“Mì Hẹn Walọyizan Dagbe Mìtọn Go to Akọta lẹ Ṣẹnṣẹn”
1. Naegbọn e do yin nujọnu nado hẹn walọyizan dagbe mítọn go to plidopọ he ja lọ whenu?
1 Mí nọ dọ̀n ayidonugo gbẹtọ lẹ tọn to plidopọ he mí nọ basi to whemẹwhemẹ lẹ whenu. Enẹwutu, nujọnu wẹ e yin dọ walọyizan mítọn ni nọ dohiagona Jiwheyẹwhe he sẹ̀n mí te. (Lev. 20:26) Walọ dagbe mítọn gọna nusisọ́ po aṣọ́dido mítọn po dona do mí hia hezeheze taidi hodotọ nugbo Klisti tọn lẹ. To whenue mí jei plidopọ agbegbe kavi akọjọpli tọn he ja lẹ, nawẹ mí sọgan ‘hẹn walọyizan dagbe mítọn go to akọta lẹ ṣẹnṣẹn’ bo gbọnmọ dali pagigona Otọ́ olọn mẹ tọn mítọn gbọn?—1 Pita 2:12.
2. Dotẹnmẹ hundote tẹlẹ wẹ mí na tindo nado do jẹhẹnu Klistiani tọn lẹ hia to plidopọ he ja lọ whenu?
2 Nọ Do Jẹhẹnu Klistiani Tọn lẹ Hia: Owanyi he mí nọ dohia ode awetọ po aliho he mẹ mí nọ yinuwa hẹ “mẹhe to gbonu lẹ” po te nọ gbọnvo mlẹnmlẹn na gbigbọ he gbayipe to aihọn lọ mẹ. (Kọl. 3:10; 4:5; 2 Tim. 3:1-5) Mí dona nọ jọmẹ bo nọ fahomẹ hẹ mẹhe mí dohún hẹ lẹ kavi to ninọmẹ devo lẹ mẹ, etlẹ yin to whenue nuhahun de fọ́n. Walọ dagbe didohia sọ nọ biọ “A wanu” didọna mẹhe yilizọn na mí to amìdonu lẹ, to húnglintẹn lẹ podọ to fidevo depope.
3. Nuflinmẹ tẹwẹ yin nina mẹjitọ lẹ, podọ etẹwutu?
3 Mẹjitọ lẹ dona penukundo ovi yetọn lẹ go ganji to plidopọ lọ ji, podọ to fidevo depope he yé mọ adọtẹn do. (Howh. 29:15) Ogán núdùdù-satẹn hotẹli de tọn dọna asu po asi po de dọmọ: “Mí yiwanna mì taun. Omẹ mìtọn lẹ po ovi mìtọn lẹ po tindo walọ dagbe bosọ nọ símẹ taun. Mẹhe nọ wazọ́n tofi lẹpo wẹ to ohó mìtọn dagbe dọ, podọ ojlo mítọn wẹ yindọ mì ni nọ wáfi to sẹfifo lẹpo.”
4. Ayidonugo tẹwẹ mí dona na awusọhia mítọn to whenue mí tin to lẹdo plidopọ lọ tọn mẹ?
4 Nusisọ́ Jlẹkaji Tọn: To plidopọ lọ whenu, nusisọ́ mítọn dona sọgbe bo tin to jlẹkaji, bo ma dona zẹ̀pá taidi dehe gbayipe to aihọn lọ mẹ. (1 Tim. 2:9) Etlẹ yin to whenue mí jlo na yì disa to lẹdo plidopọ lọ tọn mẹ jẹnukọn podọ to vivọnu tito-to-whinnu lọ tọn, mí ma dona sọnú to aliho mọmọ kavi yamakinanu tọn mẹ. Gbọnmọ dali, mí na voawu nado do kalti akọ́nnu tọn mítọn bo ma na kuwinyan nado dekunnu to whenue dotẹnmẹ lọ na hundote. Awusọhia po walọ dagbe mítọn po to plidopọ he ja lọ whenu na whàn ahunjijlọnọ lẹ nado sè owẹ̀n gbẹwhlẹngán tọn he tin to Biblu mẹ lọ bo nasọ hẹn Jehovah jaya.—Zẹf. 3:17.
[Apotin to weda 2-5]
Nuflinmẹ Plidopọ Agbegbe Tọn 2014 Tọn Lẹ
◼ Gànmẹ Lẹ: Ohọ̀n lẹ na yin hùnhùn to ogàn 8:00 afọnnu tọn mẹ. Tito-to-whinnu lọ na bẹjẹeji to ogàn 9:20 afọnnu tọn mẹ to azán atọ̀n lọ lẹpo gbè. To whenuena nuhiho bẹjẹeji tọn na to yìyì, mímẹpo dona yì sinai to aisinnu mítọn lẹ ji na tito-to-whinnu lọ nido sọgan bẹjẹeji po yẹyi po. Tito-to-whinnu lọ na wá vivọnu to ogàn 4:55 whèlẹkọ tọn mẹ to Ahọluzangbe po Sibigbe po podọ to ogàn 3:50 whèlẹkọ tọn mẹ to Sẹgbe.
◼ Plidopọ Akọjọpli Tọn: To lẹdo delẹ mẹ, plidopọ akọjọpli tọn na yin bibasi. Hẹn do ayiha mẹ dọ wekantẹn alahọ tọn ko basi oylọna agun tangan delẹ po afọzedaitọ tògodo tọn lẹ po, na e ko yí sọwhiwhe do lẹnnupọndo sọha aisinnu, húnglintẹn, po hotẹli he na tinto-aimẹ lẹ po tọn ji. Gbẹtọ sọgan wá sù zẹjlẹgo, eyin wẹnlatọ lẹ yì plidopọ akọjọpli tọn de ehe yé ma yin oylọ-basina. Eyin ninọmẹ lẹ ma hẹn ẹn yọnbasi na we nado yì plidopọ agbegbe tọn towe, a ma dona yì plidopọ akọjọpli tọn de do otẹn etọn mẹ.
◼ Húnglintẹn: To nọtẹn plidopọ tọn lẹpo fie húnglintẹn lẹ ko yin awuwlena te, tẹnmẹ lẹ na tin vọnu bo ma dona yin yíyí dai jẹnukọn. To whenuena e yindọ húnglintẹn lẹ ma nọ saba gblo sọmọ, e na yọ́n dọ mẹsusu ni dohún dopolọ eyin e yọnbasi. Kọngbedopọ pẹkipẹki hẹ mẹhe to nukunpedo húnglintẹn lọ go lẹ nado dapana asidan lẹ.
◼ Aisinnu Yíyí Dai: To whenue họngbo nọtẹn plidopọ tọn lọ lẹ yin hùnhùn to afọnnu, jaale ma nọ dowezun yì aisinnu he a yiwanna hugan de kọ̀n taidi dọ a to tẹnmẹ whlẹn hẹ plidopọ-watọ hatọ towe lẹ blo. Gbigbọ mẹde-yido-sanvọ́ tọn he nọ whàn mí nado dín dagbe mẹdevo lẹ tọn nọ dohiagona mí taidi Klistiani nugbo lẹ bosọ nọ whàn ayidonugotọ lẹ nado pà Jiwheyẹwhe. (Joh. 13:34, 35; 1 Kọl. 13:4, 5; 1 Pita 2:12) Aisinnu lẹ sọgan yin yíyí dai kiki na mẹhe zọnpọ hẹ we to ohún dopolọ mẹ kavi mẹhe nọ nọ̀ owhé dopolọ gbè hẹ we kavi na plọnmẹ Biblu yọyọ towe lẹ. Aisinnu vonọtaun delẹ ko yin awuwledai na mẹhomẹ lẹ po madogánnọ lẹ po. Na aisinnu lọ lẹ ma sù wutu, mẹdopo kavi omẹ awe he na gọalọna omẹ mọnkọtọn de wẹ dona sinai dopọ hẹ ẹ.
◼ Núdùdù Whèmẹ Tọn: Jaale bo hẹn núdùdù whèmẹ tọn wá kakati nado tọ́n sọn nọtẹn plidopọ tọn lọ nado yì họ̀ núdùdù to gbọjẹ whèmẹ tọn whenu. Núdùdù-hẹnnu (glacière) kleun he sọgan yin zizedo aisinnu towe glọ de sọgan yin yiyizan. Núdùdù-hẹnnu daho lẹ, agbán kavi nuyizan depope he sọgan gbà lẹ ma yin alọkẹyi to nọtẹn plidopọ tọn lọ ji.
◼ Nunina Lẹ: Mí sọgan do pinpẹn-nutọn-yinyọnẹn mítọn hia na tito plidopọ lọ tọn lẹ gbọn nunina sọn ojlo mẹ wá bibasi na azọ́n lẹdo aihọn pé tọn lọ to Plitẹnhọ Ahọluduta tọn mítọn mẹ kavi to plidopọ lọ ji dali. Nunina depope he yin bibasi gbọn akuẹ-wema dali lẹ dona yin didohlan gbọn yinkọ he yin yinyọnẹn to osẹ́n-liho to lẹdo lọ mẹ dali. Di apajlẹ, to Bénin, akuẹ-wema lọ dona yin didohlan A.R.T.J.B.
◼ Nujijọ Ajiji Lẹ: Eyin nuhahun he biọ nukunpedomẹgo dotowhé tọn madonukun de fọ́n to nọtẹn plidopọ tọn lọ, jaale bo dọ ẹ na dopo to aisinnunamẹtọ he sẹpọ we lẹ mẹ, ewọ na dọnsẹpọ Amasin-Họsa to afọdopolọji na amasinzọ́nwatọ nugopetọ he tin to finẹ lẹ nido sọgan gbadopọnna lehe ninọmẹ lọ sinyẹn sọ bo na alọgọ he jẹ.
◼ Amasin: Eyin a nọ zan amasin vonọtaun delẹ, jaale bo hẹn ẹn diun dọ a hẹn dehe na pemẹnu wá, na depope to amasin enẹlẹ mẹ ma na tin-to-aimẹ to plidopọ lọ ji.
◼ Nuyidokanji: Zomọ-nuyidokanji tọn lẹ ma dona yin ṣiṣadopọ hẹ nuyizan lẹtliki kavi hànjinu nọtẹn plidopọ lọ tọn lẹ tọn, podọ yé dona yin yiyizan to aliho he ma na fẹayihasẹna mẹdevo lẹ mẹ.
◼ Alọdowemẹwe S-43: Alọdowemẹwe Veuillez suivre l’intérêt (S-43) dona yin yiyizan nado na nudọnamẹ gando mẹdepope he do ojlo hia to kunnudide mayin aṣa tọn mítọn mẹ to plidopọ lọ whenu lẹ go. Wẹnlatọ lẹ dona hẹn vọkan dopo kavi awe alọdowemẹwe lọ tọn wá plidopọ lọ ji. Alọdowemẹwe he mẹ mì kanwe gọ́ lẹ sọgan yin zize yì Owe Yitẹn na nido yin nukunpedego kavi yin zize na wekantọ agun mìtọn tọn to whenuena mì lẹkọ sọn plidopọ lọ ji.—Pọ́n Lizọnyizọn Ahọluduta Tọn Mítọn février 2005, weda 8.
◼ Núdùdù-Satẹn Lẹ: Walọ dagbe towe to núdùdù-satẹn lẹ na doyẹyigona yinkọ Jehovah tọn. Nusisọ́ towe ni do we hia taidi Klistiani nugbo.
◼ Adọtẹn Lẹ: Fidepope he hiẹ mọ adọtẹn do, do homẹdagbe, owanyi po mẹtọnhopọn po hia. Eyin owhé mẹdevo tọn gbè wẹ hiẹ mọ adọtẹn do, tẹnpọn nado tindo mahẹ to whégbè-zọ́n po akuẹzinzan lẹ po mẹ dile e na yọnbasi do. Whẹpo hiẹ nado tọ́n sọn finẹ to azán godo tọn lọ gbè, hẹn ẹn diun dọ ohọ̀ he mẹ hiẹ nọ lọ tin to wiweji podọ to titoji.
◼ Sinsẹ̀nzọn Mẹdezejo Tọn: Mẹdepope he jlo nado gọalọ to azọ́nwatẹn ehe dona yì Azọ́nwatẹn Sinsẹ̀nzọn Mẹdezejo Tọn lọ to plidopọ lọ ji. Ovi he ma tlẹ ko tindo owhe 16 lẹ lọsu sọgan tindo mahẹ dagbe to azọ́n lọ mẹ to anademẹ mẹjitọ, mẹgopọntọ, kavi mẹhomẹ devo de he yin dide gbọn omẹ enẹlẹ dali glọ.