Mì Dín Mẹhe Nọ Do Ogbè He Agun Mìtọn Nọ Yizan lẹ Mọ Whẹ́ — WESẸDOTẸN INTẸNẸT JI TỌN Watchtower Tọn

Mì Dín Mẹhe Nọ Do Ogbè He Agun Mìtọn Nọ Yizan lẹ Mọ Whẹ́

1. To lẹdo he mẹ ogbè susu nọ yin dido te lẹ, naegbọn aigba-denamẹ lẹ nọ yin didena agun dopodopo sọgbe hẹ ogbè lẹ?

¹ To whenue devi Jesu tọn lẹ mọ gbigbọ wiwe yí to Pẹntikọsti 33 W.M. godo, yé “jẹ ogbè voovo yí do dọho ji” na mẹhe wá sọn awà aigba tọn he dẹn lẹ ji. (Owalọ 2:4) Taidi kọdetọn de, nudi omẹ 3000 wẹ yí baptẹm. E taidi dọ suhugan jonọ lọ lẹ tọn sọ nọ do ogbè he mẹsusu sè de, vlavo Heblugbe kavi Glẹkigbe. Etomọṣo Jehovah jlo dọ owẹ̀n Ahọluduta lọ tọn ni yin lilá na yé to ogbè yetọn titi mẹ. Ayihaawe matin dọ dopo to whẹwhinwhẹ́n he wutu e do yinmọ lẹ mẹ wẹ yindọ gbẹtọ lẹ nọ yawu kẹalọyi wẹndagbe lọ eyin yé sè e to ogbè yetọn titi mẹ. Enẹwutu to egbehe, to lẹdo he mẹ ogbè susu nọ yin dido te lẹ, aigba-denamẹ lẹ nọ yin didena agun dopodopo sọgbe hẹ ogbè dopodopo. (Mí Yin Tito-Basina, w. 107, huk. 2-3) Kándo he nọ do jonọgbè lẹ ma nọ mọ aigba-denamẹ de yí gba, ṣigba yé nọ dekunnuna mẹhe nọ do ogbè lọ to aigba-denamẹ agun he nọ penukundo kándo lọ go tọn po agun he tin to lẹdo lọ mẹ lẹ tọn po ji.

2. (a) Etẹwẹ azọ́n omẹ dindin tọn lọ yin, podọ fie wẹ e sọgan yin dandannu te? (b) Nawẹ agun lẹ sọgan gọalọna ode awetọ nado wazọ́n omẹ dindin tọn to aigba-denamẹ he ji ogbè susu nọ yin dido te lẹ gbọn? (c) Etẹwẹ mí dona wà eyin mí dukosọ hẹ jlodotọ de he nọ do ogbè devo?

² Eyin fie ogbè dopo gee nọ yin dido te wẹ mì nọ nọ̀, mì sọgan nọ dọyẹwheho sọn whédegbè jẹ devo gbè poun. Ṣigba, ninọmẹ lọ sọgan gbọnvo eyin tòdaho he mẹ ogbè susu nọ yin dido te de wẹ mì nọ nọ̀. Agun he nọ do ogbè devo lẹ sọgan nọ dọyẹwheho to lẹdo dopolọ mẹ. Dile etlẹ yindọ agun lọ lẹ sọgan na mì nudọnamẹ lẹ gando mẹhe yé dukosọ hẹ bọ e nọ do ogbè he agun mìtọn nọ yizan go, azọngban agun kavi kándo mìtọn tọn wẹ nado dín mẹhe mì sọgan dekunnuna lẹ mọ. (Pọ́n apotin lọ “Mì Gọalọna Ode Awetọ.”) Enẹwutu, e sọgan biọ dọ mì ni nọ tindo mahẹ to azọ́n omẹ dindin tọn mẹ, enẹ wẹ nado nọ kanhose mẹdevo lẹ nado sọgan yọ́n mẹhe nọ do ogbè tangan de to lẹdo lọ mẹ lẹ. Nawẹ azọ́n omẹ dindin tọn lọ sọgan yin wiwà gbọn?

3. Etẹwẹ nọ do fie agun kavi kándo de na wazọ́n omẹ dindin tọn lọ te po ojlẹ nẹmu he e na yizan po hia?

³ Basi Tito Na Azọ́n Lọ: Mí na yí whenu zan to azọ́n omẹ dindin tọn lọ mẹ to lẹdo he mẹ ogbè susu nọ yin dido te lẹ sọgbe hẹ ninọmẹ lẹdo lọ tọn lẹ. Di apajlẹ, omẹ nẹmu wẹ nọ do ogbè lọ to lẹdo lọ mẹ? Wẹnlatọ nẹmu wẹ tin to finẹ? Adlẹsi omẹ nẹmu tọn wẹ agun kavi kándo lọ ko mọyi? E ma yin bibiọ to agun lẹ si nado wazọ́n lọ to aliho dopolọ mẹ to awà lẹdo lọ tọn lẹpo ji gba, ṣigba yé sọgan na ayidonugo lẹdo he mẹ gbẹtọ sù te hugan to aigba-denamẹ yetọn ji lẹ po lẹdo he ma dẹn do yé hugan lẹ po. Etomọṣo, nujọnu wẹ e yin dọ tito dagbe de ni yin bibasi nado dín gbẹtọ lẹ, na mẹsusu dogọ nido sọgan tindo dotẹnmẹ hundote nado dawhá ylọ oyín Jehovah tọn.—Lom. 10:13, 14.

4. (a) Nawẹ azọ́n omẹ dindin tọn lọ dona yin tito-basina gbọn? (b) Dọ delẹ to aliho he mẹ a sọgan dín mẹhe nọ do ogbè he agun towe nọ yizan lẹ mọ te lẹ mẹ.

⁴ Nado dapana vivẹnu he ma yin dandan tọn to fie azọ́n omẹ dindin tọn lọ yin dandan te lẹ, pipli mẹho lẹ tọn, titengbe nugopọntọ sinsẹ̀nzọn tọn, dona basi tito na azọ́n omẹ dindin tọn lọ bo deanana ẹn. (1 Kọl. 9:26) To kándo jonọgbè tọn lẹ mẹ, mẹmẹsunnu he pegan de, eyin e yọnbasi mẹho kavi devizọnwatọ lizọnyizọnwiwa tọn he yin dide gbọn pipli mẹho agun he nọ penukundo kándo lọ go lẹ tọn dali sọgan deanana nulẹ. Agun po kándo susu po wẹ tindo tito he tin to kannukannu de nado nọ basi adà tintan azọ́n omẹ dindin tọn lọ tọn, vlavo gbọn owe alokan tọn kavi Internet yiyizan nado ṣinyan yinkọ he gbayipe to ogbè lọ mẹ lẹ dali. Enẹgodo, yé nọ wazọ́n omẹ dindin tọn lọ gbọn alokan ji kavi gbọn dlapọn bibasi nado yọ́n adlẹsi mẹhe dona yin yíyí do aigba-denamẹ agun lọ tọn mẹ lẹ dali. Eyin e yọnbasi, pipli mẹho agun he nọ penukundo kándo de go tọn sọgan basi tito bọ agun lọ pete na nọ tindo mahẹ to azọ́n omẹ dindin tọn lọ mẹ sọn ojlẹ de mẹ jẹ devo mẹ.—Pọ́n apotin lọ “Lehe Hiẹ Sọgan Dín Mẹhe Nọ Do Ogbè He Agun Mìtọn Nọ Yizan lẹ Do.”

5. (a) Ayinamẹ tẹlẹ wẹ wẹnlatọ he to mahẹ tindo to azọ́n omẹ dindin tọn mẹ lẹ sọgan hodo? (b) Etẹwẹ mí sọgan dọ eyin mí to mahẹ tindo to azọ́n omẹ dindin tọn mẹ?

⁵ Dopodopo mítọn dona nọ tindo yanwle tangan de to whedepopenu he mí to mahẹ tindo to azọ́n omẹ dindin tọn lọ mẹ. To whenuena e yindọ azọ́n ehe yin apadewhe lizọnyizọn lọ tọn, mí dona nọ sọnú taidi mẹhe to mahẹ tindo to azọ́n yẹwhehodidọ tọn mẹ lẹ. Mẹsusu mọdọ zepọn bibasi po ogbè lọ dido po to whenue yé to mahẹ tindo to azọ́n omẹ dindin tọn lọ mẹ nọ gọalọna yé nado hẹn zohunhun yetọn go podọ nado yọ́n ogbè lọ do dogọ. Mí sọgan na linlin whenu he mí yizan to azọ́n omẹ dindin tọn lọ mẹ tọn, ṣigba mí ma sọgan na linlin whenu he mí yizan nado wleawu yẹdide po todohukanji aigba-denamẹ tọn lẹ po tọn. Eyin mí mọ mẹde he nọ do ogbè lọ, mí dona dovivẹnu nado lá wẹndagbe lọ na ẹn podọ to enẹgodo mí dona yawu dọna nugopọntọ sinsẹ̀nzọn tọn kavi na mẹhe ewọ de, na kandai aigba-denamẹ lẹ tọn nido sọgan yin vivọjlado. Mí na wàmọ vlavo mẹlọ do ojlo hia kavi lala. Mahopọnna dọ azọ́n omẹ dindin tọn lọ yin nujọnu, mí dona nọ jlẹkaji bo nọ tindo mahẹ to adà lizọnyizọn lọ tọn lẹpo mẹ.—Pọ́n apotin lọ “Nuhe Na Yin Didọ to Azọ́n Omẹ Dindin Tọn Whenu.”

6. Avùnnukundiọsọmẹnu vonọtaun tẹwẹ tókunọ lẹ dindin bẹhẹn?

⁶ Tókunọ lẹ Dindin: Avùnnukundiọsọmẹnu vonọtaun wẹ e nọ yin nado dín tókunọ lẹ podọ e sọ nọ biọ vivẹnudido po akọndonanu po. Yinkọ tókunọ de tọn, awusọhia etọn kavi nusisọ́ etọn yinyọnẹn ma ko pé nado dín in mọ. Humọ, hagbẹ whẹndo etọn tọn lẹ po họntọn etọn lẹ po sọgan basi hihọ́na ẹn bo sọgan whleawu nado na nudọnamẹ lẹ wẹnlatọ he to dindin in lọ. Ayinamẹ he bọdego ehelẹ gando tókunọ lẹ dindin go sọgan sọ gọalọ eyin mí to mẹhe nọ do ogbè tangan devo lẹ dín.

7. (a) Nawẹ mí sọgan dín tókunọ lẹ to tòdaho lẹ mẹ gbọn? (b) Etẹwẹ mí sọgan wà nado hẹn ayiha whétọ de tọn jai?

⁷ Agun po kándo ogbè alọ-yido-dọho tọn lẹ po ko tindo kọdetọn dagbe to whenue yé to tókunọ lẹ dín to tòdaho lẹ mẹ. Hiẹ sọgan kanhose mẹde to lẹdo lọ mẹ bọ e na dọna we dọ emi mọ kọmẹnu, azọ́nwatọgbẹ́ kavi wehọmẹvigbẹ́ de he sè ogbè alọ-yido-dọho tọn. Ewọ sọgan ko doayi ohia aliji tọn he nọ dohia dọ ovi tókunọ lẹ tin to lẹdo lọ mẹ de go. Vlavo hẹnnumẹ etọn de sọgan yin tókunọ. Hẹn do ayiha mẹ dọ mẹlọ sọgan vẹnudo we, na e ma yọ́n lẹndai dlapọn towe tọn wutu. Ṣigba, hiẹ sọgan wà nususu na ayiha whétọ lọ tọn nido jai eyin a dovivẹnu nado jọmẹ hẹ ẹ bo basi zẹẹmẹ he họnwun gando dlapọn towe go bosọ nọ glido. Mẹdelẹ ko tindo kọdetọn dagbe gbọn DVD Biblu tọn kavi DVD devo he tin to ogbè alọ-yido-dọho tọn mẹ lẹ didohia to whenue yé to hokanse whétọ lọ nado yọnẹn eyin e yọ́n tókunọ de dali. Enẹgodo, yé nọ dọ poun dọ ojlo emitọn wẹ nado dọhodo todido Biblu tọn ji hẹ tókunọ lẹ. Eyin whétọ lọ whleawu nado na nudọnamẹ lẹ, ewọ sọgan kẹalọyi kalti adlẹsi tọn towe kavi owe oylọ-basinamẹ wá opli agun tọn lẹ tọn nado na hẹnnumẹ kavi họntọn etọn he yin tókunọ de.

8. Nawẹ agun he tin to yakẹ de sọgan gọalọna agun ogbè alọ-yido-dọho tọn de gbọn?

⁸ Agun ogbè alọ-yido-dọho tọn de sọgan basi oylọna agun he nọ do ogbè devo to lẹdo lọ mẹ de nado gọalọna yé na azán dopo kavi awe to owhe lọ mẹ, nado dín tókunọ he to lẹdo tangan de mẹ to awà aigba-denamẹ daho yetọn tọn de ji lẹ. Opli sinsẹ̀nzọn kunnudegbe tọn he agun ogbè alọ-yido-dọho tọn lọ na deanana sọgan bẹ nudọnamẹ lẹ hẹn gando tókunọ lẹ dindin go gọna wadohia de. E whè gbau wẹnlatọ dopo sọn agun ogbè alọ-yido-dọho tọn lọ mẹ sọgan yin didena pipli dopodopo bọ yẹdide aigba-denamẹ tọn he do lẹdo tangan he mẹ tókunọ lẹ na yin dindin te hia na yin yíyí na yé.

9. Nawẹ azọ́n omẹ dindin tọn lọ sọgan yin wiwà to fie tókunọ lẹ nọ saba pli do na nuwadopọ, na ayidedai kavi nado mọ alọgọnamẹ yí te lẹ gbọn?

⁹ Azọ́n omẹ dindin tọn lọ sọgan sọ yin wiwà to fie tókunọ lẹ nọ saba pli do na nuwadopọ, na ayidedai kavi nado mọ alọgọnamẹ yí to lẹdo de mẹ te lẹ. Wẹnlatọ lẹ dona sọnú sọgbe hẹ ninọmẹ lọ. Kakati nado dọhona pipli lọ blebu, e na yọ́n hugan nado dọhodopọ hẹ omẹ dopo kavi awe to mẹhe tin to finẹ lẹ mẹ podọ nado yí zinzin zan. Eyin hodọdopọ lọ tindo kọdetọn dagbe, mì sọgan na yé adlẹsi mìtọn bo yí yetọn.

10. Nawẹ azọ́n omẹ dindin tọn lọ sọgan yin wiwà to ajọwatẹn lẹdo lọ tọn lẹ mẹ gbọn?

¹⁰ Aliho devo wẹ nado basi yẹdide he do ajọwatẹn lẹdo lọ tọn lẹ hia podọ to enẹgodo nado dla yé pọ́n to ojlẹ he sọgbe mẹ. Yẹdide aigba-denamẹ tọn dopo sọgan bẹ amìdonu susu hẹn. Devo sọgan bẹ avọ̀yantẹn, núdùdù-satẹn, hotẹli kavi ajọwatẹn wunmẹ devo lẹ hẹn. Eyin ajọwatẹn wunmẹ tangan de tin to yẹdide aigba-denamẹ tọn dopodopo ji, wẹnlatọ lẹ sọgan yí aliho nuzedonukọnnamẹ tọn dopolọ zan ehe na zọ́n bọ yé na tindo numimọ bo na yọ́n azọ́n dogọ. Di apajlẹ, na tókunọ lẹ nọ wá nọ hotẹli lẹ wutu, mí sọgan basi zẹẹmẹ kleun de do azọ́n mítọn ji na mẹhe nọ wazọ́n to fie yè nọ yí nudọnamẹ te to hotẹli lẹ bo na yé DVD po owe oylọ-basinamẹ wá opli agun tọn lẹ tọn po, na yé nido na tókunọ he nọ wá finẹ lẹ. To ajọwatẹn delẹ, mí sọgan kanse poun eyin azọ́nwatọ kavi ahisinọ de nọ do ogbè alọ-yido-dọho tọn. Eyin wehọmẹ tókunọ lẹ tọn de tin to aigba-denamẹ lọ ji, mí sọgan yí DVD he tin to ogbè alọ-yido-dọho tọn mẹ delẹ na yé nado bẹ do wesẹdotẹn yetọn.

11. Naegbọn azọ́n omẹ dindin tọn lọ do yin adà titengbe lizọnyizọn lọ tọn de?

¹¹ Azọ́n Titengbe De: Azọ́n sinsinyẹn he nọ yí whenu de wẹ e yin nado dín whétọ he nọ do ogbè he agun mìtọn nọ yizan lẹ. Humọ, ogbè he nọ yin dido to lẹdo de mẹ lẹ sọgan diọ po awuyiya po dile gbẹtọ lẹ to tẹnsẹ sọn lẹdo lọ mẹ bọ mẹdevo lẹ to wiwá, podọ ehe zọ́n bọ e na vẹawu nado hẹn kandai aigba-denamẹ tọn he sọgbe de go. Etomọṣo, to lẹdo he sọha yetọn fọ́n bo to susudeji lẹ mẹ, azọ́n omẹ dindin tọn lọ yin adà titengbe lizọnyizọn lọ tọn de. Jehovah, mẹhe ze azọ́n yẹwhehodidọ tọn do alọmẹ na mí ma yin mẹnukuntahopọntọ gba. (Owalọ 10:34) “Ojlo etọn wẹ yindọ gbẹtọ wunmẹ lẹpo ni yin whinwhlẹngán bo wá oyọnẹn he pegan nugbo tọn kọ̀n.” (1 Tim. 2:3, 4) Enẹwutu, mì gbọ mí ni wazọ́n dopọ hẹ Jehovah po ode awetọ po nado dín gbẹtọ he wá sọn ogbè lẹpo mẹ bo tindo “ahun he yọ́n bosọ yin dagbe” lẹ.—Luku 8:15.

[Apotin to weda 5]

Mì Gọalọna Ode Awetọ

Eyin agun kavi kándo de to alọgọ din nado mọ mẹhe nọ do ogbè yetọn bọ yé sọgan dekunnuna lẹ, nugopọntọ sinsẹ̀nzọn tọn sọgan dọnsẹpọ mẹho agun he nọ do ogbè devo lẹ tọn to lẹdo lọ mẹ lẹ. E na yọ́n hugan nado biọ alọgọ agun he ma dẹn do mì hugan lẹ kẹdẹ tọn kavi dehe tindo aigba-denamẹ he ji mẹsusu nọ do ogbè lọ te lẹ tọn. Agun he si alọgọ yin bibiọ te lẹ sọgan dọna wẹnlatọ yetọn lẹ dọ eyin yé dukosọ hẹ mẹdepope he nọ do ogbè enẹ, yé dona kàn adlẹsi etọn dai bo yí i na nugopọntọ sinsẹ̀nzọn tọn na ewọ nido sọgan ze e na agun kavi kándo he biọ alọgọ lọ. Nugopọntọ sinsẹ̀nzọn tọn agun he go whẹho lọ gando lẹ tọn na basi tito de to pọmẹ, ehe na zọ́n bọ yé na penugo nado wazọ́n gbọn aigba-denamẹ he ji ogbè susu nọ yin dido te lẹ bo na deanana jlodotọ lẹ yì agun kavi kándo he nọ yí ogbè yetọn zan mẹ.

Eyin wẹnlatọ lẹ dukosọ hẹ mẹhe do ojlo nujọnu tọn hia de ṣigba bo nọ do ogbè devo (kavi yin tókunọ), yé dona yawu kanwe gọ́ alọdowemẹwe Veuillez suivre l’intérêt (S-43) bo yí i na wekantọ agun tọn. Ehe na zọ́n bọ mẹlọ na mọ alọgọ gbigbọmẹ tọn yí domẹwhenu.—Pọ́n km 5/11 w. 3.

[Apotin to weda 6]

Lehe Hiẹ Sọgan Dín Mẹhe Nọ Do Ogbè He Agun Mìtọn Nọ Yizan lẹ Do

• Kanhose mẹdevo lẹ—enẹ wẹ plọnmẹ Biblu towe lẹ, hagbẹ whẹndo tọn lẹ, azọ́nwatọgbẹ́ towe lẹ, po mọmọ po.

• Yí owe he mẹ yè slẹ mẹhe nọ zan alokan lẹ do zan nado dín yinkọ he gbayipe to ogbè lọ mẹ lẹ. Yinkọ gbẹtọ lẹ tọn po adlẹsi yetọn po sọgan yin dindin to Internet ji kavi to azọ́nwhé alokan tọn lẹ eyin tito mọnkọtọn tin-to-aimẹ.

• Yí zinzin zan nado kanhose to fie gbẹtọ lẹ nọ mọ alọgọnamẹ yí te lẹ, taidi wesẹdotẹn, azọ́nwatẹn ahọlu tọn po wehọmẹ daho he tin to lẹdo lọ mẹ lẹ po.

• Pọ́n nulila lẹ to linlinwe lẹdo lọ tọn mẹ nado yọ́n tito nuwiwa tọn he jonọgbè-dótọ lẹ jlo na basi lẹ.

• Dla nusatẹn po ajọwatẹn lẹdo lọ tọn he nọ wleawu nuhe jonọgbè-dótọ lẹ tindo nuhudo etọn lẹ po pọ́n.

• Biọgbè anadenanutọ lẹ bo tẹ́ tafo owe mítọn lẹ tọn do ajọwatẹn, wehọmẹ alavọ tọn, kavi húndotẹn lẹ fie mẹhe nọ do ogbè lọ lẹ nọ saba zan.

• Eyin osẹ́n otò towe tọn kẹalọyi, họ̀ owe he bẹ tito ajọwiwa tọn kavi tito ọdinatẹẹ ji tọn hẹn de, ehe nọ gọalọnamẹ nado dín nọtẹn pọmẹ tọn lẹ to Internet ji.

[Apotin to weda 7]

Nuhe Na Yin Didọ to Azọ́n Omẹ Dindin Tọn Whenu

Hodidọ po ahundopo po to aliho họntọnjihẹmẹ tọn mẹ na whétọ de tlọlọ na de ayiha awe he whétọ lọ tindo gando gowe sẹ̀. Owe mítọn he tin to ogbè lọ mẹ didohia mẹlọ nọ saba wazọ́n.

To nudọdomẹ godo, hiẹ sọgan dọmọ: “Mí to mẹhe nọ do ․․․․․ gbè lẹ dín nado sọgan má todido he Biblu zedonukọnna mí lẹ hẹ yé. Be hiẹ yọ́n mẹdepope he mí sọgan dọho hẹ ya?”

Eyin hiẹ to tókunọ lẹ dín, a sọgan dọmọ: “Mì to kẹdẹ ya? Be n’sọgan do nude hia mì ya? [Yí video honú he nọ yin zizepé de zan bo hò wefọ de na mẹlọ sọn DVD Traduction du monde nouveau mẹ.] Adà Biblu tọn ehe tin to Ogbè Alọ-Yido-Dọho Amelika tọn mẹ. To yidogọ mẹ na Biblu, mí tindo video devo lẹ he yin awuwlena nado hẹn pekọ wá na nuhudo gbigbọmẹ tọn tókunọ lẹ tọn, ehe mí nọ zedonukọnnamẹ vọnu. Be hiẹ yọ́n tókunọ kavi mẹhe ma nọ sènu ganji he nọ do ogbè alọ-yido-dọho tọn de ya?” Eyin whétọ lọ ma flin mẹde, e na yọ́n dọ hiẹ ni na apajlẹ nọtẹn fie tókunọ lẹ sọgan yin mimọ te tọn, taidi to azọ́nmẹ, to wehọmẹ kavi to lẹdo lọ mẹ.