Yé Ze Yede Jo sọn Ojlo mẹ Wá—To Brésil

TO OWHE delẹ die wayi, Rúbia, (1) mẹmẹyọnnu de he tindo owhe 30 todin zingbejizọnlin nado yì dla Sandra (2) pọ́n, yèdọ gbehosọnalitọ de he to sinsẹ̀n to agun pẹvi de mẹ to hùwaji Brésil tọn. To dlapọn lọ whenu, nujijọ de yinuwado Rúbia ji sọmọ bọ gbẹzan etọn diọ. Etẹwẹ jọ? Mì gbọ Rúbia lọsu ni dọ ẹ na mí.

“N’MA SỌGAN YISE”

Rúbia dọmọ: “Sandra plan mi yì nawe he ewọ to Biblu plọn hẹ de dè. To oplọn lọ whenu, nawe lọ dọna ẹn dọmọ: ‘Sandra, viyọnnu atọ̀n delẹ to azọ́n ṣie mẹ bo jlo na plọn Biblu, ṣigba n’dọna yé dọ yé ni nọte na ojlẹ yelọsu tọn ni wá. N’yọnẹn dọ alọnu towe ján taun to owhe ehe mẹ.’ N’ma sọgan yise. Gbẹtọ lẹ jlo na plọnnu dogbọn Jehovah dali ṣigba bo dona nọte jẹ whenue mẹhe na plọnnu hẹ yé lọ sin alọnu na vò! To agun he mẹ n’tlọ́n, e vẹawuna mi taun nado mọ plọnmẹ Biblu dopo tata. To afọdopolọji he nawe lọ dọho wẹ n’tindo ojlo sinsinyẹn nado gọalọna mẹhe tin to tòpẹvi etọn mẹ lẹ. E ma dẹn bọ n’sẹtẹn sọn tòhò he mẹ n’nọ nọ̀ dai wá tòpẹvi he mẹ Sandra to sinsẹ̀n taidi gbehosọnalitọ te.”

Nawẹ nulẹ wá yì do na Rúbia? E dọmọ: “To osun awe gblamẹ to wiwá ṣie godo, n’ko to anadena plọnmẹ Biblu 15, podọ—dile etlẹ sọgan vẹawu nado yise—e ma dẹn bọ taidi Sandra, yẹnlọsu dona dọna mẹhe jlo na plọn Biblu delẹ nado nọte jẹ whenue alọnu ṣie na vò!”

E YIN WHINWHÀN NADO VỌ́ NULẸNPỌN DO LIZỌNYIZỌN ETỌN JI

Diego (3), mẹmẹsunnu de he tindo owhe 20 linlán yì dla gbehosọnalitọ delẹ pọ́n to Prudentópolis he yin tòpẹvi de to hùwaji Brésil tọn. Dlapọn lọ yinuwado e ji sọmọ bọ e yin whinwhàn nado vọ́ nulẹnpọn do lizọnyizọn etọn ji. E basi zẹẹmẹ dọmọ: “To agun ṣie mẹ, n’ma nọ jẹtukla sọmọ, podọ gànmẹ vude wẹ n’nọ yizan to lizọnyizọn lọ mẹ to sunmẹsunmẹ. Ṣigba to whenue n’dla gbehosọnalitọ enẹlẹ pọ́n bo dotoaina numimọ yetọn lẹ godo, ayajẹ he yé tindo gọalọna mi nado mọdọ n’ma to lizọnyizọn lọ ylọdọ nujọnu. To whenue n’mọ lehe homẹ nọ hùn yé do po lehe apàpà nọ sọ yé do po, e jlo mi dọ yẹnlọsu ni tindo gbẹzan he gọ́ na ayajẹ mọnkọtọn.” To dlapọn enẹ godo, Diego bẹ gbehosọnalitọ jẹeji.

Vlavo Kunnudetọ jọja de wẹ hiẹ yin bo nọ tindo mahẹ to azọ́n yẹwhehodidọ tọn mẹ bosọ nọ yì opli Klistiani tọn lẹ. Ṣigba taidi Diego, be a nọ mọdọ emi nọ hẹn lizọnyizọn lọ di to aliho mọmọ tọn mẹ na apàpà etọn ma nọ sọ we wutu wẹ ya? Eyin mọ wẹ, be a sọgan basi vọjlado delẹ nado duvivi ayajẹ he devizọnwiwa to fie nuhudo wẹnlatọ Ahọluduta lọ tọn sù te nọ hẹnwa tọn ya? E sọgan vẹawuna we nado jo ninọmẹ dagbe he mẹ a tin te lọ do. Etomọṣo, nuhe jọja susu wà niyẹn. Yé yí adọgbigbo do vọ́ yanwle po nujlomẹ yetọn lẹ po gbeje pọ́n nado sọgan sẹ̀n Jehovah to gigọ́ mẹ. Apajlẹ devo he mí na gbadopọnna todin wẹ Bruno tọn.

NUHOTỌ AZỌ́NYỌNẸNTỌ KAVI LIZỌNYIZỌNWATỌ?

To owhe delẹ diẹ wayi, Bruno, (4) he tindo owhe 28 todin, plọnwe to wehọmẹ nuhiho tọn he diyin taun de mẹ po yanwle lọ po nado nọ deanana hànjigbẹ́ lẹ. Na nugbo tọn, e yinukọn to wepinplọn etọn mẹ sọmọ bọ whlasusu wẹ e yin oylọ-basina nado deanana hànjigbẹ́ symphonie tọn. Sọgodo dagbe de wẹ to nukọnna ẹn. Bruno dọmọ: “Etomọṣo, n’gbẹ́ nọ mọdọ nude jẹdò to gbẹzan ṣie mẹ. N’ko klan dee do wiwe na Jehovah, ṣigba n’yọnẹn dọ n’ma to dee zejo na ẹn pete, podọ enẹ nọ dotukla mi. N’dọ numọtolanmẹ ṣie lẹ na Jehovah to odẹ̀ mẹ bosọ dọho hẹ mẹmẹsunnu numimọnọ he to agun lọ mẹ lẹ. To whenue n’lẹnnupọn sisosiso godo, n’basi nudide nado ze lizọnyizọn ṣie do otẹn tintan mẹ kakati nido yin nuhiho; n’jo wehọmẹ nuhiho tọn lọ do bo magbe nado sẹ̀n to lẹdo he mẹ nuhudo wẹnlatọ Ahọluduta lọ tọn sù te taun de mẹ.” Kọdetọn tẹwẹ nudide etọn hẹnwa?

Bruno sẹtẹn yì tòpẹvi Guapiara tọn mẹ (sọha gbẹtọ he nọ nọ̀ finẹ lẹ tọn yì nudi 7 000), fie dẹn do tòdaho São Paulo tọn na kilomẹtlu 260. Diọdo daho de wẹ enẹ yin. E dọmọ: “N’jẹ owhé pẹvi de gbè, fie zomọ nuhẹnfa tọn, televiziọn po Internet po ma tin te. Ṣigba, onú delẹ tin to owhé lọ gbè he n’ma ko tindo pọ́n gbede dai—enẹ wẹ jipa omá tọn de po jipa atin-sinsẹ́n tọn de po!” Bruno nọ sẹ̀n to agun pẹvi de mẹ, podọ whladopo to sẹmẹsẹmẹ, e nọ yí núdùdù, osin po owe lẹ po do saki etọn mẹ bo nọ ze zokẹkẹ etọn nado yì dọyẹwheho to glètoho lẹ mẹ. To lẹdo enẹlẹ mẹ, mẹsusu ma ko sèhó gando wẹndagbe lọ go pọ́n. E dọmọ: “N’nọ deanana plọnmẹ Biblu 18 pipli. Lehe nuplọntọ enẹlẹ to vọjlado basi to gbẹzan yetọn mẹ do na mi ayajẹ taun! Whenẹnu wẹ e wá họnwun na mi dọ n’ko mọ nuhe jẹdò to gbẹzan ṣie mẹ—enẹ wẹ numọtolanmẹ pekọ sisosiso he Ahọluduta lọ zizedo otẹn tintan mẹ nọ hẹnwa tọn. Eyin n’ko doafọna agbasanu lẹ wẹ, n’ma na ko tindo numọtolanmẹ enẹ pọ́n gbede.” Ṣigba, nawẹ Bruno nọ penukundo ede go to akuẹzinzan-liho to Guapiara gbọn? Po nukiko yẹsẹ de po, e dọmọ: “N’nọ plọnmẹ ginta hihò.” To linlẹn de mẹ, mí sọgan dọ dọ e gbẹ́ yin nuhotọ azọ́nyọnẹntọ de.

“N’MỌDỌ N’DONA GBỌṢI FINẸ”

Mariana, (5) he ko dibla tindo owhe 30 tindo numimọ Bruno tọn nkọ. Whẹ̀yidọtọ de wẹ e yin, ṣigba mahopọnna dọ azọ́n etọn pekuẹ taun, e ma tindo ayajẹ nujọnu tọn. E dọmọ: “E nọ taidi dọ n’to wezundo to jẹhọn godo wẹ nkọ.” (Yẹwh. 1:17) Mẹmẹsunnu po mẹmẹyọnnu susu po na ẹn tuli nado lẹnnupọndo gbehosọnalitọ bibasi ji. To whenue Mariana po họntọn etọn lẹ po, yèdọ Bianca, (6) Caroline (7) po Juliana (8) po lẹnnupọndeji godo, yé basi dide nado yì gọalọna agun de to Barra do Bugres, tòpẹvi he dẹn do yé na kilomẹtlu kanweko susu de mẹ sẹpọ Bolivie. Etẹwẹ wá jọ bọdego?

Mariana dọmọ: “To bẹjẹeji, linlẹn ṣie wẹ nado nọ finẹ na osun atọ̀n. Ṣigba to whenue ojlẹ enẹ wá vivọnu, n’ko tindo plọnmẹ Biblu 15. Na nugbo tọn, nuplọntọ enẹlẹ tindo nuhudo alọgọ susu dogọ tọn nado basi nukọnyiyi to nugbo lọ mẹ. Enẹwutu, e vẹawuna mi taun nado dọna yé dọ n’jlo na lẹkọyi whé. N’mọdọ n’dona gbọṣi finẹ.” Podọ nuhe mẹmẹyọnnu ẹnẹ lọ lẹpo wà pẹpẹ niyẹn. Todin, be yanwle yọyọ Mariana tọn hẹn ayajẹ nujọnu tọn wá na ẹn ya? E dọmọ: “Homẹ ṣie hùn dọ Jehovah yí mi zan nado gọalọna gbẹtọ lẹ na yé nido basi diọdo dagbe lẹ to gbẹzan yetọn mẹ. Dona de wẹ e yin na mi nado mọdọ todin n’to whenu po huhlọn ṣie po yizan na nuhe doale taun de.” Caroline dọ numọtolanmẹ etọn—he họntọn atọ̀n etọn he pò lẹ lọsu tindo—dọmọ: “Eyin n’mlọnai to zánmẹ, n’nọ tindo numọtolanmẹ pekọ sisosiso tọn na n’yí dee zan na Ahọluduta lọ wutu. Lehe n’na gọalọna plọnmẹ Biblu ṣie lẹ do ji wẹ gbẹzan ṣie lẹpo sinai do. Awú nọ ji mi nado mọ lehe yé to nukọnyiyi basi do. N’to nugbo-yinyin hogbe ehelẹ tọn mọ dọmọ: ‘Dọ́ ẹ pọ́n, bosọ mọdọ yinyọ́n wẹ OKLUNỌ.’”—Ps. 34:8.

Homẹ nọ hùn Jehovah taun nado mọdọ lẹdo aihọn pé, mẹmẹsunnu gọna mẹmẹyọnnu jọja susu dogọ ‘to yede zejo sọn ojlo mẹ wá’ nado dọyẹwheho wẹndagbe Ahọluduta lọ tọn to fidindẹn lẹ. (Ps. 110:3; Howh. 27:11) Taidi kọdetọn de, azọ́nwatọ ojlo dagbenọ enẹlẹ lọsu nọ duvivi dona mayọnjlẹ Jehovah tọn lẹ tọn.—Howh. 10:22.

[Apotin to weda 5]

“Mí Ma Jẹdò Nude Tọn”

To whenue João Paulo po asi etọn Noemi po do ojlo hia nado yì sẹ̀n to fie nuhudo sù te, mẹdelẹ tẹnpọn nado diọlinlẹnna yé. Delẹ to hagbẹ agun lọ tọn lẹ mẹ dọmọ: “Eyin mì sẹtẹn yì tòpẹvi de mẹ, mì na pehẹ nuhahun akuẹzinzan tọn.” Mẹdevo lẹ dọ dọ, “Naegbọn mì na sẹtẹn? Nuhudo gbẹ́ tin to agun mítọn lọsu mẹ be.” João Paulo dọmọ: “E vẹawu ma nado dike ayinamẹ ahundopo tọn he sọ yin mẹhẹngbọjọ tọn enẹlẹ ni yinuwado mí ji.” Owhe susu he João Paulo po Noemi po yizan nado sẹ̀n to fie nuhudo wẹnlatọ lẹ tọn sù te zọ́n bọ to egbehe, homẹ nọ hùn yé dọ yé tẹdo nudide yetọn go. João Paulo basi zẹẹmẹ dọmọ: “Sọn whenue gbọ́n yẹn po asi ṣie po tofi, mí ma jẹdò nude tọn. Humọ, na nuhe dù nuhudo mítọn lẹ, mí nọ mọ hugan dehe mí nọ tindo dai.” Noemi yidogọ dọmọ: “Vivẹnudido ehe ma yin to ovọ́ mẹ.”

E ma nọ bọawu nado tlọ́n tòhomẹ bo yì sẹ̀n to tòpẹvi de mẹ. Nawẹ mẹhe sẹtẹn yì lẹdo he to olá lẹ mẹ lẹ nọ penukundo yede go to akuẹzinzan-liho gbọn? Gbọn azọ́n voovo lẹ wiwà dali. Mẹdelẹ nọ plọnmẹ Glẹnsigbe kavi ogbè devo, nọ plọnwe hẹ ovi lẹ to whégbè, nọ tọnu, nọ sá osẹ̀n do owhé lẹ kavi nọ wazọ́n devo depope he ma na yí whenu yetọn susu. Podọ, tadona tẹ kọ̀n wẹ mẹhe to sinsẹ̀n to fie nuhudo sù te lẹ nọ wá? Dona lẹ nọ sù taun hugan avùnnukundiọsọmẹnu lẹ!

[Apotin to weda 6]

Ajlù Whégbè Tọn

Tiago: “Ojlẹ kleun de he n’jẹ agun yọyọ lọ mẹ godo, ayajẹ ṣie jẹ didepo ji. Wẹnlatọ lẹ ma sù to tòpẹvi lọ mẹ paali, podọ diblayin dọ nuwiwa ayidedai tọn de ma tin. Ajlù whégbè tọn wle mi taun. Ṣigba, na n’mọdọ n’dona wà nude nado gọ̀ ayajẹ ṣie mọ wutu, n’dovivẹnu nado jẹakọ hẹ mẹmẹsunnu po mẹmẹyọnnu he tin to agun lọ mẹ lẹ po—podọ enẹ de sinsẹ́n tọ́n! N’jihọntọn yọyọ lẹ, podọ e ma dẹn bọ n’gọ̀ ayajẹ ṣie mọ bosọ voawu.”

[Yẹdide to weda 3]

Noemi po João Paulo po to Ascurra, Santa Catarina