Lalo de He Nọ Hẹn Gbẹtọ lẹ Lẹndọ Jiwheyẹwhe Yin Kanylantọ

NUHE MẸSUSU YISE

Owe katoliki tọn de dọmọ: “Tlolo to okú godo, alindọn gbẹtọvi he wà ylando he jẹna okú lẹ tọn nọ yì zòmẹ, fie yé nọ yin yasana te to ozò kavi ‘miyọ́n de he ma nọ ṣí gbede’ mẹ.” (Catéchisme de l’Église catholique) Nukọntọ sinsẹ̀n tọn delẹ nọ dọ dọ mẹhe to zòmẹ lẹ wẹ mẹhe jẹla mlẹnmlẹn na Jiwheyẹwhe, bo ko klan sọn Ewọ go pete lẹ.

NUGBO BIBLU TỌN

“Alindọn he waylando, ewọ lọ wẹ na kú.” (Ezekiẹli 18:4) Oṣiọ lẹ “ma yọ́n nudepope.” (Yẹwhehodọtọ 9:5) Eyin alindọn de nọ kú bo masọ nọ yọ́n nudepope ba, nawẹ e sọgan jiya to “miyọ́n de he ma nọ ṣí gbede” mẹ kavi tlẹ jiya awufiẹsa he kinklan pete sọn Jiwheyẹwhe go nọ hẹnwa tọn gbọn?

Hogbe Heblugbe po Glẹkigbe po tọn de he na taun tọn zẹẹmẹdo yọdò paa he mẹ gbẹtọvi lẹ nọ yin dìdì do, wẹ nọ saba yin lilẹdogbedevomẹ dọ “zòmẹ” kavi “olọnzomẹ” to Biblu delẹ mẹ. Di apajlẹ, whenue Jobu to azọ̀n sinsinyẹn de jẹ, e hodẹ̀ dọmọ: “Ṣo dọ hiẹ do whlá mi do yọdò mẹ [kavi “do olọnzomẹ,” sọgbe hẹ Lẹdogbedevomẹ Douay-Rheims Version tọn].” (Jobu 14:13, Biblu Gun Alada) Jobu jlo na gbọjẹ wẹ, e ma yin to nọtẹn yasanamẹ tọn de kavi fihe e na jẹla sọn Jiwheyẹwhe dè te de gba, amọ́ to yọdò mẹ.

NUHEWUTU E YIN NUJỌNU

Eyin kanylantọ de wẹ Jiwheyẹwhe yin, mí ma gán jlo nado jihọntọn hẹ ẹ; kakatimọ mí na nọla na ẹn wẹ. Nawe de he nọ Rocío bo nọ nọ̀ Mexique dọmọ: “Sọn ovu gbọ́n wẹ yè ko plọn mi dọ zòmẹ tin. Enẹ nọ hẹn mi jọsi sọmọ bọ n’ma gán lẹndọ Jiwheyẹwhe do jẹhẹnu dagbe depope. N’nọ mọ ẹn di mẹhe nọ gblehomẹ podọ hẹngogonọ.”

Ṣigba, aliho he mẹ Biblu hẹn whẹdida Jiwheyẹwhe tọn lẹ po ninọmẹ oṣiọ lẹ tọn po họnwun te zọ́n bọ pọndohlan Rocío tọn gando Jiwheyẹwhe go diọ. E dọmọ: “N’vò todin, bọ e taidi dọ agbàn pinpẹn de wẹ yin didesọn kọ̀ji na mi nkọ. Vudevude n’wá kudeji dọ nue na wà dagbe na mí hugan wẹ Jiwheyẹwhe nọ dín, podọ e yiwanna mí, bọ yẹnsu sọgan yiwanna ẹn ga. E taidi otọ́ de he hẹn alọ ovi etọn lẹ tọn bo to dagbe hugan yetọn dín.”—Isaia 41:13.

Mẹsusu lẹ wẹ to kanhò nado yin dodonọ to nukun Jiwheyẹwhe tọn mẹ, na yé to budi ma nado yì jiya to olọnzomẹ wutu, amọ́ Jiwheyẹwhe ma jlo dọ a ni sẹ̀n ewọ na obu wutu. Kakatimọ, Jesu dọmọ: “Hiẹ dona . . . yiwanna Jehovah Jiwheyẹwhe towe.” (Malku 12:29, 30) Humọ, to whenue e họnwun na mí dọ Jiwheyẹwhe ma nọ yinuwa po mawadodo po to egbehe, mí gán deji do whẹdida etọn he ja to sọgodo lẹ go ga. Taidi họntọn Jobu tọn Elihu, mí sọgan dọ po jide po dọmọ: “E dẹn do Jiwheyẹwhe nugbo lọ nado yinuwa po kanyinylan po, yèdọ Ganhunupotọ lọ nado waylan!”—Jobu 34:10.