Be Hiẹ to ‘Núdùdù Mọyi to Ojlẹ Sisọ mẹ’ Ya?

OJLẸ he sinyẹn hugan to whenuho gbẹtọvi lẹ tọn mẹ wẹ mí to gbẹnọ te. (2 Tim. 3:1-5) Owanyi he mí tindo na Jehovah po gbemima mítọn nado nọgbẹ̀ sọgbe hẹ nujinọtedo dodo tọn etọn lẹ po nọ yin whiwhlepọn egbesọegbesọ. Jesu ko mọ ojlẹ awusinyẹn tọn ehe hlan nukọn, podọ e hẹn hodotọ etọn lẹ deji dọ yé na mọ tulinamẹ he yé tindo nuhudo etọn yí nado sọgan doakọnnanu kakajẹ opodo. (Mat. 24:3, 13; 28:20) Nado sọgan hẹn yé lodo, e de afanumẹ nugbonọ de nado nọ na yé ‘núdùdù gbigbọmẹ tọn to ojlẹ sisọ mẹ.’—Mat. 24:45, 46.

Sọn whenue gbọ́n afanumẹ nugbonọ enẹ ko yin dide to 1919, “devizọnwatọ whégbè tọn” livi susu he wá sọn ogbè lẹpo mẹ ko yin bibẹpli do titobasinanu Jiwheyẹwhe tọn mẹ bo to núdùdù gbigbọmẹ tọn mọyi. (Mat. 24:14; Osọ. 22:17) Ṣigba, e ma yin núdùdù gbigbọmẹ tọn lọ lẹpo wẹ tin to ogbè lẹpo mẹ, podọ e ma yin mẹlẹpo wẹ sọgan mọ zinjẹgbonu mítọn lẹ to Intẹnẹt ji. Di apajlẹ, mẹsusu ma nọ mọ video po hosọ he nọ yin awuwlena do jw.org ji kẹdẹ lẹ po yí. Be enẹ dohia dọ núdùdù he mẹdelẹ nọ mọyi ma pé nado hẹn yé lodo to gbigbọ-liho wẹ ya? Nado wá tadona he sọgbe kọ̀n, mì gbọ mí ni lẹnnupọndo gblọndo kanbiọ titengbe ẹnẹ delẹ tọn ji.

1. Etẹwẹ yin núdanú tintan he Jehovah nọ yizan nado wleawuna núdùdù etọn?

To whenue Satani tẹ́n Jesu pọ́n nado lilẹ́ zannu zun akla, Jesu gblọn dọmọ: “Gbẹtọ ma nọ nọgbẹ̀ gbọn akla kẹdẹ dali gba, ṣigba gbọn ohó he nọ tọ́n sọn onù Jehovah tọn mẹ lẹpo dali.” (Mat. 4:3, 4) Ohó Jehovah tọn lẹ yin kinkan do Biblu mẹ. (2 Pita 1:20, 21) Enẹwutu, Biblu wẹ yin núdanú tintan to núdùdù gbigbọmẹ tọn mítọn mẹ.—2 Tim. 3:16, 17.

Titobasinanu Jehovah tọn ko wleawuna Biblu Les Saintes Écritures—Traduction du monde nouveau blebu kavi apadewhe etọn to ogbè he lán to 120 ji mẹ, podọ ogbè devo lẹ tọn nọ yin didetọn to owhe dopodopo mẹ. Gbọnvona lẹdogbedevomẹ ehe, liva susu lẹdogbedevomẹ Biblu tọn devo lẹ tọn blebu kavi apadewhe yetọn ko yin zinzinjẹgbonu to ogbè fọtọ́n susu mẹ. Nuwadotana jiawu enẹ tin to kọndopọ mẹ hẹ ojlo Jehovah tọn dọ “gbẹtọ wunmẹ lẹpo ni yin whinwhlẹngán bo wá oyọnẹn he pegan nugbo tọn kọ̀n.” (1 Tim. 2:3, 4) Podọ na “nudida depope ma tin he ma sọawuhia to nukọn [Jehovah tọn]” wutu, mí sọgan deji dọ e na dọ̀n mẹhe “yọnẹn dọ yé tindo nuhudo gbigbọmẹ tọn” lẹ wá titobasinanu etọn mẹ bo nasọ nọ na yé núdùdù gbigbọmẹ tọn.—Heb. 4:13; Mat. 5:3, 6; Joh. 6:44; 10:14.

2. Adà tẹwẹ owe mítọn lẹ nọ yiwà to núdùdù gbigbọmẹ tọn he nọ yin awuwlena mẹ?

Nado wleawuna yise he lodo mí dona wà nususu hugan Biblu hihia poun. Mí dona mọnukunnujẹ nuhe mí hia mẹ bo nọ yí nuhe mí plọn lẹ do yizan mẹ. (Jak. 1:22-25) Ojọ̀ Etiopianu owhe kanweko tintan whenu tọn yọ́n nugbo enẹ. E to Ohó Jiwheyẹwhe tọn hia to whenue wẹndagbe-jlatọ Filippi kanse e dọmọ: “Na nugbo tọn, be hiẹ mọnukunnujẹ nuhe hia a te mẹ ya?” Ojọ̀ lọ gblọn dọmọ: “Na taun tọn, nawẹ yẹn sọgan wàmọ do, adavo mẹde deanana mi?” (Owalọ 8:26-31) Filippi gọalọna ojọ̀ lọ nado tindo oyọnẹn he pegan Ohó Jiwheyẹwhe tọn. Nuhe ojọ̀ lọ plọn whàn ẹn sọmọ bọ e yí baptẹm. (Owalọ 8:32-38) Mọdopolọ, owe sinai do Biblu ji mítọn lẹ nọ gọalọna mí nado tindo oyọnẹn he pegan nugbo lọ tọn. Yé ko yinuwado mí ji bo whàn mí nado yí nuhe mí plọn lẹ do yizan mẹ.—Kọl. 1:9, 10.

Owe enẹlẹ gblamẹ wẹ devizọnwatọ Jehovah tọn lẹ nọ mọ onú gbigbọmẹ tọn susugege he yé na dù bosọ nù lẹ gbọn. (Isa. 65:13) Di apajlẹ, Atọ̀họ̀-Nuhihọ́ lọ Tọn he tin-to-aimẹ to nuhe hugan ogbè 210 mẹ nọ basi zẹẹmẹdo dọdai Biblu tọn lẹ ji, nọ gọalọna mí nado mọnukunnujẹ nugbo sisosiso gbigbọmẹ tọn lẹ mẹ bosọ nọ whàn mí nado nọgbẹ̀ sọgbe hẹ nunọwhinnusẹ́n Biblu tọn lẹ. Réveillez-vous! he nọ yin zinzinjẹgbonu to nudi ogbè 100 mẹ, nọ gọalọna mí nado yọ́n nususu gando nudida Jehovah tọn lẹ go bosọ nọ do lehe mí sọgan hodo ayinamẹ yọ́n-na-yizan Biblu tọn lẹ do hia mí. (Howh. 3:21-23; Lom. 1:20) Afanumẹ nugbonọ lọ nọ wleawuna nudọnamẹ sinai do Biblu ji to nuhe hugan ogbè 680 mẹ! Be hiẹ nọ de whenu dovo to azán dopodopo ji nado hia Biblu ya? Be hiẹ nọ hia linlinnamẹwe yọyọ dopodopo po owe yọyọ he yin awuwlena to ogbè towe mẹ lẹpo po to owhe dopodopo mẹ ya?

Gbọnvona owe lẹ, titobasinanu Jehovah tọn nọ wleawuna todohukanji hodidọ tọn he sinai do Biblu ji lẹ, ehe nọ yin nina to opli po plidopọ mítọn lẹ po ji. Be hiẹ nọ duvivi hodidọ, nupinpọn do plọnnu, wadohia, po hokansemẹ lẹ he nọ yin zizedonukọnnamẹ to plidopọ enẹlẹ po ji tọn ya? Ayihaawe ma tin dọ Jehovah wẹ to núdùdù gbigbọmẹ tọn he dojó na mí!—Isa. 25:6.

3. Eyin owe he nọ yin zinzinjẹgbonu lẹpo ma tin to ogbè towe mẹ, be huvẹ na hù we to gbigbọ-liho wẹ ya?

Lala. Nugbo wẹ dọ to whedelẹnu devizọnwatọ Jehovah tọn delẹ nọ mọ núdùdù gbigbọmẹ tọn yí hugan devo lẹ. Ṣigba, enẹ ma dona paṣa mí. Etẹwutu? Lẹnnupọndo apọsteli lẹ ji. Yé mọ nudọnamẹ susu yí hugan devi devo lẹ to owhe kanweko tintan whenu. (Malku 4:10; 9:35-37) Etomọṣo, huvẹ ma hù devi ehelẹ to gbigbọ-liho, na yé mọ nuhe yé tindo nuhudo etọn yí wutu.—Efe. 4:20-24; 1 Pita 1:8.

E sọ jẹna ayidego nado yọnẹn dọ nuhe Jesu dọ bo wà to whenue e tin to aigba ji lẹpo ma yin kinkandai to owe Wẹndagbe tọn lẹ mẹ. Apọsteli Johanu wlan dọmọ: “Na nugbo tọn, onú susu devo lẹ tin he Jesu wà, bọ eyin yé dona yin kinkan to gigọ́ mẹ wẹ, yẹn lẹndọ, aihọn lọsu ma sọgan hẹn owe-hihá he na yin kinkan lẹ.” (Joh. 21:25) Dile etlẹ yindọ hodotọ Jesu tọn lẹ to owhe kanweko tintan whenu tindo nudọnamẹ susu gando gbẹtọ pipé lọ Jesu go hugan míwlẹ, mí ma gbọagba nudepope tọn. Jehovah hẹn ẹn diun dọ mí yọ́n nuhe mí dona yọnẹn gando Jesu go lẹ nado sọgan hodo afọdòmẹ etọn pẹkipẹki.—1 Pita 2:21.

Sọ lẹnnupọndo wekanhlanmẹ he apọsteli lẹ kàn hlan agun owhe kanweko tintan tọn lẹ ji. E whè gbau, dopo to wekanhlanmẹ apọsteli Paulu tọn lẹ mẹ ma tin to Biblu mẹ. (Kọl. 4:16) Be núdùdù gbigbọmẹ tọn whèdo mí, na mí ma tindo wekanhlanmẹ enẹ wutu wẹ ya? Paali. Jehovah yọ́n nuhe mí tindo nuhudo etọn lẹ podọ e ko wleawu nususu tọn, na mí nido sọgan lodo to gbigbọ-liho.—Mat. 6:8.

To egbehe, devizọnwatọ Jehovah tọn delẹ nọ mọ núdùdù gbigbọmẹ tọn susu yí hugan devo lẹ. Be owe mítọn vude poun wẹ tin to ogbè towe mẹ ya? E yinmọ mọ wẹ, yọnẹn dọ Jehovah nọ hò towe pọ́n. Nọ plọn owe he a tindo lẹ, podọ e yin e yọnbasi nọ yì opli lẹ to ogbè he a sè hugan mẹ. Podọ deji dọ Jehovah na hẹn we lodo to gbigbọ-liho.—Ps. 1:2; Heb. 10:24, 25.

4. Eyin a ma nọ mọ nudọnamẹ he nọ yin zizedo jw.org ji lẹ yí, be enẹ dohia dọ a na lẹzun madogánnọ to gbigbọ-liho wẹ ya?

Linlinnamẹwe mítọn lẹ po owe sinai do Biblu ji devo lẹ po nọ yin awuwlena do nọtẹn Intẹnẹt tọn mítọn ji. Nudọnamẹ he nọ gọalọna alọwlemẹ lẹ, jọja aflanmẹ lẹ, po mẹhe tindo ovivu lẹ po sọ nọ yin zizedo nọtẹn enẹ ji. Whẹndo lẹ nọ mọaleyi sọn dogbigbapọnna nudọnamẹ enẹlẹ mẹ to sinsẹ̀n-bibasi whẹndo tọn yetọn lẹ whenu. Humọ, nọtẹn Intẹnẹt tọn mítọn nọ na linlin gando nujijọ vonọtaun delẹ go taidi gbedewema yíyí Giliadi tọn, po opli whemẹwhemẹ tọn po, podọ e sọ nọ na linlin mẹmẹsunnu lẹ lẹdo aihọn pé gando nugbajẹmẹji jọwamọ tọn po whẹho osẹ́n tọn he gando omẹ Jehovah tọn lẹ go po go. (1 Pita 5:8, 9) Nọtẹn Intẹnẹt tọn mítọn sọ yin azọ́nwanu yẹwhehodidọ tọn he tindo huhlọn taun, na e nọ hẹn wẹndagbe lọ tin-to-aimẹ etlẹ yin to otò he mẹ azọ́n mítọn yin alọhẹndotena te lẹ.

Hiẹ sọgan lodo to gbigbọ-liho vlavo a nọ mọ nudọnamẹ he tin to nọtẹn Intẹnẹt tọn mítọn ji lẹ yí kavi lala. Afanumẹ lọ ko dovivẹnu vẹkuvẹku nado wleawuna nudọnamẹ susu do owe mítọn lẹ mẹ na devizọnwatọ whégbè tọn dopodopo nido mọ núdù ganji to gbigbọ-liho. Enẹwutu, e ma yin dandannu dọ hiẹ ni họ̀ nuyizan de kiki nado sọgan yì jw.org ji. Mẹdelẹ sọgan basi tito yetọn titi nado nọ zín nudọnamẹ he tin to nọtẹn Intẹnẹt tọn mítọn ji lẹ tọ́n bo yí yé na mẹhe ma sọgan yì Intẹnẹt ji lẹ, ṣigba e ma yin bibiọ to agun lẹ si nado wàmọ.

Mí dopẹna Jesu, na e hẹn opagbe he e do nado penukundo nuhudo gbigbọmẹ tọn mítọn go di. Dile azán godo tọn he vẹawu nado pehẹ ehe to sisẹpọ vivọnu po awuyiya po, mí sọgan deji dọ Jehovah na zindonukọn nado to awuwlena ‘núdùdù gbigbọmẹ tọn to ojlẹ sisọ mẹ.’