Nuflinmẹ Plidopọ Daho Tọn Lẹ

Gànmẹ Lẹ: Ohọ̀n lẹ na yin hùnhùn to ogàn 8 mẹ afọnnu. Nuhiho bẹjẹeji tọn na bẹjẹeji to ogàn 9:20 mẹ afọnnu to azán atọ̀n lọ lẹpo gbè. To whenẹnu, mímẹpo dona yì sinai to aisinnu mítọn lẹ ji na tito-to-whinnu lọ nido sọgan bẹjẹeji po yẹyi po. Tito-to-whinnu lọ na wá vivọnu to nudi ogàn 5 mẹ whèlẹkọ to Ahọluzangbe po Sibigbe po, podọ to nudi ogàn 4 mẹ whèlẹkọ to Sẹgbe.

‘Yí Ohàn Do Pà Jehovah’: To hohowhenu, omẹ Jiwheyẹwhe tọn lẹ nọ yí ohàn do pà Jehovah, podọ to egbehe ohàn gbẹ́ yin adà titengbe de to sinsẹ̀n-bibasi nugbo mẹ. (Ps. 28:7) Adà plidopọ daho mítọn tọn dopodopo wẹ nọ bẹjẹeji po nuhiho bẹjẹeji tọn de po. Ehe ma yin nuhiho bẹjẹeji tọn de poun, ṣigba e yin awuwlena na mí nido sọgan plọnnu gando Jehovah go bo basi sinsẹ̀n hlan ẹn. Enẹwutu, to whenue azinponọ lọ lá dọ nuhiho bẹjẹeji tọn lọ ko jlo na bẹ, mí dona yì sinai bo dotoaina nuhiho lọ po pinpẹn-nutọn-yinyọnẹn po, kakati nado to hodọdopọ hẹ mẹdevo lẹ. Gbọnmọ dali, mí na do pinpẹn-nutọn-yinyọnẹn hia na vivẹnu he hagbẹ hànjigbẹ́ Watchtower tọn lẹ do. Whla awe to owhe dopo mẹ mẹmẹsunnu po mẹmẹyọnnu ehelẹ po nọ yí akuẹ yetọn titi do dohún yì Patterson to New York nado sọgan wleawuna ohàn dagbedagbe he mí na duvivi etọn lẹ. To whenue mí ko yí sọwhiwhe do dotoaina nuhiho bẹjẹeji tọn lọ godo, mímẹpo dona nọpọ́ nado yí ohàn Ahọluduta tọn mítọn lẹ do pagigona Jehovah.

Húnglintẹn: To nọtẹn plidopọ tọn lẹpo fie húnglintẹn lẹ ko yin awuwlena te, tẹnmẹ lẹ na tin vọnu bo ma dona yin yíyí dai jẹnukọn. To whenuena e yindọ húnglintẹn lẹ ma nọ saba gblo sọmọ, e na yọ́n dọ mẹsusu ni dohún dopolọ eyin e yọnbasi. Kọngbedopọ pẹkipẹki hẹ mẹhe to nukunpedo húnglintẹn lọ go lẹ nado dapana asidan lẹ.

Aisinnu Yíyí Dai: To whenue họngbo nọtẹn plidopọ tọn lọ lẹ yin hùnhùn to afọnnu, jaale ma nọ dowezun yì aisinnu lẹ kọ̀n taidi dọ a to tẹnmẹ whlẹn hẹ plidopọ-watọ hatọ towe lẹ blo. Gbigbọ mẹde-yido-sanvọ́ tọn he nọ whàn mí nado dín dagbe mẹdevo lẹ tọn nọ dohiagona mí taidi Klistiani nugbo lẹ bosọ nọ whàn ayidonugotọ lẹ nado pà Jiwheyẹwhe. (Joh. 13:34, 35; 1 Kọl. 13:5; 1 Pita 2:12) Aisinnu lẹ sọgan yin yíyí dai kiki na mẹhe zọnpọ hẹ we to ohún dopolọ mẹ kavi mẹhe nọ nọ̀ owhé dopolọ gbè hẹ we kavi mẹhe hiẹ to Biblu plọn hẹ lẹ. Eyin hiẹ ma to tẹnmẹ yí dai namẹ, jaale bo ma ze nudepope do aisinnu lẹ ji blo. Anademẹ ehe hihodo na hẹn ẹn yọnbasi na mẹdevo lẹ nado mọdọ aisinnu enẹlẹ vò. Aisinnu vonọtaun delẹ ko yin awuwledai na mẹhomẹ lẹ po madogánnọ lẹ po. Na aisinnu lọ lẹ ma sù wutu, mẹdopo kavi omẹ awe he na gọalọna omẹ mọnkọtọn de wẹ sọgan sinai dopọ hẹ ẹ.

Nusisọ́ Jlẹkaji Tọn: To plidopọ lọ whenu, nusisọ́ mítọn dona sọgbe bo tin to jlẹkaji, bo ma dona zẹ̀pá taidi dehe gbayipe to aihọn lọ mẹ. (1 Tim. 2:9) Etlẹ yin to whenue mí jlo na yì disa to lẹdo plidopọ lọ tọn mẹ jẹnukọn podọ to vivọnu tito-to-whinnu lọ tọn, mí ma dona sọnú to aliho mọmọ kavi yamakinanu tọn mẹ. Gbọnmọ dali, mí na voawu nado do kalti akọ́nnu tọn mítọn bo ma na kuwinyan nado dekunnu to whenue dotẹnmẹ lọ na hundote. Awusọhia po walọ dagbe mítọn po to plidopọ he ja lọ whenu na whàn ahunjijlọnọ lẹ nado sè owẹ̀n gbẹwhlẹngán tọn he tin to Biblu mẹ lọ bo nasọ hẹn Jehovah jaya.—Zẹf. 3:17.

Do Walọ Dagbe Hia to Whenue A to Nuyizan Lẹnunnuyọnẹn Tọn lẹ Zan: Mí nọ do walọ dagbe hia to tito-to-whinnu lọ whenu gbọn alokan apòmẹ tọn mítọn kavi nuyizan mọnkọtọn devo lẹ zizedo ninọmẹ he ma na fẹayihasẹna mẹdevo lẹ mẹ dali. Eyin mí to fọto-denú, nuyizan he nọ yí video do kanji, ọdinatẹẹ apòmẹ tọn, kavi nuyizan mọnkọtọn devo lẹ zan, mí dona do mẹtọnhopọn hia bo ma dotukla mẹdevo lẹ kavi sú nukunmẹ na yé. Mí sọ nọ do walọ dagbe hia eyin mí ma nọ to wekanhlanmẹ he ma yin dandan tọn dohlan gbọn alokan mítọn kavi Intẹnẹt ji to tito-to-whinnu lọ whenu.

Núdùdù Whèmẹ Tọn: Jaale bo hẹn núdùdù whèmẹ tọn wá kakati nado tọ́n sọn nọtẹn plidopọ tọn lọ nado yì họ̀ núdùdù to gbọjẹ whèmẹ tọn whenu. Núdùdù-hẹnnu (glacière) kleun de he sọgan yin zizedo aisinnu towe glọ sọgan yin yiyizan. Núdùdù-hẹnnu daho lẹ, agbán kavi nuyizan depope he sọgan gbà lẹ ma yin alọkẹyi to nọtẹn plidopọ tọn lọ ji.

Nunina Lẹ: Mí sọgan do pinpẹn-nutọn-yinyọnẹn mítọn hia na tito plidopọ lọ tọn lẹ gbọn nunina sọn ojlo mẹ wá bibasi na azọ́n lẹdo aihọn pé tọn lọ to Plitẹnhọ Ahọluduta tọn mítọn mẹ kavi to plidopọ lọ ji dali. Nunina depope he yin bibasi gbọn akuẹ-wema dali lẹ dona yin didohlan gbọn yinkọ he yin yinyọnẹn to osẹ́n-liho to lẹdo lọ mẹ dali. Di apajlẹ, to Bénin, akuẹ-wema lọ dona yin didohlan A.R.T.J.B.

Amasin: Eyin a nọ zan amasin vonọtaun delẹ, jaale bo hẹn ẹn diun dọ a hẹn dehe na pé we wá, na depope to amasin enẹlẹ mẹ ma na tin-to-aimẹ to plidopọ lọ ji.

Nujijọ Ajiji Lẹ: Eyin nuhahun he biọ nukunpedomẹgo dotowhé tọn madonukun de fọ́n to nọtẹn plidopọ tọn lọ, jaale bo dọ ẹ na dopo to aisinnunamẹtọ he sẹpọ we lẹ mẹ, ewọ na dọnsẹpọ Amasin-Họsa to afọdopolọji na amasinzọ́nwatọ nugopetọ he tin to finẹ lẹ nido sọgan gbadopọnna lehe ninọmẹ lọ sinyẹn sọ bo na alọgọ he jẹ.

Nuyidokanji: Zomọ-nuyidokanji tọn lẹ ma dona yin ṣiṣadopọ hẹ nuyizan lẹtliki kavi hànjinu nọtẹn plidopọ lọ tọn lẹ tọn, podọ yé dona yin yiyizan to aliho he ma na fẹayihasẹna mẹdevo lẹ mẹ.

Alọdowemẹwe S-43: Alọdowemẹwe Veuillez suivre l’intérêt (S-43) dona yin yiyizan nado na nudọnamẹ gando mẹdepope he do ojlo hia to kunnudide mayin aṣa tọn mítọn mẹ to plidopọ lọ whenu lẹ go. Wẹnlatọ lẹ dona hẹn vọkan dopo kavi awe alọdowemẹwe lọ tọn wá plidopọ lọ ji. Alọdowemẹwe he mẹ mì kanwe gọ́ lẹ sọgan yin zize yì Owe Yitẹn na yé nido yin nukunpedego kavi na wekantọ agun mìtọn tọn to whenuena mì lẹkọ sọn plidopọ lọ ji.—Pọ́n Lizọnyizọn Ahọluduta Tọn Mítọn février 2005, weda 8.

Núdùdù-Satẹn Lẹ: Walọ dagbe towe to núdùdù-satẹn lẹ na doyẹyigona yinkọ Jehovah tọn. Nusisọ́ towe ni do we hia taidi Klistiani nugbo.

Adọtẹn Lẹ: Fidepope he hiẹ mọ adọtẹn do, do homẹdagbe, owanyi po mẹtọnhopọn po hia. Eyin owhé mẹdevo tọn gbè wẹ hiẹ mọ adọtẹn do, tẹnpọn nado tindo mahẹ to whégbè-zọ́n po akuẹzinzan lẹ po mẹ dile e na yọnbasi do. Whẹpo hiẹ nado tọ́n sọn finẹ to azán godo tọn lọ gbè, hẹn ẹn diun dọ ohọ̀ he mẹ hiẹ nọ lọ tin to wiweji podọ to titoji.

Nusisá po Nuyizan Mọnkọtọn Devo lẹ Po: Afọdide owanyi tọn wẹ e na yin dọ mí ni de nusisá kavi parfum he owán yetọn sinyẹn lẹ zinzan pò kavi dapana yé, na owán lọ sọgan fọ́n nuhahun dote na mẹhe tindo azọ̀n tangan de lẹ wutu.—1 Kọl. 10:24.

Sinsẹ̀nzọn Mẹdezejo Tọn: Mẹdepope he jlo nado gọalọ to azọ́nwatẹn ehe dona yì Azọ́nwatẹn Sinsẹ̀nzọn Mẹdezejo Tọn lọ to plidopọ lọ ji. Ovi he ma tlẹ ko tindo owhe 16 lẹ lọsu sọgan tindo mahẹ to azọ́n lọ mẹ to anademẹ mẹjitọ, mẹgopọntọ, kavi mẹhomẹ devo de he yin dide gbọn omẹ enẹlẹ dali glọ.