Dotoaina Jiwheyẹwhe​—Lehe Mí Sọgan Yí I Zan Do

Alọnuwe lọ Dotoaina Jiwheyẹwhe yin awuwlena, na mí nido yí yẹdide lẹ do plọn nugbo dodonu tọn Biblu tọn lẹ mẹhe ma yọ́n wehia ganji lẹ. Weda awe to pọmẹ nupinplọn dopodopo tọn nọ bẹ yẹdide he yin awuwlena po sọwhiwhe po lẹ hẹn, gọna ohia he na deanana mẹde nado yọ́n yẹdide he ji e na dọhodo debọdo-dego.

Alọnuwe lọ Dotoaina Jiwheyẹwhe bo Nọgbẹ̀ Kakadoi tindo yẹdide dopolọ lẹ taidi Dotoaina Jiwheyẹwhe, ṣigba e bẹ nukinkan susu hẹn bọ nuplọntọ he yọ́n wehia jẹ obá de mẹ lẹ sọgan yí i zan. Wẹnlatọ lẹ nọ saba yí i zan nado plọnnu hẹ nuplọntọ de he hẹn Dotoaina Jiwheyẹwhe. Apotin he bẹ nudọnamẹ devo lẹ hẹn tin to weda susu ji bo sọgan yin hodọdeji, sọgbe hẹ nugopipe nuplọntọ lọ tọn.

A sọgan ze depope to alọnuwe lọ lẹ mẹ donukọnnamẹ to whedepopenu, eyin mí ma tlẹ to yíyí i zan to osun lọ mẹ. To whenue a to anadena plọnmẹ Biblu de, nọ yí yẹdide lọ lẹ zan nado basi zẹẹmẹ kandai Biblu tọn lẹ tọn. Na nuplọntọ lọ nido tindo mahẹ to oplọn lọ mẹ, nọ kàn kanbiọ lẹ sè bo nọ hẹn ẹn diun dọ e mọnukunnujẹ nuhe plọn e te mẹ. Nọ hia wefọ he to odò weda dopodopo tọn lẹ bo nọ dọhodo yé ji. To whenue mì dotana alọnuwe lọ, mì plọn Etẹwẹ Biblu Plọn Mí Taun? kavi Etẹwẹ Biblu Sọgan Plọn Mí? nado gọalọna nuplọntọ lọ nado pegan na baptẹm.