Lánkan Yetọn Sú Odò Nuhe Whè Tọn

TO OWHE 49 W.M., Pita, Jakọbu po Johanu po, “he taidi dòtin” agun lọ tọn lẹ, deazọ́n de na apọsteli Paulu po azọ́nwatọ hatọ etọn Balnaba po. Yé dona hẹn Klistiani wamọnọ lẹ do ayiha mẹ dile yé to kunnudena omẹ akọta lẹ tọn. (Gal. 2:9, 10) Nawẹ azọngban ehe yin hinhẹndi gbọn?

Wekanhlanmẹ Paulu tọn lẹ do lehe e na ayidonugo whẹho ehe do hia. Di apajlẹ, e kanwehlan Klistiani he tin to Kọlinti lẹ dọmọ: “Gando akuẹjọ he tin na omẹ wiwe lẹ go, kẹdẹdile yẹn ko na anademẹ lẹ hlan agun Galatia tọn lẹ do, mọkẹdẹ wẹ mìlọsu ni wà do ga. To azán tintan osẹ tọn lẹpo gbè, mì gbọ dopodopo mìtọn ni nọ de nude dovo do sẹdotẹnmẹ to owhé etọn titi gbè sọgbe hẹ nuhe e tindo, bọ e ma na yin whenue yẹn wá wẹ akuẹjọ lẹ na yin bibasi. Ṣigba, to whenue yẹn na wá, sunnu depope he mì yí wekanhlanmẹ lẹ do pà, omẹ ehelẹ wẹ yẹn na dohlan nado hẹn nunina homẹdagbe tọn mìtọn yì Jelusalẹm.”—1 Kọl. 16:1-3.

To wekanhlanmẹ gbọdo Paulu tọn awetọ hlan Kọlintinu lẹ mẹ, e vọ́ yanwle akuẹjọ lọ tọn dọ dọmọ: “Gbọn hinhẹn sọzẹn dali, lánkan mìtọn todin nido sọgan sú odò nuhe whèdo yé tọn.”—2 Kọl. 8:12-15.

To whenue Paulu kanwehlan Klistiani he tin to Lomu lẹ to nudi owhe 56 W.M., akuẹjọ lọ ko dibla sọgbe. E dọmọ: “Yẹn na zingbejizọnlin to madẹnmẹ yì Jelusalẹm nado yilizọn na omẹ wiwe lẹ. Na mẹhe tin to Makedonia po Akaia po lẹ ko hùnhomẹ nado má onú yetọn lẹ gbọn nunina bibasi dali na wamọnọ he tin to omẹ wiwe lẹ ṣẹnṣẹn to Jelusalẹm.” (Lom. 15:25, 26) Paulu hẹn azọ́ndenamẹ etọn di to ojlẹ vude godo, na to whenue e lẹkọyi Jelusalẹm bo yin wiwle to finẹ, e dọna Ayimatẹn-gán Lomu tọn Feliksi dọmọ: “Yẹn wá nado na nunina lẹblanu tọn lẹ omẹ ṣie lẹ, podọ nado basi avọ́nunina lẹ.”—Owalọ 24:17.

Gbigbọ he Klistiani owhe kanweko tintan tọn lẹ dohia họnwun to nuhe Paulu dọ gando Makedonianu lẹ go mẹ. E dọ dọ yé “to mí vẹ̀ vẹkuvẹku mapote nado mọ lẹblanulọkẹyi lọ yí nado yí homẹdagbe do na nunina.” Apọsteli lọ dotuhomẹna Kọlintinu lẹ nado hodo apajlẹ enẹ. E dọmọ: “Mì gbọ omẹ dopodopo ni basi kẹdẹdile e ko magbe etọn to ahun etọn mẹ do, e ma yin po awuwhiwhle po kavi po huhlọn yí do hẹnmẹ po gba, na Jiwheyẹwhe nọ yiwanna nunamẹtọ homẹhunnọ.” Etẹwẹ whàn agun lọ lẹ nado tlúalọ sọmọ? Ojlo yetọn ma yin “nado wleawuna onú susugege na nuhudo omẹ wiwe lẹ tọn poun gba ṣigba nado sudeji ga to pẹdido na Jiwheyẹwhe mẹ.” (2 Kọl. 8:4; 9:7, 12) Mílọsu sọgan tindo yanwle dopolọ dile mí to gbigbọ alọtútlú tọn dohia. Matin ayihaawe, Jehovah Jiwheyẹwhe na dona gbigbọ dagbe ṣejannabi matindo tọn mọnkọtọn—podọ dona etọn nọ hẹnmẹ wàdọkun.—Howh. 10:22.

[Apotin to weda 9]

ALIHO HE MẸ MẸDELẸ NỌ BASI NUNINA NA AZỌ́N LẸDO AIHỌN PÉ TỌN LỌ TE

Dile e yin do to azán apọsteli Paulu tọn gbè, to egbehe mẹsusu “nọ de nude dovo,” kavi de akuẹ sọha de dovo bo nọ yí i do apotin nunina agun tọn he go yè kàn “Azọ́n Lẹdo Aihọn Pé Tọn” do lẹ mẹ. (1 Kọl. 16:2) To osun dopodopo mẹ, agun lẹ nọ do nunina enẹlẹ hlan wekantẹn Kunnudetọ Jehovah tọn lẹ tọn he nọ penukundo otò yetọn go. Hiẹ sọgan sọ do nunina lẹ hlan nuyizan sọgbe hẹ osẹ́n he Kunnudetọ Jehovah tọn lẹ nọ yizan to otò towe mẹ tlọlọ. Nado yọ́n yinkọ nuyizan sọgbe hẹ osẹ́n he Kunnudetọ Jehovah tọn lẹ nọ yizan hugan to otò towe mẹ tọn, jaale bo dọnsẹpọ wekantẹn alahọ tọn he nọ penukundo otò towe go. Adlẹsi wekantẹn alahọ otò towe tọn sọgan yin mimọ to nọtẹn Intenet tọn www.pr2711.com. ji. Nunina wunmẹ he hiẹ sọgan dohlan tlọlọ lẹ die:

NUNINA TLỌLỌ LẸ

• Akuẹ, aṣọ́donu akuẹgegenu tọn lẹ kavi nutindo họakuẹ mẹdetiti tọn devo lẹ sọgan yin nina.

• Wekanhlanmẹ kleun de dona hodo nado dohia dọ akuẹ kavi núzinzan lọ lẹ yin nina.

TITO NUNINA HE SỌGAN YIN GIGỌYÍ TỌN

• Akuẹ sọgan yin nina po yanwle lọ po dọ nunamẹtọ lọ sọgan gọ̀ ẹ yí eyin e tindo nuhudo etọn.

• Wekanhlanmẹ kleun de dona hodo nado dohia dọ nunina lọ sọgan yin gigọyí.

TITO NUNINA SỌN OJLO MẸ WÁ TỌN

Gbọnvona akuẹ po nutindo họakuẹ mẹdetiti tọn lẹ po nina, aliho devo lẹ tin ga nado nọgodona azọ́n Ahọluduta lọ tọn lẹdo aihọn pé. Aliho enẹlẹ yin sislẹ bọdego. Mahopọnna aliho nunina tọn he hiẹ jlo na zan, jaale bo dọnsẹpọ wekantẹn alahọ tọn he nọ penukundo otò towe go whẹ́ nado yọ́n aliho nunina tọn he sọgan yin yiyizan to otò lọ mẹ lẹ. Na nubiọtomẹsi osẹ́n tọn lẹ po osẹ́n takuẹ tọn lẹ po nọ gbọnvo wutu, nujọnu wẹ e yin nado biọ alọgọ whẹpo do de aliho he yọ́n hugan nado basi nunina.

Alọgọ Owù-Nujijọ Tọn: Nunina alọgọ owù-nujijọ gbẹzan tọn kavi nunina tito gbọjẹ gaa/agbasazọ́n jijodo tọn de sọgan yin didohlan ARTJB.

Akuẹ He Tin to Akuẹsẹdotẹn Lẹ: Akuẹ he tin to akuẹsẹdotẹn lẹ, akuẹ he yin bibẹdo akuẹsẹdotẹn lẹ na ojlẹ tangan de (dépôt à terme), kavi akuẹ gbọjẹ gaa mẹdopodopo tọn lẹ sọgan yin zizedo alọ ARTJB tọn mẹ nado nọ yizan kavi mẹde sọgan basi tito dọ to okú emitọn godo, akuẹ lọ ni yin súsú na ARTJB, to kọndopọ mẹ hẹ nubiọtomẹsi akuẹsẹdotẹn lọ tọn lẹ.

Ale Ajọ́ Tọn Lẹ: Ale ajọ́ tọn lẹ sọgan yin nina taidi nunina tlọlọ de kavi yin didohlan ARTJB.

Ohọ̀ po Aigba Po: Ohọ̀ po aigba po he sọgan yin sisà sọgan yin nina ARTJB vlavo gbọn nunina tlọlọ de bibasi dali kavi, na nuhe dù aigba he ji ohọ̀ tin te bọ gbẹtọ gbẹ́ tin to e mẹ, nunamẹtọ lọ sọgan yí i do basi nunina ṣigba e dona dohia dọ emi na gbẹ́ nọ nọ̀ e mẹ dile e na dẹnsọ bọ emi tin to ogbẹ̀.

Kandai Gúmima po Nunina lẹ Tọn Po: Nutindo kavi akuẹ sọgan yin nina taidi ogú hlan ARTJB gbọn kandai sọgbe hẹ osẹ́n de bibasi dali, kavi yinkọ ARTJB tọn sọgan yin kinkandai taidi mẹhe na dugu nunina lẹ tọn.

Dile hogbe lọ “tito nunina sọn ojlo mẹ wá tọn” dohia do, nunina ehelẹ nọ biọ dọ nunamẹtọ lọ ni basi tito delẹ.

Na nudọnamẹ dogọ, hiẹ sọgan dọnsẹpọ wekantẹn alahọ Kunnudetọ Jehovah tọn lẹ tọn to Bénin, vlavo gbọn wekanhlanmẹ kavi alokan dali, to adlẹsi he yin sislẹ to odò yiyizan mẹ kavi hiẹ sọgan dọnsẹpọ wekantẹn alahọ Kunnudetọ Jehovah tọn lẹ tọn he nọ penukundo otò towe go.

Wekantẹn Alahọ Kunnudetọ Jehovah Tọn lẹ Tọn to Bénin

Association Religieuse Les Témoins de Jéhovah du Bénin

ARTJB, B.P. 312, AB-Calavi, Bénin

Alokan: (229) 21 36 01 14

[Yẹdide to weda 8]