Yí I Zan Ganji
1. Etẹwẹ alọnuwe pẹvi lọ Be Hiẹ Jlo Na Yọ́n Nugbo lọ Ya? yọ́n-na-yizan na?
1 Alọnuwe pẹvi lọ Be Hiẹ Jlo Na Yọ́n Nugbo lọ Ya? yin awuwlena nado gọalọna mí nado bẹ plọnmẹ Biblu lẹ jẹeji. Ṣigba e sọ yin azọ́nwanu dagbe de he mí sọgan yizan nado vúnvún okún nugbo lọ tọn lẹ. (Yẹwh. 11:6) Ayinamẹ he na gọalọna mí nado yí i zan ganji delẹ die.
2. Nawẹ mí sọgan yí alọnuwe pẹvi lọ zan nado bẹ hodọdopọ de jẹeji gbọn?
2 Nado Bẹ Hodọdopọ de Jẹeji: Hiẹ sọgan yí alọnuwe pẹvi lọ na whétọ lọ bo dlẹnalọdo kanbiọ ṣidopo he tin to weda tintan lọ ji lẹ bo kanse e dọ: “Detẹ to kanbiọ ehelẹ mẹ wẹ duahunmẹna we?” To whenue e ko na gblọndo godo, gbadopọnna dopo to gblọndo he Biblu na na kanbiọ whétọ lọ tọn lẹ mẹ bo hia dopo to wefọ he yin dide lẹ mẹ. Hia kavi basi bladopọ weda godo tọn lọ tọn bo ze owe Biblu Plọn Mí donukọnna ẹn. Eyin e ma tlẹ kẹalọyi owe lọ, alọnuwe pẹvi lọ he e ko yí sọgan do okún nugbo lọ tọn do ahun etọn mẹ.—Mat. 13:23.
3. Eyin alọnu whétọ de tọn ján, etẹwẹ mí sọgan wà?
3 Eyin Alọnu Whétọ lọ Tọn Ján: Hiẹ sọgan dọmọ: “Na alọnu mìtọn ján wutu, mì gbọ ma jo alọnuwe pẹvi ehe do na mì. E bẹ kanbiọ titengbe ṣidopo he suhugan mítọn lẹ ko kanse míde pọ́n hẹn, bo do nuhe Biblu dọ nado na gblọndo na kanbiọ enẹlẹ hia hezeheze. Eyin e jẹ whedevonu, mí na dọhodo nuhe mì lẹn gando yé go ji.”
4. Etẹwẹ mí sọgan dọ to whenue mí to alọnuwe pẹvi lọ zedonukọnnamẹ to kunnudide tòhomẹ-liho tọn ji?
4 Whenue Mí to Kunnude to Tòhomẹ-Liho Ji: Hiẹ sọgan dọmọ: “Mì to dagbe ya? Be mì ko kàn depope to kanbiọ ehelẹ mẹ sè pọ́n ya? [Jotẹnna gblọndo.] Alọnuwe ehe do gblọndo Biblu tọn he họnwun bo dutomẹji lẹ hia.” Eyin mẹlọ ma to plaplaji, mì sọgan dọhodo gblọndo alọnuwe lọ tọn dopo ji podọ hiẹ tlẹ sọgan ze owe Biblu Plọn Mí donukọnna ẹn.
5. Eyin whétọ lẹ ma to whégbè, nawẹ mí sọgan nọ yí alọnuwe pẹvi lọ zan to whedelẹnu gbọn?
5 Eyin Whétọ lọ Ma to Whégbè: To aigba-denamẹ delẹ ji, wẹnlatọ lẹ nọ saba ze owe de dai na mẹhe ma to whégbè lẹ do fie mẹdevo lẹ ma sọgan mọ ẹn te de. Eyin mì nọ wàmọ to agun mìtọn mẹ, naegbọn hiẹ ma na nọ jo alọnuwe pẹvi lọ Be Hiẹ Jlo Na Yọ́n Nugbo lọ Ya? do to whedelẹnu? To whenuena hiẹ lẹkọyi, a sọgan dọmọ: “To whenue mí wáfi wayi, mì ma to whégbè, enẹwutu mí sisẹ́ alọnuwe pẹvi ehe do ohọ̀n mìtọn glọ. Gblọndo kanbiọ detẹ tọn wẹ mì jlo na yọnẹn to kanbiọ ehelẹ mẹ?”
6. Naegbọn alọnuwe pẹvi lọ Be Hiẹ Jlo Na Yọ́n Nugbo lọ Ya? do yin azọ́nwanu dagbe de?
6 Alọnuwe pẹvi lọ Be Hiẹ Jlo Na Yọ́n Nugbo lọ Ya? ze nugbo lọ donukọnnamẹ to aliho tlọlọ he bọawu de mẹ. E sọgan dọ̀n mẹhe wá sọn sinsẹ̀n kavi aṣa lẹpo mẹ. E bọawu nado ze e donukọnnamẹ; podọ jọja po wẹnlatọ yọyọ lẹ lọsu po tlẹ sọgan ze e donukọnnamẹ. Be hiẹ nọ yí i zan to whenue dotẹnmẹ dagbe depope hùn dotena we ya?