Etẹwẹ Jiwheyẹwhe Nọ Lẹn Gando Yajiji Towe lẹ Go?

Mẹdelẹ nọ lẹndọ Jiwheyẹwhe ma nọ mọ yajiji mítọn lẹ podọ e ma nọ duahunmẹna ẹn.

PỌ́N NUHE BIBLU DỌ

• Jiwheyẹwhe nọ mọ yajiji mítọn lẹ podọ e nọ duahunmẹna ẹn

  “Jehovah sọ mọdọ kanyinylan gbẹtọ tọn sù tlala to aigba ji . . . , e sọ doadi na ẹn to ahun etọn mẹ.”—Jenẹsisi 6:5, 6.

• Jiwheyẹwhe na de yajiji lẹpo sẹ̀

  “Na whenu pẹẹde dogọ, mẹylankan lẹ ma na tin ba; hiẹ na pọ́n fie yé nọ nọ̀ dai, yé ma nasọ to finẹ. Ṣigba, homẹmimiọnnọ lẹ wẹ na dugu aigba tọn, yé nasọ nọ mọ awuvivi susu to jijọho susugege mẹ.”—Salmu lẹ 37:10, 11.

• Nuhe Jiwheyẹwhe jlo na we

  “‘Yẹn yọ́n nuhe lẹn n’te gando mì go lẹ ganji,’ wẹ Jehovah dọ, ‘yèdọ linlẹn jijọho tọn lẹ bọ e ma yin nugbajẹmẹji tọn lẹ, na mìwlẹ nido tindo sọgodo dagbe de po todido de po. Podọ mì na ylọ mi bo na wá bo na hodẹ̀ hlan mi, yẹn nasọ dotoaina mì.’”—Jelemia 29:11, 12.

  “Mì dọnsẹpọ Jiwheyẹwhe, ewọ nasọ dọnsẹpọ mì.”​—Jakọbu 4:8.