Nọ Do “Awuvẹmẹ Sisosiso” Hia
1. Nuhudo sinsinyẹn tẹwẹ gbẹtọ lẹ tindo to egbehe?
1 Mẹsusu ma ko tindo nuhudo awuvẹmẹ tọn jẹ obá ehe mẹ pọ́n to whenuho gbẹtọvi tọn mẹ. Ninọmẹ aihọn tọn he fọ́n bo to yinylan deji ko zọ́n bọ awubla, azọ̀n apọṣimẹ sinsinyẹn tọn, po todido matindo po gbayipe. Gbẹtọ livi susu wẹ tindo nuhudo alọgọ tọn, podọ taidi Klistiani lẹ, mí tin to otẹn dagbe mẹ nado do mẹtọnhopọn nujọnu tọn hia kọmẹnu mítọn lẹ. (Mat. 22:39; Gal. 6:10) Nawẹ mí sọgan do mẹtọnhopọn mọnkọtọn hia gbọn?
2. Aliho dagbe hugan tẹ mẹ wẹ mí sọgan do awuvẹmẹ hia te?
2 Azọ́n Awuvẹmẹ Tọn De: Jiwheyẹwhe kẹdẹ wẹ asisa homẹmiọnnamẹ tọn nujọnu tọn he nọ dẹn to aimẹ. (2 Kọl. 1:3, 4) Jehovah dotuhomẹna mí nado nọ hodo apajlẹ etọn gbọn “awuvẹmẹ sisosiso” didohia dali, podọ e ko sọ deazọ́nna mí nado lá wẹndagbe Ahọluduta lọ tọn na kọmẹnu mítọn lẹ. (1 Pita 3:8) Mahẹ gigọ́ tintindo to azọ́n ehe mẹ wẹ aliho dagbe hugan he mẹ mí na miọnhomẹna ‘mẹhe to awubla lẹ’ te, na Ahọluduta Jiwheyẹwhe tọn wẹ todido nujọnu tọn dopo akàn lọ na gbẹtọvi he to yaji lẹ. (Isa. 61:1) Na awuvẹmẹ he Jehovah tindo na omẹ etọn lẹ wutu, e na yinuwa to madẹnmẹ nado de kanyinylan sẹ̀ bo ze aihọn yọyọ dodowiwa tọn de dai.—2 Pita 3:13.
3. Nawẹ mí sọgan nọ pọ́n gbẹtọ lẹ hlan dile Jesu wà do gbọn?
3 Nọ Pọ́n Gbẹtọ lẹ Hlan Dile Jesu Wà Do: Etlẹ yin to whenue Jesu to yẹwhehodọ na gbẹtọgun daho lẹ, e ma nọ pọ́n yé taidi pipli de poun gba. E nọ doayi nuhudo gbigbọmẹ tọn dopodopo yetọn lẹ tọn go. Yé taidi lẹngbọ lẹ he ma tindo lẹngbọhọtọ he na deanana yé. Nuhe Jesu mọ lẹ yinuwado e ji bọ ewọ yin whinwhàn nado plọnnu yé po homẹfa po. (Malku 6:34) Eyin mí nọ pọ́n gbẹtọ lẹ hlan to aliho dopolọ mẹ taidi Jesu, enẹ na gọalọna mí nado nọ do awuvẹmẹ nujọnu tọn hia dopodopo yetọn. Ehe na nọ sọawuhia to kọnugbè mítọn mẹ podọ to nukunmẹ mítọn. Mí na nọ ze yẹwhehodidọ do otẹn tintan mẹ bo na nọ hẹn hodidọ mítọn lẹ sọgbe hẹ nuhe to ahunmẹduna mẹdopodopo.—1 Kọl. 9:19-23.
4. Naegbọn mí dona nọ do awuvẹmẹ hia?
4 Gbẹtọ susugege de sọn akọta lẹpo mẹ wẹ to alọkẹyi owẹ̀n Ahọluduta lọ tọn, podọ ojlo nujọnu tọn he nọ yin didohia yé nọ yinuwado yé ji. Eyin mí to awuvẹmẹ dohia zọnmii, mí na gbògbéna Jehovah, Jiwheyẹwhe awuvẹmẹtọ mítọn bosọ hẹn homẹ etọn hùn.—Kọl. 3:12.