Be Hiẹ Na Bẹ Plọnmẹ Biblu de Jẹeji to Octobre mẹ Ya?
1. Owe tẹlẹ wẹ mí na zedonukọnnamẹ to octobre?
1 Owe he na yin zizedonukọnnamẹ to octobre wẹ linlinnamẹwe Atọ̀họ̀-Nuhihọ́ lọ Tọn po Réveillez-vous! po. Nado doafọna mẹhe tindo ojlo lẹ, mí yin tudohomẹna nado ze alọnuwe pẹvi lọ Be Hiẹ Jlo Na Yọ́n Nugbo lọ Ya? donukọnnamẹ bo dovivẹnu nado bẹ plọnmẹ Biblu jẹeji. Nawẹ mí sọgan wà ehe to gọyìpọn whenu gbọn?
2. Nawẹ mí sọgan zan alọnuwe pẹvi lọ Be Hiẹ Jlo Na Yọ́n Nugbo lọ Ya? nado bẹ plọnmẹ Biblu jẹeji to whenue mí to gọyìpọn basina mẹhe kẹalọyi linlinnamẹwe de gbọn?
2 Lehe Mí Na Zan Alọnuwe Pẹvi lọ Do: Mí sọgan dọmọ: “Linlinnamẹwe he n’yí na we wayi lẹ na tuli gbẹtọ he wá sọn ninọmẹ lẹpo mẹ podọ sọn sinsẹ̀n lẹpo mẹ nado nọ plọn Biblu. [Yí alọnuwe pẹvi Be Hiẹ Jlo Na Yọ́n Nugbo lọ Ya? na whétọ lọ bo do kanbiọ he tin to weda tintan ji lẹ hia ẹ.] Biblu na gblọndo pekọhẹnwanamẹ tọn na kanbiọ ojlofọndotenamẹ tọn he tin to file lẹ. Be hiẹ ko kàn depope to kanbiọ ehelẹ mẹ sè dewe pọ́n ya?” To gblọndo whétọ lọ tọn godo, mì gbadopọnna dopo to gblọndo he yin nina kanbiọ etọn lẹ to alọnuwe lọ mẹ, bo hia dopo to wefọ he yin dide lẹ mẹ. Enẹgodo, basi zẹẹmẹ dọ gblọndo ehe yin vude poun to apajlẹ nuhe Biblu plọnmẹ lẹ tọn mẹ bo yí owe Biblu Plọn Mí dopo na ẹn. To enẹgodo, mí sọgan dọhodo hukan tintan weta he ewọ de to hosọ lẹ mẹ tọn ji. Kavi mí sọgan de nado gbadopọnna fihe nudọnamẹ susu tin te gando hosọ he mí dọhodeji to alọnuwe pẹvi lọ mẹ go. Mí sọgan gbadopọnna weda he bọdego ehelẹ:
● Be Jiwheyẹwhe nọ hò mítọn pọ́n nugbonugbo ya? (w. 9-11, huk. 6-10)
● Be awhàn po yajiji po na wá doalọte gbede ya? (w. 12, huk. 12-13)
● Etẹwẹ nọ jọ do mí go to whenuena mí kú? (w. 59-60, huk. 7-8)
● Be todido de tin na oṣiọ lẹ ya? (w. 71, huk. 13-15)
● Nawẹ yẹn sọgan hodẹ̀ do na Jiwheyẹwhe nido sè? (w. 166-167, huk. 5-8)
● Nawẹ yẹn sọgan mọ ayajẹ to gbẹ̀mẹ gbọn? (w. 9, huk. 4-5)
3. Nawẹ mí sọgan diọalọ sọgbe hẹ ninọmẹ lẹ gbọn?
3 Na nugbo tọn, eyin e ma yọnbasi nado do lehe plọnmẹ Biblu de nọ yin bibasi do hia bo bẹ oplọn lọ jẹeji to owe Biblu Plọn Mí mẹ to gọyìpọn tintan whenu, mí sọgan nọ basi tito to whepoponu hẹ whétọ lọ nado nọ lẹkọyi bo zindonukọn to hodọdopọ mítọn mẹ. Podọ sọgbe hẹ ojlo he mẹlọ tindo, mí tlẹ sọgan basi gọyìpọn whlasusu nado dọhodopọ do kanbiọ he hugan dopo ji to alọnuwe pẹvi lọ mẹ whẹpo do ze owe lọ donukọnna ẹn. Mì gbọ mí ni zan alọnuwe pẹvi ehe ganji to osun octobre tọn mẹ nado bẹ plọnmẹ Biblu jẹeji bo gọalọna ahunjijlọnọ lẹ nado “yọ́n nugbo lọ.”—Joh. 8:31, 32.