“Mì Ma Yọ́n Azán Kavi Gànmẹ lọ Gba”
“Enẹwutu, mì nọ họ́ mìde, na mì ma yọ́n azán kavi gànmẹ lọ gba.”—MAT. 25:13.
NAWẸ HIẸ NA NA GBLỌNDO GBỌN?
tẹwẹ yin delẹ to aliho he mẹ mí nọ mọaleyi na mí ma yọ́n azán kavi gànmẹ lọ whenue opodo lọ na wá te lẹ mẹ?
Nawẹ mẹyiamisisadode lẹ họ́ali gbọn?
Aliho tẹlẹ mẹ wẹ mí sọgan dohia dọ mí wleawudai na wiwá Klisti tọn te?
1-3. (a) Ninọmẹ tẹlẹ wẹ do nuagokun he tin to awe to oló Jesu tọn lẹ mẹ hia? (b) Kanbiọ tẹlẹ wẹ mí na mọ gblọndo na?
MÍ NI dọ dọ ahọluzọnwatọ nukundeji de biọ to asi we nado ze emi yì dope titengbe de. Ṣigba ojlẹ kleun de whẹpo hiẹ nido yì ze e, a doayi e go dọ amì he to ohún towe mẹ ma na pé nado basi gbejizọnlin lọ. A dona họ̀nwezun bo yì jẹ amì. To whenue hiẹ yì, ahọluzọnwatọ lọ wá. E pọ́n adusi po amiyọn po bo ma mọ we. Na e ma sọgan nọtepọn we wutu, e biọ to mẹdevo si nado ze e yì. E ma dẹn bọ a lẹkọ bo mọdọ ahọluzọnwatọ lọ ko yì. Etẹwẹ na yin numọtolanmẹ towe?
2 Todin, mí ni dọ dọ hiẹ wẹ ahọluzọnwatọ lọ bọ a de sunnu nugopetọ atọ̀n nado penukundo azọ́n tangan de go. A basi zẹẹmẹ azọ́ndenamẹ lọ tọn podọ yemẹpo kẹalọyi sọn ojlo mẹ wá. Ṣigba, to whenue hiẹ lẹkọ to ojlẹ vude godo, a mọdọ omẹ awe wẹ penukundo azọ́ndenamẹ yetọn go. Nuhe sọ ylan wẹ yindọ mẹhe ma penukundo azọ́ndenamẹ etọn go lọ to whẹjijọ dín. Na nugbo tọn, e ma tlẹ jẹ e kọ̀n whẹpo e do glo. Etẹwẹ na yin numọtolanmẹ towe?
3 To oló Jesu tọn he gando awhli lẹ po talẹnti lẹ po go lẹ mẹ, e yí ninọmẹ mọnkọtọn lẹ zan nado do nuhewutu, to azán godo tọn lẹ mẹ, Klistiani yiamisisadode delẹ na yin nugbonọ podọ nuyọnẹntọ to whenue devo lẹ ma na yinmọ hia.a (Mat. 25:1-30) Nado zinnudo nuagokun etọn ji, e dọmọ: “Enẹwutu, mì nọ họ́ mìde, na mì ma yọ́n azán kavi gànmẹ lọ gba”—enẹ wẹ ojlẹ tangan he mẹ Jesu na hẹn whẹdida Jiwheyẹwhe tọn ṣẹ do aihọn Satani tọn ji. (Mat. 25:13) Mí sọgan yí ayinamẹ enẹ do yizan mẹ to egbehe. Nawẹ mí sọgan mọaleyi gbọn eyin mí họ́ míde kavi họ́ali dile Jesu dotuhomẹna mí nado wà do? Mẹnu lẹ wẹ ko wleawudai nado yin whinwhlẹngán? Podọ etẹwẹ mí dona wà todin nado to alihọ́?
ALE HE MÍ NỌ MỌYI DILE MÍ TO ALIHỌ́
4. Naegbọn e ma yin dandan dọ mí ni yọ́n gànmẹ lọ whẹpo do “nọ nukle”?
4 Nuwiwa delẹ nọ biọ dọ mí ni nọ to gànmẹ pọ́n nado sọgan nọ gànmẹ ji, taidi azọ́nwiwa to azọ́nwhé de, doto de dè yìyì kavi ahihun dido. Ṣigba to nuwiwa devo lẹ whenu, taidi miyọ́n ṣíṣí kavi mahẹ tintindo to azọ́n gbẹwhlẹngán tọn mẹ to nugbajẹmẹji de godo, gànmẹ pinpọn sọgan fẹayihasẹnamẹ kavi hẹn owù wá. To ninọmẹ mọnkọtọn lẹ mẹ, nuhe yin nujọnu hugan wẹ nado na ayidonugo azọ́n he to yìyì to alọnu lọ, kakati nado to gànmẹ pọ́n. Dile opodo titonu ehe tọn to dindọnsẹpọ hugan gbede pọ́n, azọ́n he nọ gọalọna gbẹtọ lẹ nado yọ́n tito he Jehovah basi nado whlẹn mí gán wẹ yin nujọnu hugan. E ma yin dandan dọ Klistiani lẹ ni yọ́n gànmẹ he opodo lọ na wá whẹpo do gbọṣi nukle. Na nugbo tọn, mí nọ mọaleyi e whè gbau to aliho atọ́n mẹ na mí ma yọ́n azán kavi gànmẹ lọ whenue opodo lọ na wá na taun tọn wutu.
5. Nawẹ nugbo lọ dọ mí ma yọ́n azán kavi gànmẹ lọ nọ gọalọna mí nado do nuhe tin to ahun mítọn mẹ hia gbọn?
5 Tintan, nugbo lọ dọ mí ma yọ́n whenue opodo lọ na wá nọ hùn dotẹnmẹ dote na mí nado do nuhe tin to ahun mítọn mẹ nugbonugbo hia. Na nugbo tọn, enẹ nọ doyẹyigona mí bo nọ hùn dotẹnmẹ dote na mí nado yí mẹdekannujẹ nudide bibasi tọn mítọn zan nado do nugbonọ-yinyin mítọn na Jehovah hia. Dile etlẹ yindọ mí to nukọnpọnhlan nado lùn opodo titonu ehe tọn tọ́n, mí nọ sẹ̀n Jehovah na mí yiwanna ẹn wutu, e ma yin nado mọ whlẹngán kẹdẹ wutu gba. (Hia Psalm 37:4.) Mí nọ mọ ayajẹ to ojlo Jiwheyẹwhe tọn wiwà mẹ, podọ mí yọnẹn dọ ewọ to mí plọn na ale mítọn. (Isa. 48:17) Mí ma nọ mọ gbedide etọn lẹ taidi nuhe pẹnagbànmẹ.—1 Joh. 5:3.
6. Etẹwẹ nọ yin numọtolanmẹ Jiwheyẹwhe tọn eyin mí sẹ̀n ẹn na mí yiwanna ẹn wutu, podọ etẹwutu?
6 Ale awetọ he mí nọ mọyi na mí ma yọ́n azán kavi gànmẹ lọ wẹ yindọ, e nọ hùn dotẹnmẹ dote na mí nado hẹn homẹ Jehovah tọn hùn. Eyin mí sẹ̀n ẹn na mí yiwanna ẹn wutu—bọ e ma yin na azán opodo tọn kavi na ahọsumẹ de kẹdẹ wutu—e nọ zọ́n bọ Jehovah nọ gblọnhona kẹntọ etọn Satani he to vivlẹ ẹ matin dodonu depope. (Job 2:4, 5; hia Howhinwhẹn lẹ 27:11.) Eyin mí lẹnnupọndo awufiẹsa gọna awubla he Lẹgba ko hẹnwa lẹpo ji, mí nọ yí ayajẹ do yiavùnlọna nupojipetọ-yinyin Jehovah tọn bo nọ gbẹ́ gandudu ylankan Satani tọn dai.
7. Naegbọn hiẹ lẹndọ afọdidona gbẹzan mẹde-yido-sanvọ́ tọn yin nujọnu?
7 Atọ̀ntọ, Jiwheyẹwhe sinsẹ̀n matin azán tangan de to ayiha mẹ nọ zọ́n bọ mí nọ zan gbẹzan mẹde-yido-sanvọ́ tọn. To egbehe, mẹhe ma tlẹ yọ́n Jiwheyẹwhe delẹ yise dọ aihọn ehe ma sọgan gbọṣi aimẹ na ojlẹ dindẹn dogọ dile mílọsu yọnẹn do. Na yé nọ dibu dọ nugbajẹmẹji de sọgan wá aimẹ to whedepopenu wutu, yé nọ dọna yede dọ: “Mì gbọ mí ni dù bo nù, na osọ wẹ mí na kú.” (1 Kọl. 15:32) To vogbingbọn mẹ, míwlẹ ma nọ dibu. Mí ma nọ klan míde dovo nado doafọna ojlo ṣejannabi tọn mítọn titi lẹ. (Howh. 18:1) Kakatimọ, mí nọ mọ́n míde bo nọ yí whenu, huhlọn po nutindo mítọn devo lẹ po zan vọnu nado lá wẹndagbe Ahọluduta Jiwheyẹwhe tọn na mẹdevo lẹ. (Hia Matiu 16:24.) Mí nọ mọ ayajẹ to Jiwheyẹwhe sinsẹ̀n mẹ, titengbe to whenue mí gọalọna mẹdevo lẹ nado wá yọ́n ewọ.
8. Apajlẹ Biblu tọn tẹwẹ do nuhewutu mí dona nọ ganjẹ Jehovah po Ohó etọn po go mlẹnmlẹn hia?
8 Ale ẹnẹtọ he mí nọ mọyi na mí ma yọ́n azán kavi gànmẹ lọ wẹ yindọ, e nọ gọalọna mí nado nọ ganjẹ Jehovah go mlẹnmlẹn bo nọ yí sọwhiwhe do yí ayinamẹ he tin to Ohó etọn mẹ lẹ do yizan mẹ to gbẹzan mítọn mẹ. Na mí yin mapenọ wutu, mí nọ yawu ganjẹ míde go po awubibọ po. Paulu na avase Klistiani lẹpo dọmọ: “Mì gbọ ewọ he lẹndọ e to ote ni payi na e nikaa jai.” Gbẹtọ 23 000 wẹ hẹn nukundagbe Jehovah tọn bu ojlẹ kleun de whẹpo Jọṣua do deanana omẹ Jiwheyẹwhe tọn lẹ yì Aigba Pagbe tọn lọ ji. Paulu dọmọ: “Onú ehelẹ . . . yin kinkandai taidi avase de na míwlẹ, mẹhe ji opodo titonu lẹ tọn ko wá.”—1 Kọl. 10:8, 11, 12.
9. Nawẹ whlepọn lẹ nọ hẹn yise mítọn jẹ yọyọ bo nọ dọ̀n mí sẹpọ Jiwheyẹwhe dogọ gbọn?
9 Aliho atọ́ntọ he mẹ mí nọ mọaleyi te na mí ma yọ́n whenue opodo lọ na wá wẹ yindọ, e nọ hùn dotẹnmẹ dote na mí nado nọ plọnnu sọn whlepọn lẹ mẹ bo nọ hẹn yise mítọn lodo. (Hia Psalm 119:71.) Na nugbo tọn, “ojlẹ awusinyẹn tọn he vẹawu nado pehẹ lẹ” wẹ azán godo tọn titonu ehe tọn lẹ yin. (2 Tim. 3:1-5) Mí sọgan yin homẹkẹndo na yise mítọn wutu, na mẹsusu wẹ gbẹwanna mí to aihọn Satani tọn mẹ. (Joh. 15:19; 16:2) Eyin mí nọ whiwhẹ míde bo nọ dín anademẹ Jiwheyẹwhe tọn to whlepọn mọnkọtọn lẹ whenu, yise mítọn na yin hinhẹn jẹ yọyọ, dile sika nọ yin kiklọwé to miyọ́n mẹ do. Mí ma na jogbe. Kakatimọ, mí na dọnsẹpọ Jehovah dogọ hugan lehe mí sọgan ko lẹn do.—Jak. 1:2-4; 4:8.
10. Etẹwẹ nọ zọ́n bọ e nọ taidi dọ gànmẹ to yìyì po awuyiya po?
10 Nuyiwa mítọn sọgan zọ́n bọ gànmẹ na họ̀nwezun kavi zọ̀n dẹẹdẹ to nukun mítọn mẹ. Eyin mí hẹn alọnu mítọn ján to nuwiwa lẹ mẹ kakati nado to gànmẹ pọ́n, e nọ taidi dọ whenu to yìyì po awuyiya po. Mọdopolọ, eyin mí hẹn alọnu mítọn ján to azọ́n ayajẹ tọn he Jehovah zedo alọmẹ na mí lọ mẹ, azán po gànmẹ enẹ po sọgan ko wá whẹpo mí na tlẹ doayi e go. Suhugan mẹyiamisisadode lẹ tọn ze apajlẹ ayidego tọn de dai to whẹho ehe mẹ. To kleun mẹ, mì gbọ mí ni gbadopọnna nuhe jọ to whenue Jesu yin zizedo ofìn ji taidi Ahọlu to 1914 bo pọ́n lehe mẹdelẹ wleawudai to whenue mẹdevo lẹ ma wàmọ do.
MẸYIAMISISADODE LẸ WLEAWUDAI
11. To 1914 godo, naegbọn mẹyiamisisadode delẹ lẹndọ Jesu to dindẹn?
11 Flin oló Jesu tọn lẹ gando awhli lẹ po talẹnti lẹ po go. Eyin awhli kavi afanumẹ he yin nùdego to oló lọ lẹ mẹ ko yọ́n whenue asisunọ yọyọ kavi oklunọ lọ na wá wẹ, yé ma na ko tindo nuhudo nado họ́ali. Ṣigba yé ma yọnẹn, enẹwutu yé dona wleawudai. Dile etlẹ yindọ mẹyiamisisadode lẹ ko yí owhe susu lẹ do donukun dọ 1914 na yin owhe ayidego tọn de, yé ma yọ́n nuhe na jọ to gigọ́ mẹ. To whenue nulẹ ma jọ dile yé lẹn do, delẹ to yé mẹ lẹndọ Jesu to dindẹn. Mẹmẹsunnu de flindọ, “Mẹdelẹ to mí mẹ lẹndọ mí na yì olọn mẹ to osẹ tintan octobre [1914] tọn mẹ.”
12. Nawẹ mẹyiamisisadode lẹ dohia dọ yé yin nugbonọ podọ nuyọnẹntọ gbọn?
12 Pọ́n lehe enẹ sọgan ko hẹn yé gbọjọ do sọ to whenue yé to nukundo opodo lọ bọ e ma wá! Humọ, mẹmẹsunnu lẹ pehẹ nukundiọsọmẹ to Wẹkẹ-Whàn I whenu. Azọ́n yẹwhehodidọ tọn lọ dibla doalọte pete bọ e taidi dọ mẹyiamisisadode lẹ damlọn. Ṣigba to 1919, yé mọ oylọ-basinamẹ de nado fọ́n sọn amlọn mẹ! Jesu wá nado pọ́n lehe mẹhe ylọ yede dọ Klistiani lẹpo to nuyiwa do. Delẹ to mẹyiamisisadode lẹ mẹ ma pegan, bo gbọnmọ dali hẹn lẹblanulọkẹyi yetọn nado to ‘ajọwa’ na Ahọlu lọ bu. (Mat. 25:16) To aliho de mẹ, yé yinuwa taidi awhli nulunọ lọ lẹ he ma vọ́ amì do miyọ́ngbán yetọn lẹ mẹ. Podọ taidi afanumẹ adidọnọ lọ, yé ma tindo ojlo nado basi avọ́sinsan depope do Ahọluduta lọ tamẹ. Ṣigba suhugan mẹyiamisisadode lẹ tọn do nugbonọ-yinyin po ojlo vẹkuvẹku nado sẹ̀n Oklunọ yetọn po hia, etlẹ yin to ojlẹ awhàn tọn sinsinyẹn lẹ mẹ.
13. Nawẹ pipli afanumẹ lọ tọn yinuwa gbọn to 1914 godo, podọ nawẹ e to nuyiwa gbọn to egbehe?
13 To 1914 godo, Atọ̀họ̀-Nuhihọ́ lọ Tọn dọho ayidego tọn ehe: “Mẹmẹsunnu lẹ emi, mẹhe tindo pọndohlan dagbe gando Jiwheyẹwhe go to mí mẹ lẹ ma jẹflumẹ gando tito Etọn depope go. Mí ma jlo dọ ojlo mítọn titi ni yin wiwà; enẹwutu, to whenue mí doayi e go dọ nuhe ma sọgbe wẹ mí to nukundo to octobre 1914, e vivi na mí dọ Oklunọ ma diọ Tito Etọn nado hẹn homẹ mítọn hùn gba. Mí ma jlo dọ Ewọ ni wàmọ. Mí jlo na mọnukunnujẹ tito po lẹndai Etọn lẹ po mẹ poun wẹ.” Mẹyiamisisadode Oklunọ tọn lẹ gbẹ́ nọ do whiwhẹ po mẹdezejo mọnkọtọn po hia. Yé ma nọ sọalọakọ́n dọ emi yin gbigbọdo gba, ṣigba yé magbe nado penukundo azọ́n Oklunọ lọ tọn go to aigba ji. Podọ todin, “gbẹtọ susugege” “lẹngbọ devo lẹ” tọn, yèdọ Klistiani he tindo todido aigba ji tọn lẹ to apajlẹ alihihọ́ po zohunhun yetọn po tọn hodo.—Osọ. 7:9; Joh. 10:16.
LẸNGBỌ DEVO LẸ WLEAWUDAI
14. Nawẹ asisa he Jiwheyẹwhe nọ yizan nado na mí núdùdù gbigbọmẹ tọn go titẹdo na basi hihọ́na mí gbọn?
14 Kẹdẹdile Klistiani yiamisisadode lẹ nọ wà do, hagbẹ gbẹtọ susugege lọ tọn he tin to aṣeji lẹ nọ tẹdo asisa he Jiwheyẹwhe nọ yizan nado na mí núdùdù gbigbọmẹ tọn go gligli. Taidi kọdetọn de, e nọ taidi dọ yelọsu to amì yí sọn Ohó Jiwheyẹwhe tọn mẹ podọ sọn gbigbọ etọn dè do miyọ́ngbán yetọn lẹ mẹ. (Hia Psalm 119:130; Johanu 16:13.) Na yé ko mọ huhlọn yí wutu, yelọsu wleawudai na opodo lọ to whenue Klisti na lẹkọwa podọ yé nọ hẹn alọnu yetọn ján etlẹ yin to whlepọn sinsinyẹn glọ. Di apajlẹ, to gànpa Nazi tọn de mẹ, vọkan Biblu tọn dopo gee wẹ mẹmẹsunnu lẹ tindo to bẹjẹeji. Enẹwutu yé hodẹ̀ nado tindo núdùdù gbigbọmẹ tọn dogọ. Ojlẹ vude to enẹgodo, yé sè dọ mẹmẹsunnu he ṣẹṣẹ yin wiwle wá gànpa lọ mẹ de ko kàn ayiha nado hẹn zinjẹgbonu Atọ̀họ̀-Nuhihọ́ lọ Tọn yọyọ delẹ biọ gànpa lọ mẹ, ehe e whlá do afọ-whlẹnọ etọn mẹ. Mẹmẹsunnu Ernst Wauer yin dopo to mẹyiamisisadode he nọ gànpa lọ mẹ bo luntọ́n lẹ mẹ. E flin dọmọ: “Jehovah gọalọna mí to aliho jiawu de mẹ nado nọ flin linlẹn tulinamẹ tọn he tin to hosọ enẹlẹ mẹ lẹ.” Enẹgodo e dọmọ: “To egbehe, e bọawu taun nado mọ núdùdù gbigbọmẹ tọn, ṣigba be mí nọ yọ́n pinpẹn etọn to whelẹponu ya? N’deji dọ Jehovah tindo dona susu to sẹdotẹnmẹ na mẹhe nọ ganjẹ ewọ go, bo nọ dùnú to tafo etọn ji bosọ yin nugbonọ lẹ.”
15, 16. Nawẹ asu po asi po de yin didona gbọn na yé tindo zohunhun to lizọnyizọn Klistiani tọn mẹ wutu, podọ etẹwẹ hiẹ sọgan plọn sọn numimọ mọnkọtọn lẹ mẹ?
15 Lẹngbọ devo lẹ sọ nọ hẹn alọnu yetọn ján to azọ́n Oklunọ lọ tọn mẹ bo nọ nọgodona mẹmẹsunnu Klisti tọn lẹ mlẹnmlẹn. (Mat. 25:40) To vogbingbọn mẹ na afanumẹ ylankan podọ adidọnọ he go Jesu donù to oló etọn mẹ lọ, yé nọ basi avọ́sinsan lẹ sọn ojlo mẹ wá bo nọ dovivẹnu vẹkuvẹku nado ze Ahọluduta lọ do otẹn tintan mẹ. Di apajlẹ, to whenue Jon po Masako po yin oylọ-basina nado yì gọalọ to aigba-denamẹ he ji Chine-gbè nọ yin dido te to Kenya, yé whleawu to tintan whenu. Ṣigba to whenue yé lẹnnupọndo ninọmẹ yetọn ji to odẹ̀ mẹ godo, yé basi dide nado yì finẹ.
16 Dona susu wẹ yé mọyi sọn vivẹnudido yetọn mẹ. Yé dọmọ: “Lizọnyizọn lọ hẹn ayajẹ susu wá na mí tofi.” Yé bẹ plọnmẹ Biblu ṣinawe jẹeji. Yé tindo numimọ ojlofọndotenamẹ tọn susu devo lẹ. Yé dọmọ: “Mí nọ dopẹna Jehovah egbesọegbesọ dọ e gọalọna mí nado wáfi.” Na nugbo tọn, mẹmẹsunnu po mẹmẹyọnnu susu devo lẹ po tin he nọ dohia to nudide yetọn lẹ mẹ dọ yé magbe nado hẹn alọnu yetọn ján mlẹnmlẹn to sinsẹ̀nzọn Jiwheyẹwhe tọn mẹ kakajẹ whedepopenu he opodo lọ na wá. Lẹnnupọndo gbẹtọ fọtọ́n susu he ko mọ gbedewema yí to Wehọmẹ Giliadi tọn bo bẹ sinsẹ̀nzọn mẹdehlan tọn jẹeji lẹ ji. Nado yọ́n nuhe sinsẹ̀nzọn vonọtaun enẹ bẹhẹn to kleun mẹ, naegbọn hiẹ ma na hia hosọ lọ “Mì Wà Nuhe Go Mì Pé Lẹpo!” he sọawuhia to Atọ̀họ̀-Nuhihọ́ lọ Tọn 15 octobre 2001 tọn mẹ? Dile hiẹ to dogbapọnna kandai awuvivi tọn ehe gando azán dopo to azọ́n mẹdehlan tọn mẹ go, lẹnnupọndo aliho he mẹ hiẹ sọgan hẹn sinsẹ̀nzọn towe gblodeji te lẹ ji, ehe na hẹn pipà wá na Jiwheyẹwhe bo na hẹn ayajẹ wá na we.
HIẸ LỌSU NỌ TO ALIHỌ́
17. Nawẹ azán kavi gànmẹ lọ he mí ma yọnẹn ko hẹn ale wá na mí gbọn?
17 Matin ayihaawe, azán kavi gànmẹ tangan lọ whenue titonu ehe na wá opodo he mí ma yọnẹn ko hẹn ale susu wá na mí. Kakati nado gblehomẹ kavi jẹflumẹ, mí ko dọnsẹpọ Jehovah Otọ́ owanyinọ mítọn dogọ, dile mí hẹn alọnu mítọn ján to ojlo etọn wiwà mẹ. Na mí doalọ glepọnu go to yẹhiadonu-liho bo dapana ayihafẹsẹnamẹnu lẹ wutu, mí tindo ayajẹ to azọ́n Oklunọ mítọn tọn mẹ.—Luku 9:62.
18. Naegbọn mí jlo na gbọṣi nugbonọ-yinyin mẹ to sinsẹ̀nzọn mítọn hlan Jiwheyẹwhe mẹ?
18 Azán whẹdida Jiwheyẹwhe tọn to sisẹpọ po awuyiya po. Depope to mí mẹ ma jlo na dowinyan Jehovah kavi Jesu. Yé ko na mí lẹblanulọkẹyi sinsẹ̀nzọn tọn mayọnjlẹ lẹ to azán godo tọn ehelẹ mẹ. Mí yọ́n pinpẹn jide he yé tindo to mí mẹ tọn taun!—Hia 1 Timoti 1:12.
19. Nawẹ mí sọgan wleawudai gbọn?
19 Mahopọnna todido mítọn, vlavo nado duvivi ogbẹ̀ tọn to olọn mẹ kavi to Paladisi mẹ to aigba ji, mì gbọ mí ni magbe nado gbọṣi nugbonọ-yinyin mẹ to azọ́n he Jiwheyẹwhe na mí nado dọyẹwheho bo basi devi lẹ lọ mẹ. Mí ma ko yọ́n azán kavi gànmẹ tangan lọ whenue azán Jehovah tọn na wá gba, podọ mí ma tlẹ tindo nuhudo nado yọnẹn. Mí sọgan zindonukọn nado wleawudai podọ mí na wàmọ. (Mat. 24:36, 44) Mí deji dọ dile e na dẹnsọ bọ mí na ganjẹ Jehovah go mlẹnmlẹn bo ze Ahọluduta etọn do otẹn tintan mẹ, mí ma na jẹflumẹ.—Lom. 10:11.
[Nudọnamẹ odò tọn]
[Yẹdide to weda 26]
Nọ dín núdùdù gbigbọmẹ tọn, etlẹ yin to ninọmẹ sinsinyẹn lẹ mẹ
[Yẹdide to weda 27]
Whenu nọ yì po awuyiya po eyin mí ze ayiha do nuwiwa Klistiani tọn lẹ ji