Eyin A to Azọ̀n Sinsinyẹn de Jẹ

“Whenue yè mọ kansẹẹ afuje po adọ̀vi po tọn na mi, n’mọdọ okú janwẹ pò na mi. Amọ́, whenue n’lẹkọwa whégbè, n’dọna dee dọ, ‘Eyọn, e ma yin nuhe n’donukun niyẹn, amọ́ n’dona dín aliho de nado doakọnna.’”—Yọnnu de he nọ yin Linda bo do owhe 71.

“N’bẹ azọ̀n sinsinyẹn de he yinuwado okàn agbasa mẹ tọn ṣie lẹ ji to amiyọnwhé nukunmẹ ṣie tọn. To ojlẹ de mẹ, awufiẹsa lọ sinyẹn sọmọ bọ n’bẹ azọ̀n apọṣimẹ tọn. Whlasusu wẹ n’nọ mọ dee to ṣokẹdẹ bo tlẹ ko lẹn nado hù dee pọ́n.”—Yọnnu de he nọ yin Elise bo do owhe 49.

Dawe he to awutujẹ de to kẹkẹvi de mẹ bọ mẹvivẹ etọn lẹ lẹdo e

EYIN yè ko mọ azọ̀n jẹmagbọ de na we kavi na mẹvivẹ towe de pọ́n, a na ko yọ́n lehe e nọ hẹnmẹ jẹflumẹ do. Gbọnvona awufiẹsa he azọ̀n lọ lọsu nọ hẹnwa, nususu devo lẹ sọ nọ hẹn awufiẹsa wá ga. Nuhe sọ nọ hẹn ninọmẹ lọ ylan dogọ delẹ wẹ dotowhé yìyì mapote, lehe e nọ vẹawu nado mọ nukunpedomẹgo delẹ yí kavi suahọ yetọn do, kavi nuyiwadomẹji ylankan amasin delẹ tọn. Awufiẹsa he azọ̀n jẹmagbọ nọ hẹnwa lẹ gán húagbọ́mẹ taun.

Fie wẹ mí gán lẹhlan nado mọ alọgọ? Dẹ̀hiho hlan Jiwheyẹwhe po Biblu hihia po ko gọalọna mẹsusu nado mọ homẹmimiọn. Owanyi he whẹndo mẹtọn po họntọn lẹ po nọ dohia sọ nọ gọalọ ga.

LEHE MẸDELẸ KO DUDEJI DO

“Yí yise he a tindo to Jiwheyẹwhe mẹ do doakọnna azọ̀n he jẹ a te,” wẹ Robert he tindo owhe 58 dọ, “podọ ewọ na gọalọna we. Nọ hodẹ̀ hlan Jehovah. Nọ dọ nuhe to ahun ji na we lẹ na ẹn. Nọ biọ gbigbọ wiwe etọn. Nọ biọ ẹ dọ ni na we huhlọn, na a nido gọalọna whẹndo towe podọ nado doakọnna azọ̀n lọ.

“Eyin whẹndo towe gọalọna we bo ma gbẹkọ go we, e nọ wà dagbe taun. E whè gbau, mẹdopo kavi awe nọ ylọ mi to alokan ji to gbèdopo bo nọ kanse dọ, ‘Nawẹ a te do?’ Họntọn ṣie lẹ sọ nọ na mi tuli taun. Yé gọalọna mi taun, bọ ehe zọ́n bọ n’ma jogbe.”

Taidi họntọn de, eyin a yì dla mẹhe to azọ̀njẹ de pọ́n, hẹn nuhe Linda dọ do ayiha mẹ dọmọ: “E họnwun dọ mẹhe to azọ̀njẹ nọ jlo na de ayiha sọn azọ̀n lọ ji bo ma nọ jlo nado to hodọ gando azọ̀n lọ go to whelẹponu. Enẹwutu, nọ dọho hẹ ẹ do nudevo lẹ ji.”

Alọgọ Jiwheyẹwhe tọn bibiọ, Owe-wiwe lẹ hihia gọna alọgọ whẹndo po họntọn lẹ po tọn gán hẹn mí kudeji dọ mí gán gbẹ́ duvivi gbẹninọ tọn eyin mí tlẹ to azọ̀n sinsinyẹn de jẹ.

Wefọ Biblu Tọn He Gán Gọalọ Lẹ

Nọ ganjẹ Jiwheyẹwhe go.

“Yẹn hodẹ̀ hlan Jehovah bọ ewọ siọ mi. E sọ whlẹn mi sọn obu ṣie lẹpo mẹ. Agbátọnọ ylọ bọ Jehovah sè.”—Salmu lẹ 34:4, 6.

Linda he go mí donù wayi dọmọ: “N’ma nọ hodẹ̀ gbede dọ, ‘Hẹn mi jẹgangan.’ Nuhe n’nọ dọ to odẹ̀ mẹ wẹ, ‘Na mi huhlọn bo gọalọna mi nado doakọnna azọ̀n ṣie.’”

Nọ mọ huhlọn yí sọn Ohó Jiwheyẹwhe tọn mẹ.

“Depope to mẹhe nọ nọ̀ aigba lọ ji lẹ mẹ ma na dọmọ: ‘N’to azọ̀njẹ.’”—Isaia 33:24.

Nọ lẹnnupọndo opagbe he Jiwheyẹwhe do gando sọgodo go lẹ ji. Ehe na na we todido po huhlọn po nado doakọnna.

Nọ dín alọgọ whẹndo towe po họntọn lẹ po tọn.

“Họntọn nugbo nọ yiwannamẹ to whelẹponu, podọ nọvisunnu he go yè sọgan dejido to ojlẹ ayimajai tọn lẹ mẹ wẹ ewọ.”—Howhinwhẹn lẹ 17:17.

“Ma nọ klan dewe dovo blo,” wẹ Elise he go mí donù wayi dọ. “Dike họntọn towe lẹ ni gọalọna we. A gán nọ mọ dewe to ṣokẹdẹ to whedelẹnu bo ma tlẹ na nọ lẹndọ Jiwheyẹwhe to todoaina we, amọ́ ma nọ klan dewe dovo blo.”