Nọ Dohia Dọ A Yọ́n Pinpẹn Alọtútlú Jehovah Tọn

JEHOVAH yin Jiwheyẹwhe alọtlútọ. (Jak. 1:17) Nudida Jehovah tọn lẹ, he bẹ sunwhlẹvu susugege he tin to olọn mẹ lẹ hẹn, kakajẹ ogbé he gọ́ aigba ji lẹ ji nọ pagigona alọtútlú etọn.—Ps. 65:12, 13; 147:7, 8; 148:3, 4.

Pinpẹn-nutọn-yinyọnẹn he Psalm-kantọ lọ tindo na Mẹdatọ etọn whàn ẹn sọmọ bọ e pà ohàn de nado pagigona azọ́n Jehovah tọn lẹ. Hia Psalm 104 bo pọ́n eyin a ma na tindo numọtolanmẹ etọn lẹ nkọ! Psalm-kantọ lọ dọmọ: “Yẹn na to hànji hlan OKLUNỌ sọle yẹn tin to ogbẹ̀ dẹnsọ: Yẹn na to pipà hànji hlan Jiwheyẹwhe ṣie whenuena yẹn tin to ogbẹ̀.” (Ps. 104:33) Be ojlo hiẹ lọsu tọn niyẹn ya?

APAJLẸ ALỌTÚTLÚ TỌN DAHO HUGAN LỌ

Jehovah jlo dọ mí ni nọ tlúalọ dile emi nọ wà do. E sọ na mí whẹwhinwhẹ́n nujọnu tọn lẹ he wutu mí dona yin alọtlútọ. Doayi e go dọ ewọ gbọdo apọsteli Paulu nado wlan dọmọ: “Gbẹnuna mẹhe yin adọkunnọ to titonu ehe mẹ lẹ ma nado nọ yigo, podọ ma nado ze todido yetọn sinai do adọkun he ma tindo jidide lẹ ji, ṣigba do Jiwheyẹwhe, mẹhe nọ na mí onú lẹpo susugege na mí nido duvivi etọn lọ ji; nado nọ wà dagbe, nado nọ sudeji to azọ́n dagbe lẹ mẹ, nado yin alọtlútọ, bo wleawu nado mánamẹ, bosọ nọ bẹ adọkunnu whlá na yede, yèdọ dodonu dagbe de he ji yé na dó do to sọgodo, na yé nido sọgan tẹdo ogbẹ̀ nujọnu tọn lọ go gligli.”—1 Tim. 6:17-19.

To whenue Paulu kàn wekanhlanmẹ gbọdo etọn awetọ hlan agun Kọlinti tọn, e zinnudo pọndohlan dagbe tintindo gando nunamẹ go ji. Paulu dọmọ: “Mì gbọ omẹ dopodopo ni basi kẹdẹdile e ko magbe etọn to ahun etọn mẹ do.” Ewọ sọ yidogọ dọmọ: “E ma yin po awuwhiwhle po kavi po huhlọn yí do hẹnmẹ po gba, na Jiwheyẹwhe nọ yiwanna nunamẹtọ homẹhunnọ.” (2 Kọl. 9:7) Enẹgodo, Paulu donù mẹhe nọ mọaleyi sọn nunina he yè yí homẹdagbe do basi mẹ lẹ go: mẹhe mọ nunina yí lọ nọ yí i do hẹn pekọ wá na nuhudo etọn lẹ; podọ nunamẹtọ lọ nọ yin hinhẹn zun adọkunnọ gbọn dona gbigbọmẹ tọn he e nọ mọyi lẹ gblamẹ.—2 Kọl. 9:11-14.

Paulu donù kunnudenu daho hugan lọ he do alọtútlú Jiwheyẹwhe tọn hia go nado dotana adà wekanhlanmẹ etọn tọn ehe. Paulu wlan dọmọ: “Opẹ́ wẹ na Jiwheyẹwhe na nunina vọnu mayọnjlẹ etọn.” (2 Kọl. 9:15) E họnwun dọ nunina Jehovah tọn bẹ dagbewà etọn lẹpo he e dohia omẹ etọn lẹ gbọn Jesu Klisti gblamẹ hẹn. Ehe klo sọmọ bọ hogbe lẹ whè nado basi zẹẹmẹ lehe e họakuẹ do tọn to gigọ́ mẹ.

Nawẹ mí sọgan dohia dọ mí yọ́n pinpẹn nuhe Jehovah po Visunnu etọn po ko wà gọna nuhe yé na wá wà na mí lẹ tọn gbọn? Aliho dopo wẹ nado yin alọtlútọ gbọn whenu mítọn, huhlọn mítọn po nutindo mítọn lẹ po yiyizan dali nado nọgodona sinsẹ̀n-bibasi wiwe-ṣeke Jehovah tọn, vlavo e sù kavi whè.—1 Otan. 22:14; 29:3-5; Luku 21:1-4.

Aliho He mẹ Mẹdelẹ Nọ Basi Nunina Na Azọ́n Lẹdo Aihọn Pé Tọn lọ Te

Dile e yin do to azán apọsteli Paulu tọn gbè, to egbehe mẹsusu “nọ de nude dovo,” kavi de akuẹ sọha de dovo bo nọ yí i do apotin nunina tọn agun lọ tọn mẹ he go yè kàn “Azọ́n Lẹdo Aihọn Pé Tọn” do. (1 Kọl. 16:2) To osun dopodopo mẹ, agun lẹ nọ do nunina enẹlẹ hlan wekantẹn Kunnudetọ Jehovah tọn lẹ tọn he nọ penukundo otò yetọn go. Hiẹ sọgan sọ do nunina lẹ hlan tlọlọ gbọn nuyizan he sọgbe to osẹ́n-liho ehe Kunnudetọ Jehovah tọn lẹ nọ yizan to otò towe mẹ de gblamẹ. Nado yọ́n yinkọ nuyizan he sọgbe to osẹ́n-liho ehe Kunnudetọ Jehovah tọn lẹ nọ yizan hugan to otò towe mẹ tọn, jaale bo dọnsẹpọ wekantẹn alahọ tọn. A sọgan mọ adlẹsi lọ to www.pr2711.com ji. Nunina wunmẹ he hiẹ sọgan dohlan tlọlọ lẹ die:

NUNINA TLỌLỌ LẸ

Kalti akuẹsẹdotẹn tọn he nọ yin yiyizan nado do akuẹ hlan mẹdevo, nado suahọ kavi nado họ̀nú sọgan yin yiyizan nado basi nunina. To alahọ delẹ mẹ, e sọ yọnbasi nado wà ehe gbọn jw.org kavi nọtẹn Intẹnẹt tọn devo he alahọ lọ ko de nado yizan ji.
Akuẹ, aṣọ́donu akuẹgegenu tọn lẹ kavi nutindo họakuẹ mẹdetiti tọn devo lẹ sọgan yin nina. Wekanhlanmẹ kleun de dona hodo nunina lọ nado dohia dọ akuẹ kavi núzinzan lọ lẹ ma na yin gigọyí.

TITO NUNINA HE SỌGAN YIN GIGỌYÍ TỌN

Akuẹ sọgan yin nina po yanwle lọ po dọ nunina-basitọ lọ sọgan gọ̀ ẹ yí eyin e tindo nuhudo etọn.
Wekanhlanmẹ kleun de dona hodo nunina lọ nado dohia dọ nunina lọ sọgan yin gigọyí.

TITO NUNINA SỌN OJLO MẸ WÁ TỌN

Gbọnvona akuẹ po nutindo họakuẹ mẹdetiti tọn lẹ po nina, aliho devo lẹ tin ga nado nọgodona azọ́n Ahọluduta lọ tọn lẹdo aihọn pé. Aliho enẹlẹ yin sislẹ bọdego. Mahopọnna aliho nunina tọn he hiẹ jlo na yizan, jaale bo dọnsẹpọ wekantẹn alahọ tọn he nọ penukundo otò towe go whẹ́ nado yọ́n aliho nunina tọn he sọgan yin yiyizan lẹ. Na nubiọtomẹsi osẹ́n tọn lẹ po osẹ́n takuẹ tọn lẹ po nọ gbọnvo wutu, nujọnu wẹ e yin nado biọ alọgọ whẹpo do de aliho he yọ́n hugan nado basi nunina.

Alọgọ Owù-Nujijọ Tọn: Nunina alọgọ owù-nujijọ gbẹzan tọn kavi nunina tito gbọjẹ gaa/agbasazọ́n jijodo tọn de sọgan yin didohlan ARTJB.

Akuẹ He Tin to Akuẹsẹdotẹn Lẹ: Akuẹ he tin to akuẹsẹdotẹn lẹ, akuẹ he yin bibẹdo akuẹsẹdotẹn lẹ na ojlẹ tangan de (dépôt à terme), kavi akuẹ gbọjẹ gaa mẹdetiti tọn lẹ sọgan yin zizedo alọ ARTJB tọn mẹ nado nọ yizan kavi mẹde sọgan basi tito dọ to okú emitọn godo, akuẹ lọ ni nọ yin súsú na ARTJB, to kọndopọ mẹ hẹ nubiọtomẹsi akuẹsẹdotẹn lọ tọn lẹ.

Ale Ajọ́ Tọn Lẹ: Ale ajọ́ tọn lẹ sọgan yin nina taidi nunina tlọlọ de kavi yin didohlan ARTJB.

Ohọ̀ po Aigba Po: Ohọ̀ po aigba po he sọgan yin sisà lẹ sọgan yin nina ARTJB vlavo gbọn nunina tlọlọ de bibasi dali, kavi na nuhe dù aigba he ji ohọ̀ tin te bọ gbẹtọ gbẹ́ tin to e mẹ, mẹde sọgan yí i do basi nunina, ṣigba e dona dohia dọ emi na gbẹ́ nọ nọ̀ e mẹ dile e na dẹnsọ bọ emi tin to ogbẹ̀.

Kandai Gúmima po Nunina lẹ Tọn Po: Nutindo kavi akuẹ sọgan yin nina taidi ogú hlan ARTJB gbọn kandai sọgbe hẹ osẹ́n de bibasi dali, kavi yinkọ ARTJB tọn sọgan yin kinkandai taidi mẹhe na dugu nunina lẹ tọn.

Dile hogbe lọ “tito nunina sọn ojlo mẹ wá tọn” dohia do, nunina ehelẹ nọ biọ dọ nunamẹtọ lọ ni basi tito delẹ.

Na nudọnamẹ dogọ, a sọgan dọnsẹpọ wekantẹn alahọ Kunnudetọ Jehovah tọn lẹ tọn to Bénin, vlavo gbọn adlẹsi he yin sislẹ to odò yiyizan dali nado kanwehlan kavi tẹkan. Kavi a sọgan dọnsẹpọ wekantẹn alahọ Kunnudetọ Jehovah tọn lẹ tọn he nọ penukundo otò towe go.