Alọnuwe Yọyọ He Yin Awuwlena Nado Deanana Plọnmẹ Biblu lẹ Wá Titobasinanu lọ Mẹ
Lehe Mí Na Yí Alọnuwe Mẹnu lẹ Wẹ to Ojlo Jehovah Tọn Wà to Egbehe? Zan Do
1. Lẹndai atọ̀n tẹlẹ wutu wẹ alọnuwe Ojlo Jehovah Tọn do yin awuwlena?
1 Be hiẹ ko jẹ alọnuwe yọyọ lọ Mẹnu lẹ Wẹ to Ojlo Jehovah Tọn Wà to Egbehe? zan ji ya? Lẹndai etọn wẹ (1) nado gọalọna plọnmẹ Biblu lẹ nado yọ́n omẹ nankọ he mí yin, (2) nado plọnnu yé gando nuwiwa mítọn lẹ go podọ (3) nado gọalọna yé nado mọ lehe titobasinanu mítọn nọ yinuwa do. Nupinplọn he alọnuwe Ojlo Jehovah Tọn bẹhẹn lẹ tin to weda dopodopo ji bo sọgan yin dogbapọnna po awubibọ po to oplọn dopodopo godo to nukunwhiwhe atọ́n yì ao gblamẹ.
2. Basi zẹẹmẹ lehe alọnuwe ehe yin awuwlena do tọn.
2 Lehe E Yin Awuwlena Do: Nuhe alọnuwe lọ bẹhẹn lẹ yin mimá do adà atọ̀n ji, podọ dopodopo yetọn dọhodo onú tangan de ji gando titobasinanu Jehovah tọn go dile mí mọ do to aga. Hosọ nupinplọn 28 he e bẹhẹn lẹ tọn dopodopo wẹ yin kanbiọ de, podọ hóvila he bọdego lẹ nọ na gblọndo kanbiọ lọ tọn. Yẹdide he wá sọn otò 50 linlán mẹ lẹ wẹ alọnuwe lọ bẹhẹn nado do lehe azọ́n mítọn yin azọ́n lẹdo aihọn pé tọn de do hia. To nupinplọn susu mẹ, apotin he hosọ yetọn yin “Dindonanu Dogọ” lẹ yin awuwlena bo bẹ ayinamẹ lẹ hẹn, ehe a sọgan na tuli nuplọntọ towe nado yí do yizan mẹ.
3. Nawẹ mí sọgan yí alọnuwe Ojlo Jehovah Tọn zan gbọn?
3 Lehe A Sọgan Yí I Zan Do: A sọgan bẹjẹeji gbọn ayidonugo nuplọntọ lọ tọn dindọn wá kanbiọ he nọtena hosọ nupinplọn lọ tọn ji dali. Podọ, dile mì to hukan nupinplọn lọ tọn lẹ hia dopọ, zinnudo hóvila lọ lẹ ji na ẹn. Enẹgodo, gbadopọnna kanbiọ dogbapọn tọn he tin to odò weda lọ tọn lẹ hẹ ẹ. A sọgan hia nupinplọn lọ blebu whẹpo do dọhodeji kavi má ẹn do kleunkleun. Yí wuntuntun zan nado de wefọ he a na hia sọn nupinplọn lọ mẹ lẹ. Ma wọn nado gbadopọnna yẹdide lẹ po apotin “Dindonanu Dogọ” tọn lẹ po blo. To suhugan ninọmẹ lẹ tọn mẹ, nupinplọn lọ lẹ dona yin dogbapọnna debọdo-dego. Etomọṣo, hiẹ sọgan yì nupinplọn devo ji eyin nupinplọn enẹ dọhodo whẹho he to niyaniya mẹ de ji. Di apajlẹ, eyin plidopọ de to nukọn ja, hiẹ sọgan yì gbadopọnna nupinplọn 11tọ hẹ ẹ.
4. Naegbọn homẹ towe hùn nado tindo azọ́nwanu yọyọ ehe?
4 To whenue mí to Biblu plọn hẹ mẹde, mí nọ gọalọna ẹn nado jẹakọ hẹ Otọ́ olọn mẹ tọn mítọn. Ṣigba, mí sọ dona plọnnu in gando titobasinanu Jehovah tọn go. (Howh. 6:20) Lehe homẹ mítọn hùn do sọ nado tindo azọ́nwanu yọyọ de he na hẹn ẹn bọawuna mí nado wàmọ!