“Azọ́n lọ Klo”

OJLẸ sọ̀ na opli titengbe de to Jelusalẹm. Ahọlu Davidi ylọ ahọvi, ahọluzọnwatọ họ̀nmẹ tọn gọna sunnu huhlọnnọ etọn lẹpo pli. Homẹ yetọn hùn taun nado sè nulila vonọtaun de. Jehovah ko deazọ́nna visunnu Davidi tọn Sọlomọni nado gbá ohọ̀ daho de he na yin kinklandowiwe na sinsẹ̀n-bibasi Jiwheyẹwhe nugbo lọ tọn. Ahọlu Islaeli tọn he ko poyọnho lọ ko mọ yẹdide họ̀gbigbá tọn lọ yí to gbọdo glọ bo yí i na Sọlomọni. Davidi dọmọ: “Azọ́n lọ klo, na e ma yin tẹmpli gbẹtọ tọn, ṣigba Jehovah Jiwheyẹwhe tọn wẹ.”—1 Otàn. 28:1, 2, 6, 11, 12; 29:1.

Enẹgodo, Davidi kanse dọmọ: “Todin, mẹnu lẹ wẹ na desọn ojlo mẹ to egbé nado sẹwá nukọn po nunina de po to alọmẹ hlan Jehovah?” (1 Otàn. 29:5) Eyin a ko to finẹ to gbenẹgbe, nawẹ a na ko yinuwa gbọn? Be a na ko yin whinwhàn nado nọgodona azọ́n daho ehe ya? Islaelivi lẹ yawu yinuwa. Na nugbo tọn, yé “[hùnhomẹ] nado basi nunina sọn ojlo mẹ wá . . . , na ahun pipé de wẹ yé yí do basi nunina sọn ojlo mẹ wá lọ lẹ.”—1 Otàn. 29:9.

To owhe kanweko susu lẹ godo, Jehovah wleawuna nudevo he yiaga taun hugan tẹmpli lọ. E ze tẹmpli gbigbọmẹ tọn daho lọ dai, enẹ wẹ awuwledainanu lọ na gbẹtọvi lẹ nido nọ dọnsẹpọ ewọ to sinsẹ̀n-bibasi mẹ to dodonu avọ́sinsan Jesu tọn ji. (Heb. 9:11, 12) Nawẹ Jehovah to alọgọna gbẹtọvi lẹ nado gbọwhẹ hẹ ẹ to egbehe gbọn? E to mọwà gbọn azọ́n mẹhẹnzun devi tọn mítọn gblamẹ. (Mat. 28:19, 20) Kọdetọn azọ́n ehe tọn wẹ yindọ, plọnmẹ Biblu livi susu nọ yin anadena, devi fọtọ́n susu lẹ nọ yí baptẹm podọ agun yọyọ kanweko susu nọ yin didoai to whemẹwhemẹ.

Ṣigba, jideji mọnkọtọn nọ biọ dọ owe sinai do Biblu ji susu dogọ ni yin zinzinjẹgbonu, Plitẹnhọ Ahọluduta tọn lẹ ni yin gbigbá bo yin nukunpedego, podọ nọtẹn plidopọ lẹ tọn ni yin hihọ̀. Be hiẹ ma kọngbedopọ dọ azọ́n wẹndagbe-jijlá tọn mítọn klo bo nọ hẹn ale wá ya?—Mat. 24:14.

Wanyina Jiwheyẹwhe podọ na kọmẹnu gọna niyaniya-yinyin azọ́n yẹwhehodidọ Ahọluduta lọ tọn wẹ nọ whàn omẹ Jiwheyẹwhe tọn lẹ “nado sẹwá nukọn po nunina de po to alọmẹ hlan Jehovah” gbọn nunina sọn ojlo mẹ wá lẹ bibasi dali. Lehe e yin ayajẹnu do sọ nado nọ “yí nuhọakuẹ [mítọn] lẹ do gbògbéna Jehovah” podọ nado mọ lehe yè nọ yí nugbonọ-yinyin po nuyọnẹn po do zan nunina enẹlẹ do nado wazọ́n he klohugan lọ to whenuho gbẹtọvi tọn mẹ!—Howh. 3:9.

Aliho He Mẹ Mẹdelẹ Nọ Basi Nunina Na Azọ́n Lẹdo Aihọn Pé Tọn Lọ Te

To egbehe mẹsusu “nọ de nude dovo,” kavi de akuẹ sọha de dovo bo nọ yí i do apotin nunina tọn agun lọ tọn mẹ he go yè kàn “Azọ́n Lẹdo Aihọn Pé Tọn” do. (1 Kọl. 16:2) To osun dopodopo mẹ, agun lẹ nọ do nunina enẹlẹ hlan wekantẹn Kunnudetọ Jehovah tọn lẹ tọn he nọ penukundo otò yetọn go. Hiẹ sọgan sọ do nunina lẹ hlan tlọlọ gbọn nuyizan he sọgbe to osẹ́n-liho ehe Kunnudetọ Jehovah tọn lẹ nọ yizan to otò towe mẹ de gblamẹ. Nado yọ́n yinkọ nuyizan he sọgbe to osẹ́n-liho ehe Kunnudetọ Jehovah tọn lẹ nọ yizan hugan to otò towe mẹ tọn, jaale bo dọnsẹpọ wekantẹn alahọ tọn. A sọgan mọ adlẹsi lọ to www.pr2711.com ji. Nunina wunmẹ he hiẹ sọgan dohlan tlọlọ lẹ die:

NUNINA TLỌLỌ LẸ

Kalti akuẹsẹdotẹn tọn he nọ yin yiyizan nado do akuẹ hlan mẹdevo, nado suahọ kavi nado họ̀nú sọgan yin yiyizan nado basi nunina. To alahọ delẹ mẹ, e sọ yọnbasi nado wà ehe gbọn jw.org kavi nọtẹn Intẹnẹt tọn devo he alahọ lọ ko de nado yizan ji.
Akuẹ, aṣọ́donu akuẹgegenu tọn lẹ kavi nutindo họakuẹ mẹdetiti tọn devo lẹ sọgan yin nina. Wekanhlanmẹ kleun de dona hodo nunina lọ nado dohia dọ akuẹ kavi núzinzan lọ lẹ ma na yin gigọyí.

TITO NUNINA HE SỌGAN YIN GIGỌYÍ TỌN

Akuẹ sọgan yin nina po yanwle lọ po dọ nunina-basitọ lọ sọgan gọ̀ ẹ yí eyin e tindo nuhudo etọn.
Wekanhlanmẹ kleun de dona hodo nunina lọ nado dohia dọ nunina lọ sọgan yin gigọyí.

TITO NUNINA SỌN OJLO MẸ WÁ TỌN

Gbọnvona akuẹ po nutindo họakuẹ mẹdetiti tọn lẹ po nina, aliho devo lẹ tin ga nado nọgodona azọ́n Ahọluduta lọ tọn lẹdo aihọn pé. Aliho enẹlẹ yin sislẹ bọdego. Mahopọnna aliho nunina tọn he hiẹ jlo na yizan, jaale bo dọnsẹpọ wekantẹn alahọ tọn he nọ penukundo otò towe go whẹ́ nado yọ́n aliho nunina tọn he sọgan yin yiyizan lẹ. Na nubiọtomẹsi osẹ́n tọn lẹ po osẹ́n takuẹ tọn lẹ po nọ gbọnvo wutu, nujọnu wẹ e yin nado biọ alọgọ whẹpo do de aliho he yọ́n hugan nado basi nunina.

Alọgọ Owù-Nujijọ Tọn: Nunina alọgọ owù-nujijọ gbẹzan tọn kavi nunina tito gbọjẹ gaa/agbasazọ́n jijodo tọn de sọgan yin didohlan ARTJB.

Akuẹ He Tin to Akuẹsẹdotẹn Lẹ: Akuẹ he tin to akuẹsẹdotẹn lẹ, akuẹ he yin bibẹdo akuẹsẹdotẹn lẹ na ojlẹ tangan de (dépôt à terme), kavi akuẹ gbọjẹ gaa mẹdetiti tọn lẹ sọgan yin zizedo alọ ARTJB tọn mẹ nado nọ yizan kavi mẹde sọgan basi tito dọ to okú emitọn godo, akuẹ lọ ni nọ yin súsú na ARTJB, to kọndopọ mẹ hẹ nubiọtomẹsi akuẹsẹdotẹn lọ tọn lẹ.

Ale Ajọ́ Tọn Lẹ: Ale ajọ́ tọn lẹ sọgan yin nina taidi nunina tlọlọ de kavi yin didohlan ARTJB.

Ohọ̀ po Aigba Po: Ohọ̀ po aigba po he sọgan yin sisà lẹ sọgan yin nina ARTJB vlavo gbọn nunina tlọlọ de bibasi dali, kavi na nuhe dù aigba he ji ohọ̀ tin te bọ gbẹtọ gbẹ́ tin to e mẹ, mẹde sọgan yí i do basi nunina, ṣigba e dona dohia dọ emi na gbẹ́ nọ nọ̀ e mẹ dile e na dẹnsọ bọ emi tin to ogbẹ̀.

Kandai Gúmima po Nunina lẹ Tọn Po: Nutindo kavi akuẹ sọgan yin nina taidi ogú hlan ARTJB gbọn kandai sọgbe hẹ osẹ́n de bibasi dali, kavi yinkọ ARTJB tọn sọgan yin kinkandai taidi mẹhe na dugu nunina lẹ tọn.

Dile hogbe lọ “tito nunina sọn ojlo mẹ wá tọn” dohia do, nunina ehelẹ nọ biọ dọ nunamẹtọ lọ ni basi tito delẹ.

Na nudọnamẹ dogọ, yì odò pete to adà bẹjẹeji tọn nọtẹn Intẹnẹt jw.org tọn bo zín “Basi Nunina Nado Nọgodona Azọ́n Lẹdo Aihọn Pé Tọn Mítọn,” kavi dọnsẹpọ wekantẹn alahọ Kunnudetọ Jehovah tọn lẹ tọn to Bénin, vlavo gbọn adlẹsi he yin sislẹ to odò yiyizan dali nado kanwehlan kavi tẹkan. Kavi a sọgan dọnsẹpọ wekantẹn alahọ Kunnudetọ Jehovah tọn lẹ tọn he nọ penukundo otò towe go.