‘Núdùdù to Ojlẹ Sisọ Mẹ’
1. Nawẹ tito-to-whinnu azán plidopọ vonọtaun agọe tọn gọalọna hiẹ po mẹdevo lẹ po gbọn?
1 To azán plidopọ vonọtaun tọn mítọn lẹ godo, mí nọ saba dọ dọ, “E wá do gànmẹ pẹpẹ!” Nugopọntọ lẹdo tọn dopo na linlin dọ to todidoai na tito-to-whinnu agọe tọn lọ godo, mẹhe to lẹdo etọn mẹ delẹ do ojlo hia nado yidogọna mahẹ tintindo yetọn to lizọnyizọn lọ mẹ. Nugopọntọ tomẹyitọ de dọmọ: “E gọalọna mí nado lẹnnupọn ganji gando nudide mítọn gbẹ̀mẹ tọn lẹ go dile ojlẹ lẹ to jujuyi.” Nugopọntọ devo dọ dọ, “Wẹnlatọ susu wẹ dohia dọ nuflinmẹ dagbe de wẹ ehe yin na yé nado hẹn ẹn diun dọ yé to ayidonugo na nuhe yin nujọnu hugan lọ, yèdọ lizọnyizọn lọ.” Nawẹ azán plidopọ vonọtaun tọn gọalọna we gbọn?
2. Etẹwẹ na yin dogbapọnna to tito-to-whinnu owhe sinsẹ̀nzọn tọn he ja lọ whenu?
2 Tito-to-whinnu owhe sinsẹ̀nzọn he ja tọn lọsu nasọ wá do gànmẹ pẹpẹ. Hosọ lọ wẹ “Dín Fibẹtado to Jehovah Mẹ,” he yin didesọn Psalm 118:8, 9 mẹ. Delẹ to hosọ he na yin hodọdeji lẹ mẹ wẹ: “Lehe Jehovah Nọ Yin Figángán de to Ojlẹ Ayimajai Tọn lẹ mẹ Do,” “Gọalọna Mẹdevo lẹ Nado Mọ Fibẹtado to Awà Jehovah Tọn Glọ,” “Hodo Apajlẹ Jehovah Tọn to Awuwiwlena Fibẹtado Mẹ,” “Jọja lẹ Emi, Mì Yí Jehovah do Basi Jidide Mìtọn!” po “Paladisi Gbigbọmẹ Tọn Mítọn—Awuwledainanu Jehovah Tọn Na Fibẹtado” po.
3. Eyin mí yì plidopọ lọ, nawẹ mí sọgan mọaleyi to gigọ́ mẹ gbọn?
3 Lehe Hiẹ Na Mọaleyi sọn Tito-to-Whinnu lọ mẹ Do: Tlolo he azán lọ na yin lilá, basi tito dagbe lẹ nado sọgan tin to otẹn lọ mẹ, bo basi oylọna plọnmẹ Biblu towe lẹ. Nado sọgan “yí akọndonanu do de sinsẹ́n tọ́n,” mí dona hẹn nuhe mí sè lẹ do ayiha mẹ. (Luku 8:15) Enẹwutu dotoaina tito-to-whinnu lọ po sọwhiwhe po, bo basi kandai kleunkleun lẹ do nuagokun gọna anademẹ he a lẹn nado yizan to gbẹzan towe po lizọnyizọn lọ po mẹ lẹ ji. To plidopọ lọ godo, de whenu dovo nado dọhodo tito-to-whinnu lọ ji hẹ whẹndo towe, bo lẹnnupọndo aliho tangan he mẹ hiẹ po whẹndo towe po sọgan yí nudọnamẹ lọ lẹ do yizan mẹ do ji.
4. Naegbọn mí dona to nukọnpọnhlan azán plidopọ vonọtaun tọn mítọn he ja?
4 Po owanyi sisosiso po, nulinlẹnpọn jẹnukọn ko gọalọna Hagbẹ Anademẹtọ lọ nado wleawuna azán plidopọ vonọtaun owhe ehe tọn taidi núdùdù dojó de. Na Jehovah ni dona vivẹnudido mìtọn nado yì plidopọ lẹdo tọn ehe podọ nado mọaleyi sọn ‘núdùdù to ojlẹ sisọ mẹ’ he yin awuwlena na Klistiani lizọnyizọnwatọ lẹ ehe mẹ.—Mat. 24:45.