Dike Nuyiwa Towe lẹ Ni Pagigona Jiwheyẹwhe
1. Naegbọn mẹsusu nọ yawu doayi Kunnudetọ Jehovah tọn lẹ go to plidopọ agbegbe tọn lẹ whenu?
1 To whenue mí jei plidopọ agbegbe tọn lẹ, mẹsusu nọ yawu doayi e go dọ plidopọ de wẹ mí jei. To fisusu he plidopọ lẹ nọ yin bibasi te, azọ́nwhé he nọ na linlin to lẹdo lọ mẹ lẹ nọ hẹn ẹn zun yinyọnẹn na omẹ lẹ dọ mí to plidopọ de basi. Mẹhe tin to lẹdo lọ mẹ lẹ nọ doayi jonọ susu he do kalti akọ́nnu tọn lẹ go. Nuflinmẹ delẹ die he na gọalọna mí nado pagigona Jiwheyẹwhe gbọn walọ dagbe mítọn dali to whenue mí tin to lẹdo he mẹ plidopọ lọ na yin bibasi te.—1 Pita 2:12.
2. Nawẹ nusisọ́ jlẹkaji tọn mítọn sọgan pagigona Jiwheyẹwhe to lẹdo he mẹ plidopọ lọ na yin bibasi te mẹ gbọn?
2 Nusisọ́ Jlẹkaji Tọn: Nusisọ́ jlẹkaji tọn mítọn to plidopọ lọ whenu nọ saba yinuwado ayidonugotọ lẹ ji. Ṣigba, aliho he mẹ mí nọ sọnú te to ojlẹ devo lẹ mẹ—to whenue mí to núdù to núdùdù-satẹn de, to nuhọ̀, po mọmọ po sọyi—sọ sọgan yinuwado mẹdevo lẹ ji taun. Dile etlẹ yindọ e ma yin dandan dọ mí ni sọnú gẹẹ to ninọmẹ enẹlẹ mẹ, nusisọ́ mítọn dona tin to jlẹkaji, wleyẹyi bo ma na yin nusisọ́ mọmọ tọn. Gbẹtọ lẹ dona doayi e go po awubibọ po dọ mí gbọnvo na mayisenọ lẹ. (Lom. 12:2) Humọ, mí dona do kalti akọ́nnu tọn mítọn, na enẹ nọ hẹn plidopọ mítọn zun yinyọnẹn na mẹdevo lẹ bo nọ hùn dotẹnmẹ kunnudide tọn lẹ dote na mí, bosọ nọ gọalọna plidopọ-watọ devo lẹ nado yọ́n mí taidi Klistiani hatọ de.
3. Nawẹ mí sọgan do homẹfa po homẹdagbe po hia gbọn?
3 Homẹfa po Homẹdagbe Po: To ojlẹ he mẹ mẹsusu to aihọn lọ mẹ yin ṣejannabinọ podọ mayọndagbenọ te ehe, homẹmiọnnamẹnu daho de wẹ e nọ yin na mẹdevo lẹ, taidi núdùdù-sàtọ lẹ, nado doayi homẹfa po homẹdagbe he mí nọ dohia po go. (2 Tim. 3:1-5) To whenue mí jlo na yí tẹnmẹ dai na mẹdevo lẹ kavi to whenue mí jlo na tò nado yí owe yọyọ he yin didetọn to plidopọ lọ ji lẹ, mí dona nọ dín, e ma yin ale mídetiti tọn gba, ṣigba dehe yin mẹdevo lẹ tọn. (1 Kọl. 10:23, 24) Whla tintan he jlodotọ de wá plidopọ de, ewọ dọ to vivọnu plidopọ lọ tọn dọmọ: “N’ma flin depope to hodidọ he yin nina to gbenẹgbe lẹ mẹ, ṣigba nuyiwa Kunnudetọ lẹ tọn wẹ whàn mi taun, podọ n’ma sọgan wọn enẹ gbede.”
4. Naegbọn mí dona lẹnnupọndo ninọmẹ mítọn lẹ ji nado yọnẹn eyin mí sọgan ze míde jo nado gọalọ to plidopọ lọ ji?
4 Mẹdezizejo sọn Ojlo mẹ Wá: Gbigbọ mẹdezejo tọn nọ dohiagona Klistiani nugbo lẹ. (Ps. 110:3) Be a sọgan ze dewe jo nado gọalọ to plidopọ lọ ji ya? Jẹnukọnna plidopọ de, mẹmẹsunnu po mẹmẹyọnnu 600 po wẹ ze yede jo nado jla fie plidopọ lọ na yin bibasi te do. Azọ́nwatọ fie yé haya lọ tọn lẹ dọmọ: “Nupaṣamẹnu daho he mí ma ko mọ pọ́n de wẹ ehe yin! Mí ma gán yise dọ omẹ ehe lẹpo wẹ ze yede jo sọn ojlo mẹ wá.” Mí yí jejejininọ do to nukọnpọnhlan plidopọ agbegbe 2013 tọn gọna dotẹnmẹ he e na hundote na mí, e ma yin nado dotoai bo plọnnu sọn Jiwheyẹwhe dè kẹdẹ gba, ṣigba nado pagigona Ewọ ga.