Lehe Mí Sọgan Gọalọna Mẹhe Wehihia Sinyẹnawuna lẹ Do
1. Avùnnukundiọsọmẹnu tẹwẹ Biblu pinplọn hẹ mẹhe wehihia sinyẹnawuna lẹ bẹhẹn?
1 Whétọ he wehihia sinyẹnawuna lẹ sọgan tindo ojlo to gbigbọnu lẹ mẹ, ṣigba yé sọgan nọ lẹndọ Biblu po owe mítọn lẹ po pinplọn na vẹawu. Nawẹ mí sọgan gọalọna yé to gbigbọ-liho gbọn?
2. Azọ́nwanu he nọ hẹn kọdetọn dagbe wá tẹlẹ wẹ mí sọgan yizan nado gọalọna mẹhe wehihia sinyẹnawuna lẹ?
2 A sọgan bẹjẹeji po alọnuwe de po, vlavo Dotoaina Jiwheyẹwhe kavi Dotoaina Jiwheyẹwhe bo Nọgbẹ̀ Kakadoi. Gbehosọnalitọ de sọn États-Unis nọ do alọnuwe awe ehelẹ hia whétọ lẹ bo nọ biọ to yé si nado de dehe na bọawuna yé hugan. E sọgan bọawuna mẹhe sewé de nado kẹalọyi nupinplọn he na biọ dọ ewọ ni hiawe bo na gblọndo na kanbiọ lẹ, ṣigba aliho nupinplọn tọn ehe sọgan vẹawuna mẹhe ma sewé sọmọ de. Eyin nuplọntọ lọ lẹ yọ́n wehia jẹ obá de mẹ, wẹnlatọ susu wẹ nọ yiwanna nado bẹ nupinplọn jẹeji hẹ yé to alọnuwe lọ lẹ Wẹndagbe de sọn Jiwheyẹwhe Dè!, Hiẹ Sọgan Yin Họntọn Jiwheyẹwhe Tọn!, kavi Owe Ṣie He Bẹ Otàn Biblu Tọn lẹ Hẹn mẹ.
3. Etẹlẹ yinyọnẹn gando mẹhe ma yọ́n wehia lẹ go wẹ na gọalọna mí nado plọnnu yé po kọdetọn dagbe po?
3 Nọ Pà Yé: Suhugan mẹhe ma yọ́n wehia lẹ tọn wẹ nọ yawu mọnukunnujẹnumẹ bosọ tindo nugopipe nado plọnnu. Nọ na yé sisi nujọnu tọn bo nọ doyẹyigona yé. (1 Pita 3:15) Yé na yin whinwhàn nado zindonukọn to nupinplọn lọ mẹ eyin yé mọdọ vivẹnudido yetọn lẹ to sinsẹ́n detọ́n bọ yé sọ to nukọnyi to gbigbọ-liho. Enẹwutu, nọ pà yé whẹwhẹ.
4. Etẹwẹ mí sọgan wà nado na tuli mẹhe ma yọ́n wehia sọmọ lẹ na yé nido nọ wleawuna oplọn lọ?
4 Eyin nuplọntọ lọ ma tlẹ yọ́n wehia sọmọ, nọ na ẹn tuli nado nọ wleawuna oplọn lọ. Wẹnlatọ delẹ to Afrique du Sud nọ na tuli nuplọntọ yetọn lẹ nado biọ to hagbẹ whẹndo tọn kavi họntọn yetọn he yọ́n wehia ganji de si nado gọalọna yé. Wẹnlatọ de to Grande Bretagne nọ yí owe etọn titi he mẹ e ko zẹhudo na nuplọntọ etọn lẹ bọ yé nọ yí i zan nado na gblọndo hukan kleun delẹ tọn. Gbọnmọ dali, yé nọ mọ lehe gblọndo nina nọ bọawu do eyin yè wleawu jẹnukọn podọ enẹ nọ whàn yé nado wleawu ga. Mẹmẹsunnu de to Inde nọ na tuli nuplọntọ etọn lẹ nado nọ pọ́n yẹdide he nupinplọn he na bọdego bẹhẹn lẹ bo lẹnayihamẹpọn do yé ji jẹnukọn.
5. Nawẹ mí sọgan do homẹfa hia to whenue mí to anadena oplọn lọ gbọn?
5 Nọ Fahomẹ: Mahopọnna owe depope he a to pinplọn hẹ mẹlọ, nọ zinnudo nuagokun lẹ ji bo nọ gọalọna nuplọntọ towe nado mọnukunnujẹ yé mẹ ganji. Ma nọ gbadopọnna nudọnamẹ susu blo, vlavo hukan kleun delẹ poun ko pé. Eyin nuplọntọ lọ ma tlẹ ko yọ́n wehia ganji, nọ fahomẹ hẹ ẹ. Dile pinpẹn-nutọn-yinyọnẹn etọn na Jehovah na to jijideji, e yọnbasi dọ enẹ ni whàn ẹn nado hẹn wehihia etọn pọnte. Enẹwutu, nọ basi oylọna nuplọntọ lọ nado wá opli lẹ tlolo he a jẹ nuplọn hẹ ẹ ji.
6. Nawẹ mí sọgan gọalọna gbẹtọ lẹ nado yọ́n wehia gbọn?
6 Eyin Biblu plọntọ lẹ yọ́n wehia, yé na yawu yinukọn to gbigbọ-liho. (Ps. 1:1-3) Eyin e wá ṣì apọ̀ na nuplọntọ lọ nado plọn wehihia, a sọgan vọ́ jide na ẹn gbọn alọgigọna ẹn nado lẹnnupọndo nuhe e ko penugo nado plọn bosọ yọ́n wà delẹ ji dali. Hẹn ẹn deji dọ Jehovah na dona vivẹnudido etọn lẹ, bo na ẹn tuli nado biọ alọgọ to odẹ̀ mẹ. (Howh. 16:3; 1 Joh. 5:14, 15) To paa mẹ, alọgigọna gbẹtọ lẹ nado yọ́n wehia ma nọte do wehihia pinplọn yé kẹdẹ ji gba, e sọ nọ biọ dọ mí ni whàn yé nado yiwanna wehihia.
7. Naegbọn mí ma dona nọ whleawu nado ze nugbo lọ donukọnna mẹhe wehihia sinyẹnawuna lẹ?
7 Jehovah ma nọ yí nukunpẹvi do pọ́n mẹhe ma sewé sọmọ lẹ. (Job 34:19) Nuhe to ahun gbẹtọ lẹ tọn mẹ wẹ Jehovah nọ pọ́n. (1 Otan. 28:9) Enẹwutu, ma nọ whleawu nado ze nugbo lọ donukọnna mẹhe wehihia sinyẹnawuna lẹ blo. Azọ́nwanu dagbe susu lẹ wẹ tin he a sọgan yizan nado bẹ nupinplọn jẹeji hẹ yé. To nukọn mẹ, a sọgan diọ oplọn lọ do owe Biblu Plọn Mí mẹ bo gọalọna yé nado tindo nukunnumọjẹnumẹ gigọ́ do Owe-wiwe lẹ ji.