‘Na Ojlo Jiwheyẹwhe Tọn Ni Yin Wiwà’
1. Etẹwẹ yin hosọ tito-to-whinnu azán plidopọ vonọtaun tọn na owhe sinsẹ̀nzọn 2012 tọn, podọ naegbọn e do sọgbe dọ mí ni gbadopọnna hosọ ehe?
1 Jehovah dá mí to ojlo etọn mẹ. (Osọ. 4:11) Enẹwutu, eyin mí ma plọn nado nọ wà ojlo Jiwheyẹwhe tọn, e na vẹawu dọ mí ni jẹ lẹndai he wutu mí do yin didá kọ̀n. Ojlo Jiwheyẹwhe tọn wiwà nọ kàn dẹpẹ biọ na e biọ dọ mí ni nọ hoavùn sọta ayilinlẹn mítọn nado wà “nuhe yin ojlo agbasalan po linlẹn tọn lẹ po” kavi nado wà “ojlo akọta lẹ tọn.” (Efe. 2:3; 1 Pita 4:3; 2 Pita 2:10) Eyin Jiwheyẹwhe tọn dẹ́n, mí na yin “wiwle gbẹ̀te gbọn [Lẹgba] dali, nado wà ojlo etọn.” (2 Tim. 2:26) Tito-to-whinnu azán plidopọ vonọtaun tọn na owhe sinsẹ̀nzọn 2012 tọn na gọalọna dopodopo mítọn nado yinuwa sọgbe hẹ ovẹvivẹ tangan atọ̀ntọ he go Jesu donù to odẹ̀ apajlẹ tọn etọn mẹ. (Mat. 6:9, 10) Hosọ etọn wẹ “Na Ojlo Jiwheyẹwhe Tọn Ni Yin Wiwà.”
2. Kanbiọ tẹlẹ wẹ na yin dogbapọnna to tito-to-whinnu lọ whenu?
2 Kanbiọ He Na Yin Dogbapọnna Lẹ: Dile hiẹ to todoaina tito-to-whinnu lọ, dín gblọndo na kanbiọ ehelẹ: Etẹwẹ yin nujọnu sọ todidoai na Ohó Jiwheyẹwhe tọn? Nawẹ mí sọgan to ayipa nuhe ojlo Jiwheyẹwhe tọn wiwà yin go zọnmii gbọn? Naegbọn mí dona desọn ojlo mẹ nado nọ gọalọna gbẹtọ wunmẹ lẹpo? Nawẹ mí sọgan tindo gbẹzan he na hẹn pekọ wá na mí gbọn? Jọja lẹ emi, etẹwẹ mì dona dohia Jehovah? Ale tẹlẹ wẹ nọ wá sọn ojlo Jiwheyẹwhe tọn wiwà mẹ? Naegbọn e yin onú niyaniya tọn nado jlọ mẹdevo lẹ dote bo na tuli yé?
3. Etẹwẹ na gọalọna mí nado mọaleyi sọn awuwledainanu gbigbọmẹ tọn ehe mẹ to gigọ́ mẹ?
3 Wà nuhe go a pé lẹpo nado wá plidopọ lọ bo dotoai po sọwhiwhe po. Afọzedaitọ Bẹtẹli tọn de kavi nugopọntọ tomẹyitọ de sọgan wá plidopọ lọ taidi hodọtọ jonọ. Jẹnukọnna tito-to-whinnu lọ podọ to vivọnu etọn, voawu nado dọho hẹ ewọ po asi etọn po, eyin e ko wlealọ. Vlavo mì yin tlẹnnọ wẹo kavi whẹndonọ, to whenue mì lẹkọyi whégbè, mì ma yin “sisètọ nuwọntọ” blo, ṣigba mì vọ́ dogbapọnna tito-to-whinnu lọ na mìde kavi hẹ whẹndo mìtọn bo lẹnnupọndo lehe mì sọgan yinuwa to kọndopọ mẹ hẹ ojlo Jiwheyẹwhe tọn wiwà to gigọ́ mẹ do ji.—Jak. 1:25.
4. Naegbọn e yin nujọnu dọ mí ni ze ojlo Jiwheyẹwhe tọn wiwà do otẹn tintan mẹ?
4 Mẹhe nọ doafọna ojlo yetọn titi bo nọ gbẹ́ ma nado litaina ojlo Jehovah tọn lẹ na yin vivasudo to madẹnmẹ. (1 Joh. 2:17) Enẹwutu, mí dopẹ́ dọ Jehovah wleawu nudọnamẹ he wá do gànmẹ ehe tọn na mí, yèdọ nuhe na gọalọna mí nado ze ojlo Jiwheyẹwhe tọn wiwà do otẹn tintan mẹ!