Lehe Mí Sọgan Yí Hoyidokanji lẹ Zan Do
1. Gbọnvona owe mítọn lẹ, awuwledainanu dagbe devo tẹwẹ mí tindo?
1 Mẹsusu wẹ nọ yiwanna nado hia hogbe he vivi bosọ yin jijlọ lẹ to jw.org ji. (Yẹwh. 12:10) Ṣigba, be hiẹ nọ yí hoyidokanji lẹ zan ya? Yé nọ hẹn ẹn yọnbasi nado dotoaina susu nudọnamẹ he to nọtẹn mítọn ji lẹ tọn. Nawẹ hoyidokanji lẹ sọgan hẹn ale wá na mí gbọn?
2. Nawẹ mí sọgan nọ yí hoyidokanji lẹ zan to oplọn mẹdetiti tọn kavi whẹndo tọn whenu gbọn?
2 Na Oplọn Mẹdetiti Tọn Kavi Whẹndo Tọn: Todidoai na hoyidokanji Biblu tọn, linlinnamẹwe lẹ tọn kavi owe devo lẹ tọn to whenue mí to mọto mẹ, kavi to azọ́n mítọn lẹ wà sọgan gọalọna mí nado yí whenu mítọn zan po nuyọnẹn po. (Efe. 5:15, 16) Dopo to aliho he mẹ mí sọgan diọalọ na sinsẹ̀n-bibasi whẹndo tọn mítọn te lẹ mẹ wẹ nado nọ dotoaina hoyidokanji owe de tọn bo hodo hihia lọ to owe lọ mẹ. Todidoai na hoyidokanji lẹ to oplọn mẹdetiti tọn mítọn whenu sọgan gọalọna mí taun nado hẹn wehihia mítọn pọnte kavi nado plọn ogbè de.
3. Mẹnu lẹ wẹ sọgan duvivi hoyidokanji lẹ tọn to aigba-denamẹ mítọn ji?
3 Na Lizọnyizọn Lọ: To aigba-denamẹ mítọn ji, mẹhe sin alọnu nọ ján sọmọ bọ yé ma nọ mọ whenu nado hiawe lẹ sọgan yigbe nado dotoaina hoyidokanji lẹ. Kavi mí sọgan dukosọ hẹ mẹhe nọ do ogbè devo lẹ he sọgan kẹalọyi owẹ̀n Ahọluduta lọ tọn eyin yé sè e do “ogbè [yetọn] titi mẹ.” (Owalọ 2:6-8) To akọ̀ delẹ mẹ, todidoai yin nujọnu taun. Di apajlẹ, to akọ̀ Hmong lẹ tọn mẹ, otàn mẹhomẹ lẹ tọn wẹ jọja lẹ nọ dotoaina bo do nọ yọ́n whenuho. Podọ yé ma nọ saba wọn otàn enẹlẹ. To akọ̀ susu mẹ to Aflika, gbẹtọ lẹ nọ yiwanna otàn lẹ sisè nado plọnnu sọn yé mẹ.
4. Kanbiọ tẹlẹ wẹ mí sọgan kanse míde gando lehe mí na gọalọna gbẹtọ lẹ to aigba-denamẹ mítọn ji do go?
4 To aigba-denamẹ mítọn ji, be e na yin alenu nado hò hoyidokanji de na whétọ de to ogbè etọn mẹ ya? Be mẹde sọgan duvivi hoyidokanji owe de tọn eyin mí dohlan ẹn gbọn wekanhlanmẹ Intẹnẹt ji tọn gblamẹ ya? Be mí sọgan yí hoyidokanji owe de tọn do CD ji bo yí i na whétọ de he tindo ojlo bo tlẹ sọ ze vọkan owe lọ tọn na ẹn dogọ ya? Eyin mí yí hoyidokanji owe blebu de tọn, alọnuwe de tọn, linlinnamẹwe de tọn kavi alọnuwe pẹvi de tọn na mẹde to kunnudegbe, mí sọgan hia ẹ di owe dogbonu. Hoyidokanji lẹ yin awuwlena na mí nido nọ yí yé zan to oplọn mẹdetiti tọn mítọn whenu podọ na mí nido dó okún nugbo Ahọluduta lọ tọn lẹ.—1 Kọl. 3:6.