Eyin Mẹvivẹ de Kú

EYIN mẹvivẹ de ko kú do we pọ́n, hiẹ lọsu sọgan ko tindo numọtolanmẹ delẹ taidi awubla, ṣokẹdẹninọ po flumẹjijẹ po. Vlavo a nọ duadi, gblewhẹdo dewe kavi dibu. A tlẹ gán ko kanse dewe nuhewutu a gbẹ́ togbẹ̀.

Yọnẹn dọ awubla ma yin ohia madogán tọn. Kakatimọ, e nọ dohia dọ a yiwanna mẹlọ taun. Amọ́, be a gán duto awubla towe ji ya?

LEHE MẸDELẸ KO DUDEJI DO

Awubla towe gán taidi nuhe ma na depò gbede, amọ́ ayinamẹ he bọdego lẹ gán gọalọna we:

AWUBLA TOWE GÁN DẸN-TO-AIMẸ

E ma yin mẹlẹpo wẹ nọ blawu to aliho dopolọ mẹ podọ mẹdelẹ tọn nọ dẹn-to-aimẹ hú mẹdevo lẹ tọn. Etomọṣo, avi sọgan de awubla towe pò. Vanessa he yin nùdego wayi, dọmọ: “N’gbọ bo nọ viavi; e nọ de awubla ṣie pò.” Yọnnu de he nọ yin Sofía, he nọviyọnnu etọn kú to ajiji mẹ, dọmọ: “Nulinlẹnpọn do nuhe jọ lọ ji nọ yidogọna awufiẹsa ṣie. E nọ taidi agàdá de mẹ kiklọ́. Awufiẹsa lọ nọ sinyẹn taun, amọ́ e nọ zọ́n bọ apà lọ nọ kú.”

NỌ DỌ LINLẸN PO NUHE TO AHUN JI NA WE LẸ PO NA MẸDE

Nugbo wẹ dọ a gán nọ jlo na nọ dewe ṣo to whedelẹnu. Amọ́, awubla taidi agbàn pinpẹn de he hiẹ ṣo ma gán hẹn. Jared, dẹpẹ owhe 17 mẹvi de he otọ́ etọn kú dọmọ: “N’nọ dọ nuhe to ahun ji na mi na mẹdevo lẹ. Nuhe n’nọ dọ lẹpo sọgan nọma họnwun na mẹdevo lẹ, amọ́ hodidọ tọ́n nọ wà dagbe na mi.” Janice he yin nùdego to hosọ tintan mẹ, dọ ale devo he e nọ hẹnwa dọmọ: “Hodidọ hẹ mẹdevo lẹ nọ miọnhomẹna mi taun. N’nọ mọdọ mẹdevo lẹ nọ mọnukunnujẹ nuhe to ahun ji na mi mẹ, podọ n’nọ mọdọ ma to dee ṣo.”

NỌ KẸALỌYI ALỌGỌ

Doto de dọmọ: “Eyin mẹhe to awubla mẹ de dike bọ họntọn po hẹnnumẹ lẹ po gọalọna ẹn to bẹjẹeji [nujijọ lọ tọn], e nọ zọ́n bọ e nọ doakọnna awubla lọ to nukọn mẹ.” Nọ dọna họntọn towe lẹ nuhe yé gán wà nado gọalọ; vlavo yé nọ jlo nado gọalọ amọ́ yé ma nọ yọ́n nuhe yé na wà.—Howhinwhẹn lẹ 17:17.

DỌNSẸPỌ JIWHEYẸWHE

Yọnnu de he nọ yin Tina dọmọ: “Whenue kansẹẹ-zọ̀n hù asu ṣie to ajiji mẹ, n’ma gán sọ dọ homẹ na ẹn ba, enẹwutu n’nọ dọ nulẹpo na Jiwheyẹwhe! To afọnnu lẹpo, n’nọ biọ to e si nado gọalọna mi to azán lọ pete ji. Jiwheyẹwhe gọalọna mi to aliho susu mẹ he n’ma tlẹ gán slẹ.” Tarsha, yọnnu de he tindo owhe 22 to whenue onọ̀ etọn kú, dọmọ: “Biblu hihia wẹ nọ miọnhomẹna mi to azán lẹpo ji. N’nọ mọ nudagbe he ji n’gán lẹnnupọndo.”

NỌ LẸNNUPỌNDO FỌNSỌNKU JI

Tina zindonukọn dọmọ: “To dai, todido fọnsọnku tọn ma nọ di nude na mi, na din wẹ n’do hudo asu ṣie tọn bọ visunnu ṣie lẹ do hudo otọ́ yetọn tọn, e ma yin sọgodo. Amọ́, to owhe ẹnẹ godo, todido ehe ko lẹzun nujọnu na mi todin. E nọ gọalọna mi taun. N’nọ to nulẹnpọn dọ n’na wá gọ̀ ẹ mọ whladopo dogọ, bọ enẹ nọ na mi jijọho po ayajẹ po!”

Vlavo, awubla towe ma na busẹ to zánto dopo mẹ. Amọ́, nuhe Vanessa dọ gán gọalọna we. E dọmọ, “Yè nọ lẹndọ e ma na wá pọnte gbede, amọ́ nulẹ nọ wá pọnte to nukọn mẹ.”

Flindọ a na gbẹ́ nọ jẹdò mẹlọ tọn, amọ́ a gán gbẹ́ duvivi gbẹninọ tọn. Po alọgọ owanyinọ Jiwheyẹwhe tọn po, a gán gbẹ́ wá jihọntọn dagbe lẹ bo duvivi gbẹninọ tọn. Humọ to madẹnmẹ, Jiwheyẹwhe na fọ́n oṣiọ lẹ sọnku. E jlo dọ a ni wá gbò mẹvivẹ towe fán whladopo dogọ. Whenẹnu, awubla towe na busẹ kakadoi!