Ohó Jiwheyẹwhe Tọn Tindo Huhlọn
1. Etẹwẹ yin hosọ azán plidopọ vonọtaun tọn na owhe sinsẹ̀nzọn 2014 tọn?
1 To vogbingbọn mẹ na nudepope he gbẹtọvi mapenọ lẹ sọgan wleawuna, Biblu tindo huhlọn nado diọ mí gbọn linlẹn po nuyiwa mítọn lẹ po hinhẹn sọgbe hẹ ojlo Jehovah tọn dali. Ṣigba, nawẹ Ohó Jiwheyẹwhe tọn tindo huhlọn sọ? Nawẹ mí sọgan yí huhlọn etọn zan to gigọ́ mẹ to gbẹzan mítọn mẹ gbọn? Nawẹ mí sọgan yí i zan nado gọalọna mẹdevo lẹ po kọdetọn dagbe po dogọ gbọn? Mí deji dọ mẹlẹpo wẹ na yin hinhẹn lodo to gbigbọ-liho to whenue nuagokun ehelẹ na yin dogbapọnna to tito-to-whinnu azán plidopọ vonọtaun tọn he yin awuwlena na owhe sinsẹ̀nzọn 2014 tọn lọ whenu. Hosọ etọn wẹ “Ohó Jiwheyẹwhe Tọn Tindo Huhlọn” bo yin didesọn Heblu lẹ 4:12 mẹ.
2. Gblọndo kanbiọ tẹlẹ tọn wẹ mí dona dotoaina?
2 Dín Gblọndo Na Kanbiọ Ehelẹ: Dile hiẹ na to todoaina tito-to-whinnu lọ, basi kandai gblọndo kanbiọ he yin sislẹ to odò ehelẹ tọn.
• Naegbọn mí dona tindo jide to Ohó Jehovah tọn mẹ? (Ps. 29:4)
• Nawẹ mí sọgan duvivi huhlọn he Ohó Jiwheyẹwhe tọn tindo tọn to gbẹzan mítọn titi mẹ gbọn? (Ps. 34:8)
• Nawẹ hiẹ sọgan dike huhlọn he Ohó Jiwheyẹwhe tọn tindo ni sọawuhia to lizọnyizọn towe mẹ gbọn? (2 Tim. 3:16, 17)
• Etẹwẹ mí sọgan wà ma nado jai jẹ omọ̀ huhlọn yẹdoklọmẹ tọn aihọn Satani tọn mẹ? (1 Joh. 5:19)
• Taidi jọja de, nawẹ hiẹ sọgan tindo kọdetọn dagbe to gbigbọ-liho gbọn? (Jel. 17:7)
• Nawẹ mí sọgan lẹzun huhlọnnọ gbọn etlẹ yin to whenue mí yin madogánnọ? (2 Kọl. 12:10)
• Etẹwẹ na gọalọna mí nado to diọdo lẹ basi zọnmii, eyin mí tlẹ tindo aṣa kavi jijọ ylankan he doadọ̀do to ahun mítọn mẹ lẹ? (Efe. 4:23)
3. Gbọnvona todidoai na tito-to-whinnu lọ, nudevo tẹlẹ wẹ mí sọgan wà nado mọaleyi sọn azán plidopọ vonọtaun tọn lọ mẹ?
3 Lehe nudọnamẹ titengbe ehelẹ sisè na hẹn ale wá na mí do sọ! Humọ, dile e na yin na plidopọ lẹdo tọn po plidopọ agbegbe tọn po do, azán plidopọ vonọtaun tọn lọ na hùn dotẹnmẹ lẹ dote na mí nado hùndonuvo podọ nado duvivi gbẹdido mẹmẹsunnu po mẹmẹyọnnu he wá sọn agun devo lẹ mẹ lẹ po tọn. (Ps. 133:1-3; 2 Kọl. 6:11-13) Enẹwutu, de whenu dovo nado dogbẹ́ hẹ họntọn he a ma ko mọ sọn ojlẹ dindẹn lẹ, bosọ jihọntọn yọyọ devo lẹ. Eyin hodọtọ jonọ de taidi nugopọntọ agbegbe tọn kavi mẹmẹsunnu de sọn Bẹtẹli yin dide nado wá azán plidopọ vonọtaun tọn mìtọn, be e ma na yọ́n dọ hiẹ ni yí dotẹnmẹ hundote enẹ zan nado dokuavọna ewọ po asi etọn po ya? Na nugbo tọn, mí tindo whẹwhinwhẹ́n susu nado to nukọnpọnhlan azán plidopọ vonọtaun tọn he ja lọ!