Kanbiọ Sinai Do Biblu Ji
Fitẹ wẹ nuylankan lẹ nọ wá sọn?
Mẹnu wẹ tẹnpọn nado hẹn Jesu na ewọ nido wà nuylankan?—Matiu 4:8-10
To paa mẹ, gbẹtọ lẹ nọ jlo nado tin to jijọho mẹ hẹ mẹdevo lẹ, nado dọ nugbo podọ nado jọmẹ. To whelọnu lo, naegbọn danuwiwa, whẹdida mawadodo po kanyinylan po do gbayipe sọmọ? Mí nọ saba sè linlin danuwiwa tọn lẹ. Be mẹde tin he nọ tẹnpọn nado hẹn gbẹtọ lẹ na yé nido wà nuylankan wẹ ya?—Hia 1 Johanu 5:19.
Be Jiwheyẹwhe dá gbẹtọvi lẹ po ayilinlẹn ylankan po wẹ ya? Lala, Jehovah Jiwheyẹwhe dá gbẹtọvi lẹ to apajlẹ etọn mẹ, bo na mí ayilinlẹn lọ nado nọ hodo apajlẹ owanyi etọn tọn. (Gẹnẹsisi 1:27; Job 34:10) Ṣigba, Jiwheyẹwhe sọ doyẹyigona gbẹtọvi lẹ bo na yé mẹdekannujẹ nudide bibasi tọn. To whenue mẹjitọ mítọn tintan lẹ de nado yinuwa to aliho ylankan mẹ, yé gbẹ́ nado hodo apajlẹ Jiwheyẹwhe tọn bo lẹzun mapenọ. Yewlẹ dè wẹ mí dugu ayilinlẹn ylanwiwa tọn sọn.—Hia Deutelonomi 32:4, 5.
Be mí na to nuylankan wà zọnmii wẹ ya?
Jiwheyẹwhe jlo dọ mí ni nọ duto ayilinlẹn ylankan mítọn lẹ ji. (Howhinwhẹn lẹ 27:11) Enẹwutu, e plọn mí lehe mí na dapana nuylankan wiwà do po lehe mí na mọ ayajẹ nujọnu tọn do po. Ṣigba to egbehe, mí ma sọgan hodo apajlẹ owanyi Jiwheyẹwhe tọn to pipé mẹ.—Hia Psalm 32:8.
Dile etlẹ yindọ nuylankan fọ́n bo to jijideji to egbehe, Jiwheyẹwhe jo dotẹnmẹ do na ẹn na ojlẹ de, na mẹlẹpo nido sọgan mọ kọdetọn vẹadi he e nọ hẹnwa lẹ. (2 Pita 3:7-9) Ṣigba to madẹnmẹ, aigba na gọ́ na gbẹtọ ayajẹnọ lẹ he nọ setonuna Jiwheyẹwhe.—Hia Psalm 37:9-11.