Apotin Kanbiọ Tọn

◼ Be Kunnudetọ Jehovah tọn lẹ dona nọ má hodidọ gbangba tọn he yin yiyidokanji kavi he yin vivọkan lẹ wẹ ya?

Hodidọ sinai do Biblu ji lẹ nọ hẹn mí lodo bosọ nọ na mí tuli. (Owalọ 15:32) Enẹwutu, jọwamọnu wẹ e yin dọ mẹde ni jlo nado má nudọnamẹ tulinamẹ tọn mọnkọtọn hẹ mẹhe ma wá opli lẹ. Na zomọ nuyidokanji tọn voovo lẹ wẹ tin-to-aimẹ to egbehe wutu, hodidọ de sọgan yin yiyidokanji bo yin mimá na mẹdevo lẹ po awubibọ po. Mẹdelẹ ko bẹ hodidọ gbangba tọn he yin yiyidokanji lẹ pli na yede, etlẹ yin dehe ko yin didọ owhe susu lẹ die wayi, bo nọ gbọn mẹwhinwhàn dagbe dali whé yé na họntọn yetọn lẹ kavi basi vọkan yetọn na yé. Mẹdevo lẹ ko wleawuna nọtẹn Internet tọn lẹ bo nọ bẹ hodidọ lẹ do finẹ na mẹdevo nido yí yé zan.

E họnwun dọ, nude ma ylan to e mẹ nado yí hodidọ gbangba tọn lẹ do kanji na yizan mẹdetiti tọn kavi na hagbẹ whẹndo tọn mítọn lẹ. Humọ, mẹho lẹ sọgan basi tito nado yí hodidọ lẹ do kanji na hagbẹ agun lọ tọn awutunọ he ma nọ penugo nado wá opli lẹ. Etomọṣo, mí tindo whẹwhinwhẹ́n susu ma nado má hodidọ gbangba tọn he yin yiyidokanji kavi he yin vivọkan lẹ.

Na hodidọ lẹ nọ yin nina sọgbe hẹ nuhudo lẹdo lọ tọn wutu, mí sọgan mọnukunnujẹ nuagokun hodidọ he yin yiyidokanji bo yin mimá de tọn mẹ to aliho agọ̀ mẹ, na mí ma yọ́n ninọmẹ he mẹ hodidọ lọ yin nina te. Humọ, e sọgan vẹawuna mí nado yọ́n mẹhe na hodidọ lọ po ojlẹ he mẹ e na ẹn te po, nado sọgan deji dọ nudọnamẹ agọe tọn he sọgbe lẹ wẹ yin yiyizan. (Luku 1:1-4) Gbọnvona enẹ, hodidọ gbangba tọn he yin yiyidokanji kavi he yin vivọkan lẹ sọgan hẹn mẹdelẹ nado na ayidonugo po gbégbò he ma jẹ po mẹde kavi mọ ẹn yí sọn mẹdevo lẹ dè.—1 Kọl. 3:5-7.

Afanumẹ nugbonọ podọ nuyọnẹntọ lọ nọ wazọ́n sinsinyẹn nado wleawuna núdùdù gbigbọmẹ tọn “he pé” podọ to “ojlẹ sisọ mẹ.” (Luku 12:42) Ehe bẹ tito hodidọ gbangba tọn he nọ yin nina to agun Kunnudetọ Jehovah tọn lẹ tọn mẹ hẹn, gọna nuyidokanji he mí sọgan yí to nọtẹn Internet tọn mítọn he yin jw.org ji lẹ. Mí sọgan deji dọ afanumẹ nugbonọ podọ nuyọnẹntọ lọ po Hagbẹ Anademẹtọ etọn po na wleawuna nuhe mí tindo nuhudo etọn nado sọgan lodo to yise mẹ lẹ na mí.—Owalọ 16:4, 5.