Oylọ-Basinamẹ Tlọlọ

1. Whetẹnu wẹ nujijla oylọ-basinamẹ wá plidopọ daho mítọn na bẹjẹeji?

¹ Eyin a to tito basi nado ylọ hẹnnumẹ kavi họntọn towe lẹ na núdùdù vonọtaun de, yèdọ núdùdù de he biọ vivẹnudido po akuẹ susu po sọn dè we, ayihaawe ma tin dọ hiẹ na yí zohunhun vonọtaun do basi oylọna yé. Mọdopolọ, azọ́n susu wẹ ko yin wiwà nado wleawuna núdùdù gbigbọmẹ tọn he mí na dù to plidopọ daho mítọn he ja lọ ji. Osẹ atọ̀n jẹnukọnna plidopọ lọ, Jehovah ze lẹblanulọkẹyi lọ do alọmẹ na mí nado basi oylọna gbẹtọ lẹ. Etẹwẹ na gọalọna mí nado yí zohunhun do má oylọ-basinamẹwe lọ?

2. Etẹwẹ na whàn mí nado tindo mahẹ gigọ́ to nujijla lọ mẹ?

² Eyin mí yọ́n pinpẹn ale susugege nuplọnmẹ kọfanamẹ tọn he Jehovah nọ wleawuna to plidopọ mítọn lẹ ji tọn, mí na yin whinwhàn nado tindo mahẹ gigọ́ to nujijla lọ mẹ. (Isa. 65:13, 14) Mí sọ dona flindọ nujijla whemẹwhemẹ tọn mítọn lẹ nọ de sinsẹ́n tọ́n. (Pọ́n apotin lọ, “E Nọ De Sinsẹ́n Tọ́n.”) To mẹhe mí basi oylọna lẹ mẹ, mẹdelẹ na wá plidopọ lọ, ṣigba mẹdevo lẹ na gọ̀n. Mahopọnna sọha mẹhe siọ oylọ mítọn lẹ tọn, vivẹnu vẹkuvẹku he mí do to nujijla lọ whenu lẹ nọ hẹn pipà wá na Jehovah bosọ nọ do homẹdagbe etọn hia.—Ps. 145:3, 7; Osọ. 22:17.

3. Nawẹ oylọ-basinamẹwe lọ lẹ na yin mimá gbọn?

³ To agun dopodopo mẹ, pipli mẹho lẹ tọn dona magbe nuhe sọgan yin wiwà tọn nado má oylọ-basinamẹwe lọ gbọn aigba-denamẹ yetọn lẹpo ji, vlavo eyin yè na zedai na mẹhe ma to whégbè lẹ, kavi má yé to kunnudide gbangba tọn whenu. To sẹfifo lẹ, linlinnamẹwe lẹ dona yin mimá dopọ hẹ oylọ-basinamẹwe lọ eyin e biọ domọ. To whenue nujijla lọ na wá vivọnu, lehe homẹ mítọn na hùn do sọ nado yọnẹn dọ mí yí zohunhun do tindo mahẹ to e mẹ bọ mẹsusu kọnawudopọ hẹ mí nado dù núdùdù gbigbọmẹ tọn dojó he Jehovah wleawuna lọ!

E Nọ De Sinsẹ́n Tọ́n

To owhe susu lẹ die, to whenue mẹmẹyọnnu de to mahẹ tindo to nujijla oylọ-basinamẹ tọn de mẹ, e nọ lẹndọ vivẹnudido mítọn ma na tindo ale de. E nọ dọ dọ, ‘Be gbẹtọ lẹ ka na yigbe nado wá plidopọ lọ ya?’ To Sibigbe afọnnu plidopọ lọ tọn, e doayi dawe he nọ yì sinsẹ̀n Sikh tọn de go to apá etọn, enẹwutu, mẹmẹyọnnu lọ dọ yinkọ etọn na dawe lọ bo dọho hẹ ẹ to kleun mẹ. E wá họnwun na ẹn dọ dawe lọ wá plidopọ lọ na e mọ oylọ-basinamẹwe de yí wutu. Dawe lọ kàn kanbiọ susu biọ bọ mẹmẹyọnnu lọ na ẹn gblọndo. E dọ lehe e to vivi tito-to-whinnu lọ tọn dù do gọna lehe nusisọ́ po walọ dagbe plidopọ-watọ lẹ tọn po yinuwado e ji do. To azán dopolọ gbè, mẹmẹyọnnu lọ sọ wá dọhodopọ hẹ asu po asi po de he sinai to apá etọn. Yelọsu mọ oylọ-basinamẹwe de yí bo do ahihun wá plidopọ lọ. Yé duvivi plidopọ lọ tọn bo basi tito nado lẹkọwa to Sẹgbe. Taidi kọdetọn de, mẹmẹyọnnu lọ mọdọ nujọnu taun wẹ nujijla whemẹwhemẹ tọn mítọn yin.
To plidopọ agọe tọn de ji, asu po asi po gbehosọnalitọ whepoponu tọn de dọ yinkọ yetọn lẹ na asu po asi po de he yin mẹho na yé bo dọho hẹ yé vude. Asu po asi po lọ dọ dọ whla tintan die emi wá nuwiwa ehe tẹnmẹ. Gbehosọnalitọ lọ lẹ kanse yé dọ, “Mẹnu wẹ basi oylọna mì?” Yé gblọn dọ: “To whenue mí lẹkọwa whégbè to gbèdopo, mí mọ oylọ-basinamẹwe lọ to ohọ̀n mítọn glọ.” Yé hia ẹ bo tlẹ kanwe gọ́ alọdowemẹwe he to oylọ-basinamẹwe lọ godo. Plidopọ-watọ devo lẹ má núdùdù whèmẹ tọn yetọn hẹ asu po asi po lọ. Yé yiwanna tito-to-whinnu lọ sọmọ bọ yé basi tito nado lẹkọwa to azán he bọdego. Tito yin bibasi nado dla yé pọ́n.