹtọ lọ diọlinlẹn gando lehe nukunbibia daho lọ ko sẹpọ do go wẹ ya?” “Paali” wẹ e gblọn. “Eyin nukunbibia daho lọ wá doalọtena tito mítọn lẹ, e na yọ́n taun!”

HỌ́ DEWE SỌTA KINNIKINNI HE TO GBIGBÓ LỌ

Stephen Lett, dopo to Hagbẹ Anademẹtọ lọ mẹ dọhodo 1 Pita 5:8 ji he dọmọ: “Mì gbọṣi lẹnpọn dagbenọ-yinyin mẹ, mì nọ aṣeji. Kẹntọ mìtọn Lẹgba to dindanpe di kinnikinni de he to gbigbó, bo to mẹhe e na tlẹndu dín.” Mẹmẹsunnu Lett dọ dọ mí sọgan mọ lehe nuyijlẹdonugo Pita tọn sọgbe do eyin mí lẹnnupọndo kanlin wunmẹ he kinnikinni yin ji.

To whenuena e yindọ kinnikinni dohuhlọn taun bo nọ họ̀nwezun hugan gbẹtọ, mí ma dona ganjẹ huhlọn mítọn titi go nado nọavùnte sọta Satani. Mí tindo nuhudo alọgọ Jehovah tọn. (Isa. 40:31) Nuglọ nuglọ wẹ kinnikinni lẹ nọ gbọn nado wle kanlin lẹ, enẹwutu mí dona dapana amlọn gbigbọmẹ tọn, na alọ Satani tọn nikaa plá mí. Kẹdẹdile kinnikinni de nọ hù tẹ́gbọ́ẹ he ma dogán kavi kẹtẹkẹtẹ gbémẹ tọn pẹvi he to amlọndọ de do, Satani ma do lẹblanu depope podọ ojlo etọn wẹ nado hù mí. Humọ, to whenue kinnikinni de tlẹ́n kanlin de dù godo, ninọmẹ kanlin lọ tọn ma nọ yọ́npọ́n paali, kẹdẹdile “ninọmẹ godo mẹ tọn” mẹhe Satani wle lẹ tọn nọ “ylanhu tintan tọn” do. (2 Pita 2:20) Enẹwutu, mí dona diọnukunsọ Satani bo tẹdo nunọwhinnusẹ́n Biblu tọn he mí ko plọn lẹ go gligli.—1 Pita 5:9.

WLEBÒNA OTẸN HE A TINDO TO OWHÉ JEHOVAH TỌN GBÈ

“Mímẹpo wẹ tindo otẹn de to owhé Jehovah tọn gbè,” wẹ Samuel Herd he yin dopo to Hagbẹ Anademẹtọ lọ mẹ dọ. Klistiani lẹpo wẹ tindo otẹn de to “ohọ̀” kavi owhé Jiwheyẹwhe tọn gbè, yèdọ tẹmpli gbigbọmẹ tọn etọn, he nọtena tito sinsẹ̀n-bibasi tọn etọn to dodonu avọ́sinsan ofligọ Jesu tọn ji. Otẹn enẹ yin lẹblanulọkẹyi họakuẹ de he mí dona wlebòna. Taidi Davidi, ojlo mítọn wẹ nado ‘nọ nọ̀ ohọ̀ Jehovah tọn mẹ to gbẹzan mítọn lẹpo mẹ.’—Ps. 27:4.

Mẹmẹsunnu Herd dlẹnalọdo Psalm 92:12-14 bo kanse dọ, “Nawẹ Jehovah nọ gọalọna mí nado tindo kọdetọn dagbe gbọn?” E dọmọ: “To paladisi gbigbọmẹ tọn lọ mẹ, Jiwheyẹwhe nọ penukundo mí go, nọ basi hihọ́na mí bo nọ yí osin nugbo lọ tọn do fakọna mí.” Humọ, e na tuli mẹplidopọ lẹ dọmọ: “Mì gbọ mí ni nọ dopẹ́ etọn na ẹn.” Enẹgodo, Mẹmẹsunnu Herd dotuhomẹna mẹplidopọ lẹ dọmọ: “Mì dike mí ni yí homẹhunhun do gbọṣi owhé Jehovah tọn gbè—e ma yin na ojlẹ gli de gba, ṣigba kakadoi.”

KLISTIANI LẸ NỌ NA SISI OHÓ JIWHEYẸWHE TỌN

Enẹgodo David Splane, dopo to Hagbẹ Anademẹtọ lọ mẹ basi zẹẹmẹ dọ sisi nina Ohó Jiwheyẹwhe tọn ko dohiagona Klistiani lẹ to whenuho gblamẹ. To owhe kanweko tintan whenu, yé ganjẹ Ohó Jiwheyẹwhe tọn go nado didẹ whẹho adàgbigbo tọn. (Owalọ 15:16, 17) Ṣigba, to owhe kanweko awetọ whenu, Klistiani he mọ azọ́nplọnmẹ yí to wehọmẹ tamẹnuplọnmẹ Glẹki tọn mẹ delẹ jẹ wésise yetọn zedaga ji kakati nido yin Owe-wiwe lẹ. To nukọn mẹ, mẹdevo lẹ yí linlẹn Nukọntọ Ṣọṣi tọn po ahọluigbagán Lomu tọn lẹ po tọn do diọtẹnna nuplọnmẹ Biblu tọn lẹ bo gbọnmọ dali wleawuna sinsẹ̀n-nuplọnmẹ lalo susu.

Mẹmẹsunnu Splane dọ dọ to oló de mẹ, Jesu dohia dọ Klistiani yiamisisadode nugbonọ lẹ na tin to aigba ji to ojlẹ lẹpo mẹ nado yiavùnlọna nugbo lọ. (Mat. 13:24-30) Mí ma sọgan dọ mẹhe yé yin na taun tọn. Ṣigba to owhe kanweko lẹ gblamẹ, mẹsusu ko de nuyise po aṣa he ma sọgbe hẹ Owe-wiwe lẹ po gbà. Delẹ to yé mẹ wẹ Biṣọpu-gán Agobard tòdaho Lyon tọn to owhe kanweko 9tọ mẹ, Pierre he wá sọn Bruys, Henri he wá sọn Lausanne, po Valdès (kavi Valdo) po to owhe kanweko 12tọ mẹ, John Wycliffe to owhe kanweko 14tọ mẹ, William Tyndale to owhe kanweko 16tọ mẹ, gọna Henry Grew po George Storrs po to owhe kanweko 19tọ mẹ. To egbehe, Kunnudetọ Jehovah tọn lẹ nọ tẹdo nujinọtedo Biblu tọn lẹ go bo nọ kẹalọyi i taidi asisa nugbo lọ tọn. Enẹwutu wẹ Hagbẹ Anademẹtọ lọ do de Johanu 17:17 taidi hosọ owhe 2012 tọn dọmọ: “Ohó towe wẹ nugbo.”

VỌJLADO OJLOFỌNDOTENAMẸ TỌN DELẸ GANDO AZỌ́NPLỌNMẸ PO SINSẸ̀NZỌN LỌ PO GO

Anthony Morris, dopo to Hagbẹ Anademẹtọ lọ mẹ lá dọ vọjlado delẹ yin bibasi gando azọ́n mẹdehlan po gbehosọnalitọ titengbe lẹ po tọn go. To septembre 2012, Wehọmẹ Biblu Pinplọn Tọn Na Alọwlemẹ lẹ na yin bibasi to otò tangan delẹ mẹ. Diọdo sọ yin bibasi gando mẹhe na mọ azọ́nplọnmẹ Wehọmẹ Giliadi tọn yí lẹ go. Bẹsọn octobre 2011, mẹhe na yì Giliadi lẹ dona ko tin sinsẹ̀nzọn whenu-gigọ́ tọn wunmẹ de mẹ—taidi mẹdehlan he ma ko yì Giliadi lẹ, gbehosọnalitọ titengbe lẹ, nugopọntọ tomẹyitọ lẹ po mẹhe to sinsẹ̀n to Bẹtẹli lẹ po. Mẹhe mọ azọ́nplọnmẹ Giliadi tọn yí lẹ na yin didohlan alahọ lẹ mẹ kavi azọ́n nugopọntọ tọn mẹ nado hẹn omẹ Jiwheyẹwhe tọn lẹ lodo bo na tuli agun lẹ to azọ́n yẹwhehodidọ tọn mẹ.

Gbehosọnalitọ titengbe susu dogọ na yin didohlan fidindẹn lẹ podọ hlan fihe to nuglọ lẹ. Bẹsọn 1^er janvier 2012, mẹhe yì Wehọmẹ Biblu Pinplọn Tọn Na Mẹmẹsunnu Tlẹnnọ lẹ po mẹhe yì Wehọmẹ Biblu Pinplọn Tọn Na Klistiani Alọwlemẹ lẹ po delẹ na yin didohlan fidindẹn lẹ taidi gbehosọnalitọ titengbe whenu gli tọn lẹ nado yì dekunnu bo do agun yọyọ lẹ ai. Gbehosọnalitọ titengbe whenu gli tọn enẹlẹ na sẹ̀n na owhe dopo bo sọgan vọ́ yin pipà to owhe yọyọ dopodopo mẹ na lẹblanulọkẹyi enẹ kaka na owhe atọ̀n. Mẹhe tindo kọdetọn dagbe to azọ́n lọ mẹ lẹ sọgan yin pipà to godo mẹ taidi gbehosọnalitọ titengbe.

Opli whemẹwhemẹ tọn 2011 tọn yin nuwiwa ayajẹ tọn de. Mí deji dọ Jehovah na dona tito yọyọ he yin bibasi nado gbloada na azọ́n yẹwhehodidọ tọn lọ bo yidogọna pọninọ mítọn—bo gbọnmọ dali hẹn gigo po pipà po wá na oyín etọn.

[Apotin/Yẹdide to weda 18]

Nado Yọ́n Yé Dogọ

To tito-to-whinnu lọ whenu, mẹmẹyọnnu asuṣiọsi atọ́n he asu yetọn ko nọ Hagbẹ Anademẹtọ lọ mẹ pọ́n lẹ yin hokanse, yewlẹ wẹ Marina Sydlik, Edith Suiter, Melita Jaracz, Melba Barry, po Sydney Barber po. Yé dọ lehe yé mọ nugbo lọ po lehe yé biọ sinsẹ̀nzọn whenu-gigọ́ tọn mẹ do po. Dopodopo yetọn donù nujijọ vonọtaun delẹ go, gọna nuhe yé flin gando asu yetọn go lẹ po delẹ to dona he yé duvivi etọn hẹ asu yetọn lẹ mẹ po. To enẹgodo, mẹhe wá lẹpo ji ohàn sọha 86 he hosọ etọn yin “Yọnnu Nugbonọ lẹ, Mẹmẹyọnnu Lẹ.”

[Yẹdide lẹ]

(To aga) Daniel po Marina Sydlik po; Grant po Edith Suiter po; Theodore po Melita Jaracz po

(To odò) Lloyd po Melba Barry po; Carey po

[Yẹdide Otò tọn to weda 16]

(Na nudọnamẹ gigọ́, pọ́n linlinnamẹwe lọ)

Alahọ ṣidopo yin kinkọndopọ po alahọ Mexique tọn po

MEXIQUE

GUATEMALA

HONDURAS

SALVADOR

NICARAGUA

COSTA RICA

PANAMA

[Yẹdide to weda 17]

Yẹdide tatọ́-tẹnnọ he Kunnudetọ Jehovah tọn lẹ jlo na gbá to Warwick, New York tọn