Alọgigọna Mẹhe Ma Ko Wleawufo Nado Plọn Owe Biblu Plọn Mí Lẹ

1. Be mẹlẹpo wẹ na tindo ojlo to owe Biblu Plọn Mí mẹ to tintan whenu ya? Basi zẹẹmẹ.

¹ Eyin mẹde na lẹzun sinsẹ̀n-basitọ Jehovah tọn, ewọ dona plọn nuhe Biblu plọn mí. Ṣigba, na mẹdelẹ tin to sinsẹ̀n he ma yin sinsẹ̀n Klistiani tọn de mẹ wutu, yé ma nọ pọ́n Biblu hlan taidi Ohó Jiwheyẹwhe tọn. Mẹdevo lẹ ma yise paali dọ Jiwheyẹwhe tin podọ yé ma tindo sisi na Biblu. Azọ́nwanu dagbe tẹlẹ wẹ ko yin yiyizan nado gọalọna mẹhe ma nọ kẹalọyi to tintan whenu dọ yé ni plọn owe Biblu Plọn Mí hẹ yé lẹ? Ayinamẹ he bọdego lẹ sinai do nuhe wẹnlatọ he wá sọn otò voovo 20 mẹ dọ lẹ ji.

2. Eyin mẹde dọna mí dọ emi ma yise dọ Jiwheyẹwhe tin, etẹwẹ mí dona dindona, podọ etẹwutu?

² Mẹhe Ma Yise dọ Jiwheyẹwhe Tin Lẹ: Eyin mẹde dọ dọ emi ma yise dọ Jiwheyẹwhe tin, nuyọnẹnnu wẹ e nọ yin nado dín whẹwhinwhẹ́n lọ. Be e yise dọ nulẹ-tin-yededenu wutu wẹ ya? Be e masọ tindo yise to Jiwheyẹwhe mẹ ba na whẹdida mawadodo he to aihọn lọ mẹ kavi na yẹnuwiwa sinsẹ̀n tọn wutu wẹ ya? Be otò he mẹ suhugan gbẹtọ lẹ tọn ma yise te dọ Jiwheyẹwhe tin de mẹ wẹ e wá sọn ya? Vlavo mẹlọ ma kudeji mlẹnmlẹn dọ Jiwheyẹwhe ma tin, podọ e masọ mọdọ dandannu wẹ e yin nado yise dọ Ewọ tin. Wẹnlatọ susu mọdọ eyin yé kanse dọ, “Be mọ wẹ mì ko nọ pọ́n whẹho lọ do dai ya?,” enẹ nọ whàn gbẹtọ lẹ nado basi zẹẹmẹ pọndohlan yetọn tọn. Nọ dotoai bo ma nọ gbòhódonù na yé blo. Eyin mí mọnukunnujẹ nuhewutu mẹlọ ma yise dọ Jiwheyẹwhe tin mẹ, mí na yọ́n lehe mí na gblọnna ẹn do, gọna owe he mí na zedonukọnna ẹn.—Howh. 18:13.

3. Nawẹ mí sọgan dohia dọ mí tindo sisi na mẹlọ podọ na nuyise etọn lẹ gbọn?

³ To whenue a to ohó gblọnna mẹlọ, hẹn ẹn diun dọ nuhe dọ a te ma dohia dọ a to agọjẹdo pọndohlan etọn. Wekantẹn alahọ États-Unis tọn na ayinamẹ dọmọ: “Nujọnu taun wẹ e yin nado nọ na sisi mẹdekannujẹ he gbẹtọvi dopodopo tindo nado basi dide nuhe e na yise tọn. Kakati nado to tintẹnpọn nado duto hodọdopọ lọ ji, e nọ yọ́n hugan nado kàn kanbiọ mẹhẹnlẹnnupọn tọn lẹ sè gbẹtọ lẹ, na yé nido wá tadona de kọ̀n na yede.” Nugopọntọ tomẹyitọ de nọ saba dotoaina whétọ lẹ, enẹgodo e nọ bẹ gblọndo etọn jẹeji po kanbiọ lọ po dọ, “Be a ko lẹnnupọndo yọnbasi ehe ji pọ́n ya?”

4. Naegbọn homẹfa do yin nujọnu?

⁴ Nujọnu wẹ e yin nado nọ fahomẹ, na e nọ biọ whenu whẹpo mẹde nido yise dọ Jiwheyẹwhe tin. Hodọdopọ mítọn tintan lẹ sọgan nọma whàn mẹlọ nado yise dọ Mẹdatọ de tin. Vlavo dile ojlẹ to yìyì, e na wá kẹalọyi dọ e sọgan yọnbasi dọ Mẹdatọ de ni tin, kavi dọ emi mọnukunnujẹ nuhewutu mẹde sọgan wá tadona enẹ kọ̀n mẹ.

5. Naegbọn mẹdelẹ sọgan nọma tindo ojlo to Biblu mẹ?

⁵ Mẹhe Ma Nọ Tindo Ojlo Kavi Jide to Biblu mẹ Lẹ: To paa mẹ, mẹhe kẹalọyi dọ vlavo Jiwheyẹwhe tin lẹ ma nọ saba tindo ojlo to nuhe Biblu plọnmẹ lẹ mẹ, na yé ma yise dọ Biblu yin Ohó Jiwheyẹwhe tọn. E sọgan yindọ otò he ma yin otò Klistiani tọn de mẹ wẹ mẹlọ nọ nọ̀ bo nọ lẹndọ mẹhe yin apadewhe sinsẹ̀n Mẹylọhodotọklisti tọn lẹ wẹ nọ zan Biblu. Kavi otò Klistiani tọn he ma nọ na ayidonugo whẹho sinsẹ̀n tọn paali de mẹ wẹ e nọ nọ̀, podọ e sọgan nọ lẹndọ Biblu ma na yọ́n-na-yizan na emi. Nawẹ mí sọgan gọalọna omẹ enẹlẹ nado wá tindo ojlo to Biblu mẹ bo kẹalọyi oplọn to owe Biblu Plọn Mí mẹ gbọn?

6. Etẹwẹ nọ saba yin aliho dagbe de nado fọnjlodotena gbẹtọ lẹ gando Biblu go?

⁶ Wekantẹn alahọ Grèce tọn wlan dọmọ: “Aliho dagbe hugan lọ nado gọalọna mẹhe ma nọ tindo ojlo to Biblu mẹ lẹ wẹ nado hùn Biblu bo do nuhe e bẹhẹn hia yé.” Wẹnlatọ susu ko doayi e go dọ nuyiwadomẹji he owẹ̀n Biblu tọn nọ tindo do ahun mẹde tọn ji nọ tindo huhlọn hugan nudevo depope he yé sọgan dọna mẹlọ. (Heb. 4:12) Oyín Jiwheyẹwhe tọn mimọ to Biblu mẹ ko gọalọna mẹsusu nado wá tindo ojlo nado gbadopọnna Biblu.” Wekantẹn alahọ Inde tọn wlan dọmọ: “Nugbo lọ gando ogbẹ̀ po okú po go nọ fọnjlodotena Hindu lẹ taun—nuyiwadomẹji dopolọ wẹ opagbe aihọn de he mẹ akọ̀ ṣinṣinyan ma nasọ tin te ba tọn nọ tindo do yé ji.” Wẹnlatọ lẹ nọ saba donù nuhahun he gbẹtọ lẹ nọ pehẹ to lẹdo lọ mẹ lẹ go, podọ ehe nọ hùn dotẹnmẹ dote na yé nado yí Biblu zan nado do nuhe Ahọluduta Jiwheyẹwhe tọn na wà nado didẹ nuhahun lẹ hia.

7. Etẹwẹ mí sọgan dọna mẹhe tindo pọndohlan agọ̀ gando Biblu go na nuyiwa sinsẹ̀n Mẹylọhodotọklisti tọn lẹ tọn wutu lẹ?

⁷ Eyin mẹde tindo pọndohlan agọ̀ gando Biblu go na nuyiwa sinsẹ̀n Mẹylọhodotọklisti tọn lẹ tọn wutu, dohia ẹ dọ sinsẹ̀n Mẹylọhodotọklisti tọn lẹ ko slokọna Biblu po nuplọnmẹ etọn lẹ po. Wekantẹn alahọ Inde tọn wlan dọmọ: “To whedelẹnu, e nọ biọ dọ mí ni gọalọna gbẹtọ lẹ nado mọnukunnujẹemẹ dọ sinsẹ̀n lẹ nọ plọnmẹ onú agọ̀ lẹ gando Biblu go.” Yé na linlin dọ adà 4tọ alọnuwe lọ Quel est le but de la vie? Comment le découvrir? tọn he do lehe sinsẹ̀n lẹ ko tẹnpọn nado hẹn Ohó Jiwheyẹwhe tọn flu bo sukúndona ẹn do hia nọ yinuwado Hindu lẹ ji. Gbehosọnalitọ de to Brésil nọ saba dọna gbẹtọ lẹ dọmọ: “Be e ma na yọ́n dọ mì ni yí sọwhiwhe do gbadopọnna nuhe Biblu bẹhẹn lẹ ya? Mẹsusu wẹ yí ahundopo do to mọwà, podọ e ma yin po linlẹn lọ po nado wá biọ sinsẹ̀n tangan de mẹ. Nuhe mì na plọn sọgan paṣa mì.”

8. Naegbọn mí ma dona gbọjọ eyin mẹde ma tindo ojlo to nuhe Biblu plọnmẹ lẹ mẹ to tintan whenu?

⁸ Jehovah nọ pọ́n ahun mẹdopodopo tọn mẹ. (1 Sam. 16:7; Howh. 21:2) E to mẹhe tindo ninọmẹ ahun mẹ tọn dagbe lẹ dọ̀n wá sinsẹ̀n-bibasi nugbo mẹ. (Joh. 6:44) Susu yetọn wẹ ma ko plọnnu pọ́n gando Jiwheyẹwhe go kavi ma jẹakọ hẹ Biblu sọmọ. Lizọnyizọn mítọn nọ hùn dotẹnmẹ dote na yé nado “yin whinwhlẹngán bo wá oyọnẹn he pegan nugbo tọn kọ̀n.” (1 Tim. 2:4) Enẹwutu, eyin mẹdelẹ ma tindo ojlo to nuhe Biblu plọnmẹ lẹ mẹ to tintan whenu, ma gbọjọ blo! Yí dopo to azọ́nwanu he tin-to-aimẹ to ogbè towe mẹ lẹ mẹ zan nado fọ́n ojlo yetọn dote. Dile ojlẹ to yìyì, a sọgan wá penugo nado diọadana hodọdopọ lọ biọ azọ́nwanu tangan he mí do nọ deanana plọnmẹ Biblu lẹ mẹ, enẹ wẹ owe Etẹwẹ Biblu Plọn Mí Taun?

[Apotin to weda 4]

Eyin whétọ lọ dọ dọ emi ma yise dọ Jiwheyẹwhe tin, tẹ́n ehe pọ́n:

• Kanse e dọ, “Be mọ wẹ mì ko nọ pọ́n whẹho lọ do dai ya?” nado yọ́n whẹwhinwhẹ́n lọ.

• Eyin ewọ tindo yise to nulẹ-tin-yededenu mẹ, alọdlẹndonu ehelẹ sọgan yọ́n-na-yizan:

Hosọ lọ “Hasard ou conception” he nọ sọawuhia debọdo-dego to Réveillez-vous! mẹ.

Video lọ Les merveilles de la création révèlent la gloire de Dieu

Alọnuwe lọ lẹ Une vie pleinement satisfaisante: Comment?, adà 4tọ; La vie a-t-elle été créée? po Cinq questions à se poser sur l’origine de la vie po.

• Eyin whẹdida mawadodo po yajiji po wẹ zọ́n bọ ewọ masọ tindo yise to Jiwheyẹwhe mẹ ba, alọdlẹndonu ehelẹ sọgan yọ́n-na-yizan:

Owe Y a-t-il un Créateur qui se soucie de vous?, weta 10

Alọnuwe lọ lẹ Be Jiwheyẹwhe nọ hò mítọn pọ́n nugbonugbo ya? adà 6tọ, po Etẹwẹ Yín Lẹndai Ogbẹ̀ Tọn?, adà 6tọ po

• Diọadana oplọn lọ biọ owe Biblu Plọn Mí mẹ eyin a mọdọ whétọ lọ kẹalọyi dọ e yọnbasi dọ Jiwheyẹwhe ni tin. Vlavo e na yọ́n nado bẹ sọn weta 2tọ kavi sọn hosọ devo ji he sọgbe hẹ ninọmẹ whétọ lọ tọn.

[Apotin to weda 5]

Eyin whétọ lọ ma tindo yise to Biblu mẹ, tẹ́n ehe pọ́n:

• Gbadopọnna owe La vie: comment est-elle apparue? Évolution ou création?, weta 17 po 18tọ po hẹ ẹ.

• Dọhodo ale he tonusisena nunọwhinnusẹ́n Biblu tọn lẹ nọ hẹnwa lẹ ji. Zinjẹgbonu voovo he a sọgan yizan nado dohia dọ Biblu yọ́n-na-yizan taun lẹ die:

Hosọ lọ “De L’aide Pour Les Familles” he nọ sọawuhia debọdo-dego to Réveillez-vous! mẹ.

Video lọ La Bible: une force dans votre vie

Alọnuwe lọ lẹ Wẹndagbe de sọn Jiwheyẹwhe Dè!, nupinplọn 9 po 11tọ po; Owe de Na Gbẹtọ Lẹpo, weda 22-26; gọna Une vie pleinement satisfaisante: Comment?, adà 2tọ

Nọ yí alọnuwe lọ La vraie foi: le chemin qui mène au bonheur, adà 3tọ zan na Malenu lẹ.

Eyin a to kunnude to lẹdo he mẹ gbẹtọ lẹ nọ tindo pọndohlan agọ̀ gando Biblu go te mẹ, e sọgan yọ́n hugan ma nado dlẹnalọdo asisa he mẹ ohó nuyọnẹn tọn he a to mimá hẹ yé lẹ wá sọn kakajẹ whenue a na ko tindo hodọdopọ susu hẹ yé.

• Basi zẹẹmẹ lehe dọdai Biblu tọn lẹ ko mọ hẹndi do tọn. Zinjẹgbonu he a sọgan yizan lẹ die:

Video lọ La Bible: un récit historique exact, des prophéties dignes de foi

Alọnuwe lọ Owe de Na Gbẹtọ Lẹpo, weda 27-29

• Diọadana oplọn lọ biọ owe Biblu Plọn Mí mẹ eyin whétọ lọ jẹ nuhe Biblu plọnmẹ gando hosọ voovo lẹ go kanse ji.

[Apotin to weda 6]

Eyin whétọ lọ dọ dọ, “N’ma yise dọ Jiwheyẹwhe tin,” a sọgan gblọn dọmọ:

• “Be n’sọgan basi zẹẹmẹ nuhe hẹn mi kudeji dọ Mẹdatọ de tin tọn na we to kleun mẹ ya?” Enẹgodo, dọho hẹ ẹ do nuagokun he tin to owe Comment raisonner, weda 72-74 mẹ ji, kavi basi tito nado hẹn owe de he a ko duvivi etọn wá na ẹn.

• “Ṣigba, eyin Jiwheyẹwhe de tin dai wẹ, omẹ nankọ wẹ mì na ko jlo dọ ewọ ni yin?” Suhugan whétọ lẹ tọn wẹ nọ gblọn dọ emi na jlo dọ ewọ ni yin Jiwheyẹwhe owanyinọ, mẹhe nọ dawhẹ dodo, lẹblanunọ, podọ mẹhe ma nọ homẹnukuntapọn. Dohia ẹ to Biblu mẹ dọ Jiwheyẹwhe tindo jẹhẹnu enẹlẹ. (Etlẹ sọgan yọnbasi dọ a ni yí weta 1 owe Biblu Plọn Mí tọn zan, bo bẹjẹeji sọn hukan 6tọ.)

Eyin whétọ lọ dọ dọ, “N’ma tindo yise to Biblu mẹ,” a sọgan gblọn dọmọ:

• “Mẹsusu wẹ tindo pọndohlan enẹ. Linlẹn mẹdelẹ tọn wẹ yindọ Biblu ma sọgbe to lẹnunnuyọnẹn-liho kavi dọ osẹ́n he tin to Biblu mẹ lẹ ma yọ́n-na-yizan. Mì jaale, be mì ko hia Biblu pọ́n ya? [Jotẹnna gblọndo. Enẹgodo, do homẹbibiọ he tin to weda 3tọ alọnuwe lọ Owe de Na Gbẹtọ Lẹpo tọn ji hia ẹ bo ze alọnuwe lọ donukọnna ẹn.] Mẹsusu ma tindo jide to Biblu mẹ na sinsẹ̀n ko slokọna nuplọnmẹ Biblu tọn lẹ. Homẹ ṣie na hùn nado dọhodopọ hẹ mì to whedevonu do apajlẹ he tin to weda 4 po 5tọ po ji.”

• “Mẹsusu wẹ tindo pọndohlan enẹ. Be n’sọgan do nude hia mì to Biblu mẹ he yinuwado ji e ya? [Hia Job 26:7 kavi Isaia 40:22, he dohia dọ Biblu sọgbe to lẹnunnuyọnẹn-liho.] Biblu sọ bẹ ayinamẹ nuyọnẹn tọn he na gọalọna whẹndo lẹ hẹn. Homẹ ṣie na hùn nado do apajlẹ de hia mì to whedevonu.”

• “Homẹ ṣie hùn dọ mì dọ linlẹn mìtọn na mi. Amọ́, mí ni dọ dọ Jiwheyẹwhe kàn owe de na gbẹtọvi lẹ, etẹwẹ mì lẹndọ owe enẹ na bẹhẹn?” Enẹgodo, hia wefọ Biblu tọn de na ẹn, ehe nọgodona nuhe e dọ lọ.